鄭廿一的个人专页

本身都係Top Blade嘅Fans，而近期發覺佢哋旗下仲開咗一個私房牛扒品牌「War Rooms」，適逢同老婆提早食生日飯，就訂位試試佢。.位置其實就喺Top Blade中環店嘅地庫位，需要事前經網站訂位及留deposit；靜靜哋而且枱同枱之間嘅間距又好好，仲適合2-6人聚會飲酒食嘢傾計。而一個8度菜嘅menu人均都係$780，就質素而言性價比係極高。.而我一開始本住嘅expectation只係一餐「高級x靚」嘅牛扒，但一邊食係一邊超出我嘅expectation – 不論係牛料理本身或者一啲side dish，除咗靚料外反而係食到大廚嘅對菜式設計嘅心思同埋煎牛嘅功力。.以其中一度Dry Aged和牛舌芯為例，外層其實已經煎到一個焦香至帶脆皮嘅程度，但咬入口呢層薄薄嘅焦香一下子就會180度轉為成牛肉Rare程度嗰種淋滑，而再有一種出面食牛舌好少有會嘅彈牙嘅感覺，口感層次嘅急速變化相信係火喉控制十分準確下嘅成果。基本上係每一度菜都會喺口感同味道上俾到你好深刻印象嘅層次感。.全晚最驚艷嘅就一定係壓軸嘅和牛煲仔飯。起初睇到menu嗰陣仲會覺得，都係搞吓啲花款俾個飯你飽吓肚，但係佢一上枱嗰時就知呢個飯真係唔簡單。當佢一上枱我哋聞到嗰浸澎湃嘅香氣嗰陣，仲以為已經立即食得，點知佢一開蓋嗰陣，呢種香係只係單單煲白飯散發出嚟嘅焦香， 而嗰種香氣係以經勝過出面好多靚煲仔飯加咗餸焗出嚟嘅香氣。令當時我哋即刻忍唔住爆咗句「痴線得個白飯都咁香嘅？」然後店員先會再喺你面前加上秘製醬油同和牛粒，再焗多5分鐘先正式上碟。基本上呢個moment已經香到唔識講，而食落口梗加係高潮 – 其實牛反而唔係好重點（當然牛嘅油脂經已滲晒落飯度），反而係個飯，除咗牛油香之外仲帶少少甜嘅醬油味撈埋係剛剛好，連埋飯味3者係好balance，唔會有是旦一邊特別搶出嚟；而平時食煲仔飯最緊要係個飯粒吸收咗味道之後都仲夠爽身、粒粒分別，而呢度除咗做到呢點之外，每粒米仲會做到一種好水潤同飽滿嘅口感，係從來都唔會喺出面嘅煲仔飯食到，但明明呢度係食牛扒嘅…….酒水可能係會價錢較高啲嘅一環，但相信佢哋都係放啲靚嘢出嚟(雖則我唔曉)。不過佢哋都有一個drink set 係$299包咗一杯wine soda、兩杯Champaine 同一杯dessert wine，一人一set對我嚟講都夠飲了。.…查看更多

通常出佐敦嘅目的就係去飛個靚髮，又可以喺嗰頭搵吓有咩值得食嘅小店。而某日放工飛完髮都成9:00，快快就選擇咗bookmark 咗好耐但未試嘅呢間清湯腩。Bookmark 嘅原因係因為知佢都係少有用新鮮騸牯牛嘅清湯牛腩。一般情況我都會揀食崩沙或爽腩，不過當晚去到已得返普通清湯腩河（$49）食到，無問題照殺。唔駛等好耐有得食，腩嘅份量都幾多，雖然係一般牛腩位但望上去都十分靚仔，每件都帶上適量嘅脂肪位，肥瘦分明。脂肪帶濃濃嘅油香味，肥仔得嚟但又好難忍口，而腩肉都一樣係好濃牛味，無腥羶感，而且咬落唔會有渣，口感爽滑，好食。湯頭嚟講，飲落就係最純粹嘅牛肉牛骨湯味 - 無太多調味料嘅修飾，樸實嘅清甜，仲有一絲絲蘿白嘅清甜味夾雜喺入面。而的確蘿白都已經炆到透晒，吸晒湯汁，呢啲細微位就已顯得成碗粉嘅出色。最後成個湯都差唔多清晒，就我嚟講亦唔會覺得有口渴之感。但最後杯凍奶茶亦有少少驚喜，雖帶尾段少少澀，但整體茶嘅甘香都好突出，唔會太重奶，啱我口味。雖然佢哋仲有出名咖喱嘅食法，但每次見到清湯腩真心唔想錯過....…查看更多

某個唔係好風和日麗嘅下午，入長洲Hea 咗個圈，食吓嘢。入去第一個目標就係呢間熾工房。出碼頭後向左行一陣仔就會搵到。有如長洲版KFC(原來長洲又真係無KFC)，最出名嘅就係炸雞同蘑菇飯，set 價錢大概$50上下，但份量比KFC多。炸雞係即叫即炸，當日雖然係平日，但都坐滿人，等咗大概20分鐘度就有得食，炸雞當然係熱辣辣，標晒煙嗰隻。佢哋嘅雞雞外面層脆皮唔算好厚粉，但都十分脆口，邊咬邊咔咔聲嗰隻，感覺仲無咁乾身，不過雞味就遍淡少少（淡啫唔係無）。薯條係好好食，肉厚薯味濃。而KFC蘑菇飯雖然深入民心，但呢度就絕對係另一種風格- 除咗用靚啲嘅菇之外，厚厚嘅白菌汁就好似極濃香菌味嘅忌廉蘑菇湯直接伴飯一樣，但又唔會太滯口。如果你係白菌控，呢個飯一定啱你。而菇飯本身都配咗兩件去骨雞翼，雖然無炸雞咁正，但亦算係雙重滿足。最後叫咗一杯唔知咩蘋果茶，不甜，淡淡蘋果香，清香茶味為主，好甜之人或會覺得清淡。食完，好飽，但仲有其他嘢要食.....…查看更多

又是一餐工作中的簡便lunch。多年前曾幫襯過珍寶海南雞，整體感覺一般，並無返轉頭。今次再嚟，店舖感覺企理咗，而店內食品一向都算多選擇，不過當然都係會試返海南雞。雞飯嚟講佢都有幾款，分別只於醬汁，今次試嘅係四川麻辣。咁午飯都係正路價錢$48都唔會要求太高，雞都算滑，份量正常，味道是還可以。個麻辣配少少碎花生，帶多咗啲香味同口感。油飯就幾上色嘅，輕輕油香味，整體嚟講算ok，不算驚艷，但以茶記午餐嚟講我已覺過得去。…查看更多

話說上次食完外賣之後，講咗一定會試返次堂食，說時遲那時快，就到時間就立即幫襯多次。上次外賣佢哋有個別菜式唔建議，怕太影響質素，今次終於可以試。首先啲煎炸嘢即場享用，啲口感立即返晒嚟，新鮮熱辣；其次今次可以食到冰鎮咕嚕肉。同區有另一高質黃店茶記都以呢味餸而馳名，其冰鎮咕嚕肉外脆內軟。對比下大澳德發有另一種感覺，外層雖然無咁脆，但爽口感覺得嚟炸粉較薄身，肉咬落係爆汁嘅感覺，配合返個我覺得調味甜感較重嘅咕嚕汁，味道開胃口感juicy。另外幾欣賞係佢嘅大澳鹹香雞，食落似鹽焗雞，但係應該用蒸滑雞嘅方式，食落會無咁乾身；另外個卜卜蜆啲蜆肉都幾大粒，份量多，個汁就蒜辣味香濃。因為今次散叫，本身價錢可能會貴啲，但因為上次消費後會有coupon 送返，面額都幾大，用返又抵食咗好多。當然優惠詳情就要自己了解（利申非廣告）。…查看更多

【#二拾一食記】刀刀刀削削削麵麵麵香港無乜地方食刀削麵，咁啱撞到呢間名都唔曉讀，叫刕舙馫 (音：勵華興）嘅食店，就試試佢。四川麻辣係佢哋嘅主打，成間調味一係四川麻辣，一係唔辣，無得揀。麵係機削嘅，硬係無咗人手嗰種感覺，當然好處係粗幼控制好D。食落算煙韌但我覺得可以再好d. 湯底係牛骨雞骨嗰類嘅清湯，算清甜，唔錯嘅。麻辣就跟配菜上，叫咗牛𦟌，係一粒粒有厚道有𡁻頭嗰隻，口感係好嘅，但食到無乜肉香味，同樣肥牛感覺都係一般般。不過佢個麻辣係好食嘅，麻香惹味開胃，辣道適中，救咗個餸！簡單講，雖然少少貴，但食解吓刀削麵癮，或者鍾意食麻辣嘅，可以一戰。題外話：唔知幫襯時可能新開張，柚面服務勁混亂，不過聽到個負責教人嘅阿姐唔單止無怪D 伙記，仲同佢哋講「唔緊要，慢慢學」，值得一讚！…查看更多

秘魯菜夠特別，日式秘魯菜更加係聽都未聽過🙈上網搜一搜，由於曾經有好多日本人移居秘魯，因此發展出呢門咁特別嘅菜式，以酸辣為主，但係口味清新唔會有東南亞菜般嘅重口味。而同事味道層次感豐富之餘亦唔難食出好多其他地方菜式嘅風味。Tokyolima 嘅Brunch Set，只限周末供應。話就話係Brunch，但份量多到嚇死人，4道前菜2道冷盤1道主菜加甜品，比擬一餐豐富晚餐。頭盤中先來嘅炸雞同冷麵沙律，好食但不算重點，喺度就唔多講了。然後嚟嘅沙律「T-3」，就好似佢形容咁係一道如颱風般刺激味蕾嘅菜式- 沙律入面用唔同嘅材料及調味做成多重口感，時而爽時而香脆，一時係醋汁味道然後又食到材料嘅甜味，啖啖驚喜，真係非常鐘意！另一道Lomo Saltado 係一味墨西哥tacos，用上超濃嘅薄荷醬，味道刺激未必人人受到，但換著我鐘意食呢隻醬汁嘅就覺得好爽了！然後兩款刺身H&M 及 Ceviche Clasico - 前者係吞拿魚及油甘魚，特別在刺身豉汁加入柚子嘅酸甜味道，同樣開胃；後者係秘魯傳統菜，用極酸嘅醬汁格硬「醃熟」鮮鱸魚肉，但同時魚肉又不失刺身嘅鮮甜。呢道菜仲加入咗秘魯出名嘅Tiger's Milk，開頭以為係老虎奶咁犀利？原來係一種青檸及魚湯等混成嘅湯汁......其實食完以上前菜已經好飽，不過仍然無減去我哋食主菜嘅胃口，因為真係好好食👍🏻加錢要咗一款Grilled Black Cod，燒魚扒又滑又鮮甜，不過有啲似香鮮醬嘅醬汁本人就覺得甜得滯，所以都係鍾意就咁食個魚多啲；而另一款煎牛扒Picanha，牛後腿肉牛味濃郁，外皮已煎到微濃嘅香脆口感，5成熟淋得嚟仍保留嚼勁，係一塊十分高質嘅牛扒！最後嘅甜品焦糖香蕉船伴玉桂蘋果，好味，但已經好飽了🙏🏻總括嚟講，人均約$500 消費，可能有少少奢侈，不過的確係試到一啲重未食過又高質嘅菜式，過程仲可以一路研究係咩嚟，係一次好好嘅經歷👍🏻👍🏻👍🏻…查看更多

話說公司附近已經越嚟越無啖好食，喺近月積極開發新飯堂嘅時候，誤打誤撞入咗呢間上海麵店，成為近期新寵。午餐除咗選擇多(麵食、客飯，水煮魚都有），價錢亦ok (~$40-$60)。近來試過自己就最鍾意就係佢嘅炸豬扒酸辣湯麵！本身湯底微辣醋味較突出，易入口又幾開胃，麵身初頭會較硬，但食一陣吸咗湯就啱啱好，唔會好似出麵咁好快就變咗一pat 糊狀咁。個乾炸豬扒仲好食！香口之餘又唔會太乾身或太油，咬落去外面脆脆哋而入面嘅口感仍非常好，真心有驚喜！不過，慢工出細貨，如果趕時間要食個快lunch 嘅，就唔好喇😅😅 …查看更多

是夜隨機喺網上搜尋附近有咩推介小店，而一向鐘意食牛肉麵嘅版主好自然俾「青藏牛肉麵」呢幾隻字吸引咗，見評分又唔差，即管嚟到錦屏街呢條北角嘅隱藏小巷試一試。未去過青藏，唔知何謂「青藏高原」風味，不過一入門的確傳嚟陣陣孜然嘅香氣，可能就係所謂高原嘅味道。睇睇餐牌，猶豫之下想叫價錢貴啲嘅羊肉扁麵 - 可惜唔知係咪夜已深，要乜無乜 🙉唯有叫返牛肉拉麵先試試佢。一上枱，好似唔駛錢咁多嘅芫茜䓤呈現眼前，對於鐘食多青嘅我自不然覺得正。其中一樣出色嘅係，湯嘅熱度真係滿分，直至食完成碗都仍然係熱度十足。湯頭似一般牛骨湯味，尚算青甜，而中間仲夾雜小小羊肉羶味，相信唔食羊嘅都可以接受，但鐘羊嘅難免覺得唔夠喉！牛肉份量算多，食就一定食得飽，不過肉味自然都係一般，加上熱湯嘅關係，唔駛一陣牛肉就變得過熟而有𡁻頭。拉麵掛湯還可以，只係麵質軟淋，完全無爽口彈牙嘅感覺，可以話係扣最大分數。好彩，蘿蔔又救返碗麵少少。其實未煮得入味，好彩本身蘿蔔夠甜，亦煮得夠淋身，又加返少少分。$39 食碗麵，又無太大追求，個人覺得食吓無妨。有人話店完態度差，的確係無乜禮貌，不過街坊生意，食客又似係習以為常，所以都無謂過份追求喇👍🏻…查看更多

兒時對於紅磡美食的記憶最深印像的便是加太賀 - 一個個大紅燈籠高掛，遍佈整條街巷，令人真如置身日本的感覺，到時在仍然很深刻。不過現在好吃的日本菜開到成行成市，加太賀質素下降劣評如潮，昔日風光不 再，反而該條窄巷現在卻開滿了各式各樣的美食，是一個尋寶的好地方。而今次便正正遇上這個驚喜 - 全球美食。向來找尋平民美食都是小弟的嗜好，因相信香港藏著很多街坊生意、價廉味美的餐廳，全環美食亦乎合這個條件。一個set lunch 連沙律及餐飲亦不過$40-$50，份量十足美道超埴。先來一個薯仔沙律，味道是很香的蛋黃醬味，作餐前開胃小食份量剛剛好。因為<星星>熱的關係(其實都無乜闗係)，order 了一個炸雞意粉。雖然表面炸得有點過燶，但亦因此皮炸得非常開脆，上枱時還不住冒煙，熱辣辣的非常吸引，抵食夾大件。白汁意粉的味道也不錯，但下次會比較想試肉醬味的。女友order 的是手打漢堡，亦同樣份量十足。漢堡十分厚身，咬落啖啖肉，十分滿足！不過口感就比較乾身一點，另外如多些薯條會更加豐富。最後雖然沒有拍照，但女友大讚這裏的熱奶茶較香滑！原來奶茶亦是這裏的招牌之一呢．．這種街坊小鋪美中不足是座位較小較窄，不過服務態度相當好，就當作是街坊小店的一種特色吧？…查看更多

『滄浪亭』是一家位於紅磡的上海麵店。標題之所以說是『表裏不一』的原因，是每次小弟經過此店鋪時看見其『滄浪亭』的店名，一個怎看也看不明白的Logo，再加上其時尚格調的裝橫，總覺得和傳 統的『上海麵』顯得格格不入！後來查看之下，方發現原來於蘇洲的確有一名勝為『滄浪亭』，同時於上海一帶亦有『滄浪亭』的連鎖食店！雖然香港和上海的食店 應無大關係，但大概亦因此而命名。因為想吃一點較清淡一點的東西，於是乎便選擇了 『滄浪亭』作為午餐！其實早前已嘗過其豬扒上海麵，發現有驚喜！今次便決定再試試其他選擇。落地玻璃的設計，看不明白的LOGO.....室內時尚格調的裝橫，只有約 4 張枱，坐位不多麵的選擇很多，每款價錢約$38-$48不等，亦有如醉轉彎等不同小食今次分別叫了菜肉雲吞上海麵及肉絲煨面。雲吞中，小弟獨愛韭菜雲吞，因為覺得味道較香口。而『滄浪亭』的菜肉雲吞正為韭菜雲吞，啱我口味！它們的麵是正宗 的上海幼麵，入口感覺需較為『林』身，但入口卻十分滑溜，不會有糊作一團的感覺。醬油湯底則偏向清淡，如果喜歡濃口味的人可能未必欣賞。不過重點在其菜肉 雲吞！皮薄之餘，塞了滿滿的韭菜及豬肉，而且豬肉味道十分濃厚，應在調味上下過心思！另外的肉絲煨麵亦十分足料！煨麵配上與醬油湯底截然不同的肉湯 (應該是雞肉雞骨等淆製而成，但女友卻認為有點像魚湯的味道) ，雖較油膩，但味道叫十分清甜 ，大讚！還有一點很重要的是，兩碗麵上菜時都十分熱辣辣，增添了其美味！兩個人加起約 $90 的消費，實在抵食！…查看更多

Amour Cafe 可說是我的『飯堂』之一 ---- 但凡與女友路經尖沙咀佐敦一帶，總會想到這裏品賞它們的意粉......原因十分簡單，因為又平又好味！之所以說它是名不虛傳，全因本身 Amour Cafe 於Open Rice 早已享負盛名！位於佐敦的『搵食』核心地帶，Amour Cafe 的破舊裝修與它的食物可說是格格不入。另一方面要注意的是，它們出菜的速度實在非常慢...........不過好的食物是值得等的 一個餐連餐湯、意粉、甜品及飲品大概$50-$70 (有一點很重要，加底唔駛加錢！)消費，以它們的質素如果位於如旺角與的旺區絕對能賣多若20%-30%的價錢！它們的意粉汁稠較燶，因此麵條均能充份沾上其口味濃洧的醬汁。配搭方面，米蘭豬扒(或雞扒) 及煙蠔均是我的至愛，尤其它們的磨菇煙蠔意粉大部份時間均是我的必食 item！…查看更多

經朋友介紹，搵到灣仔呢間隱世咖啡小店!!而家starbuxks 開到周街都係，反而呢種小店先飲得出”嘆咖啡”的真正味道！其實今次係我第二次嚟，聽聞店主曾因加租壓力做唔落去, 好彩得到欣賞佢o既投資者/客人幫手, 先得以繼續!! 除咗價錢相宜(Lunch 一個意粉+咖啡大概$50)之外, 味道及質素亦非常好! 意粉除了白汁的味道調得十分好之外, 亦加上了很惹味的黑胡椒長包則稍稍用焗爐烘熱，唔會凍冰冰之餘仲有香脆的口感, 配上鮮味的煙三文魚, 正!因為本人鐘意味道較濃烈的咖啡，因此叫了一杯Macchiato! 店主亦細心解悉咗佢同其他expresso 的不同之處....入口咖啡味道好甘香, 唔會有酸味, 而且甘香味仲停留o係口腔一段時間.....好享受XXDD同場加映, tailor made 的 Blue Burry Muffin。入口鬆軟, 蛋味香濃~店主亦好鐘意同客人傾計, 了解佢哋口味, 係一位有熱情o既店主! 希望多d人知道可以支持下呢d 小店…查看更多

同場試的另一間已另寫食評, 前因後果在此就不多提及了!!而我本身主要就係食呢間博多一幸舍....正宗豬骨拉麵, 叫咗套餐有埋餃子!同樣地試咗啖湯先...第一個反應係, 勁重味, 重點有點"滯"的感覺, 而且o個層豬骨湯ge 膠質極之糊口, 唔太鐘意......食完我仲滯到胃痛添-_-糖心蛋雖滑, 但蛋香味不足.......麵條叫咗普通, 但都係徧硬身餃子係幾香的, 皮夠薄, 換嚟代價係..無乜料XXDDD雖然個湯底真係好濃, 但食完後真係有 點滯, 仲搞到我胃痛咗一段時間...............而對我嚟講整體味道都只係不過不失而以!! 唯有期望下次試其他會有更好表現~~…查看更多

唔試一蘭, 走去佐敦食拉麵 Champion....其實就即係一個專食拉麵的 food court! 大概有8間鋪度?唔記得了....聽聞佢哋會定期鬥高評分, 低分ge 會被out 換一間新的頂上, 亦無深究了...XXDD只知道 7月中 mega box 都會開!上openrice 望過下, 其實間間食評差唔幾, 於是試咗呢兩間, 分別係 <超男> 同 <博多一幸舍>..呢度有 d 特別, 每個人會俾張咭仔你記住你食過乜, 埋單就用佢找數! 而有得食ge 時侯o個個tag 亦會震, 近年幾多food court 用呢隻tag, 幾方便........!!!!呢個係女朋友叫的豬骨湯底拉麵! 試試個淡湯底, 雖話係豬骨湯麵, 但係飲落好似有少少醬油味.....! 成個麵配咗好多芽菜, 我諗係為咗口感爽口 d? 上網做咗少少research, 發覺原來呢種係叫"二郎系式拉麵", 特點正係醬油味, 配以大量菜, 及徧重肥油..XDD 日本拉麵有咁多變化, 今次學到野了!麵條比較粗身, 聽過目的係為咗有更大 surface area 去沾度d 湯汁! 由於我只係食咗一啖的關係, 感覺都幾特別, 麵條夠爽口, 撈埋醬油湯底幾好食很流心的糖心蛋, 本身蛋味好甜, 加上隻蛋係滷過的, 味道幾有層次!總括嚟講, 感覺比同場試的另一間好, 但如果以呢個價錢, 我覺得我哋可以食到一 d 更加好食的! 但如果鐘意食拉麵, 就一試無彷!…查看更多