Kenni Gor的个人专页

以前朋友生日黎過一次，不過因為包左房，又食左好多海鮮拼盤，其實無咩印象。今次同另一半黎食，希望會有另一種感受。如果以晚餐4 course黎計，其實價錢唔算貴，當然仲要睇埋質素既。前菜1: 蜜瓜配西班牙風乾火腿個蜜瓜係好甜好甜好甜，而且並唔係用糖水浸出黎既味，日本蜜瓜都比唔上。西班牙風乾火腿好香，好濃郁，就咁食唔會話好鹹，味道會留係口腔好耐。配埋蜜瓜又岩岩好，如果火腿唔夠濃郁，可能食落會無晒味。前菜2:牛油焗田螺女朋友唔食貝殼類，我可以自己掃晒佢。螺肉肉質幾實，牛油唔會遮到螺肉既鮮味，唔會太油，如果可以再多幾粒就好喇。主菜兩個都好食，不過我極度極度介紹黑豚豬架。因為另一個食左牛，所以揀一個唔係牛既試下。不過呢個黑豚絕對唔會令人失望。個豬佢煮左7成，肉質岩岩好，有口感但唔韌，而且食落有少少爽口既感覺。而肉本身既味道有少少果味，after test都keep左好耐，有少少豬味既牛扒感覺。作為男人，我估唔到自己會咁鍾意個甜品，雞蛋布甸好清甜，蛋味都好香。最特別係個扁桃，清新、爽甜，飽住咁食都食得落！…查看更多

LCX呢邊新開左好多新餐廳，仲要對住維港，咁靚既景無理由唔去一去打卡。見今日收工唔算晏，即刻約人去食，見到有得食烤鴨就更加諗都唔諗就衝入去！羲和雅宛～可能今日係weekday，人唔多，真係好好彩咁俾我坐到窗邊睇夜景！前菜篇食上海野，唔小心叫咗好多次前菜，第一味就係呢個「桂花蜜山藥」。第一啖食落去就覺得好幸福，佢桂花味好香但唔會落得好甜，好清香又唔膩，啲山藥都煮得啱啱好，好爽脆，又掛汁，真係好開胃喔！跟手第二樣就係「乾蝦冰草」，其實睇圖嗰陣唔知係咩黎嘅，純粹係諗住今日咁多肉，不如叫啲菜食下啦。不過睇嚟今日我真係非常幸運，個冰草係好得意㗎！佢上面有一粒粒嘅透明水珠，我一開始仲以為係真水，原來係冰草自己嘅表皮，口感爽爽地，但係好薄，冰草又有自己既少少甜味，食完其實我唔肯定佢煮過未跟住就到主菜- 烤鴨一見到個師傅喺後邊不停咁切切切，睇到都已經好興奮。佢上碟嘅時候先來配菜，比平時嘅配料多好多，仲有包爆炸糖，仲以為自己食錯野。鴨肉佢分左三碟咁上，第一碟比較脆，主要係鴨皮only。佢教呢個可以配爆炸糖同酸莓醬，配左之後佢即刻肥膩感大跌，好清新，爆炸糖無平時既咁爆，留返肉香，係幾頂癮既。（淨食唔掂醬絕不建議！）第二係鴨胸，肉質比較實同肉味濃。呢個就玩fusion野，配山渣條，紅洋蔥同芥茉醬，原本鴨胸有少少實，加左山楂條同芥茉醬之後，酸酸地好得意，平時唔食胸既友人都讚不絕口！第三係鴨脾，肉質最嫩滑同最香。佢教我地用正常中式配搭， 京蔥，青瓜同甜醬。由於原本鴨脾肉已經夠香，配返京蔥增加左佢嘅口感。但係我覺得就咁食最正，肥瘦度啱啱好，好滿足！！呢度樣樣野都好好食，最後再寫多樣菜俾大家睇吓啦！「金銀蛋浸萵筍」，個樣好似係好普通，但係佢既上湯好好味，無咩味精，你可以食到萵筍嘅清甜，又有少少皮蛋既上湯味，最緊要係食左都唔覺得肥膩，對於超多肉既一餐黎講，萵筍嘅存在簡直係完美！…查看更多

人大左，真係少左好多機會食放題，一黎愈黎愈貴，二黎質素參差嚇親人。大喜屋系列係少數身邊既人都會讚既放題，咁食餐當預祝情人節都好。9:30後入座有85折，臨走先知，絕對加強左我encore指數！食放題揀刺身先是常識吧，又鮮甜又好味，肉質都幾實。推介大家一定要食甜蝦同赤海蝦，一d霉都無，而且都挑得幾乾淨添！舊羊架食落幾嫩口，唔知係我過分左定點，肉質仲有少少奶香同草味，羊羶得黎唔會太搶，以放題質素以言，佢羊架係頭2位。佢d特色壽司都幾得意，最好係佢舊飯都好細，唔會想用飯餵飽你果d，良心！我之前聽講極尚最特別係海膽，不過我話你知，呢舊炸貓山王是係極品，未咬開已經有陣陣榴連味飄出，外面少少脆，內面又軟又夠熱，食得出唔係普通既榴連！見到隔離有16個女生gathering,搞到我想即刻組返隊放題團,再黎食多次！…查看更多

咁岩行開佐敦，諗住食返個糖水先返屋企，咁既weekend先夠滿足嘛，不過總之就伏左自己。因為突然想食芋圓，行到第3間先有，緊係咩都唔諗入左去先。佢話入面既其他野食加芋圓要$10，我即刻退而求其次，搵樣原本就有芋圓既食，搵左好耐發現得2款，1樣係榴連，1樣係芒果，唯有迫住食芒果。黎到即刻呆一呆，點解$35咁大杯既，好抵食喎，仲以為普通碗仔，而家起碼1.5倍！第一啖試左小丸子同芋圓先，唉...心知不妙了...芋圓外面無味，咬入面都有些少芋味，最大獲係佢既韌力，夠你跑一轉馬拉松，唔硬，就係好韌。唔好以為小丸子無事，佢先最伏，成口都係粉味，我以為佢未煮熟，不過又好似唔係，anyway，好難食。但係佢個芒果係好食既，甜酸度剛好，果肉唔會霉霉爛爛，大家食個芒果西米露最就好，應該最好食，又大碗。另一個都係丸子d fd,得花奶椰汁味，似融左既雪糕，丸子一樣好難食。評語同佢個名一樣：伊甸園，睇得唔食得，自己諗...…查看更多

話說自從年頭第一次係黃埔食過一次德美之後，就愛上左呢間餐廳!價錢層面佢唔可以話平，不過計埋份量就抵到不行了，上次食到就黎嘔都食唔晒。今日咁岩經過發現原來tst都有一間，當然即刻衝上去喇!7點半左右上到去已經好多人,我地等左大約20分鐘左右先有位,個場坐30-40人,同黃埔差唔多。第一樣就先食個蟹子沙律,由於本人十分肚餓,唔小心夾左先影相,不過好肯定咁同你講,佢真係好多.圖入面上面個碗係大隻既戰鬥碗,我足足夾左4次先食晒呢碟沙律!入面既扎青瓜絲好新鮮,每一啖都嗦嗦聲.佢最好既係好少沙律醫,出面食蟹子沙律見到都飽,但係呢個比既份量係極少,撈一撈之後其實睇落唔覺加左沙律醫,男仔女仔都鍾意.再黎係德美玉子,比出面既玉子少一點甜度,多一點蛋味.不過佢一直都冷藏住佢,入面有些少雪味. 而且應該整左好耐,凍到有少少老,不過不失.上次我無寫食評,就係因為呢碟牛油果軟殼蟹卷無晒貨,一怒次下放棄左寫佢.佢雖然得4件,但真係稱得上大大件,女仔食晒4件應該投降左一半. 佢上面既牛油果唔會用好熟既,食落仲有少少口感,而且仲有成1cm咁厚.入面既軟殼蟹都不得了,好大隻,略嫌唔夠熱.還好粉不多,唔會油膩.跟手都要叫返個睇個名好伏既野食.鰻魚9成都無咩問題,但配班戟見到都覺得今次一定伏到自己.可惜,我失敗了.佢今次個班戟反而有少少暖意,即使有沙律醫都唔會入口即濟. 鰻魚既醫汁味道好香,入面原本蛋味唔夠都豐富返.重點係無咩飯,食多兩件都OK!最後送左個是日甜品,正常no comment.完。…查看更多

星期日想搵個地方慢慢咁食個brunch,醒起呢間oolaa受歡迎指數極高，平時晚餐食得多，今日就黎試一試佢個brunch！大約2點半左右去到，估唔到呢個時間都有8/9成full，當然大部分都係外國人。去到時啱啱仲有2張枱，勁好彩唔駛等！（因為已經好肚餓）我向來都中意試新野，睇下伏味有幾濃，所以一般既all day breakfast今次無食，食左呢個breakfast pizza。首先，估唔到佢會咁大個，感覺就好似兩個人先食得晒。餅底幾彈牙同好香，唔粉。上面d主角，其實就係將all day breakfast 既所有野放晒係上面（除左薯餅），食落去又幾得意。講真呢個味道幾好，不過佢有好多蛋，但茄膏，肉醬同芝士唔夠，搞到比d蛋搶晒味，如果比例係蛋少d,腸同醬多d就prefect!跟住呢個叫做rosti,好明顯我又係唔知想樣係咩就嗌，order之前上一上網睇過係薯餅既fd,岩晒口味。先講呢個既唯一缺點：就係左下角果個醬，完全唔係本人既口味，好奇怪，好彩我點少少試左味先。呢個薯餅係咬落見到，佢入面既薯肉係一條一條好清楚，唔會溶溶爛爛，似無先用水煮熟d薯仔，真係生煎煎熟，入口有咬感之餘又唔粉，可能係我食過最好食既薯餅。三文魚正常，有鮮味，蛋是完美的流心蛋。由於薯餅太好食，我基本上唔記得左蛋同三文魚有無咩其他特別。最後仲叫左兩杯咖啡，唔記得影相就唔寫喇（我係有薯餅萬事足）！試新野又唔一定會中伏既，係咪？…查看更多

本人一向都有用the entertainer既習慣（未聽過既我好簡單介紹一下，就係可以主菜買一送一，有時連嘢飲都得），去開cwb咪試下有咩新野，見到呢間係咩台式意大利菜，好似好伏咁，當然要伏一伏佢喇。佢限定左要係最貴既5/6個主菜入面先揀一個，入面有牛排，豬肋，燒雞，海鮮同呢個最伏既鴨腿！點解我會講呢個最伏呢，因為連個侍應一上碟都同我講一句：「d黑色係黑醋汁咋，唔係煮燶左，放心！」其實我聽完就真係唔放心，我叫之前都知有黑醋汁，一黎就伏味濃。（平心而輪，外型先0分）食落其實醋味唔重，鴨肉味幾出，之但係佢就老左少少，牙縫多左幾條肉。加左檸檬汁反而仲好，無咁heavy.呢個就無期待已久既pizza餃，真係啱啱先知有呢就道菜，一拎出黎漲卜卜我以為佢咁多餡，點食得晒😂佢個size大約大過一個成年男人隻手少少，可以切開4份，個manager仲會親自幫你壓返d熱氣出黎先切，可能怕我地自己整既話會燙傷。呢個餡係忌廉汁波菜，但唔會成口醬，好香好脆好滑好好食！味道同口感都好過鴨腿多多聲，個皮唔會太重粉味，外脆內彈牙，好期待下次食佢既真正pizza！翻食指數：8分…查看更多

咁岩見到openrice有個買一送一優惠券，覺得唔試好似對自己唔住咁，難得OT到咁上下，去試一試佢都理所當然。海鮮闊條麵睇完個名，係咪以為我講錯咗呢？本人完全無錯，呢一個個名真係寫「闊條麵」！但點睇佢都係扁意粉，可能係我唔識野喇！講返味道，佢又真係幾好食，d意粉唔會煮得過分林，又入味。同埋佢塊魚真係唔差，有口感有鮮味，絕對係亮點。不過粒帶子好鹹，得個鹹字，無其他評價。山頂餐廳，聽個名你會以為入面所有野都好高級，呢個西班牙海鮮飯，名就ok ge，食就欠奉喇！入面既海鮮都頭先一樣，慳返唔講。個飯呢，簡單係糟蹋食物，可能大X樂既一哥焗豬扒飯仲好食，果飯唔係生煮到熟，係煲熟左先煮，唔入味，又林。都有2/3成唔林既，因為佢煮到焦左嘛，食啖飯，林巴巴之餘一點硬掘掘，真係amazing！好彩用左個優惠，填補返個奇怪飯既失望，大家食千萬唔好食飯，意粉係好食好多好多！…查看更多

話說之前金朝陽有個promotion,download 佢隻app加登記可以賺張$100 coupon.我當然二話不說貢獻email，拎左張coupon先。又想用張$100又唔想太貴，最黎都係揀返大戶屋，又可以添飯！一黎即刻食左個最愛鹽燒五花腩定食，百二貨仔但係質素好到估你唔到！五花腩既肥瘦比例掌握得好好，唔會食到你個口油淋淋之餘，d香味都出晒黎。本人無論去食m記薯條，定屋企炒菜都要走鹽，你就知我幾怕鹹，不過呢個五花腩話就話鹽燒，其實鹽既分量並唔過分，同d肉味都幾夾，配埋個飯啱啱好（佢個飯都好好食，好有飯香）。大戶屋仲有串燒都幾出名，見到樣樣都想食，直接就叫左個雜錦串燒（仲有好多款雜錦，不過得呢款有菜有肉）睇落個樣都唔錯，肉汁鎖得幾好，最好食係中間有大蔥果款，燒既時候肉汁滲左少少入，鮮甜得黎多左肉香，咪話唔吸引。不過呢個串燒有2個位真係做得差：1。我以為佢會即煮即燒，點知拎到過黎已經暖左，唔係凍，但串燒expect既熱無左2。d汁太多太多太多喇，搞到個秋葵同冬菇無晒自己既味，唔知係因為原材料太差，怕佢無味，定係d汁就黎過期，快d用埋佢算。總括係好食既，淨係個五花腩都值得再去！（定食大盛飯，然後再加多碗，都唔洗加錢，再大食都夠飽）…查看更多

近排洗錢多左，諗住食平dd，緊係睇下有咩小菜平靚正喇，睇睇下就去左和記（女朋友同我講果陣仲以為係電話果個和記）。女朋友話見到個個都食炸蝦餅，咁緊係試下喇！1。每件蝦餅好大件2。佢真係新鮮熱辣炸起比我地3。炸粉好薄，唔會食到好粉4。蝦肉同蝦膠好新鮮彈牙，比例夾得幾好5。好抵食6。（我第一眼以為係加大版麥樂雞）之後諗住再叫個骨（小菜必食），發現呢度竟然有個紫羅骨，即刻叫黎試下。1。紫薑波羅骨而家好少人整2。佢d骨係入味既3。酸甜度掌握得幾好，配個些少薑味，味覺幾豐富個人對呢樣小菜好有期待，所以都有2點可以做好d1。薑唔夠嫩，可以用嫩薑炒，口感更好2。我一開始以為佢會用金沙骨（咁平我可能大想頭左），點知只係普通肉排，有少少失望最後仲叫左個啫啫芥蘭（唔記得影相就食左），夠鑊氣，熟度剛好，唔會因爲個窩係熱既，搞到佢熟過頭。三樣小菜唔駛$200埋單，成班佬去一定會愛上！（是日同女朋友去無飲啤酒，但睇到大啤都平平地，而且款式好齊）…查看更多

是月生日，朋友係九龍城返工，話去試下呢間食豬既餐廳。入到去，得一張二人枱有人，成間餐廳都靜悄悄，walter仲多過客，心諗：今次可能中大伏了......黑松露意大利飯第一個就黎左個飯，佢d黑松露好香，個意大利飯軟硬度幾好，少少偏乾身，口感一流扁意粉配西班牙黑豚扒意粉意外的一般，沒太大感想，全靠豬肉救返豬皇飯件豬肉真係好食，成個飯既味道偏濃郁，食完有少少口乾，叫佢加左好幾次水意大利式茄子芝士肉醬焗釀彩椒全部都肉，特登叫左個菜，估唔到佢係放係黃椒入面焗，唔會話好濃味，相對清返少少，如果份量多少少就好。燒排骨如果呢間係以豬肉為主題，咁燒排骨真係可以唔使食，肉質一般，骨多過肉太多，比起其他失色不少甜品佢送咗個馬卡龍，本人其實非常討厭馬卡龍，因為太甜，不過呢個甜到適中，可能係呢度最出色嘅一味總括，味道不錯，但好濃味，要不停加水。價錢偏貴，完全明白點解無咩客，希望佢可以維持落去！…查看更多

同兩個舊同事食飯，點知OT到好夜，搵左好幾間，最後試一試green waffle，不過一開就就要等成60分鐘，我不禁期待起來。叫咗三樣嘢食，三樣都好澱粉質：第一樣係薯條，炸得幾好，不過唔特別，無影相。第二樣就係mac & cheese,呢樣佢整得好香，芝士味夠但又唔會好漏，最特別嘅係佢用嘅通粉外面係有坑紋的，啲芝士粘住係外層，好正！第三樣係牛扒粒薯粒鑊仔，牛粒幾嫩身，配埋薯仔幾match,不過因為我地太多澱粉質，後期食落好濟，下次再試會減少d.另外叫咗三杯唔同嘅嘢飲，個名就夠特別啦，味道就一般，不過不失啦。PS: 我同同事傾計果陣，隔離個大叔一直喺度偷聽，可能我哋啲話題真係好敏感，個呀叔無朋友討論，忍唔住聽得好興奮，其實我地都有少少老尷。…查看更多