indianajones1028的個人專頁

在新城市L1四圍搵食之際，店內職員忽然遞上餐牌，然後講：「惠顧二人套餐有八折…」心諗：「抵喎…四百蚊就食到龍蝦鮑魚牛柳鐵板燒…龍蝦仲要唔係平價波士頓貨…」於是即刻入座。時間尚早，店內只坐滿五成客人。立即點餐…就更係龍蝦鮑魚牛柳鐵板燒二人套餐啦！呢頭叫完…唔夠一分鐵…即奉上套餐的沙律及麵豉湯！點解咁快嘅…原來通通已經預備好並放在大堂中央的檯上。沙律由於預先加醬調配好，所以我們食嘅時候，菜已經出水…之後等了大概十五至二十分鐘，海鮮類先上菜。兩隻龍蝦size偏細，所以起肉燒煮後所剩無幾，味道亦偏淡。可幸係肉質爽口彈牙，即龍蝦係新鮮貨，加番啲分數。鮑魚同鮮魷都唔un而且好新鮮，不過味道亦係偏淡，鍾意味濃的可能就要加多一點醬油來吃了。海鮮類上菜後，差不多十五分鐘，牛柳才上菜。(有嚴重滯後喎)牛柳亦唔un好味！但如果多一點焦香就更佳。整體份量亦足夠，以平均每人二百多元的消費計，呢餐亦算抵食。…查看更多

係OR睇到好多人嚟幫襯，而我亦未試過吉列豬扒嘅豬扒包，所以專程由氹仔坐的士過嚟新馬路試...可能平日關係，雖然舖內差不多坐滿，但仍然好快有檯。一坐低仲見到有下午茶叫，咁就一於唔好諗...下午茶...豬扒包，西多士...最緊要配凍飲！(外面34度天氣呀！)等咗一陣，先嚟個西多士。一見到佢外表炸得好靚，而放係檯面都聞到佢嘅香味，急不乃待即加糖漿食囉。結果真係好好味！到差不多食完個西多，豬扒包又到。個包好脆...豬扒味道適中，吉列嘅外皮亦唔厚。所以咬落好正，味道配合得幾好。最重要加埋凍飲真係無得頂！絕對係係新馬路行街嘅一個優閒加油站！一定會再嚟...因為見到好多人叫鐵板扒類...望落就好正好想試，唯有下次啦！…查看更多

今次出發到澳門之前，已經聽到朋友熱烈推介此餐廳，於是乎就預先訂檯，怎料晚餐已經訂到九月...幸好午餐時段仍有位。由於過關需時，加上銀河穿梭巴士個"替更"司機唔熟路，差點令我們趕唔切到餐廳攞位，好彩我哋上個月嚟澳門時已經到銀河"探過路"，所以就算架"穿梭巴士"沒有在JW Marriott門外讓我們落車，最終我們都得趕到去品嚐呢間餐廳的美食！一嚟我們就先取至愛的刺食及凍貝殼海鮮類，刺身選擇唔少，但我至愛的就只有三文魚，八爪魚及北寄貝。三種都非常鮮甜，尤其個三文魚，真係停唔到口。另外，凍蝦又大隻又爽甜，亦吃了很多隻。不過，蟹腳就強差人意，雖然酒店很細心地將蟹腳的殼預先剪開...不過，亦因為咁令到啲水入咗個蟹肉中，流失咗鮮味。希望佢哋可以改善。至於熱盤...主要以西式為主，中式就有湯麵及點心...亦有燒味，湯麵是即場手拉的...我太太試過，話幾好味。同時，一直亦有片皮鴨提供，味道就一般，但還是可以的。甜品方面選擇唔算多，蛋糕款式亦少，不過，味道中規中矩。而場中有軟雪糕機...味道分別有雲尼拿，士多啤梨及朱古力，亦有兩溝的味道選擇。個軟雪糕就反而有驚喜，奶味夠濃，香味亦很好，食落好rich！必吃之選。飲品除了果汁(通常兩種...當日係西柚汁及雜苺汁)，最特別係有港式奶茶，以我咁鍾意食奶茶嘅人嚟講，佢哋沖嘅奶茶...茶味已經算唔錯。好味道！除了以上所講...場中有三個大玻璃凍櫃，全部裝滿維他紙包飲品給客人隨便選擇。總括嚟講，呢間餐廳嘅浦飛係銀河渡假區嚟講，已經係必試之選了！…查看更多

記得上一次嚟到8，品嘗過佢嘅點心之後，已經決定要再嚟過。不過，其間試過多次嚟澳門都因為沒有訂位而緣慳一面。今次下定決心...一個月前買定船票...訂埋酒店...就Book定檯啦！由於暑假關係...我哋搭Lift時...全部有三批人都係一齊去8食晏的，真利害！由於人多，而門口姿客就得一個，所以要等佢遂批遂批人帶入去...幸好佢哋都算有效率...最終亦很快安排到坐位。一坐低...立即揀點心啦。落完order之後，待應好快就送上餐前小食。剛試過個餐前小食之後...點心就已經陸續登場...唔使多講，所有點心都很有水準。而我個人就最喜歡金網叉燒酥，外面酥皮香脆，裏面嘅叉燒餡料很好味！而手袋酥嘅外皮就鬆化...亦好好味！除了點心，亦叫了燒腩仔及西蘭花炒鴛鴦帶子小菜品嘗。兩樣都做得好好味...燒腩仔固然皮脆肉香；而鴛鴦帶子中，以沒有炸的比較食到鮮味！但仍然係煮得好好嘅菜式。食飽啦...但仲心思思想食啲嘢添...一於叫甜品啦。大熱天時...最好食凍嘢...就叫個"鴛鴦金魚凍"啦！(點解8咁多用金魚款式嘅食物嘅？)一條椰子味，一條芒果味...好啱凍食。估唔到仲加球椰子雪糕！好味到不得了。食到飽飽了...忽然待應奉上奶茶及甜點...(係喎...上次食到最尾有奶茶跟葡撻，唔記得添！)雖然已經好飽，但印象上次啲奶茶好好飲...所以都要飲！味道跟上次一樣...好濃滑，只是略甜。至於個甜點都幾好，但我都係鍾意個凍金魚多啲！總括嚟講，抵食好食！應該有機會會再嚟！…查看更多

今日放假經過新城市...見到正斗已經開咗，於是乎就埋去攞位。坐低見到啲裝飾幾好，都算整潔，檯與檯之間空間合理，唔迫。環境都攞8/10分嘅。侍應招呼都算有禮貌，主動幫我們添茶很多次。叫了食物...雲吞麵(大)，炸鯪魚球及干炒牛河。雲吞麵最先到達。所謂大嘅雲吞麵，Size亦只係普通，有六粒雲吞，一啖一隻嘅大小，每隻雲吞有一隻蝦。先講味道，聞起嚟的確好香，麵亦夠爽口。可惜唔夠味道，無論係個湯底同埋個雲吞，我真的覺得好淡添。至於炸鯪魚球，上檯時係熱辣辣的...味道尚算可以！值得一試。到干炒牛河，又係唔得。今次係太油，上菜時已經見到碟上很多油，食嘅時候已經嘴唇沾滿油，而牛肉亦唔夠嫰滑。總括嚟講，食物質素仍有待改善，希望過一排會好啲啦！…查看更多

嚟咁多次澳門都未去過三盞燈行逛，所以今次專程過去。之前搵過呢區好多食肆選擇，不過以緬甸菜居多，我們興趣就一般。本來想去一些心儀的餐廳，但就有啲無開門，有啲又太多人，最後因為肚餓唯有走入余榮記。講真...見到餐牌嘅價錢都覺得...幾貴下！不過，佢又勝在好多選擇！於是乎係云云嘅眾多選擇中，點了蟹子日式炒飯及咖喱牛腩飯。蟹子日式炒飯要MOP$51，雖然貴...但味道就出奇地幾好。好香，蟹子又多！咖喱牛腩飯亦有驚喜，MOP$38又唔貴，但咖喱幾香唔太辣。牛腩亦淋...仲有幾多牛筋。好好食！由於無套餐，飲品要另叫。$16一杯凍奶茶...味道仲要一般，呢樣最唔抵食！…查看更多

由於今日澳門實在太多人，好多地方已經搵唔到位食嘢，好彩今晚仍然可以去到呢間心儀既餐廳食晚飯，都算無令今次行程失望。我們專登夜一點才到，在事先沒有BOOK位的情況下，仍然可以俾到位我哋，好好彩。餐廳環境就一流，雖然我們夜了入座，但餐廳內仍然有八成滿，証明真係好受歡迎。由於我們先前在澳門市內觀光時已經吃了不少東西，所以今晚不是叫了特別多的食物。首先嚟個凱撒雞肉沙律，唔單止蔬菜新鮮，配料豐富，最驚喜係啲雞肉係手撕再經調味，所以不會太乾，令整個沙律味道好好！得快就吃光了。之後上了南瓜湯，湯的質感好creamy，味道唔濃偏甜。而且，湯中放有一隻預先煎熟的帶子就得特別。帶子被巴馬火腿卷著，帶子很好吃，跟個湯好夾。然後來一客最多人叫的carbonara意粉，這個意粉真係呢間餐廳的特色，即時係我們眼前製作，然後捧上檯面享用。味道就比較濃及鹹，不過仍然可以算得上好味。Pizza就點了芝士蘑菇香腸，個Pizza好薄好脆，配料很香及濃味，跟Pizza好夾，真係非一般的Pizza。又係很快吃光了。跟著就係侍應介紹的蔬菜焗春雞，本來打算點豬扒，但因為太夜竟然已經售罄！ 估唔到個雞可以咁嫩滑，同埋啲蔬菜可以咁好味！縱使我哋已經好飽，但都想吃光它。本來一心想試的Giant Sundae，最後因為連最愛吃雪糕的兒子也太飽而不能再吃，所以唯有下一次再來品嘗吧！…查看更多

咁啱路經附近，見門外人頭湧湧，都諗住唔使入去坐啦。點知剛啱有位，所以即時入去坐定定，等食。先叫咗個雞翼拼蛋撻茶餐，兩隻雞翼大大隻，賣相吸引。點知咬落去…生嘅？！即時叫伙記換過，佢哋又肯換過兩隻新嘅雞翼。讚！至於個蛋撻，好好味，甜度剛剛好，蛋漿亦唔稀。讚！食完唔夠喉，於是食埋個菠蘿包，個菠蘿包真係正，皮脆包軟，配奶茶簡直無得彈！難怪門外排長龍買啦！再讚！…查看更多

今日去接夜機，所以決定入去機場食下嘢。上網見到阿鴻有分店，一於就揀佢啦！入到去已經七點幾，全店爆滿。好彩只等了一陣就有位。快快趣叫嘢食…三拼一碟﹙鵝片，墨魚同鵝掌﹚，鵝肉粥，蔡瀾撈麵。總括所有食物都係水準之上，比美總店。但價錢貴同份量少亦是事實。以後都係去番總店食好好啲啦！最後要提下杯紅豆奶茶，好得！紅豆嘅甜味跟茶嘅苦澀味出奇地夾。推介！…查看更多

今日途經附近，本想去鴻運車仔麵，但嗰邊人山人海，所以轉場嚟呢間。叫咗個三絲炒瀬粉及車仔麵，炒粉有鑊氣但無味，而個車仔麵就又係原全無嘅！最離譜個凍奶茶，無茶味似飲奶水。…查看更多

選擇平日北上行街食嘢就係貪無乜人，之前試過佳寧娜嘅盛八，超正！於是乎今次再試第二間日式放題！揀咗附近呢間萬膳！我哋十二點前入座，得我哋一檯人！(點知一路坐到成下午一點先再有人入場)食物方面叫咗刺身拼盤，賣相可以，但食落鮮味欠奉！炸物，燒物都還可以！味道OK！雪糕都得，尤其個芝麻雪糕，啲黑芝麻超香！最唔掂就係飲品，選擇少，而汽水更係枝裝汽水倒杯，所以無氣！最後埋單108，可接受，但我寧願加多幾十去返盛八食啦！…查看更多

星期六行到去海運大廈，要食晏搵邊度好呢？諗起好耐無去Dan Ryan's...於是乎就一家三口去食。去到好彩唔駛等位就直入...坐低等叫嘢食...但個個侍應都好似好忙咁四圍"衝"住行，實在好難搵到一個人去幫你。最後我哋終於叫到嘢食啦！每次嚟都一定叫凱撒沙律，真係好好味！一試再試！主菜分別係Ribs拼roasted chicken及蜜桃豬扒，估唔到個雞同豬扒可以咁JUICY同好味！推介！另外，甜品係Brownie拼雪糕，唔駛講，至好味！下次可以再試！…查看更多

又一次因為菜生之名去試食，結果如題。叫咗蝦子撈麵，淨震吞，淨水餃，淨豬手...結果：蝦子撈麵個麵雖然唔係機制，但麵身唔爽，蝦子唔新鮮。最弊就係碟麵嚟到已經凍啦。淨雲吞水餃就叫做好些少，但雲吞又比水餃好。不過，食慣香港雲吞，澳門嘅都可以唔抱咁大希望囉。豬手又係唔入味，唔好食。或者因為太多人去幫襯，所以食物水準未能保持啩？但下次唔去囉！…查看更多

一心諗住去氹仔喜蓮食早餐,係酒店坐的士去到先發現無開門！極失望之制，個的士哥哥話有好介紹，跟著就車我哋去附近嘅余榮記，佢話佢哋啲的士大佬好多都係嚟呢度飲茶。到達時已經見個舖頭人山人海，可能今日又係澳門回歸假期，所以人都特別多，好彩都係等咗一陣就有位。今餐叫咗雪菜肉絲米粉，火腿腸一丁，豬扒一丁，餐蛋治，奶茶及華田。全部嘢食都掂！尤其雪菜同個豬扒！早餐之選。埋單$93，算貴。但我哋如果係酒店三個人食都要過百，但質素一定無呢度咁好。第日係氹仔酒店住又多一個選擇啦！…查看更多

今日為咗同老婆慶祝生日，專程嚟買甜品返屋企食。我哋買咗人氣法式焦糖燉蛋，朱古加藍苺蛋糕，法式千層鬚，焦糖雲呢拿蛋糕同埋Tiramisu。我個人最鍾意焦糖雲呢拿蛋糕，好香好味。至於個法式焦糖燉蛋，其實都做得好，可惜面嗰層焦糖燶咗，影響口感有啲苦。不過，下次依然會再幫襯。（希望到時唔好再加價，因為宜家$40一件都好貴囉！）…查看更多