cathychungsy的个人专页

間餐廳好似開咗幾年(?)都無幫襯過，今晚喺門口見倒好多人食煲，吸引我地入去。 凍凍地，叫咗個秋冬限定(?)嘅藥膳醉雞煲($98)+$15追加准山麵。另叫一份上湯浸娃娃菜配四式冷盤($98)。 先飲藥膳湯暖下身，藥材味好夠，但咸咗啲。雞件有7-8件，好滑；跟煲配嗰份生菜份量都唔少，放落藥膳湯烚熟又幾好味；准山麵似喺街市買廿幾蚊一袋有8個定10個嗰啲。後來我同朋友都話早知加$28/$38追加魚片/豬肉片/牛肉片仲好。 上湯浸娃娃菜係瓦煲上，上湯好甜，但對我嚟講又係濃味咗啲。四式冷盤有皮蛋豆腐、手撕雞、椒泡雞翼尖同埋豬腩片。全部正常發揮，無話特別好味或者特別差。 埋單連加一$232.1，價錢絕對唔貴，坐得又幾舒服，又無話趕你走。短期內可以再去試個羊腩煲($138)。…查看更多

週末無嘢做，晨早行咗成粒鐘，行下行下就去到石門。見呢間新新地嘅茶餐廳就入去。早餐供應至11點半，我叫咗仿鮑片火腿通粉配煎雙蛋、多士及熱杏霜。 通粉嘅湯底甜得過份，諗住清清地食通粉都未必得。仿鮑片有4-5片，火腿片多啲，通粉份量同口感正常。多士夠脆，不過又係偏甜，但尚可接受(可能入貨入咗啲甜度高嘅包?)，煎蛋火喉啱啱好，但就唔係脆邊。杏霜正常，夠熱。 整體不過不失，希望湯底可以減甜，大家都可以食得食淡啲。…查看更多

去石門揾食，其實好多間餐廳都食過。假日夜晚近7點，眼見間舖頭一枱客都未有，就本住幫下小舖入去一試。食物種類唔算好多，計有煲類，炖湯一人餐，pizza，泰式小食及潮式滷水。煲類及炖湯餐配有白飯/米粉/瀨粉/葱油撈麵及飲品一杯。兩個人，叫咗一個炖湯餐，五指毛桃湯，酸菜魚，瀨粉同凍龍眼茶。另一個就係雞煲餐，瀨粉同熱龍眼茶。再加一份酸辣無骨鳳爪。炖湯好清甜，而且有幾舊㷛湯料跟埋，唔係齋飲水。酸菜魚稍為唔夠酸菜，味道較淡，魚就係滑捋捋嘅桂花魚/鱸魚之類。雞煲係唔辣嘅，但調味唔錯，係雞件比較少，唔夠喉。瀨粉同酸辣無骨鳳爪就正常。埋單~$250，無收加一。店員都幾禮貌，但唔夠主動，斟水都係你叫佢先幫你加水，但都無順手幫埋同枱嘅其他人斟水。…查看更多

一行3人週日正午12點前入座，不用等位。可能仲未返晒工，入餐廳時無日式嘅歡迎儀式😄。餐廳唔係好大間，只有2人/4人枱，大概二十幾張枱，隔離枱5人都係加圓櫈坐走廊。成間餐廳嘅員工似乎都係外勞，聽倒佢地之間用普通話溝通。而且坐附近嗰幾枱都係移咗民嚟香港嘅家庭，感覺好似返咗大陸咁😄。講返啲嘢食。我地叫咗5樣。1) 招牌蝴蝶魚(少油、走辣，$98)份量都幾多，仲有啲紅蘿蔔薄岸同青瓜薄片一齊炒。但味道就無乜特別，好似屋企餸咁。成碟嘢好咗好多蒜頭炒，我自己就麻麻地。2) 鮮炒黃牛肉(少油、少辣，$138)用咗土豆絲(薯仔絲)炒，味道唔錯，但好油。牛肉嘅味道係似返大陸食火鍋嗰種肉味，不過有啲韌，而且好多牛肉都切到碎濕濕，好難夾。3) 魚湯滑豆腐($58)魚湯清清地，同豆腐應該係夾嘅。豆腐好滑，似百福豆腐，不過唔知點解豆腐好似係甜嘅。4) 香辣刁子魚($38)似上海菜嘅薰魚，但呢碟魚係辣嘅，而且亦無咁好味。魚嘅質地似硬咗嘅豆豉鯪魚，魚皮仲硬，唔啱口味。5) 老麵花卷($29)花卷好鬆軟，甜甜地，但我食唔倒麵粉味。整體質素麻麻地，但價錢確係比一般餐廳平少少，會再幫襯嘅，不過唔會好熱切咁囉。…查看更多

週末睇完戲，行下行下就嚟到沙田圍。見倒呢間餐廳啲下午茶餐無咁悶就姑且入嚟試下。叫咗個河內蒸粉包+手撕雞檬紙卷套餐，配熱飲，我叫咗熱奶茶(如果叫咖啡，餐廳只提供滴漏咖啡，要加$10)。手撕雞似肉鬆多啲，好乾，得有啲攰。蒸粉包我覺得有些少想壞未壞之間嘅味道(有少少似燒味放到第二日先食嗰種味道)，我無叫侍應換，因為我覺得亦有可能係調味問題。奶茶有啲嚡口，平時唔落糖嘅我要落一包先飲得落。整體普普通通，套餐連加一$58我就覺得唔係太值，畢竟茶餐廳好多下午茶餐都係50蚊有找。當日隔離枱個食客叫咗個侍應埋去，似係話佢碗麵有嘢(可能係昆蟲之類)。店家話換過另一碗/樣畀佢，但個客人就話唔使，咁餐廳亦無收佢錢。…查看更多

有啲期待，因為唔使再去集團嘅上海餐廳。復活節假期大概兩點鐘到，唔使等位，老板娘(？)仲行咗出舖外兜客。一坐低就有位職員遞上茶同兩碟小食(醃蘿蔔同淮鹽花生)。蘿蔔酸酸甜甜，懷疑係舖頭自己醃，鍾意食嘅可以買返屋企食，每樽$50(無見過真身，唔知份量)。叫咗兩個套餐，套餐送豆漿。雞扒擔擔麵+鍋貼兩隻同埋鮮肉水餃麵+酸辣老醋海蜇皮。估唔到雞扒係炸嘅，不過有啲乾。鍋貼肉餡味道唔錯，係略嫌煎得唔夠脆，同行友人嫌皮太厚(但我係鍾意嘅)。鮮肉水餃得三集，味道不過不失，麵嘅質地有啲淋。老醋海蜇皮正常嘢，無咩特別。要揾次晚市嚟食先知佢啲上海菜式同點心究竟好唔好食，值唔值得再幫襯。…查看更多

同朋友近近地入大尾篤BBQ，無訂位。搭九巴75K喺汀角落車過對面馬路，諗住睇啱邊間就入去。其實去烤場預咗食物質素唔會好得去邊，志在同friend吹水。第一間見倒嘅係嘉年華，公眾假期每位$248(預先訂座)/$288(即場)，另加開爐費$50，職員唔答即時訂座可否享有預訂價錢。之後就係燒烤農莊，每位$230(包一樽/罐$10飲品)+開爐費$50，職員耐心回答我們提問，並歡迎我們入內看看食物/環境。再向大尾篤方向行多一陣就有鴻運，舊年試過，朋友話試第二間，所以無睇價錢。隔離就係前麥師傅烤埸個位，改咗名(唔記得)，話有廿年歷史，不過我地都唔覺有咩地方見過呢個名。。。12點9都未開，但有一大班人等，可能訂咗位。因當時未見有職員，問唔倒有無即場位，唯有折返去燒烤農莊。老實講，食物都係嗰啲，雞中翼(有四個味道：原味、辣、咖哩、麻辣)，牛扒、豬扒、金沙骨、雞扒、雞全翼、鴨胸、腸/丸、蕃薯、茄子、粟米、翠玉瓜、方包等等。跟爐有一份金菇，另每位有一件菠蘿、一隻蝦同一隻青口。食物味道都係一般，係勝在唔算好重味。烤場話限燒四粒鐘，但我地燒到成6點(近五粒鐘)都無職員趕我地走，可以同朋友傾到飽。離開時仲有職員同我地講拜拜，成個感覺又再好啲。…查看更多

星期六同朋友行完河背水塘，順道出返元朗市中心揾食。之前已經食過觀塘間校長燒肉，覺得性價比都唔錯，只不過食得兩粒鐘係唔夠時間，同朋友傾得計就唔夠時間食。見元朗間校長燒肉有$328嘅3小時刺身燒肉火鍋放題，仲要4人同行，1人免費，我地4個人就啱啱好，連加一為起都係每人~$270。可能早去嘅關係(~6點)，人唔滿，侍應安排我地坐卡位。卡位好闊落，可以坐6個人，只係坐入面嘅人出入無咁方便。食物種類好多，有刺身(5-6款)、壽司、日式凉拌(如中華沙律、螺肉、墨魚仔)、沙律菜、雜果。我只係食咗三文魚、中華沙律同螺肉，不過不失。亦有各款中式蒸點、炸物、鹽焗蛋，各式熱葷，又啱食嘅話，真係未正式開始燒烤同火鍋都飽咗一半咁滯。不過我全部無食，主打食燒肉。燒烤同火鍋料都多，質素正常。唔使三舊水都唔應該期待係好高級數嘅食材，過得去就ok。仲有甜品添，都應該收貨啩。飲品都係啲大路嘢，款式都多嘅。其實近年食自助餐/放題都唔會食好多嘢，不過勝在咩都可以試下，而且今次食3粒鐘真係可以同朋友傾餐飽。滿足。…查看更多

行完街，純粹揾個地方坐下食少少嘢。上到嚟熟食中心，間間都無話有下午茶餐牌，只見呢間有就幫襯呢間喇。叫呿油肶配沙津，加凍檸茶，$39。以呢個熟食中心嚟講，價錢唔算特別平，因為有餐廳嘅炒粉麵飯或西式扒飯都係咁上下價錢。雞肶比想像中大啲，不過唔太夠豉油味，而且近骨位仲係紅紅地，唔多夠熟。反而沙律有啲驚喜，切到細細粒，令蔬果粒包咗好多沙律醬，而且亦夠凍。凍檸茶茶底夠濃，又唔太甜，啱我口味。既然佢話自己係澳門茶餐廳，下次嚟可以試豬扒包。…查看更多

近11點先到沙田，想食粉麵早餐真係唔多選擇。見翠華早餐供應至11點半，二話不說就入咗去。侍應叫我嘟完安心出行同針咭就自行入座，入座後餐廳經理又話要有餐廳職員安排先得，好混亂。而家啲集團餐廳都係要自己掃QR code落單，而且想要杯水都係自助形式。希望長者幫襯會有職員可以代勞，始終未必個個識字/用手機落單，而且字又偏細睇唔清楚。叫咗B餐($39)沙嗲牛麵，配牛油餐包及滑蛋，飲品我要咗茶走。沙嗲牛肉味道唔錯、牛肉肉質亦夠冧。滑蛋都真係幾滑，份量亦比集團式快餐店多。茶走我覺得太多奶、唔夠茶味，而且唔夠熱，有啲失色。餐廳冷氣唔係好夠，已踏入秋天，但都一路食一路流汗。而且抽風可能都麻麻，一直都聞倒煮嘢食味。…查看更多

餐廳門外有大大幅油畫，好易見倒。我地一行6人，職員安排咗梳化位置畀我地，好闊落。叫咗海南雞4人套餐，套餐有半隻海南雞、火車頭河粉(二人份量)、柚子鮮蝦沙律、脆皮炸牛腩、煎扎肉、雞牛串燒各兩串。再散叫蜜汁雞肉串撈檬，生牛肉河粉、雞絲粉皮、札肉蒸粉包、椰汁珍多冰同椰汁綠豆冰。海南雞好嫩滑，配甜甜酸酸嘅醬好開胃。火車頭河粉好多餸，牛腩好冧好入味、河粉好幼身，放湯一流。柚子鮮蝦沙律酸酸甜甜，好開胃，柚子份量都幾多，蝦就幾隻。脆皮炸牛腩有啲失色。個炸粉漿炸得太脆，雖然牛腩都冧，但味道明顯無湯牛腩咁香八角味。煎札肉似炸多過煎，札肉切得幾厚，但肉質唔夠結實，而且無乜豬肉味。串燒雞肉同牛肉有焦香味，配唔知咩醬(甜甜地又咸感地)，個人認為都係配沙嗲醬夾啲。特價嘅嘅蜜汁雞肉串撈檬係用現成買返嚟嘅日式雞肉串，口感當然無咁有咬口，不過特價貨無太多要求。生牛肉河粉質素唔錯，個湯底(同火車頭湯河個湯底一樣)好重香料味，基本上無得輸。雞絲粉皮(我諗應該唔係越南嘢啩！？)正正常常，唯獨是青瓜絲太多皮連住、有啲硬，長者食有啲困難。扎肉蒸粉包上枱時好熱，米紙好軟糯。餡料好多，味道亦都唔錯。珍多冰同綠豆冰估唔倒成杯都係椰汁沙冰，椰汁份量好少。冰未溶已經覺得淡，溶咗飲就仲淡。成餐飯整體質素唔錯，但又未必會短期內番兜，希望下次再去有驚喜。…查看更多

朋友係理大校友，校支出示校友咭埋單有八五折。午餐($288)包以下各項：1) 餐湯/開胃小菜(煙三文魚配柑)。三文魚有三大片，酸酸甜甜真係好開胃。2) 主菜(有5-6款選擇)，我要咗西冷七成熟。上枱時係過熟，不過口感唔錯，調味亦啱啱好。3) 甜品，我要咗大熱嘅芝士榴槤慕絲。慕絲入口即溶，質地亦唔會過份空氣感。4) 有氣酒/果汁。有氣葡萄酒雖易入口，但酒精應該有1X%，一杯就夠。5) 餐飲，我要咗咖啡。朋友話咖啡果味濃，亦好滑口(？)。我唔識鑑賞，只係覺得有啲稀同埋偏苦。餐廳樓底高，座位闊落，環境唔算嘈雜，同朋友傾計一流，只係梳化櫈偏矮，屈住對腳坐兩粒鐘係幾差少少。下次去試下坐餐枱，可能好啲。…查看更多

第一次嚟，事緣係朋友話佢嘅食物味道唔錯。喺門口望下餐牌，見佢午餐都大概有十幾款，應該點都揀倒嘢食嘅。。。結果唔係無嘢啱食揀唔倒，而係有3個餐都想食，唔知改棄邊兩樣啫最終揀咗是日鮮魚配蔬菜馬鈴薯，貪佢有神秘感，希望上枱時有驚喜。點餐係要自己行去，午餐配沙律同飲品(我叫咗英式早餐茶)，買飛後就可以坐低等侍應送餐。沙律細細碗，菜都新鮮嘅，不過啲油醋汁好酸。主菜上枱時真係有驚喜，舊魚好大塊，連皮一齊炸，連啲配菜都係煮得啱啱好。魚只係用鹽醃咗，點少少沙律醬已經好好味。英式早餐茶係川寧牌，我覺得茶味淡咗啲，可能我真係飲得好濃嘅茶。呢個餐$98，無加一，餐廳亦無特別催促或者限時，令我有個愉快假期，性價比贏晒。…查看更多

幫朋友慶生，揀咗呢間大家都未食過嘅嚟試。當日仲要千叮萬屬大家唔好去錯第二間，因為太子有兩間同中文名餐廳，只係英文名唔同。餐廳入口喺一樓(地下)，餐飲區就喺二樓。我地嘅座位就喺上完樓梯後左手面嘅一間房，大概有十張八張4-6人枱，當晚包括我地只坐了5枱。雖然係鬆動，但張硬板櫈我就覺得唔好坐。食物選擇都算多。我地3個人叫咗拼盤、芒果大蝦沙律、16安士西冷牛扒(七成熟)、卡邦尼意粉。拼盤有炸蝦，炸芝士條，炸雞翼，炸雞粒同薯條。係夠熱，但好似無咩味道，都係要點茄汁食。沙律嘅芒果係切粒，不過整體狀態更似芒果汁/醬，我起初以為係用嚟撈沙律，但見佢又有油醋汁喎，奇怪。沙律正常發揮，只係我唔太鍾意酸。西冷扒有~1.5-2厘米厚，可能因為咁難控制火喉，所以佢裹面係有一邊係五成熟，不過另一邊幾乎全熟。我地切開一條條share食，但因為我地幾個都唔食太生嘅，所以最終係犧牲咗最生嗰條西冷肉。卡邦尼意粉好creamy，撈埋流心蛋一齊食好正，不過好快就頂住個胃。亦解釋倒點解佢唔係咁大碟。經Openrice訂位，標明係特別日子：生日。以為餐廳會有人聯絡我睇下有咩可以安排，但原來我諗多咗😄。。。咁問嚟做咩呢🤔…查看更多

同同事中午嚟食飯，有人揸車我當然ok喇！商場有免費泊車，平日每消費滿$200可享1小時免費泊車，最多免3小時。星期六日及假期都有，只係消費額要高啲。平日set lunch有4個價錢，每個價錢都有3款主菜揀。分別係$108、$128、$168同$228，另加10%服務費。套餐包餐湯/沙律、主菜同餐飲。我叫咗沙律、芝士豬肉漢堡飽配薯條、熱咖啡。沙律菜好新鮮，但係個芝麻醬略咸。芝士猪肉漢堡望落去都算厚。芝士似係落鑊煎過，同豬肉融合得唔錯，而且燶檂地幾好食。豬肉漢堡同平時食嘅牛肉漢堡質地有啲唔同，看似打得好爛，又好似濕咗嘅豬肉鬆咁，幾得意。味道係唔錯，有BBQ醬，不過又係濃味咗些少。薯條好熱，攤凍些少食真係可以用外脆內軟嚟形容，唔點茄汁都好好食。咖啡就正正常常，係細杯咗啲。其實餐廳環境不俗，燈光暗暗地，好啱同朋友一路食一路傾計。可惜下晝要返工，唯有揾日放假再嚟過。…查看更多