HKGore的个人专页

買了團購優惠, 1 slice大pizza + 汽水仲平過正價單件pizza一截(價錢無謂寫),小弟很喜歡吃pizza,見有事出開旺角買兩張黎試下.因團購卷並沒有店名,去到我都唔太sure係咪果間.問一問中東男店員佢都唔知乜頭乜路,男店員再搵路邊一個挨住欄杆我仲以為係街坊或者路人既本地女店員黎確認至知無黎錯.公眾假期 6點3到門外,食完埋單走人都只得我一個客.確實有些少需要搞團購拉少少知名度.女店員非常有禮,服務我認為很ok的,亦應該是該店唯一能以粵語溝通的店員.第一次幫襯,兩樣都加錢試下佢d睇落招牌菜feel既野.pizza轉至尊,飲品轉芒果奶昔.pizza賣相只是普通.可能需要花點心思吸引路人眼球.先講餅底.外面例如連鎖店多數係多油到咬落有少少油炸feel,或薄脆係餅乾feel.或者較厚身麵包質地,再唔係薄身煙靭類似蔥油餅/酒樓薄撐果類.唔係勁多油,就係乾硬化.呢度最特別既係: 佢非常少油,但竟然並無乾硬化,可能勝在夠薄身.薄得黎亦似番pizza餅底,唔會餅乾或者酒樓薄撐.同某p字頭大pizza名店比,呢間餅底軟身些少,無咁硬/脆,但少油勁多.厚薄同果便最薄個位差唔多,但內外厚度更加一致.當然最外面渣手位另計.少油有好有壞,好處當然健康得多,壞處是較容易口乾.幸好餅底本身夠薄,而且全體夠平均而不會外面較厚,除左最外側渣手位之外基本上唔飲野都無問題.餅底芝士充足,有d位甚至可以用豐富黎形容.但蕃咖醬我喜歡可以再厚一點點.topping比較特別.好多鋪頭都鐘意切細碎d,均云咁分佈全餅睇落靚仔d,睇相明顯見到好多都係大大塊,然後有d位吉左無餡料.(其實有其他味睇落比較平均的)食落如賣相所想,一口啖啖肉,一口齋食餅底.或者你好心機用刀叉自己割細佢再分配...  orz因為芝士同餅底合格,無餡都不會有很大問題.但如果喜歡啖啖都有餡料的話建議還是挑選其他口味.另外外賣左一片番屋企做宵夜,因為旺角仲有野搞,隔左一個鐘至番到屋企,個紙袋只有pizza本來的中心位稍有少少油印,其他位大致上都好乾爽,非常少見.買過幾間大pizza外賣,通常三個字左右個袋已經一大片油印.紙袋就廢事咁無聊影相了.另外杯芒果奶昔,夏日炎炎叫果陣當然充滿幻想係雪到冰凍,類似半溶雪糕feel咁既野消暑,雖然見到佢寫lassi而唔係milkshake都知多數係另一樣野,但上到枱果陣見到總會有少少失落.事前無查過lassi係乜,即場飲落,當然唔係milkshake咁味,而近似有少少...許留山既感覺?  orz濃厚既芒果味,溝左d有奶質感但唔重奶味既野,有可能係芒果味太搶至無乜奶味.d奶質感既野,查資料似乎係乳酪?飲品黎講偏向杰身,質地似鮮奶.芒果味幾足夠,但尾段有少少偏酸,相信係用真芒果至出現到既效果,而唔係用糖漿.味道方面其實ok,當外國特色野試下係唔錯,下次有機會試佢唔係pizza既中東菜可能會試下其他口味既lassi.但pizza既話,始終pizza同汽水呢對最唔健康既組合先係絕配.總括黎講, pizza非常推薦.同時做薄+勁少油+唔口乾實在少見.突然想食唔健康既pizza但又懶健康唔想食咁油肯定會諗起佢.芒果lassi本身不差,一試無妨.再光顧的機會是很大的.…查看更多

講到豬油渣,出名既類似周記英記都係淋既軟身豬油渣.相信年紀唔太輕既朋友,都好耐無見過以前果D炸到透,細細粒既豬油渣麵賣.難得發現而家仲有地方有售,出開深水涉就特登去試下.是次試左:1. 一大一普通豬油渣粉仔. (粉仔,冬菇粒,豬油渣粒.另可伴菜甫)粉仔質感爽口彈牙,類似剪斷晒既烏冬,但由於形狀並不完美,相信係自家制而非外面機器所製的來貨.由於本身都有幾分飽至黎,未能試真湯底味道.半飽時感覺得雖非甚麼上乘材料,但至少配麵時頗順口.反正沒打算過把湯喝光,伴麵ok即可.炸透的豬油渣我也是第一次嘗試.與主流(?)那種又肥又軟又大片的豬油渣相比,少了一分肥膩,多了一分香口.但細細粒炸透始終不如主流那種啖啖肉令人滿足獸欲.如未曾試過柞透的豬油渣者,絕對值得一試.畢竟這東西買少見少.2. 油菜. (生菜)普通,菜算乾淨.沒要蠔油要鼓油.鼓油很咸,混在菜水之中味道變得ok很多.3. 豬頸肉串燒.豬頸肉即叫即燒,而且是生燒而非先煮半熟再燒香給客人.等侯時間會比較長一點,但生燒的口感與半熟再燒各有不同.喜歡生燒的朋友可試.吃辣程度普通的我,認為沙嗲醬很辣.還好醬是伴碟而非混者串燒上.可能因為只售$8的關係,所以有點細粒.可能由於在下午茶以後,晚飯之前那個尷尬時間.人客少,服務很熱情,說話聲線也吊高兩度很有抑揚頓挫.同桌在粉仔上枱時說了一句"乜d豬油渣咁少既",有位店員另外送了一小碟豬油渣給我們.就算說付回那份渣油的錢也不要.剛好也看到個婆婆來買外賣順便借廁所,也很親切的告訴婆婆會先等婆婆慢慢上完廁所,出來時才把食物弄熱給她.這種小店能為客人做到這種服務,還能要求甚麼?兩碗粉,一碟菜,一串串燒,盛惠51,價錢相宜.下次再挑戰.…查看更多

拜完山落番地鐵站唔知食乜好,就隨手入左呢間.叫海鮮湯烏冬,無海鮮.改豬扒湯烏冬,無豬扒.最後唯有叫左個什錦天婦羅烏冬...又唔係有茶餐減價要限quota,做乜五點鐘就乜鬼都無晒,咁佢晚巿點算?天婦羅蝦略有調味帶咸,幾乎唔點天婦羅汁都ok,比預期中更好.南瓜頗甜,食得過.冬菇外表無乜問題,但一夾就出水沾濕天婦羅脆衣,亦唔夠菇香,唔係咁識欣賞.其他配料只算ok.烏冬確實幾滑同煙靭.醬油湯底送烏冬還好,剩飲完全不行.另外跟麵有兩塊超薄蘿蔔.整體黎講同樣價錢都有唔少地方食得番差唔多水準.不過咁多野都無實在有d失望,未必再有下次...…查看更多

同frd book左星期四夜晚7:30,去到勁少人,似乎閒日唔book都ok.如此地段,雖然係閒日,但晚飯時間竟然無乜人就實在有d驚訝.約莫到9點後至開始坐到接近滿座.book果陣明明話無左+$30清酒任飲,但去到又有...據唯一飲酒既友人講, d酒飲得出有溝水,但入口ok.另外你落order寫既份量,同佢上枱個份量係完全無關的.例如雞翼,寫4黎6件,第二round寫3又黎左8件,靠直覺寫吧...刺身: 普通放題質素.估佢唔到歐洲火山灰停飛都仲有三文魚食.係飛得番,賣剩存貨,定入大陸貨?食落ok.牛肉粒: 普遍軟熟,但有時會有一兩粒食落有渣.有肉味但不濃,調味偏淡.豬扒肉(大概係咁既名): 明明好似係豬頸肉...?肥美,彈牙,仲要面頭有微微焦黃,小弟非常欣賞,黎左兩round.帆立貝: 無乜海鮮既鮮味,咬口ok,但煎熟之餘面頭有油而又唔係煎脆左個面,調味亦淡.唔係食鮮甜,唔係食濃味,又唔係食香口,唔識欣賞...炸豆腐: 面頭炸粉炸到有少少硬,但內裡豆腐依然軟滑,伴汁加木魚絲同蘿蔔蓉上.炸蠔: 普通水準,有frd覺得好食,可以一試.餃子: 本來見無跟餃子汁上仲想叫佢拎,點知有frd咬左啖話已經落左.皮唔會炸得太實,加上餃子汁本來就好味,可以一試.炸薯餅: 怕飽肚寫2試下,點知黎左一件再中間割一半,只試左1/4件.雖然得果一啖味道試唔真,但感覺良好.蝦天婦羅: 炸漿太厚,蝦無味,成班天婦羅魔只嗌一round就算蕃薯天婦羅: 估佢唔到炸漿反而非常薄,紫芯蕃薯非常紫非常甜,而且本身切得薄,唔會點飽肚,絕對值得一試.當然蕃薯呢家野一造造甜唔甜的,萬一有人幾個月後食落覺得完全唔甜既我都唔係有心浪費你quota...白魚肉天婦羅: 炸漿無味再加上魚無味,唔知食緊舊乜,不試也罷.串燒蕃茄: 小弟無試,朋友認為好味.煙肉車厘茄串: 煙肉香口而車厘茄帶酸提升口味.本身已經係好配搭,亦好難失手,值得一試.串燒雞翼: 全部中翼下面關節已切開.一串兩隻,寫4黎左6隻,寫3又黎左8隻,唔知點計勁怪.非常香口惹味,友人重口味加七味粉覺得更正.非常推介.串燒冬菇: 味道普通無乜印象,無乜菇香味.薄燒牛肉: 印象不深而且麻麻地.金菇牛肉卷: 味道普通,好少燒汁.漏單比想像中嚴重.記得既至少有牛舌同煎大蝦無黎.特別係大蝦落左兩次單,之後last order問我地有無野未黎時催多次都無左影,但隔離枱又有得食,明顯係漏單唔係賣晒.甜品有: 雪米糍(x2), 芝麻雪糕, 豆腐雪糕(當日售罄), 紅豆雪糕.雀巢公司雪糕原杯咁上.本來以為雪糕都係任食的,點知睇真d張紙下面有行細字寫每人一客...有樣野抵讚.食到尾聲飽晒有d時間剩就大家坐低打下機.不知不覺over左半粒鐘(當時約坐滿8成客,幾乎得番bar枱位剩)都無催過,亦無收d食唔晒既野.當然如果bar枱都坐得七七八八可能會催鐘,就算唔催我地都會唔好意思即刻走,但未坐滿所以無催過我地呢一點實在感覺良好.為左呢點再加食物水準唔錯,肯定會再幫襯!…查看更多

本來一直都懶得開acc同寫食評,但中左呢次伏真係忍唔住開番個黎寫下之前睇報紙見屋企附近有間號稱區內唯一一間串燒開張,就黎試下.七點幾黎到,見到鋪頭坐得一半,門口仲有牌寫住某電話公司既promote $33三十分鐘內任食14款野.由於無用開果間公司,就用番正價散叫,入到話兩位,點知佢同我講:「唔好意思,散叫要等一陣」「下?要等幾耐呀?」「要八點至入得」雖然我未大爺到覺得正價食野有得優先入場或者指指點點.但結局等到八點期間,成間鋪係得一半滿,但完全無客出入過, d單亦分張枱分開,完全唔明做乜唔俾客入座,仲要係最熱門既晚飯時間.又唔係座位問題,又唔係收錢問題,又唔係要食你d優惠野要分開一批批限數量咁入,趕客乎?入到去睇紙,感覺款式好少下.三串/三件吉列set得五款(同散叫重覆),所有野食包埋麵之類都係20款左右.見唔到有蕃茄既魂串燒盛合,亦唔見燒蕃茄散叫;亦見唔到京天婦羅盛合.劃果張紙唔見,無menu,牆身都無任何野貼住.上手食評同我都只係爭三日,做乜咁神祕會少咁兩款set?同任食promote有關?睇完就覺得更加少野食.俾錢亦同上手唔一樣,我地係食完至埋單既.記住兩篇食評只係爭3日,竟然咁大變化...先上左個唔記得乜名盛合(唯一一款吉列set): 吉列皮炸得唔夠鬆,蝦同墨魚圈無味要靠沙律醬,隻蠔就叫幾有蠔味(唔排除有人會覺得腥),三樣得隻蠔食得過.和牛串燒盛合(x2): 三款野無問邊款打邊款.先食最厚食(快餐店薄牛扒厚少少),四四方方,有三塊果款.勁靭,勁多渣,無乜味,食到尾好似食橡皮糖咁,似乎係上手講既和牛(但我覺得似一啖一塊既安格斯一口牛).然後食中間好肉酸既澳洲和牛,調味最重,亦最淋,有d似打邊爐肥牛捲埋一劈咁燒.最後試薄身一條過既牛,味道深淺係兩者中間,唔似第一串咁橡皮糖,亦唔似澳洲牛咁淋,無論調味同軟硬都係擺番去中間好似合理d.(啱啱食緊第一串第一啖,有個女侍應黎問d野食得唔得,大佬都未食,點答唧)芝味翠肉瓜: 芝士淋上翠肉瓜上面燒,除非特登,唔係好難整到佢難食,合理水準.魚湯叉燒白麵(x2): 我果碗第一啖食落口既感覺係「哇,做乜咁大陣胡椒粉味!?」嚴重到係好似媽咪麵成包粉倒晒落去咁食果隻feel.食到底無乜胡椒粉味,可能係我果碗咁啱重手左唔好彩.但我唔知係味覺已經俾胡椒粉搶到食唔到d魚湯味,定本身魚湯真係無乜味,總之覺得啖湯真係好頹.叉燒偏肥.麵係淋麵,你可以想像成河粉既口感,但係係同米粉差唔多幼.唔鐘意淋麵既朋友要小心考慮.燒牛舌: 牛舌已經算係牛比較重味既部份,但佢竟然可以咁淡味甚至無乜味.偏靭,但起碼唔似之前款牛o趙落有渣先.但由盛合到牛舌既所有牛都無乜牛味真係ok灰下燒築地花竹蝦: 菜色既野,廚藝同客人口味永遠係最大爭論點,呢個亦係小弟之前唔想寫食評既主因.隻蝦細都算,但最大問題係「唔該隻蝦唔好係霉架囉」咬左一啖,吐番出黎,埋單唔該... =w=)/(拿,結局食完反而唔問我食物既感想喎)本來怕串燒攤凍,所以諗住分開兩round叫,開始慶幸自己叫得少,亦後悔自己叫得多.有味既有: 澳洲和牛(汁料調味), 吉列炸蠔(蠔味), 魚湯叉燒白麵(胡椒粉味), 燒築地花竹蝦(霉味)其他無乜味既,食唔食自己考慮.另外間野本身係無任何免費茶水供應.一係汽水,一係樽裝水,又無非炭酸飲品,大佬你唔係局我8蚊同你買枝水呀嘛...(唔sure有無酒類,因為唔飲酒)好似...賺錢緊要過service咁喎...結局上面份量既野埋單182.雖然完全唔飽,但唔敢再嗌,寧願去食糖水好過.由入座時未滿客都要無故等位,到食品種類數量同質素(特別係隻蝦),又唔見報紙介紹果兩種盛合,到硬食8蚊枝水,汽水或乾哽三揀一.只可以講: 無可能有下次...…查看更多