cheesecat的個人專頁

入亞博睇show，入去食個簡餐先入場，呢啲山旮旯地方，困住你，香港食肆一定抬高價錢，預左，無問題。臨開show前，間間都有啲人排隊，揀間少人啲快趣啲。Menu 寫住「原隻鮮炸大雞脾太陽蛋飯配秘製蔥油」，有我最愛嘅太陽蛋，就呢個。去到counter，同我講話無雞脾，轉左雞扒火腿，唔緊要，最緊要仲有隻太陽蛋撈飯，你雞脾降level變雞扒價錢照舊都無緊要。埋單加埋杯凍檸茶$113food court 形式，自己搵位，見到有位就坐低。心急趕時間入場坐低先醒起，唔係太陽蛋咩？算，快食，唔返去理論了。平心而論，佢個雞扒煎得脆，但啲飯好難食無口感偏淋。百零蚊碟頭飯，你俾隻咁嘅蛋我話太陽蛋，好明顯煎左兩面仲點太陽蛋？仲要得一隻，無下次。…查看更多

想試好耐，但佢早收舖，難得附近做野先有機會試。名物西多，無餐，加杯凍檸茶，$60，係比較貴。賣相靚，金黃色，漲卜卜咁，真係唔捨得切落去。好期待，但期待換黎失望，真心，佢係好鬆軟好鬆軟，但佢完全無蛋味，佢應該係多蛋白打到起晒泡嗰隻做法，食多兩啖，好啖口，中間花生醬亦完全無味，加埋糖漿，好似食緊啲單一好甜嘅海綿，佢連快餐店大xx嗰啲都比唔上。真係唔好食，我最後食淨1/3，西多咁易ko嘅我都食唔落，唔好食嘅就算對唔住係浪費我都唔想對唔住我嘅胃。…查看更多

耐不耐會去馬鞍山做野，雖然係著名嘅美食沙漠，但都會嘗試搵下有冇咩小店可以一試。呢間車仔麵都有好評，就試下。通菜、韮菜餃、蘿蔔、豬紅米線底，加個炸辣雞翼。貪心地要左腩汁同麻辣汁，無被reject。碗麵賣相唔差，滿滿的醬汁，重口味最鐘意。逐樣講，菜就唔comment，蘿蔔清甜不會過腍，無重糖水味。豬紅就相對遜色，唔太入味，比較清淡，始終豬紅本身有陣味，滷唔入味就會有嗰陣味，呢樣麻麻。韮菜餃，係我唔好，店方無錯，我以為通常有豬肉包埋，但佢呢隻原來係純素餃，只得韮菜做餡，佢餐牌都無寫錯，係寫韮菜餃，仲有一隻係鮮蝦韮菜餃，出面好多時只寫韮菜餃但又有豬肉底，希望大家理解點解我會有個wrong expectation。佢只得菜就會食落相對上好散唔實淨，但韮菜味係香嘅。佢加左兩隻汁俾我令到個湯底好濃郁，好好味，麻辣味亦好出，有麻感亦唔死辣。佢餸嘅份量唔算多。個雞翼算脆身，食落亦有肉汁保留唔乾，有麻辣味，但覺得有些少過咸，不過整體唔差有驚喜。有用紙墊底索油，抵讚。有機會再去都會再試，老闆娘招呼都有禮貌，整體幾好。…查看更多

長沙灣老舖，懷舊味濃。呢間老字號最出名就係炸豬扒同通菜。叫咗炸豬扒擔擔米線，腐乳通菜，其實仲有叫到凍檸茶。好快就上晒所有嘢，be honest，唔係懷唔懷舊嘅問題，啲食物嘅樣我真係覺得未必會好食。首先炸豬扒感覺上係乾身，果然，食落係薄身、柴同乾，我唔明白點解佢係最出名嘅食物，我食到一半就放棄咗啦。另外，擔擔米線唔係我expect嘅擔擔，佢只係一pat花生醬嘅物體放咗落個清湯度，有啲都係街坊價食上海麵食嘅舖頭仔都唔會咁樣整個擔擔湯底，老實講係好失望嘅，味道當然係唔好食，個湯同個醬都溝唔埋，成口漿住咁。腐乳甜甜地咁，不過我覺得唔知係咪成本問題溝左糖水，你見個漿都好稀下，有人會覺得佢係特別調製，呢樣見仁見智。我個杯凍檸茶最後無黎到，亦無追過佢，因為啲野唔好食，都唔想再追啦，我好respect小店，但我覺得真係唔好食，唔係我杯茶，就唔飲佢杯茶啦。…查看更多

星期六嘅下午時間，喺觀塘工廠區搵食唔容易，因為有啲餐廳星期六日唔開，有啲又唔offer set lunch。所以直接周圍行下，見邊間餐廳有開就入。行到近觀塘碼頭位置見到呢間餐廳仲有set lunch，就入咗去。佢飲品嘅Menu比較吸引，有好多特別同健康嘅飲品，咁我就叫左楊枝甘露茉莉茶加烤雞粟米忌廉意粉。飲品先上，原來係沙冰底，飲品名有啲誤導，我叫咗走甜，係有啲淡因為無預佢係沙冰，應該叫返少甜會好飲啲，飲落亦都食到有芒果柚子粒，有少少乳酪咁。個意粉賣相唔錯望落紅紅綠綠有車厘茄，醬汁就係意料中嘅粟米湯溝忌廉，但烤雞就差少少，因為啲雞比較乾身偏靭，意粉幼身，但都算煮得剛剛好無淋，整體唔差雖未到好好食，飲品選擇加分，可以再試其他。…查看更多

據聞呢間餐廳食生蠔好抵，想試好耐，仲要撞啱機會嚟佐敦就試吓。間餐廳身處酒店，格局係走causal 感覺偏港式少少路線，中午時間好多學生黎食飯，見佢有學生餐offer。叫咗set lunch carbonara意粉、雜菜湯另加生蠔六隻再加Tiramisu。生蠔係美國嘅Pacific Rock計返$10隻最少要叫六隻。首先上湯同麵包，湯就味道正常，足料嘅，冇乜驚喜。麵包個質感係好食嘅外面小小脆入邊軟身，但係美中不足就凍嘅，但佢凍得來又唔算硬其實都算可以接受，不過熱或者暖就最好啦，亦會更加好食。之後上個生蠔，$10隻都知佢唔會太大隻，有晒心理準備，食落新鮮幾清甜，當然肉質唔厚，但當過下口癮係可以，而佢個醬汁都幾好味，因為有啲係真係好茄汁味但係佢唔算，亦有少少香料係入面。意粉醬汁豐富，我好怕乾身嘅carbonara，蛋味都算濃（見佢個汁色水就知），但層次唔多，後勁淡味啲，所以唔會食到好膩。不過比起佐敦另一間出名食carbonara嘅cafe小店，我會覺得佢好食啲。bacon唔會太咸，唔覺有咩特別，意粉就煮得啱啱好，算係幾好食。最後上埋甜品，講真第一眼望到見到上面有朱古力彩針，我就覺得作為一間西餐廳咁樣賣相就唔太討好，係downgrade左嘅，但係食落係唔錯，芝士同咖啡酒味配合得好，唔係濃味嘅路線，佢係偏濕小小嘅texture，唔會食到成口油脂，我好快就食晒成個。服務一般但性價比係高嘅，唔好expect佢係高級餐廳無問題。意粉同甜品味道都比某啲再貴價嘅餐廳好食。…查看更多

呢間新開半年多的車仔麵好多好評，即管試試。門面光猛裝修靚，坐得舒服。用手機自助落單，但飲品無得揀甜度冰度，下單頁面唔user friendly，好多人對飲品都有特別要求。落單後請店員改做走甜，但話無晒茶膽，無得走甜，咁惟有轉烏龍冷泡茶。叫左重慶麻辣湯底米線，豬腸豬紅蘿白通菜，加個黑松露醬炸單骨雞翼。先講小食，一上碟我就知有啲伏，有食開就知，佢應該係氣炸界好出名嘅現成1kg一大包嘅單骨雞翼，食一啖陣味真係一樣，唔會難食，只係諗住會唔會係自家制，應該就唔係啦，碟小食$28。碗麵一黎個賣相甚好，堆得滿滿。不過有個問題，佢個底其實係清湯底，上面放左麻辣醬，我要攪勻佢先可以食到佢真正嘅味道，佢塞滿晒我就真係攪唔太到，要好小心好小心以免辣油彈落衫度，都整左我一陣。終於攪完，試試湯底，就無乜花椒香，亦無乜麻味，無層次，偏向死辣，湯底仲要加錢就好唔值。蘿白無根軟淋，味道可以，未算好甜。豬紅就麻麻，無乜滷過嘅味，淡味，亦食到陣血味。豬腸味道okay，少少嚼勁，但唔係靭。米線就係幼身嘅，偏硬，食左少少都開始有啲「un」胃，食唔到好多。佢入機個陣係有得揀米線軟硬度，我無揀，諗住咁係適中，但真係都偏硬。個湯底係越食越變左死辣味，完全唔係麻辣。我勸各位叫都係叫返原味湯加醬汁，我再試下落單，原味湯係可以加幾種汁，記得至少有腩汁，沙嗲汁，魔鬼辣汁。我覺得，加幾種汁應該好食過我呢個所謂重慶麻辣湯底，原味湯$14but重慶$20。樽白桃烏龍無乜桃香，普通烏龍咁囉。全部盛惠$104，車仔麵黎講都係貴嗰堆，性價比太低，又唔算好食。…查看更多

本身係諗住就咁食雲吞河，跟住店員姐姐介紹左新出品黑松露雲吞就試下。加埋生菜同凍檸茶。生菜okay，唔靭無青味，爽脆甜。黑松露雲吞有驚喜，本人係鐘意黑松露味，有啲人係唔鍾意黑松露味，就冇辦法。黑松露味配蝦係夾嘅，值得一讚係，呢度嘅蝦做到好爽脆身，口感好好，出面好多老字號啲蝦都係霉淋咁。有讚有彈，但湯底同河粉就比較遜色。首先，呢度嘅河粉同出邊一般食開嘅質感好唔同，河粉係好薄身又好滑身不過唔易爛，冇乜米味，由於河粉好滑身所以掛唔到湯，加上湯底偏淡，所以食落真係好似滾水淥粉咁。建議店家可考慮改用第二隻河粉，可能有改善。為咗黑松露雲吞，我係會返轉頭。…查看更多

久仰回味車仔麵大名，0負評，但夜晚唔開，一試嘅機會難度增加。終於有機會，午飯時間，去到一條長長人龍，都十多人排隊，大概排了十五分鐘。首先，價錢係非常相宜，$42三餸一麵包飲品，現今物價難似找到媲美。一場黎到，梗係食得落嘅盡試，五餸，豬紅豬腸蘿白豬肉丸蝦條米線，凍檸茶，腩汁加辣汁，埋單$5x。名物豬肉丸，內裡滿滿的蘿蔔絲，新鮮炸起，但後來回想，又唔係好食到有豬肉碎，其實係咪只係蘿蔔絲餅？無豬肉？再對比以前啲相，似乎而家配方係無乜（定無？）豬肉。但點都好，係好好食，出色。蝦卷，就係普通腐皮粟米蝦卷，okay，但唔覺有咩特別。豬紅，質地好，唔係一咬就碎係完整又少少煙靭咁，雖然無處理唔好嘅味，但調味偏淡，真係無乜味。豬腸，唔靭，無怪味，調味偏淡，唔香。蘿蔔，天然清甜味，食得出無話落重糖水去忟，所後勁係清水味浮現，質地軟淋但無過爛。湯底已加腩汁，亦加左兩大匙辣汁，不過食落偏淡唔太夠味，唔香味好寡。睇返餸同湯汁調味，好家常味道，係無落味精，但我重口味，所以成碗麵係唔算惹味，好似媽媽煮俾你食咁。呢間車仔麵價錢取勝，唔係難食，除左粒好似唔係豬肉丸係蘿蔔絲餅嘅野，無乜令我回頭嘅意欲。…查看更多

天水圍街坊介紹呢間格仔餅好好食，咁就即管試試。因為坐低食，除左格仔餅仲叫左碗腐竹糖水。嗱，個格仔餅係真係世一，佢係鬆脆路線唔係煙韌路線，輕力已咬開，多花生醬好滿足，暫時未食過其他格仔餅有相同嘅質感。天水圍咁遠真係都唔知幾時再有機會可以食到。但碗糖水就真係麻麻，你見根本就係糖水加腐竹，腐竹都無煮溶，完全無腐竹味，都真係好吃力先食得晒成碗。間舖衛生亦都麻麻，席間見有小昆蟲，怕嘅外賣會比較好。好評只係俾格仔餅。…查看更多

呢間去摸過一次門釘，因為佢而家收8:30pm唔係openrice所寫的9:30pm。今次特登準時收工趕去，叫左豬腸，蘿白，雞翼，豬紅，多咖喱汁，米線。加杯凍檸茶同炸韮菜餃。碗麵一黎到即刻心心眼，點解？因為真係俾左好多咖喱汁俾我，我重口味嘅，先加分。咖喱汁少少辣，令到成碗湯底好濃郁，每一啖米線亦都掛滿醬汁。蘿白清甜夠淋無渣，好食。豬腸通常兩隻款，一款係清走晒腸所有的組織得返腸皮，另一款就係相中所示，留返啲組織。圖中做法好多時會令到豬腸食落硬身難𡁻。但呢度唔會，夠晒淋。雞翼唔係滷到柴嗰隻，食落仲係嫩滑亦夠味。豬紅就係爽滑嘅，入晒味。炸韮菜餃就韮菜香差少少，調味偏甜，但餃皮炸得剛好夠酥脆。呢碗算係我食過嘅車仔麵好高分嘅一碗，餸嘅份量亦多。…查看更多

呢排想搵好食嘅車仔麵，都一連試左幾間。呢間有豬扒係個店名，唔使問招牌菜一定係豬扒。叫四餸，豬腸，蘿白，金菇，豬扒，米線。加杯走甜嘅凍檸茶。金菇唔comment，豬扒係招牌，唔算厚，鬆軟，食得出係美極醃味，係okay唔錯嘅，但未算好好好好食。蘿白甜又淋，無渣，好食。豬腸就差啲，因為我食到有幾舊有少少少少粟味。如果無粟味，係好食嘅。個湯底麻辣醬汁好濃郁，當然唔係去到四川麻辣嗰隻，但以車仔麵黎講絕對合格有餘，好啱重口味嘅我，佢本身唔會校到好辣或好麻。我杯凍檸茶係走甜，但一飲就知係有甜，不過佢係少少少少甜，我趕時間又基於還可接受及唔浪費食物，無叫佢再換過。我坐低時見佢貼住張消費卷有7折嘅單張，咁埋單嗰陣就問係咪有7折，店員話過左期係要搣，我就無再追究。因為我行入去嗰下係無見到張單張，我落左單抬頭先見到，7唔7折唔影響我叫幾多野食。但我出左門口再望，佢係有貼係門口，有行細字寫明去2021年12月31日。都過左7個月，講真，要搣走有幾難？仲放係度，有咩用意？希望店方處理下，唔好引起誤會，真係會有人俾呢樣野吸引左入黎。一定會再食，豬扒雖然唔差但就未必吸引到我再叫，會試其他餸。…查看更多

新店又成二十幾個好評，雖然都知有真有假，我係超鐘意食海南雞，見佢有海南雞飯，都試下。佢一set海南雞飯，有湯有飲品，計埋好似$60有找。（唔見左張單）個湯就冬瓜湯，清清地，味道okay。一開飯盒見到黃晒嘅飯就知可以減一半分。有人講過黃薑飯一定係垃圾，如果有心整會用雞油同其他材料去整個飯，色水會係淡淡的淺啡色，落得黃薑粉即係佢懶唔想用複雜嘅步驟同材料整個雞油飯。個飯的而且確係唔合格嘅，無雞油味，得陣淡淡嘅黃薑粉味。雞係主角，份量算多了，不過完全係0雞味，唔知係咪用雪藏雞，佢有俾泰式海南雞醬，就係點左佢隻醬更突顯佢隻雞無雞味，好似搵清水烚咁，亦都唔滑，胸位就更加差。…查看更多

未到晚飯時間又有啲肚餓，就走去一盅兩件下。1.鵪鶉蛋燒賣2.牛柏葉3.炸蝦餃平日下晝無乜人，新舖新裝修，坐得舒服。賣相好靚，炸蝦餃幾特別，個蝦係爽口彈牙，皮脆唔油，配搭少少沙律醬，好食，不過得兩件，少少貴。牛柏葉唔多地方有，佢個汁夠薑味但唔嗆，個底有白蘿蔔，好入味，好食。到我至愛，鵪鶉蛋燒賣，肉質唔實又滑，個皮煙煙韌韌無蒸到爛晒，好食。叫左3樣3樣都好食，估唔到天水圍都有好食點心，可以encore。…查看更多

難得錦田遊，呢間bookmark左好耐，真係慕名而來。叫左1.蝦餅2.豬肉船河蝦餅肉質唔彈牙，蝦肉幾散，好一般下。個船河份量多嘅，一上枱嗰下係覺得堆頭幾大咁喎，好期待，但⋯⋯首先個湯係無乜味嘅，我唔係好覺得我食緊船河，個河粉真係好敗筆，見到佢可以突出個湯出面成吋咁多就知大鑊，即係好硬身啦，湯河，但河粉硬身又勁厚，成件事咪錯晒，掛唔到湯，好明顯佢地炒河同湯河都係用同一隻粉（可以睇其他食評炒河相），其他泰式餐廳一係就用普通幼身河粉，一係就好似粉皮好薄好透身嗰隻，本人未見過呢隻粉做湯河。慳材料將就味道就係錯嘅事。又粗又硬又厚嘅河粉加上無乜味嘅湯，難食，我落左好多醋有返啲味先可以食落去。佢嘅豬肉都無乜調過味又有啲嚡口，都係麻麻。當時我碗湯河同另一枱一齊出，個女店員放低一碗喺兩個靚仔嘅枱，立即問靚仔洗唔洗要調味架，到我個碗放低就走了，服務有落差，要我問先俾我。本身係諗住叫甜品㗎，但食左兩樣都唔算好食就放棄了，好彩，山長水遠真係好失望，無下次。…查看更多