Milky Foody的个人专页

每次經過呢間餐廳，總會被佢嘅芝士蛋糕吸引住，受唔住誘惑入去幫襯🤣餐廳好適合大班人聚會，因為除咗款式多，一定有啱口味嘅菜式外，份量都非常大碟！The Everything Flatbread Pizza 材料豐富，辣肉腸非常香口。Flatbread焗至外層鬆脆，裡面煙韌。Chicken Madeira有雞胸肉，薯蓉，蘑菇，蘆筍。肉質嫩滑多汁嘅雞胸肉面層鋪上奶香味濃嘅mozzarella芝士，配着特製嘅madeira醬汁，味道一流。薯蓉打至細滑，cream味濃郁。 記得一定要留肚食芝士蛋糕！今次試咗Caramel Pecan Turtle Cheesecake。Cheesecake香滑，加埋面層嘅焦糖同胡桃，及底層brownie，上面再配上特濃嘅朱古力醬，令整件蛋糕口感更豐富，味道更有層次感。…查看更多

餐廳佈置走可愛打卡風，有小屋造型及雞蛋造型座位，又有打卡專用雞蛋cushion，亦有大圓枱，適合帶一班小朋友黎聚會。低温慢煮雞肉沙律 ($78)流心蛋生熟度適中，沙律菜新鮮，醬汁酸甜開胃。慢煮雞肉嫩滑，雖然就咁食略為咸，不過夾着沙律菜一齊食就剛剛好。三文魚生雞蛋飯 ($65)蛋白打發成泡，中間放上蛋黃，造型吸引。三文魚粒新鮮肥美。加入醬油後將材料攪拌，然後加上飯素，口感濕潤fluffy，白飯香糯帶嚼勁。攪拌後大阪燒風八爪魚捲 ($78)雞蛋卷水分較高，口感與實心嘅玉子燒不同。八爪魚大大粒，好有咬口。配上大阪燒醬汁同木魚絲，風味十足。鮮果水果茶 ($48)水果茶好足料，基本上整杯都載滿不同種類嘅水果。凍玫瑰茉莉花啫喱茶 ($38)玫瑰花令茶身帶微苦。啫喱較碎，口感略為硬身。值得一讚嘅係員工好盡責，會不斷幫忙斟水。另外餐廳嘅餐具都好精緻，就連小碟都係雞蛋造型。…查看更多

自從多番自由行/旅行團來港後，以為山頂嘅店舖會多番生意，結果仍然未如理想，平日晚上7時半左右黎到，見到商店已相繼關門，不少餐廳亦已停止入座🙈🙈。幸好呢間餐廳仍未到last order時間😌，而且環境優美，於是決定入去一試。不過如圖所見，餐廳只有幾枱客人。侍應態度親切，先為我地點飲品及送上餐包。寶雲酥羊架略為過火，感覺似吉列羊架。儘管如此，羊架肉質嫩滑多汁，帶微微羊騷味。鴨肉醬寬條麵賣相不太吸引，食落卻有驚喜。肉醬有濃濃嘅肉香，份量十足，食到臨尾幾乎可以啖啖肉醬𢳂黎食。寬條麵似新鮮自家製嘅，口感柔韌彈牙。最後點了甜品朱古力雪糕 & 柚子gelato作結。朱古力雪糕非常香濃，上面仲灑上朱古力碎。至於gelato嘅柚子果味好重好清新。…查看更多

呢間專食海南雞嘅餐廳好貼心，可以不另收費選擇雞胸肉，仲可要求去皮添，啱晒減肥人士😎我揀左雞胸肉，冇諗到呢個部位都烹調得好好，肉質嫩滑，一啲都唔嚡。好欣賞佢嘅甜醬油，送飯一流。油飯好香，唔覺油膩感。跟餐附送老火雞湯，足料好味，冇味精。…查看更多

呢間餐廳從門外看已經覺得好有氣派，裝修別具風格。不但外觀靚，餐廳嘅食物質素都非常高。餐前先食富有香草味嘅意大利麵包配黑醋及橄欖油。Clams ($138)蜆肉十分鮮甜，湯汁帶有濃郁嘅海鮮味，忍唔住將湯汁都飲晒。Braised Ox Cheek ($248)牛頰肉炆煮得非常軟腍，肉味香濃，筋肉分明，鋪在下面嘅薯蓉細滑creamy，加埋炸蒜同香蔥一齊食，口感豐富。Crispy Scale Tilefish ($268)呢度菜賣相就像畫一般漂亮。魚塊上嘅鱗片好有氣勢，咬落非常鬆脆。魚身亦好嫩滑，配着酸酸甜甜嘅湯汁，味道極佳。Tiramisu ($88)Tiramisu口感綿滑濕潤，上等嘅mascapone芝士奶味好重，咖啡香味亦好濃。Cioccolato ($98)朱古力parfait濃郁得好似食緊軟滑嘅朱古力咁，同酸酸甜甜嘅莓一齊食好夾。…查看更多

尚善嘅午市定食走開高檔路線，平均一個餐要200幾到300幾。壽司定食($280)最欣賞帶子壽司，厚身嘅帶子不但有口感，而且味道鮮甜。兩款炙燒壽司經輕輕炙燒後帶出馥郁香氣，增添風味。不過蟹柳小卷則令人失望，外層紫菜太濕而變韌，很難咬開。其他壽司均很新鮮，而且切得厚身，絕不吝嗇。壽司飯水分偏多，食落較粘口，味道則調配得好好，除咗醋外，亦食到甜味。茶碗蒸面層鋪了層膏狀醬汁，食落與蒸蛋很搭配。整體而言，餐廳魚生嘅質素係幾高嘅，不過呢個價錢，應該可以搵到更好嘅選擇😌…查看更多

向來好鐘意呢間山東菜小店，特別鐘愛佢哋嘅燒雞菜飯。今次黎到，試試特色啲嘅山東鹵麵($50)，材料有豬肉片，番茄，雲耳，蛋花。豬肉片肉質腍身，番茄爽甜，雲耳大大片，蛋花唔會太散。麵質軟滑，湯底偏淡。整體感覺好健康清新，一啲都唔油膩。…查看更多

先要一讚霞飛飛嘅員工服務周到，態度親切友善，仲會主動關心我地嘅座位會唔會大風。酒樓嘅環境舒服，裝修別緻，最啱一家人黎聚餐。花素蒸餃手工精細，餡料調味適中。灌湯生煎包外層煎得香脆，皮薄餡多，一咬開，湯汁湧出，肉香味十足。紅燒小圓蹄好有驚喜！大大隻圓蹄燜得好腍，輕輕一切，圓蹄肉便可離骨。至於圓蹄皮則軟腍而唔油膩。砂鍋松茸老豆腐嘅砂鍋size好大，但份量比想像中少🤣。豆腐燜得入味，松茸味道香濃，湯底帶點微辣。去骨樟茶鴨先沾上醬汁，夾在軟熟嘅小蒸包間一起吃，口感豐富。如果要挑剔，就只可說樟茶鴨較為瘦身，如果再多啲油香味就更佳！招牌海皇炒飯夠晒鑊氣，不過配料唔太多，帶點微辣。最尾食個高力豆沙香蕉作結。…查看更多

位於K11 Musea嘅BEP裝修有格調，坐得好舒服。海防墨魚昆布沙律賣相好吸引，材料豐富，食落既有爽口嘅墨魚同青瓜絲，又有淋滑嘅昆布，以及扎肉、碎花生等，好有層次感。沙律醬汁酸酸甜甜，非常開胃。底層脆片記得盡快食，或者先攞起，否則放耐咗就會變淋。泰式生蝦新鮮爽口，醃料醒胃，辣味十足，唔太食得辣嘅朋友就要小心喇。越式豬肉法包嘅包身烘得脆身，材料亦好豐富，五花腩嘅油香十足。可惜整體較為乾身，亦食唔到肝醬嘅香味。…查看更多

餐廳好有bar嘅感覺，好適合收工同朋友飲下啤酒食下泰式小食。“Thaipas”小食拼盤食物質素高，好啱佐酒，個人最鐘意春卷，炸得脆口唔油膩。鮮蝦蟹肉粉絲煲煮得入味，粉絲索盡湯汁，惹味好食。串燒有齊雞、牛、豬，燒得惹味，配香濃嘅沙嗲醬。菠蘿海鮮炒飯炒得乾身，粒粒分明。…查看更多

呢間位於蘭桂坊嘅酒吧餐廳，裝修特色，而且員工非常親切熱情，會好用心咁介紹menu。不過整體黎講，餐廳只勝在打卡或者飲下野，食物質素麻麻。火山熔岩芝士漢堡係餐廳其中一道特色菜。侍應會在客人面前淋上熱熔嘅芝士，芝士從漢堡包頂部流到四周，十分震撼。芝士份量多到點埋薯條都仲有好多剩，啱晒鐘意食芝士嘅朋友。漢堡包嘅包身好軟熟，不過漢堡扒就略為乾同粗嚡。芝士焗龍蝦意大利飯賣相吸引，龍蝦好大隻，不過肉質過淋，可能唔太新鮮。至於意大利飯烹調時間過長，雖然食得出層次豐富嘅海鮮味，可惜口感太軟，似食緊湯飯多啲。脆炸羊肋骨有肉香味，炸得酥脆，佐酒一流。酒方面happy hour時段做緊買一round送一round。Cocktail嘅賣相非常吸引，打卡一流！試咗兩杯，都係水果味偏重，酒精成份較低，啱晒鐘意飲甜甜地果酒嘅女仔🤣Fig blossomIsland breeze…查看更多

Orange Elephant嘅裝修同環境都比起九龍城內街嘅泰國餐廳感覺新淨同舒適。好適合一班朋友慢慢坐下傾下計。原個菠蘿海鮮焗飯味道唔錯，飯粒炒得乾身，配料都唔少，旁邊仲有肉鬆同香脆嘅腰果按個人喜好添加。炸蝦餅好厚身，蝦肉爽口彈牙，口感好好。軟殼蟹則有啲失望，切得太細嚿，而且炸粉好多，偏多油，咬落唔係好食到軟殼蟹。如果可以切得冇咁碎嘅話會好好多。至於生菜包味道幾好，生菜大塊新鮮，肉碎肥瘦比例適中，炒得香辣好食。…查看更多

番茄仔比其他連鎖麵鋪定價貴，但係絕對物超所值。和牛𦟌番茄刀削麵和牛𦟌切得好厚身，煮得好淋，富肉香味。番茄湯好濃郁，食得出有用番茄打成蓉黎做湯底。至於刀削麵嘅麵質滑得黎有彈性，而且好掛湯。輕煎三味鴨番茄刀削麵三味鴨用咗鴨胸部份，煎得香嫩，鴨皮嘅油香提升咗整碗麵嘅味道。飲品方面點了“茶走”，以玻璃樽盛載，設計特別，細看發現原來係聯乘銀都冰室嘅出品。奶茶嘅茶味香濃，加埋奶嘅絲滑，絕對係港式奶茶嘅代表之一。…查看更多

餐廳嘅menu雖然選擇唔多，但係勝在容易保持食物嘅水準！天婦羅蕎麥麵(醬油湯)天婦羅外層鬆脆，裡面鎖住水分，食落一啲都唔油膩。最欣賞天婦羅蝦，size大隻而且蝦肉爽口。蕎麥麵配醬油湯，感覺好健康🤣 麵質柔韌，湯底清得黎富醬油香。…查看更多

呢間餐廳嘅晚市套餐好有驚喜！$148 “滋味小菜孖住食”套餐有齊大大份雞煲/蒸魚加一個小菜，另外加$8有白飯，$15有油菜，$10有特飲，平民價錢但高質食物！個人推薦食黃燜醬雞，性價比好高，以雞煲形式上菜，份量足夠2-3人食。雞件份量十足，配菜有薯仔、豆卜、洋蔥等。另外點了梅菜扣肉煲，同樣大大份，好多肉。梅菜唔鹹，帶點甜味，整體唔會好油膩，送飯一流。除此之外，餐廳嘅一人晚餐亦好抵食，有齊小菜，灼菜，湯，飯，下次黎到一定會叫黎試試！…查看更多