siuchisum1990的个人专页

友人一向奉行多菜少肉, 健康D又環保D. 所以今日去食BBQ我地都叫咗好多蔬菜類. 雖然呢間係做川式串燒, 但唔會清一色淨係得辣辣肉串, 而係有好多唔同款式可以選擇!我地叫咗都好多食物, 比較喜歡的如下:- 燒日式一口甜薯 - 甜薯係一口一粒, 個皮好薄, 黑忟忟外表一D都唔吸引, 食落就有驚喜! 裏面係香軟甜薯肉, 係甘甜的味道, 一粒連皮食, 咬落去暖暖地, 口感好好而且味道一流! 我會比個5*- 燒四季豆 - 一串都有好多條, 四季豆沾上四川粉同孜然粉好惹味, 咬落脆卜卜又唔會乾- 燒菠蘿 - 厚切菠蘿連皮燒, 咬落暖心而且好多汁, 係超香甜的菠蘿味, 我同友人都好鍾意- 燒車厘茄 - 車厘茄平平無奇, 但原來用來燒係好好味, 燒完的車厘茄裏面個心軟棉棉, 咬落去D茄汁流晒出來, 酸酸地好易入口- 原條燒黃立倉 - 魚皮燒到香脆, 魚肉都好夠鮮味軟滑, 佢配埋檸汁同埋酸甜汁, 我自己覺得加埋D汁更清新好味!其它食物都燒得唔錯, 雖然食緊BBQ, 但自我感覺非常健康, 大家都不妨可以試下多菜少肉餐單啊~! …查看更多

本身Lunch 時間九龍灣附近已經好多人, 加埋落雨就更加唔想落街. 所以今日決定叫外賣上公司食. 呢間吉吉點之前堂食已經試過一次, 質素唔錯. 後來見佢有做送外賣, 所以今日試下叫. 手機落咗單, 等40分鐘左右已經送到上黎公司喇.一個人食唔到咁多野, 叫咗個老火湯, 蝦餃燒賣同一個鳳爪排骨飯. 老火湯好多料, 而且飲落夠火喉夠味, 飲得出真係煲出來無味精, 而且冬瓜好啱夏天飯, 好消暑呢~ 蝦餃燒賣可以叫半份(2粒), 啱晒我呢D鍾意獨自嘆點心的人, 可以食多款. 兩款都好飽滿足料, 蝦肉都好彈牙, 雖然話係外賣但送到上黎個皮無爛亦都無淋patpat, 質素都keep 到! 鳳爪排骨飯 - 飯粒夠爽口而且都好香, 值得一讚係豉油會另外附上, 唔會浸到淋晒. 整體來講外賣質素都可以keep 到, 實在難得. 重點係, 叫夠$60就可以送貨, 自己一個人食少少野都OK.…查看更多

放假前夕係屋企食完飯做乖乖女, 煲完電視劇後, 通常都鍾意約附近班朋友熱宵磨一下. 約下約下已經成為咗習慣, 而安安燒就係我地宵夜熱點之一. 我地通常夜晚11-12點會去食, 一黎貪佢隔離有標位可以泊車, 二來鍾意佢款式夠多可以散叫, 叫幾多都得. 三黎貪佢有折, 哈哈.宵夜唔太肚餓, 都係大家坐埋飲杯野傾下計. 今日朋友車我黎, 可以飲啤酒大解放. 本身想叫Hoeggarden, 不過我發現佢最近多咗隻新啤酒叫"Strongbow蘋果酒", 即管試下. 呢隻蘋果酒應該係專為女仕而設, 飲落好清新, 帶有蘋果香同有少少蜜糖味. 雖然佢係啤酒, 但就一D都唔苦, 反而佢個種啤酒味中咗左蘋果個種甜味, 一邊啤一邊食串燒好正呀!雖然話食宵夜, 但叫下叫下自然就會叫咗一堆野食. 豚肉串, 雞翼, 雞腎, 午餐肉, 牛舌, 芝心丸呢D指定動作會叫, 佢呢間燒得夠香又多汁, 好惹味, 我地成班都好like! 今日仲試咗兩樣新野, 就係燒韭菜同埋麻吉年糕燒. 前者燒韭菜好有驚喜, 望落大大條, 食落去一D都唔韌, 而且無"渣" 燒完個時熱辣辣好香韭菜味, 正! 後者麻吉年糕燒初時以為係韓式一條條的年糕, 上到枱原來係魚蛋皮包住年糕, 咬落外面彈牙裏面軟Q, 口感好得意, 個人本身好鍾意食年糕, 所以大力推介呀食飽晒2點幾餐廳都仲好熱鬧, 氣氛都好好!…查看更多

今日同多年好友暢聚, 揀咗旺角呢間酒吧. 算係大家都啱食又就腳. 黎得呢度當然係要試下佢D手工啤酒啦, 大大話有幾十款咁多, 實在係花多眼亂, 我地都唔係咁識, 就睇返佢D tasting note 跟返個人口味來揀喇 (有D仲附有中文嫁! 好貼心). 我就揀咗呢支大象 logo 的手工啤, 係帶有Mocha 味同埋朱古力味, 仲有少少芫茜味, 認真搞鬼! 飲落味道清新同幾特別, 又唔算苦, 就咁飲或者餸食物都OK. 朋友叫咗支穀雨, 係有烏龍茶的啤酒, 飲落麥味較重, 個人覺得會適合配濃味食物.然後到佐酒小食喇. 我地叫咗生蝦刺身同埋芝士旋風薯條. 本來諗住酒吧食物大部份都係普普通通, 點知有驚喜! 生蝦好厚肉, 食落有鮮味, 而且個醬汁做得好好, 夠清新之餘又唔會過辣. 而芝士薯圈係新鮮炸出來, 份量夠2-3人食, 重點係佢面頭D芝士好香濃好多, $58一客可算係超值. 怪不得眼見差不多每枱都有叫一客, HAHA, 真係無得輸呢度D侍應都好有禮貌, 坐係度飲野食野都唔會有壓力, 我同好友食完都好滿意, 下次會再黎…查看更多

車仔面簡單易整, 要整得好味其實只要花少少心機就可以了. 今日黎到呢間新開"食神"車仔面, 門面相片同廣告都做好多, 以為元朗終於有間似樣D的車仔面, 點知極失望而回叫咗最簡單的配料: 蘿蔔, 豬紅, 豬皮. 叫咗辣汁, 滿心期待. 當時下午3點左右, 得4張枱, 隔離枱似乎等咗有一段時間, 到上枱時食物錯咗, 見到該食客都好失望. 輸到我喇, 雖然食物無錯, 不過同樣失望.首先睇下個湯低, 顏色非常清, 而且味道偏鹹, 粗面夾上手, 係平價無口感的薄身粗面, (坊間收得$30以上的車仔面, 一般都用比較貴價彈牙的厚身粗面). 已無乜期望, 再夾下D餸, 蘿蔔, 豬紅同豬皮都係一樣味 = 無味. 似係就咁用清水加少少鹽去焯. 一咬落去得個鹹字.下午茶時間, 埋單$37連一罐汽水 (本人已經係叫3樣都係平價餸), 價錢拍得住灣仔某知名車仔面, 但質素相差怎遠. 新界區有勇氣收呢個價錢, 卻無誠意做返碗似樣車仔面. 一句講晒, 無下次!…查看更多