Bonnnnnod 的個人專頁

之前有朋友介紹過呢間餐廳，行過見到裝修幾靚感覺幾舒服，而且朋友話味道幾唔錯，決定比次機會佢。食完覺得幾好，有幾道菜值得推介！我地點左4道菜同飲品，排名分先後🤣個人覺得最好味😋筋腩相逢 $108呢個真係CP值高，口感、味道都好唔錯，有驚喜！上台見到細細煲以為得好少，點知用匙羹一翻到底，好 ！足 ！料！牛腩好大件有3-4舊，肥瘦紋理均勻，牛腩燜得彈牙軟腍又唔老。讚👍🏻牛筋都好多好大條，燜到好軟又唔會一pat 嘢咁，而且keep 到口感！成個牛腩煲嘅調味濃郁入味又唔會好鹹好重味，食到好飽繼續食都唔覺得膩。好啱送飯食🥰好正。酸菜石斑 $128呢個酸菜魚都好出色！首先湯底夠酸夠香，花椒味真係畫龍點睛，辣度適中，酸辣平衡，好開胃～石斑肉質彈牙，厚實得嚟都幾滑，好新鮮。酸菜湯入面有幾種菇，好彈牙入味，仲有芋絲係底，都幾豐富，同埋意想不到幾好味，符合曬想象中要嘅酸菜魚味～豆花飲品系列都好出色！飲品入面加豆花幾新奇有趣，原本我以為會好奇怪，點知幾有驚喜。個人覺得奶茶同豆花比較夾～豆花年代奶茶$32（左）奶茶味道唔算好出，反而豆花嘅黃豆香味好突出，有d似用豆奶沖茶嘅效果，而且豆花好嫩滑，成杯飲品好滑好順帶點濃厚嘅質感，幾特別。豆花美祿恐龍 $28（右）美祿唔係好甜，質感相對稀薄d，同豆花嘅配搭冇奶茶咁夾，但係味道幾特別值得一試～招牌海南雞例牌 $158招牌海南雞都幾唔錯，肉質整體都嫩滑，連雞胸肉都唔會好孩。雞肉上面淋上秘製醬汁，味道淡雅，食到雞肉原味。個人覺得搭配三種唔同配料更佳。黑色係甜醬油，質地較黏稠，口感溫潤；紅色係泰式酸辣醬，酸酸辣辣好開胃，唔會好辣，最鍾意點呢個醬；黃色係薑蓉，地道海南雞風味～呢個雞搭配油飯應該都幾唔錯～酒糟三寶 $88賣相好得～ 三個小酒埕分別有醉雞翼及雞翼尖、雞腎、無骨雞爪。冷盤嚟講連下面嘅木盤都係凍嘅呢樣小細節有加分！個人最鍾意中間嘅雞腎，酒味係三者中比較淡，雞腎彈牙得嚟唔會好爽，質偏軟，份量唔少，幾好味～雞爪比雞翼酒味更濃郁，有d苦澀，加上雞爪本身好吸味，唔太喜歡酒味濃嘅朋友未必好接受到。但喜歡酒釀香味或者醉雞嘅人應該覺得幾入味濃郁～而且雞爪、雞翼、雞翼尖嘅肉質都好彈牙清爽，冰冰凍凍幾refreshing！整體嚟講，餐廳嘅菜式都幾有水準，擺盤、調味、食材質素、質感都做得唔錯。而且用餐環境舒適，價錢合理，可以再戰。…查看更多

呢間旺角新開茶餐廳行懷舊路線，舖頭細細但係幾多「影相位」，裝修各方面睇得出有用心。（呢d係新開張嘅花牌，依家已經冇曬，圖片只供參考）但係但係！！點解d撈麵可以 咁 ！難 ！食！ 完全係酸忌廉撈丁！史上最難食芝士撈丁肯定佢攞冠軍🏆首先！個面份量應該係完整一個出前一丁。成個麵底係乜汁都冇，芝士醬極度少！芝士汁嘅責任就係要可以好足量好均勻咁撈勻成個麵，啖啖都有芝士香濃味先啱。佢反其道而行，出前一丁先係主角，芝士醬得一🥄勺咁多，啱啱好可以覆蓋大約頭3啖嘅麵。少唔緊要，我忍唔住出聲問佢拎一碗芝士汁 ，佢都好好態度咁比左一碗「芝士汁」我。服務態度ok！（可能因為嗰陣新開張）問題嚟啦。一路食我一路懷疑人生，到底我食緊d 咩啊？呢個根本就係sour cream 撈忌廉定係芝士粉定係奶。完全唔知到底呢兜汁係咩。就咁飲左兩啖我都係飲到sour cream味加非常隱約嘅芝士味。芝士呢？！豬扒唔大，但都幾厚，不過d 肉好柴好乾⋯🙏🏻我真係覺得，想主打賣芝士撈麵就真係比d 誠意，係咪真材實料大家一食就知道。d 汁好似水咁稀，又唔芝士又唔creamy，仲要打著懷舊、地道香港風味嘅旗號，真係唔應該係咁嘅態度。…查看更多

其實本身見到呢間餐廳廣告賣到咁犀利以為會質素ok，點知食過一次吉列和牛後，真係列入黑名單永不翻身！首先，$278！！你真係和牛我都算，但係咁嘅質素我真係嬲到手震！真係從來未試過吉烈牛上到台係咁凍、仲要d 牛好似水浸泡過咁嘅狀態，炸皮又軟又散又同肉分離！睇到d 顏色都冇胃口！都算，個和牛肉真係⋯未見過日本和牛肉係幾乎冇雪花，同赤身嘅質感色澤都好似，燒完食係好似cheap 牛肉咁粗糙！柴到完全食唔落口⋯我唔知係咪個別例子，可能我特別唔好彩，但係我真係希望，餐廳訂價便高，份量又比其他餐廳相對少嘅情況下，可以提供翻應有質素嘅食物，否則再多廣告都冇意思。仲要呢個份量，飯量得正常飯碗一半度，正常女仔食完未必夠飽。何況係男仔？！…查看更多

同朋友行完街，佢話帶我食日本煲仔飯，我真係未聽過，覺得好得意就跟左佢去食。呢間餐廳除左平時常見嘅壽司刺身等日本料理之外，最特別就係岩鹽同釜飯。釜飯其實就係日本版煲仔飯，用嘅係不鏽鋼膽煮熟，保證個飯keep 住溫度，未入店就已經聞到門口釜飯嘅香味。我地個位正對面嘅大廈外牆好靚，屏幕播放唔同嘅靚畫面，例如煙花、動畫等等，不過播左陣就結束左。燒鵝肝牛小排釜飯 $148上台後用沙漏計時焗1分鐘先打開，個飯跟埋裝住湯汁嘅茶壺，可以做茶漬泡飯，或者包紫菜食，又或者可以將紫菜加入茶漬飯中一齊食，總之按照自己鍾意嘅食法自己搭配。燒鵝肝甘香濃郁，燒牛排嫩滑牛肉味香濃，飯入面仲有香甜栗子、菇同少許青菜。可惜份量整體都比較少。鍾意釜飯底有d 飯焦帶微微焦香味同木香。穴子明太子玉子燒 $68最鍾意食玉子燒！呢個玉子燒係即點即造，夠曬厚身彈牙，蛋味香濃～入面包住鹹香微辣嘅明太子同鰻魚肉，切開有流心效果，口感同味道都唔錯～安康魚天婦羅 $78安康魚嘅炸漿好薄好貼，脆得嚟唔油膩，就咁食味道清淡魚肉紮實，配合阿爾卑斯山粉紅岩鹽調味食到魚肉原汁原味。木魚高湯浸翡翠苗 $88翡翠苗好嫩滑，而且有d 菇菌一齊用木魚湯煮增加口感同香味。檯面有岩鹽，可以按照個人喜好加岩鹽調味。碟豆花乳酸梳打 $32 （藍色）可以飲到蝶豆花獨特嘅味道，我覺得ok，估唔到配合乳酸梳打味道幾特別，但真係比較睇個人口味。巨峰梳打 $28 （紫色）巨峰梳打甜甜地好冰凍。…查看更多

今日同朋友係附近跑步，之前都有幫襯過，覺得價錢合理而且份量足，味道都唔錯，所以間唔中都會嚟。突然發現今日點嘅菜式幾乎都有酒，冷盤為主，朋友真係個酒鬼～首先點左醉鴿米粉 $68醉鴿有半隻，份量唔多，但係酒香味十足，醃得入味，鴿肉都唔會柴，有咬口，味道不錯。佢嘅米粉好幼細，不過碗米粉係完全冇調味，比較清淡。仲有醉小三 $88醉小三有醉鴨舌、醉雞、醉豬手。呢個係冷盤，三款嘅酒味各有千秋，都比較入味。豬手口感比較爽口，酒味唔算好重；鴨舌份量比較多，入味，而且食得多都唔會膩；醉雞酒味最濃郁，份量都最少，雞肉唔會好柴，都算滑。上湯浸肉燥娃娃菜 $48娃娃菜份量好足，我地食到最後太飽食唔曬～娃娃菜都幾甜，肉燥係大大粒嘅肉碎，份量都唔少。食嘅時候加埋湯一齊食會好味d。滷水拼盤（細）$68滷水拼盤有雞翼、雞腎、雞蛋、豬腸、鴨舌同甜甜地嘅醃菜。鍾意佢乜都有d而且份量算適中，而且價錢合理都幾抵食。味道方面每樣都滷得入味，鹹甜適中。整體味道都唔錯，餐廳裝修都有用心，好似有二樓但係我未上過去，唔知下次有冇機會上去望下～…查看更多

同朋友係尖沙嘴行街，本身想食米線，突然見到呢間燒肉放題覺得好吸引就上去睇睇。餐廳門口有好多風水擺設同好多特別版嘅酒，而且晚飯時段 6-8pm 係$248 一位，我地覺得都ok 就入去試下。餐廳d 位都係卡位為主，坐落都闊落舒服嘅。每個人都有碟醬料，有三種醬，左到右分別係 薑蔥味濃d 辣味輕d嘅海南雞辣醬、酸辣刺激嘅泰式辣醬以及味道偏甜嘅烤肉汁。另外檯面有鹽同醬油。我唔係好食得辣所以都係點烤肉汁為主，海南雞辣醬都勉強接受到，但都係覺得幾辣下～食物方面，烤物好多選擇！有豬、牛、雞、海鮮、蔬菜、酵素系列嘅醃肉、天婦羅、壽司、刺身、料理、熟食、沙律等等。 燒肉印象比較深刻而且好味嘅就係蜜糖芥末豚肉粒、霜降和牛、蜜桃豚後肉、奇異果牛肋肉、薄牛舌、安格斯骰仔粒。以上部位都係調味比較特別，而且油脂比較充足，食落就嫩滑多汁d～ 要注意燒烤時間，店內提供3分鐘同1分鐘沙漏，好有用！想知道燒烤時間大概點預可以問店員～海鮮最鍾意燒蠔，夠曬大隻海水味足，另外青口都唔錯。刺身鯛魚、象拔蚌、原隻甜蝦都唔錯，幾甜。壽司比較鍾意創意壽司嘅芒果黑松露帶子同海膽拖羅塔。過癮得嚟味道特別，幾好味。其他熟食冇乜點試，最記得個酸辣鳳爪真係好辣好辣～～餐廳提供每人兩罐無酒精飲品，有茶有汽水。…查看更多

呢間餐廳嘅裝修貫徹木船主題。店內裝修就係一架大木船，牆身、門口全部都係木板舖砌。門口右邊有木造嘅船位，天花吊飾有纜繩、船燈等等。兩旁有圓形鏡模仿船嘅窗口，加上色彩繽紛嘅噴畫，見到心情都好d～食物飲品造型設計都幾靚十分吸引眼球，味道唔錯。青木瓜沙律 $62沙律都幾大兜，味道係泰式酸辣汁個味，食落有蒜、酸、辣、甜四種味道混合，同生蝦點嗰個汁味道接近。沙律入面有車厘茄、提子仔、青木瓜、紅蘿蔔絲、腰果、花生等等。一開始食覺得沙律清甜清爽，食到下面就越嚟越辣，蒜味都變得濃郁幾過癮，一個沙律食到唔同感覺幾得意。Combo 小食拼盤（細）$52小食拼盤有蔗蝦、春卷、泰式魚蛋同泰式魚餅。呢個菜cp值高！醬汁味道偏甜，個人最鍾意個蔗蝦，熱辣辣，香脆彈牙，食落口仲有淡淡蔗汁香甜味。另外魚餅都好特別，質感好軟。春捲香脆、魚蛋質感係屬於比較鬆散嗰種。招牌菠蘿炒飯配虎蝦 $158第一次見菠蘿炒飯擺得咁靚☺️有兩隻大大嘅虎蝦，炸得香脆，蝦肉結實彈牙。仲有一串又甜又多汁嘅菠蘿。下面有肉鬆同紅色嘅泰式辣醬，甜甜辣辣有蒜味。炒飯飯粒分明唔會太濕，有炒蛋、雞肉、提子乾、菠蘿肉等等配料，鹹甜適中，味道不俗。脆爆芒果園 $58呢杯芒果沙冰酸酸甜甜，表面係大量忌廉，仲有焦糖醬、爆谷、芒果粒，後面仲有粒芒果雪米糍，入面係雪凍嘅芒果cream。芒果smoothie 本身都好冰凍幼滑。夏日巴東海灘（菠蘿椰子）$58椰子沙冰都係打得好幼滑，仲有半片菠蘿。椰奶味濃郁，最正係可以刮椰子肉食～…查看更多

呢間幸福堂係旺角女人街新開張。店面裝修簡潔，全玻璃設計可以睇到曬製作過程，呢樣抵讚。最吸睛應該係收銀隔離個大鍋，入面裝住黑糖珍珠，感覺好似係新鮮炒。食落好似唔係😣杯黑糖厚鮮奶 $32 就麻麻地有點失望。首先冇熱嘅，得走冰，d 珍珠係個鍋度但只是常溫，仲要個心係唔熟透！！黑糖味唔算濃郁，d 奶就真係好濃好creamy好似飲cream 咁，因為佢真係落好多花奶、cream ，飲完好飽滯，lunch 都食唔落。唯一抵讚係面有一層好薄有燒過嘅焦糖主要係唔使排隊又有個鍋好似真係炒珍珠咁先去幫襯，結果一般般。…查看更多

呢間餐廳嘅裝修都幾有心思，行工業風但係又比一般工業風要細緻骨緻。氣氛唔錯，但牛扒一般。由於係平日夜晚，我地揀左主菜買一送一時段。去到先知原嚟要每人點一樣飲品，但係平時食飯唔習慣飲飲品，感覺被迫消費，唔係幾舒服。今日我地點左兩份最貴嘅熟成牛扒，但都比較失望。M4 特級熟成肉眼排 $358牛排點左5成，出到嚟係做到5成熟，肉質整體都算軟熟，但係邊邊比較熟嘅地方都係比較柴同孩口。肉眼嚟講應該嫩滑d，但係佢整體偏瘦，肉汁都欠奉。牛肉味係有嘅，但唔算濃郁。伴碟有薯仔同兩片瓜，醬汁味道唔會好重味，味道都係OK嘅。但個人覺得如果係原價嘅話定價偏高唔太值。買一送一就都ok。 小食同沙律都係正價。烤雞凱撒沙律 $109雞肉係雞胸肉，雖然比較柴同乾，勝在大片份量可以。底下凱撒沙律味道正常，但沙律菜種類好單調，煙肉粒都冇，呢個價錢可以豐富d。Pamaham 芝士pizza $218pizza 底好薄好脆，芝士香濃，Pamaham 鹹香，幾好味，都係份量問題。…查看更多

叉燒大王即使平日夜晚都係好旺好多人食。晚飯時段都經常見到好多人係門口排隊斬料返屋企～ 叉燒大王除左叉燒、燒味出色，小炒、海鮮、粥粉麵飯全部都好唔錯！首先必點皇牌蜜汁叉燒 $88 例牌叉燒份量足，例牌已經好夠2個人食。蜜汁叉燒肥瘦均勻，蜜汁香濃，好啱送飯食啊！我呢碟就一半肥嘅多d，一半瘦嘅多d。個人鍾意肥d ，口感就比較juicy嫩滑有肉汁，瘦d 嘅就乾身d燒烤味濃d冇咁膩。整體熱辣辣，都幾鬆化嫩滑，味道唔錯！蜜汁薯仔牛柳粒 真係好有鍋氣！！上台都係冒緊煙，熱辣辣，d 薯仔外脆內軟，表面香脆熱辣，入面係薯蓉質感，小心唔好辣親，真係好熱。蜜汁調味加上黑椒即刻降低甜膩度，而且變得香口惹味。牛仔粒大細適中，上台即刻食係熱辣鬆化！肉質嫩、肥瘦均勻、入味、夠鍋氣！好味～蒜蓉蒸貴妃蚌 $98 4隻d 貴妃蚌好大隻新鮮，肉質結實彈牙，味道鮮甜，加上蒜蓉粉絲，真係好惹味～叉燒大王真係keep水準，夠曬鍋氣！門口斬料每日有唔同特價燒味，價錢真係幾抵！…查看更多

跟朋友去左長沙灣呢間又就腳又好味嘅火鍋店。聽聞佢地文昌雞係海南新鮮直送，所以揀椰子雞湯底（ $248 每位。）首先將半隻新鮮海南雞倒入椰子水湯底，先大火煮幾分鐘再熄火焗5分鐘，就可以食到嫩滑海南雞加飲到好清甜椰子雞湯！呢個文昌雞真係好新鮮美味，肉質彈牙嫩滑。湯底d 椰子肉係新鮮椰子挖出嚟，所以質感好嫩滑。椰子湯底清甜用左幾種椰子嘅汁煮成，分外清甜。海鮮套餐可以選擇3款紅色欄目海鮮、黃色指定貝類2款、3款藍色欄目海鮮以及6款一般火鍋配料。海鮮全部都好新鮮。我地揀左最出名嘅肉蟹，另外仲有象拔仔、鮑魚，黃色嘅指定貝類係兩款指定貝類係兩種蜆。藍色海鮮揀左帶子、金刀貝、鮮蝦、全部都好新鮮鮮甜。肉蟹最推介，肉質豐厚，味道鮮甜，象拔仔都係大隻結實鮮甜。此外鮑魚、帶子、金刀貝大大粒肉，鮮甜彈牙。 D 蝦扎扎跳！超級新鮮！指定貝類係蜆，有種大粒d 有種細粒d，勝在份量唔少，而且全部都肉質飽滿～其他邊爐配料同樣唔錯！個人最鍾意牛肉！肉質軟又吸收曬椰子雞湯同海鮮鮮味。手打墨魚丸真係好好味新鮮打，粒粒墨魚肉，幾彈牙不過唔係爽口紮實，好吸湯底味～正！另外懷山清爽，娃娃菜林甜。魚皮餃同腐竹就普通。整體而言，海南雞、海鮮都好新鮮，種類繁多，性價比高，值得encore！…查看更多

大埔美食多，但係呢間車仔麵店咁多人排我諗主要原因係佢裝修夠特別，而且車仔麵味道唔錯，價錢相宜，所以位置唔太就腳一樣成日有人排隊。好彩今日嚟得早唔使排隊，食到一半出面已經開始要排。餐廳好細，但係裝修明顯擺心思，同店名「三不館」（三不管）呼應，行懷舊香港路線。店內掛滿香港舊時有代表性嘅裝飾，例如d 舊式招牌、牌匾、海報、寫字板等等，連餐具、桌椅都係配合主題，例如碗碟畫左公雞，桌椅係摺台摺凳。連牆壁階磚都係懷舊風格。點左碟滷水豬大腸 $24 同埋車仔麵（3餸1麵）$38車仔麵揀左河粉做麵底。河粉較厚身，係有咬口煙韌嘅靚河粉，浸耐左都唔會爛；雞翼尖滷得入味，有4、5隻；花菇同樣燜得透又入味，有4、5粒；醬燒豬頸肉又滑又juicy仲帶燒烤味，有3片；湯底揀左腩汁，所以碗麵好夠味。滷水豬大腸醬汁甜甜地，豬大腸處理得乾淨，口感煙韌，份量都幾ok，個人幾鍾意佢嘅口感同調味，好味！佢檯面仲有辣菜脯，入面有蝦乾添，加落麵度辣辣地又鹹香，好過癮。呢間車仔麵店味道唔錯，貨真價實，裝修幾靚，去開大埔可以一試～…查看更多

大圍雖然多食肆，但係拉麵店就唔多，有沾麵嘅更加少！呢間係其中一間。味道正常。係公園隔離嘅呢間拉麵店前身係龍亭，本身都係賣拉麵。餐牌變化不大都係嗰幾樣。沾麵每日限量20碗，所以早d 嚟食好d，一般夜晚已經賣曬，之前6、7點行過想食沾麵，嚟到都已經冇得食。今次lunch嚟就食到沾麵。揀左「陰」，醬油豚骨沾麵$75另外加左$8 有半粒溏心蛋，溏心做得幾好。揀左面質硬、味道濃、有蔥醬油豚骨湯底都幾濃，入面有d 木耳同豬腩肉粒，而且有濃濃鰹魚味，但係鰹魚粉嘅粉粒比較粗糙，令湯底飲落有d 孩口。拉麵暖暖地，質感爽口煙韌，撈埋落湯度味道唔錯，可惜湯底偏鹹冇乜豬骨味，整體感覺一般般。…查看更多

沙田新開嘅salted pig 有好多應節掛飾，充滿新年氣氛。今日試左佢地嘅lunch set，包括頭盤、主菜、甜品同飲品。頭盤揀左沙律菜，酸酸甜甜，有d 雞胸肉粒同唔同種類沙律菜，份量較少。主菜係招牌德國鹹豬手（2人份） $268呢個德國鹹豬手係呢間餐廳嘅招牌菜！首先份量都真係幾大份，一個人真係食唔曬。佢嘅豬手已經幫你起左骨，同埋切成幾大塊，豬手嘅皮非常香脆，而豬手肉嫩滑多汁，鹹香美味，都幾唔錯！伴碟仲有烤甘筍條薯仔酸菜等。烤甘筍都幾甜而且個心都烤熟透。醬汁酸酸地帶芥末味，平衡翻豬手鹹味。甜品係木糠蛋糕，細細件，味道唔錯。飲品係凍檸檬茶，自己加糖漿。…查看更多

陳漢記煲仔飯都幾出名，佢一直keep住水準都唔錯，全部煲仔飯都係即叫即煲，新鮮熱辣，飯焦多少就睇你淋豉油嘅時機同方法。鍾意佢嘅飯有砂煲獨特嘅香味，暖笠笠。公司臘味煲仔飯 $50我覺得臘味係煲仔飯嘅靈魂，食親煲仔飯都一定要有臘腸或者臘肉，呢個煲仔飯將臘腸臘肉剁碎鋪係飯面明火煮，每粒米都有臘肉香味，但係獨孤一味，所以味道都比較單調同濃味。黃鱔滑雞煲仔飯 $69黃鱔冇乜骨，肉質幾彈牙，都算嫩滑又唔腥，而且份量都ok。但係d 滑雞就差d 啦，好孩好老，白雪雪，好明顯係雪雞，唔好味，而且份量唔多，仲要冇幾舊擺得入口，下次都唔會揀雞。…查看更多