KathyOlalaLeung的个人专页

今日我同阿媽去魚眾不同點咗一碟炸雞髀薯條同一碗南瓜雞湯米線做下午茶餐🎃，我覺得喺下午茶時段可以坐到四人座位嘆下午茶真係坐得幾舒服！論食物質素方面，我覺得炸雞髀薯條真係炸得夠外脆內軟，而且味道皮脆肉嫩真係幾好食🤤！論南瓜雞湯米線味道方面，南瓜湯底夠濃又夠熱辣辣，而且米線夠軟滑真係令人食得開胃！不過唯一美中不足就係有個女人收銀員工服務態度惡劣。佢經常走埋嚟我個位問我食完未同收得碗未，而且仲話我坐得耐真係擺明係趕客！依家顧客永遠是對的，佢竟敢對啲客講嘢串串貢，難免喺下午茶時段只有少數人幫襯啦！我會列呢間餐廳入黑名單，下次唔會再去幫襯！😤…查看更多

琴日去長沙灣行街咁啱去長沙灣麗新商場見到有一間新店叫沖繩二段日本料理餐廳，於是就入去試下日本定食。當我同阿媽入咗呢一間日式餐廳，我覺得呢間餐廳裝修幾靚，呢方面真係值得加分！👍👍👍👍之後，我喺點餐嗰陣見到有勁多石鍋餐，於是我就點咗一份明太子烏冬石鍋餐+煎雞肉餃子+一碟炸芝麻手羽及追加一份岩鹽焦糖冬甩🍩，其中明太子烏冬石鍋餐，蜜糖芥茉炸雞，芝麻手羽，及岩鹽焦糖冬甩味道係最好食，明太子烏冬煮得夠creamy又夠多汁，而芝麻手羽又炸得夠鬆脆，真係值得嘉許！😻不過最難食就係抹茶麻薯冬甩，抹茶麻薯冬甩唔夠外脆內軟，而且啲🍫真係整得太硬，茶味又唔夠濃。呢一碟十分為滿分，我只能夠評呢碟甜品好味指數得4/10（⭐️⭐️⭐️⭐️）。而飲品方田，我點咗一杯凍抹茶牛奶，我覺得雖然奶味夠多，口感又夠絲滑，不過茶味唔夠濃真係令人大打折扣！👎👎👎👎 論最後服務態度方面，我覺得杯抹茶牛奶味道真係太淡，於是我就問有個女店員攞過一個普通糖漿俾我！不過嗰個女店員嘅語氣真係太負氣，就算餐廳只供應黑糖糖漿都唔駛第一時間表現得唔耐煩。既然店內冇供應普通糖漿，店員可以婉轉啲答客人唔好意思，我哋餐廳只供應沖繩黑糖糖漿，咁先係待客之道！不過整體而言，我覺得呢間餐廳啲店員都係木口木面，對客人冇嚟笑容，難怪依家有咁多香港人鍾意北上消費，呢一間餐廳真係要加強員工培訓，好好改善員工服務態度吧！🧐…查看更多

我見到呢一間茶記有醉雞米線食，所以今日就俾次機會入去試下個醉雞米線。我一入去間餐廳揀位坐，餐廳入面啲冷氣真係凍到好似個冰室，於是我去揀位坐竟然遇個有個夥記話我唔好周圍走，我話佢一日未落單都可以揀位坐，今時今日咁嘅服務態度點得呀？後來到我點咗一碗醉雞米線，我食落去覺得啲醉雞太鞋，啲醉雞多數搭雞胸、雞翼同雞胶，冇俾一舊雞髀，而且個米線湯底太淡，簡直係劣食。另外，我點咗一杯凍檸茶少冰，殊不知杯凍檸茶真係落得太多冰，簡直唔合格！…查看更多

琴日我同屋企人去四季叫咗一碟咖喱雞扒飯同一碟豉椒排骨炒河，今次啲食物質素果然令人滿意👍。當我切開塊雞扒真係不費吹灰之力就可以輕輕切開塊雞扒食，塊雞扒除咗夠鮮嫩多汁之外，而且啲秘製咖喱汁真係好似沙嗲汁咁超好食，啲咖喱汁帶有少許沙茶醬同花生醬味道真係令人食到好開胃。另外，豉椒排骨炒河真係炒得非常有水準。呢碟排骨炒河全部都係一字排，啲排骨真係夠哂嫩滑，而且碟排骨炒河真係好香豆豉味，令人食到津津有味。論員工服務態度方面，我覺得依家新請返嚟啲女人同女仔侍應已經比以前嗰個男人腦細落單醒目好多。依家新請嗰個女人同女仔侍應幫客落單起碼冇落錯單，真係比當初新開張個男人腦細醒目好多啦！…查看更多

話說依家譚仔啲魚蛋配豬紅魚腐米線真係太難食，啲豬紅好似整到似魚膠粉咁難食，而且魚蛋又整得唔夠爽口彈牙，連街邊賣啲魚蛋都好食過譚仔。論服務態度方面，員工服務態度比以前差好多，真係超趕客。依家喺香港食飯真係限時限候，我當時已經食完碗米線再飲埋杯凍奶茶就閃人，殊不知有個四眼男仔同譚仔阿姐竟然催我食飯食快啲，佢哋竟然要趕住喺9:45pm就要收工。豈有此理，以往喺譚仔食飯一向都係收10:00pm，呢間譚仔請啲員工居然趕客，難怪有咁多人北上消費啦！🙄…查看更多

話說最近我睇到open rice有推出262兩位用嘅韓燒放題早鳥優惠同198蚊韓燒放題優惠券，於是我就決定帶屋企人一齊去食韓燒。我覺得韓燒放題價錢親民，飲品選擇多，不過食物選擇相對比較少，而且只有少量刺身供應，真係無法滿足為食客嘅味蕾。整體而言，我覺得飲洛神花茶同食韓國蜜瓜味雪條係最好味，而且韓燒放題性價比高，真係值得推薦俾大家食呀！如果腦細可以無限量供應多種類嘅刺身同壽司俾食客品嚐，我覺得餐廳生意必定客似雲來吧！…查看更多

話說第一次食呢間啲牛腩汁魚腐、豬紅、雞翼米線都幾好食，但係今次叫左一碗光速車仔麵（碗麵有蘿蔔、雞翼、廚師腸）真係超難食！呢個湯底淡而無味，而且啲牛腩汁唔夠鮮甜，真係大不如前！今次最氣頂就係遇到有個冬菇頭女人幫我落單，佢既待客之道真係超惡劣！佢幫我落單個陣竟然逼人加多幾樣餸，佢見我唔肯加餸就乘機向我黑面，而且佢見我食平野又坐得耐就乘機對個客發脾氣！不過當時唔係有好多客，呢個大陸職員今時今日既服務態度真係超悔氣，我以後都唔會再幫襯呢間垃圾店！…查看更多

話說前幾日見到長發美食廣場開左一間新台茶店，於是就決定入去店內睇下鎮點之寶！當我入左台茶店後，我見到有各色其式既台茶及水果茶任君選擇，之後我就買左一杯芝士奶蓋芒果茶飲，口感果然既清新又奶味濃，真係飲過返尋味啊！…查看更多

話說今日去一休食下午茶，我同阿媽點左一碟鰻魚炒飯！殊不知個碟鰻魚炒飯太鹹同埋無鰻魚，我於是叫個Waiter換過新一碟！個waiter竟然話試過味後覺得d炒飯唔太鹹，而且又堅決唔肯換過新一碟，態度超惡劣，難怪呢間餐廳無生意啦！以後都唔會再幫襯！What the poor staff service!!😤…查看更多

今日放工與朋友睇戲就選擇黎呢間small potato餐廳享受二人晚餐吧！當步入餐廳的一刻就見到到處的裝潢充滿歐陸風情，令人好似置身於歐洲一樣咁寫意啊!眨下眼就到了點餐時間了。我首先點了一個set meal B再拼一個忌廉煙肉薯條兼一個三文魚凱撒沙律，詳請如下:論食物方面，set meal B的忌廉蘑菇蜆肉意粉的味道也尚算Ok.. 不過加多點醬汁的味道更佳。至於另外點的小食同埋前菜方面，三文魚Caesar salad的味道夠新鮮，不過欠了沙律醬汁有點美中不足。而煙肉薯條的味道太淋，唔夠鬆脆。雖然價錢比較大眾化，但食物素質有待改善。下次有機會黎食飯，我希望不會再令本小姐失望。…查看更多