ข้อมูลส่วนตัวร้าน t0720

唔想煮飯用fxxxpanda叫咗第一次食嘅榮少喇沙, 試新嘢好緊張, 好彩唔差! 等咗七,八個字就送到, 倒瀉咗少少湯同裝炸嘢嘅紙袋爛咗, 不過算啦。叫咗炸雞扒咖哩飯同埋兩分鐘炸豬扒喇沙。個炸雞扒好好味, 煮完送到過嚟都仲係好脆, 仲要有成六七件! 個咖哩飯就麻麻地, 咖哩汁稀到好似豉油, 味道係平時日式咖哩磚嗰啲味, 跟餐送咗一杯菊花茶, 味道偏甜似糖水。至於兩分鐘炸豬扒喇沙, 首先好欣賞佢面同湯本身已經分開裝, 油麵同埋米粉keep到有咬口。另外個喇沙湯好好味呀, 好香椰醬味同好足料, 每啖麵夾上嚟都掛住好多蝦乾碎同香料, 配料有三粒豆卜同埋芽菜, 我最尾係飲埋成個湯😋 另外炸豬扒我就覺得普普通通, 份量係好多, 有兩大件完整豬扒, 但對我嚟講就鹹咗少少, 喺度推介炸雞扒同埋喇沙👍…ดูเพิ่มเติม

去K11 musea行完差不多到晚飯時間但唔太餓，諗住求其食D嘢閃人。見呢間得兩條友排隊，就試佢啦最緊要快!Order咗個叉燒干炒菠菜意粉 $8x點知...見住前一個order嘅內地客拎住佢嗰份，等黎等去都唔見staff煮我個意粉，三四個字後問staff一味話煮緊，再睇佢煮其他人嘅，全部同款，what!?原來懶洗鑊所以唔煮我嘅! 有冇搞錯!? 足足等咗超過八個字先有!!個意粉鑊氣係有但同一般茶記嘅冇分別，份量亦唔係多，個麵濕嘅，完全唔係所謂干炒，根本唔值呢個價😡…ดูเพิ่มเติม

諗住去食個下午茶，要乜冇乜，本身都冇乜客, 都仲要等大半個鐘先有嘢食到，叫咗六樣嘢，得五樣到。BTW壺鐵觀音茶葉碎到啖啖都飲到🙄七味炸豆腐 - 脆嘅， 有味嘅，唔差。蝦餃 - 口感ok但有怪味炸雲吞 - 脆係脆呀但油到一路滴燒鴨瀨 - 正常鮮蝦腸 - 落完單先話冇做腸粉魚鬆炒米粉- 一粒魚鬆都見唔到，啲西芹仲要全部霉曬黑曬，又油又咸到抽筋。算喇嗱嗱林飲多幾啖水食D走人, 點知個收銀拎錯單收錯錢又唔認聲大夾惡，搞咗勁耐先退錢，真心一肚火，冇咩唔會再去!…ดูเพิ่มเติม

第一次幫襯呢間繆天食堂， 舖頭主要做外賣生意但都有幾張凳可以畀人堂食。唔算太肚餓，嗌咗一個細嘅潮州炒麵線$25，姐姐煮嘅時候已經聞到好香。到佢煮完包好遞畀我， 見到個面嚇咗嚇，好有份量，如果佢係細嘅份量，大嗰個一定好壯觀😂呢個潮州炒麵線入面有幾種唔同嘅麵( 有幼麵線, 幼麵, 粗麵同應該有少少米粉)， 配料有魚片, 豬肉, 雞蛋, 韭菜, 芽菜，全部都好足料。 重點係食落唔會太油太鹹，好似媽媽屋企煮嗰種感覺😋 完全估唔到25蚊可以食到呢種質素， 有機會嘅話我會再幫襯。仲有入面幫手個妹妹好有禮貌🤗…ดูเพิ่มเติม