辣椒小姐的个人专页

見而家時勢咁興食牛火鍋，等我又貼下潮流先。 同男友成淩晨12點先嚟打個邊爐，我都係第一次。店面好細但裝修特別，牆身以油畫做裝飾，畫得幾靚架，另一邊就係雜貨店咁樣，好懷舊呢！呢度緊貼國内潮流，用iPad 自助下單，讚呀616呢度好專一架，除咗牛之外，其他配料選擇唔多，所以記得要同牛魔王嚟食，否則朋友有機會只可以睇住你食。而且每碟嘅份量應該係預設1-2人嘅份量，唔會超過10片，好適合2口子，可以叫好多但又唔會怕食唔哂。呢度牛嘅部位分好多，啲名都好盞鬼，咩匙柄，牛坑爪，牛駝峰真聽都未聽過，全部嚟一份吧，但千其唔好問邊碟係邊碟,小妹唔識分， 只可以話咁夜食啲牛都咁新鮮，早啲嚟應該會仲好。只係牛骨湯底好弱，冇咩味，如果再重牛味啲會再好啲。另外叫咗1set 3支616自家品牌原漿啤，個後生仔同我哋講話駛唔駛試咗一枝先，佢話唔係人人接受到，講到咁，我哋當然豁出去，照嚟3枝，唔掂最多猜咗佢啫。 其實佢係可以接受嘅，男友話帶點米水味，好特別，後生仔就同我哋講每次嚟貨口味都有啲唔同，這就是手工啤嘅奧義。最後埋單係$424，唔算貴，以後又多個沙田友宵夜好去處…查看更多

辣妹一向留意食辣嘅餐廳，不論高檔餐廳，小館甚至國內嘅都會食，稻成亞丁都有留意，適逢約朋友係圓方行街，便順路一試。店面唔算好大，裝飾中規中矩，我同朋友點了烤羊腩，水煮魚片，川滷麵，同龍抄手。烤羊腩$158如此鮮艷的烤（炸）羊腩，太過人造色素了。口味還可以，免强食到8成。跟住嚟嘅係水煮魚片 $168呢個我唔識形容，係咪我哋太早嚟定係我哋冇叫桂花或者龍躉呢啲貴嘅魚，水準何其差，厚切帶鱗嘅魚肉(應該係鯇魚吧)已經煮到老哂，堅硬而冇味，仲衰過阿媽煲完湯攞出嚟果啲，我同朋友食唔到一半再嚟嘅係川滷麵 $82睇相唔知大家估唔估到係咩，雞肉同雞蛋炒完一pat咁撈埋啲紹菜放係個麵上面，湯底係甜醬油，麵係粗過意粉似油麵咁，川滷麵呢3隻字除咗麵呢個字之外，完全跟個名冇關，我夾硬食咗半碗，朋友食咗一啖就放咗係隔離吉枱，唉！難為個侍應仲問我係咪唔好食，你想我點呢！最後嚟埋龍抄手 $48好彩呢個叫好啲，名同樣係有關連嘅，我一個人食咗4只，朋友咩心機都冇哂，食咗2只，這個口味還是可以。咁就$531蚊，我都未試過食川菜會好似冇食過嘢咁，超失望，我都唔好意思同朋友AA制。…查看更多

難得跟老死食個午餐，當然唔想趕住食又要趕住交枱，係OR 搵到Grab, 午市餐牌啱口味，又唔貴，即管試一試。唔知係咪樓上鋪嘅關係，鋪細細得3-4張枱，open kitchen，老死未等到我上去已經叫哂嘢食。。。一客沙律同一客burger，餐飲叫咗2個帶蜜桃味嘅香料茶。Caesar Salad $68份量夠2個人，而且啲包好好味，唔會太多Caesar 醬，唔太漏。。。魚柳burger $88burger個包鬆軟，魚柳炸得好好，唔乾又唔厚粉，加埋啲薯條，冇得輸。蜜桃味香料茶 free呢個茶唔錯，淡淡嘅蜜桃味好清，正好對沖剛才邪惡嘅薯條呢度由於枱位唔多，建議大家先打嚟book，否則有機會白行一趟。…查看更多

終於收工，成11點夜媽媽又見肚餓，朋友話有度食雞煲唔錯，環境好又有得拍車，於是踩油向旺角進發。牛薈位於花園街界限街附近，最初朋友講咗好耐，我都唔知係咩位置，最後佢話係車房酒吧果邊，咁我就知啦。呢度勝在全街錶，靜中帶旺，餐廳門口有樓梯上2樓，可能前新係酒吧，所以特設吸煙露台位，而且餐堂單邊落地大玻璃，仲可以開窗，超通爽。朋友話個雞煲好食，就叫咗雞煲加辣，再叫咗啲手打丸，雲吞，稻庭烏冬，手切牛同響鈴。雞煲果然唔錯，夠辣，仲越煲越辣。啲雞都幾好，唔柴。係未落湯之後朋友話落哂啲烏冬落去撈汁，一食落口，吸哂辣汁嘅撈烏冬不得了。落湯後用嚟食響鈴都好正，再食埋雲吞同手打丸，大滿足。不得不提，呢度個調味盒好靚，成個手飾箱咁今餐埋單唔駛800,因為9點後有折，唔錯。…查看更多

做一日閒人嘅辣椒，夜晚11點幾仲未食飯，決定去厚福街碰碰運氣，睇下仲有咩食。行過見到有間魚生飯仲開，賣相幾吸引，就同閒人二號入去鉄火堂坐低。鉄火堂係新開嘅餐廳，店面細細，但整齊企理。 呢度只賣刺身飯，有9款幫你併好嘅刺身飯，亦有自選刺身飯任你併。有選擇困難嘅我當然唔會自選，揀咗極上盛合海鮮，而閒人二號就叫咗火炙特選海鮮。火炙特選 $138唔好睇佢好似細細碗，但賣相同用料都好新鮮，份量好足，好過俾成舊水去食得2-3片薄肉嘅拉麵，閒人二號食完都話好飽。極上盛合 $158呢個不得了，一上枱就覺得佢值回票價，份量同用料同樣超新鮮，碗飯仲要比火炙再大一圈，辣椒盡哂人事搵埋閒人二號幫拖，只係僅僅可以ko哂啲刺身，碗飯我食咗1/3, 真係覺得好唔應該。差唔多食完見舖頭冇咩客就嚟打样，忍唔住同店長講碗飯太大啦，點知佢話怕客人食完唔夠飽會投訴，所以先咁大碗，咁睇嚟下次我要少少飯就夠啦，唔好浪費。…查看更多

難得星期五放假，辣妹決定做一日閒人，搵多個閒人陪我hea食午飯，食飯地點當然係有辣椒出没嘅地方，所以今次去十二味。十二味地方細細，有少少茶記feel, 午市人流算多，八成滿。今餐叫咗夫妻肺片，水煮魚同麻婆豆腐。夫妻肺片 $78份量比坊間涼菜大，口味唔錯，食到有麻有辣又唔過鹹，食材口感亦幾好，算淋，只係偏凍，再常溫少少冇咁重雪氣會更好。水煮魚 $298水煮魚係用鱸魚，份量超大，兩個人冇可能食得哂一個14吋大盤。鱸魚口感可以，部份好滑好彈牙，但有啲就少少梅。 薯粉係好闊嘅水晶粉，口感幾好。整個水煮魚冇咩鹹味又冇咩香味，只算合格。經過一番努力，只係ko咗一半，突然覺得自己好敗家。麻婆豆腐 $68豆腐好滑，應該係百褔豆腐，汁醬做得幾好，夠杰，可以包住啲豆腐，唔會水汪汪，夠麻而且有牛肉碎，係整餐最滿意嘅一道菜。…查看更多

放題一向與我無緣，皆因我食量細，所以什麼放題，什麼自助餐我一向都會say no,。但今次唔同，朋友話有好介紹，係我至愛嘅麻辣火鍋放題，仲要係我先前有幫襯過嘅食肆，咁蝕就蝕啦，一於嚟會一會佢。呢度湯底選擇都算多，有辣有唔辣，我哋當然係選麻辣加野菌湯底啦。 麻辣一上枱，好厚嘅一層油，正呀經理介紹如果想食辣啲，可以參考四川人嘅正宗食法，先行"筆"起啲辣油放係碗度，用嚟點嘢食，辣妹我梗係聽教聽話即做，真係辣好多另一邊個野菌湯仲不得了，超好飲，未開始打邊爐已飲咗半煲湯，菌味好濃郁而且應該冇味精，因為飲完都唔會涸喉。至於火鍋配料，選擇都算幾多，2個鐘任食都未必可以每樣叫一次，而且每樣嘢都寫明份量，等食客心中有數，唔會浪費食物。另外仲有一頁係加錢追加嘅配料，任食得嚟又可以有選擇食好啲，唔錯。我哋今次就加咗錢試佢個牛胸油，呢個牛胸油好好食，有牛味又勁爽口，最後我哋前後追加咗2碟。Round1: 陣容頂盛~~~Round2: 成勝追擊~~~Round3: 再接再勵~~~Round4: 激戰4個round之後真係勁滿足，多謝朋友俾我見識到人嘅極限，因為我round2已經陣亡了今次d 姊妹唔好酒，冇join 酒水放題，下次搵啲飲酒嘅朋友嚟先。不過包嘅飲品都好多選擇，唔錯…查看更多

銅鑼灣人來人往，找吃的並不難，但要找對口味的，有一定難度，透過OR 就可以有方向了。今次找到了友心， 睇介紹係傷心酸辣粉嘅高級版，一般的傷心酸辣粉我係唔會去，但見佢寫係高級版，姑且試一試。店內環境較暗，偏向西式。餐牌也貼近台式咖啡廳，佈滿碎花，女生挺喜歡的。我們這次選了水煮江團及香辣豬手套餐，配凍飲及飯。香辣豬手外觀挺吸引，口味也不錯，辣味還差點點，可能是我太能吃辣吧！水煮江團，魚質跟我在外頭吃的有點不一樣，像似有點腥味，可能是午餐的關係吧！辣味啦，叫了大辣還可以，這次不用再加辣椒了，也足夠我送一碗飯。這餐每人80左右，也不是太貴，還可以。…查看更多

久違佐敦了，也久違泰菜，剛巧路經泰妃，見店面細細，但有7成滿坐，心想應該不會太差，而且午市都幾啱價，所以拉門而入。今餐叫咗豬脾飯同黃咖喱牛腩飯。豬脾做得好淋，豬皮入口溶化，又唔太鹹，唔錯。黃咖喱牛腩飯分開餸同飯，份頭算大，牛腩亦唔算少，至少唔係得2—3舊，而且都算淋，唔錯，只不過我雖然叫咗大辣，但對於我這辣妹嚟講，跟本毫無意義，所以最後還是加入辣椒粉，增加食慾最後埋單100左右，唔算貴，起碼係飽嘅，而唔係出面咁食咗陣風一樣…查看更多

假日好耐都未試過早過12起身，今日早起，決定食個豐盛早餐奬勵自己，落樓下試試cocomo 嘅早餐。這裡地方唔大，先前好多時候都見有人等枱，今日早起，店鋪剛開門，不用等就坐低了，太好啦。這裡早餐選擇近英式早餐，正合我心意，始終港式早餐太悶了！今朝2口子吃了英式早餐跟奄列早餐，這份量不少，性價比挺高呢。雖然牛角包較燶，影響正體評分，但綜合起來，有7分呢，因為沙律菜新鮮，沙律汁酸甜得宜，奄列更剛好7分熟至於英式早餐，不得了，份量拍得住外面嘅Sunday brunch 份量，但價錢只係外面嘅三份一，性價比值有10分。 沙律菜正不再講，除了多士之外，所有都是熱呼呼啲，好好味。咖啡亦甘香，配上熱奶油，一朝早有如此配搭嘅早餐，乎復何求！咁樣都只係70左右，而家任何一間似樣嘅茶餐廳都唔得啦，以後嘅假日早餐有目標了…查看更多

難得好姊妹生日，人唔齊都要食個飯，見個面。主角今次話想食Amico 1890, 我哋當然唔say no.訂咗7點鐘嘅枱，限時90分鐘，姊妹們怕時間緊迫，我到之前已點好食物先行開動，冇計，大家都知我太多嘢做，實唔可以準時到。我哋叫咗幾杯嘢飲，分別係求其，Amico, 垃圾桶同可遇不可求， 啲名都改得幾特別，幾玩味，但味道就冇咩特別，嘢飲一杯吧。前菜叫咗凱撒沙律， 炸魚薯條，水牛城雞翼。沙律算係大碟，而且都算足料，唔係淨係得菜，幾好。炸魚薯條，啲魚炸得幾好，唔乾，只係個粉漿厚咗啲。水牛城雞翼都算合格，如果再濃味啲，再辣的就好啦。主菜叫咗夏威夷pizza, 車打漢堡同墨汁大蝦意粉。pizza皮薄餡夠，只係燶咗啲，賣相差咗啲。呢個漢堡個肉唔合格，冇牛肉味，唔好見佢好大個，只係個包高，錯覺呢！墨叶大蝦意粉大蝦原全冇味，意粉我就覺得較硬身，有咬口，但朋友就覺得係未煮熟。口感呢啲嘢就見人見致，所以大家如果食開較軟身嘅意粉，叫呢個嘅時候就同侍應講煮淋少少。今晚加埋切餅費係806蚊，價錢唔貴，所以走嘅時候門口同門外已有不少人等枱，不過其實啲嘢好普通。給餐廳同其他食客嘅溫馨提示：門口太窄太細啦，情形就好似迫出地鐡一樣，啲人企哂係門口唔郁，叫極借借都冇人郁，唉！希望呢度嘅侍應可以改善下。…查看更多

近來經常要到灣仔開工，仲要係星期日，令人不其然感到沮喪，我想台灣了打開OR search，見有間台灣小吃係附近，就勇往直前了。下午茶主要以台灣小吃為主，太好啦，只可惜得我一個人，未能試埋其他小吃。餐廳當時8成滿坐，冇需等位，原本想點厚多士，但店員話包包未到，所以只好另作選擇，鹽酥雞併荔枝玉露吧。鹽酥雞實在太好食，所以急不及待食了幾舊才驚覺自己未影相，真失禮荔枝玉露一般貨色，荔枝味唔太重，可改善。…查看更多

先前來過吃這家的下午茶，其鹽酥雞非常好吃，今日跟朋友於灣仔偶遇，又正好在大友商場附近，所以提議到這店小聚，訴訴近況。下午2點左右門口有人聚集等枱，不過都算唔駛等好耐就有位，可能跟其店名一樣，小吃為主吧！看過午市餐牌，感覺唔太有台灣小吃嘅感覺，冇鹽酥雞嘅，原來下午茶要230後先有，咁唯有叫午餐啦。我叫咗較接近台灣口味嘅香酥豬扒配肉燥飯跟熱柑桔薑茶，朋友就叫了豬軟骨米線配胚芽奶茶。朋友嘅豬軟骨米線冇咩特別，算係僅僅合格，其胚芽奶茶就唔太對板，似奶水又冇茶味，還怨白白浪費了喝凍飲嘅quota.我叫嘅香酥豬扒配肉燥飯，外表對板，豬扒尚算酥軟，但比起早前食嘅鹽酥雞，差太遠了。至於杯柑桔薑茶，冇咁薑味，帶小小甜，唔太出色。看來還是下午茶較吸引…查看更多

今天又要上班，天呀！何等命苦。下班時已是下午茶時段，相約同樣命苦的同事一同吃個午飯連下午茶了結此日。剛好行過大友商場，同事想食越南嘢，就決定來安南。這裡下午茶價格唔算貴，所以有不少人聚集等枱，我們等了十數分鐘，終於有枱。坐低後，一直冇人執枱，叫了侍應好幾次，侍應還回了一句出哂餐先執，咁你就唔好叫我哋入嚟坐啦！火火哋執好枱後我哋話可以落單，叫完嘢食我問了有咩嘢飲可選，佢又回了一句，"咁你又話落得單"我忍唔住再回佢你出面餐牌冇寫有咩嘢飲選嘛。再火火哋我哋分别叫了香茅豬扒金邊粉同香茅雞翼金邊粉，2杯凍檸茶就算了。香茅雞翼金邊粉的雞翼唔好話香茅味，連底味都冇，湯底亦冇咩蒜湯味，頗失望。不過算啦，都知道係食下午茶而已，不能要求過高。同事的豬扒好啲，有香茅味有底味，只不過係涼涼的，相信係一早做好，都係果句，下午茶就算吧，若然係正式晚飯，我一定打回頭。…查看更多

星期日這個陽光充沛嘅好日子，辣椒我竟然要一大早返工ot, 天啊真命苦。 為咗消感苦楚，順便消消暑氣，放工後決定走入附近最近嘅許留山，感受下被芒果包圍嘅感覺。坐低叫咗芒之戀，好快就送上，一盤有3小碗，芒果水晶粉，芒果糯米糍同芒果小丸子。唔知係咪我太out, 少食甜品，亦好耐好耐冇嚟許留山，覺得佢哋嘅出品賣相好好，好吸引。芒果水晶粉芒味濃郁，粉QQ的，好味。芒果糯米糍保持水準，至於芒果小丸子，辣妹一向對湯丸類嘅物體冇咩好感，尤其係冇餡嘅，就更加唔like, 所以完全放棄小丸子只飲咗芒果汁。但整體唔錯。食完之後成個人舒服哂。…查看更多