ar金的个人专页

原來想去轉另外一間出左名既泰菜食，點知喺等位途中，突然睇到呢間鋪，屯門都以為點解呢度會有一間當舖？ 行入去就發現原來係一間fusion泰菜，見個裝修幾好，同埋唔想喺轉角嗰間度等，所以就入去試一試👌🏼唔係講笑，呢間嘢真係值得更多人知道，原本只係叫咗冬陰功薯條、肉碎生菜包同黃油雞。唔係講笑，呢個薯條個醬真係好值得一試，真係可以令到你覺得點解薯條會同冬陰功結合到😬肉碎生菜包：佢唔係傳統嘅泰式肉碎生菜包，而係有少少修改嘅版本，幾嘢味幾特別👌🏼👌🏼呢個黃油雞真係有料，佢個皮煎到極脆，係用刀刮個都會聽到脆皮聲嘅嗰種，最特別嘅係連雞胸都會滴出黃油😬最後因為飲緊啤酒嘅關係，佢呢間舖有好多唔同款嘅啤酒，好多都係香港嘅手工啤，所以我哋叫多咗佢哋個魚餅嚟送酒。完全食得出佢個魚餅唔係出面攞貨拎返嚟，因為入面食得出香茅、蔥、檸檬皮、少少薑嘅味道（戴返頭盔先可能食錯），不過佢個魚餅的確係幾精彩。我哋happy hour入去，啤酒仲要買一送一，完全性價比非常之高，所以佢真係值得更多人知道👍🏼…查看更多

尖沙咀食完飯諗住食個糖水啦，唔睇由至可，一睇先發現原來尖沙咀係咁少糖水鋪😂 終於搵到間入去試下，叫左芋圓桂花糕涼粉同朱古力Waffle。芋圓桂花糕涼粉：呢幾樣野夾埋唔係唔好食，但就係3樣獨立既野，無咩特別。不過份量真係少左啲，雖然話係尖沙咀，不過呢個質量係真係無咩值得講。另外仲有個朱古力Waffle，面頭都有啲Oreo碎同朱古力碎，就係Waffle去熱壓，都係無咩特別。整體而言，如果唔係尖沙咀少糖水舖都未必會揀佢，因為就係無咩特別同小貴🤔…查看更多

收工諗住食個快既，行過K11 Musea見到有間拉麵就行入去試試，標榜住京都Best 10拉麵，心諗應該好勁啦，雖然過往都中過好多次呢啲過江龍伏，例如金色乜乜乜呢啲🤣 都試一下啦🤣分別叫左一個豚鴨沾麵同芝麻辛辣拉麵。點知個沾麵黎到麵心知有少少不妙，唔知係我對沾麵既無知定係間鋪對沾麵認知錯誤，個湯水到一個點喎，完全0掛湯，要用羹架埋湯先有味，呢個真係對沾麵既一大侮辱🤣 麵質唔差既，有蛋香麵粉香；叉燒都算淋滑，有煙熏味；糖心蛋帶少少酒香，不過不失。而湯拉麵方面都不過不失，但係呢個價黎講真係唔太值，某啲food court 拉麵仲好過佢其實，未至於可以自稱京都Best 10拉麵😂 果然車肽人都係啲可以比錢買既頭銜🤒…查看更多

好耐之前生日已經試過呢間鋪頭，今次再黎食野，叫左set dinner，由頭盤到生蠔，再到main 加主食其實都做得好唔錯，人均5百零，set dinnet + cocktail + 再加左一款甜品，仲想點呀？🤭生蠔兩款前菜：水牛芝士沙律+三文魚他他番茄濃湯蒜香帶子意粉：味濃，佢個帶子應該係刺生級帶子（好似係），好嫩熟成安格斯牛板腱：牛味濃，薯蓉係有誠意薯蓉兩款甜品，都品太甜，不過Tiramisu 好食啲仲有兩杯cocktails…查看更多

試左$780 果個Omakase set，包括左前菜、刺生、8件壽司、湯、再加甜品，仲有一杯生啤👌🏼一嚟到即刻上杯生啤爽下個人先，再黎沙律開開胃之後就開始上刺身刺身有：- 兵庫縣生蠔配青瓜啫喱：生蠔好新鮮，好鮮甜- 北海道八爪魚配wasabi莖 加根子：第一次試Wasabi莖，唔算好攻鼻，不過有Wasabi嘅香味- 池魚腩+火炙過油甘魚：池魚腩幾滑，油甘魚腍滑到筷子都夾得開- 吞拿魚刺身：呢個先癲，吞拿魚加醬油漬吞拿魚，上面再加魚子醬，上下再加白飯魚乾脆脆，再用紫菜包住，淨係聽呢個組合都覺得大癲，好食到震食完刺身，中間揀長有個熱食：- 花魚一夜乾- 魔鬼魚魚翅：呢個真係未食過佢嘅魚肉幾滑同埋佢嘅魚翅其實就係佢嘅軟骨，真係連骨都可以食之後就到壽司：食左既壽司包括凡立貝海膽壽司、喜之次、金目鯛、銀雪魚、海老蝦蓉+明太子+飛魚子，而最深刻嘅有：- 希靈魚：其實小弟一直好驚食呢一種魚，因為好腥，今次奇蹟地師傅燒一燒條魚，加咗麵豉，再加蔥同紫菜，又真係唔腥喎- 「葉脆脆」（生菜包住三文魚壽司+ 炸番薯絲 + 芝麻醬）- 右口魚：左口魚就食得多啦，右口魚喎🤣 反轉左🤣🤣🤣 燒一燒佢之後真係滴油，正👍🏼最後飲埋個魚湯，食埋個雪糕甜品，飽飽離場😬 Ps. 佢個柚子漬蘿蔔真心幾特別，好fresh👌🏼👌🏼…查看更多

Lunch Time 灣仔行過見到食蛋包飯，就行入去試下，鋪頭唔算多人，6-7成滿。叫左個咖喱吉列豬扒蛋包飯，上菜速度都幾快，不過個吉列豬扒真係炸到有啲燶，炸到有啲黑，唔係出面金黃色果種吉列豬，食到某幾舊真係有少少苦味，同埋個豬扒都真係炸得有啲老，小硬。蛋都算滑，個飯有落左啲菇、蘿蔔絲果啲炒埋入去，都算ok。不過跟餐杯綠茶真係有啲淡，同飲水差唔多。跟餐仲有一個涼拌木耳，味道尚可。整體黎講，中規中矩，普通food court 咖喱豬扒蛋包飯咁。…查看更多

經過黃埔，去咗一間幾特別嘅拉麵居酒屋食晏。鋪面裝修好有日本特色，貼左啲福崗既資訊喺牆。佢lunch time 有兩個set，1個拉麵加1杯野飲：$78，1個拉麵加兩串小食加1杯野飲：$118，雖然都有加一，但係如果唔加特別野食，都算ok👌🏼👌🏼叫左2個lunch set，虎蝦濃湯拉麵+蟹肉牡蠣，葡提鴨卷+午後檸茶；另一個set：明太子拉麵+午後檸茶。虎蝦濃湯拉麵：個湯好似西式嘅龍蝦湯，但係佢比較清，唔會膩。而同時佢又做到濃湯嘅效果，所有湯可以掛晒上個拉麵度👍🏼 而最上面嗰隻虎蝦，佢有櫻花蝦包住去炸，估吓非常大聲同埋好新鮮👍🏼呢個拉麵真係值得一試👍🏼👍🏼明太子拉麵：呢個嘅感覺做到好似明太子意粉咁，但係唯一敗筆係佢食晒會比較你，因為入面有比較多芝士粉，如果佢會減少啲芝士粉或者換成一啲比較Fresh既野，或者係青檸或者柚子皮啲類配料，成個意粉食落去個感覺可能會更加輕鬆。但亦都可以提一提嘅係，呢個拉麵唔知點解有陣青瓜味🤔蟹肉牡蠣：牡蠣幾大隻，炸得幾脆葡提鴨卷：個鴨燒得有啲老，有進步空間總體來講，我覺得可以有第二次，幾好幾好👍🏼…查看更多

食完飯經過食下冰，其實佢啱啱開果陣已經有經過過，果陣佢地播緊台灣歌，幾有情懷🙈 但係去食果日已經無左，可能因為版權問題，但係又真係無左個感覺🤣講返個冰，個冰既質感都幾特別既，不過真無冇咩味😂😂😂 個set包左一碗配料：有芋圓、紅豆、愛玉，另外個冰頂有一球芋泥，但係都係好清無咩味，0甜😂 同埋奶蓋，有少少甜。仲有配多個類似花奶既奶奶，都有啲啲味。成個冰最底係嫩仙草，不得不讚佢，個仙草真心嫩同滑既👍🏼 不過因為個冰都無咩味，仙草再好都只係救到少少🙈都可能會有第次機會，不過唔會食冰，可能都只係會叫佢啲仙草野飲👌🏼…查看更多

星期五晚去試聞名已久嘅愛文生，全條街都瀰漫住佢同對面兩間大排檔炒嘢炒出嚟嘅油煙。尤其是今日係星期五，好多人排隊，排咗大約20幾分鐘終於可以入座。叫咗七個餸，包括有避風塘粟米條、啫啫芥蘭、椒鹽鮮魷、炸大腸、薯仔牛柳粒、豉椒炒蜆、豉油王炒麵。最推介其實係避風塘粟米條，因為香港唔係好多大排檔會做呢一個餸，佢做得幾好味少少辣，好多炸蒜，同時粟米唔會生。椒鹽鮮魷都唔錯。 食飯途中有個小意外，就係啫啫通菜個煲搞到墊住佢個光瓦碟都爆咗，相信真係燒到非常之熱。不過唔係好建議大家叫大腸類嘅餸，因為佢啲大腸有啲韌，雖然佢整得幾入味。另外就係豉椒炒蜆都唔係好推介，因為殼多個蜆，而同時啲蜆都唔係好新鮮有啲有沙，有啲壞咗。整體來講如果唔駛等都可以一試👍🏼…查看更多

一間幾有氣派既中菜，不論店內環境、個景其實都唔差。可能因為提早訂枱，所以安排咗坐窗邊，窗外主要望住會展站同埋灣仔碼頭，幾靚。今次食咗晚飯套餐，$998一位，每兩位會包一枝酒，連埋甜品總共食7道菜，最有驚喜係菜膽湯同埋個龍蝦。菜膽湯好有秋天嘅味道，而龍蝦佢用咗蝦膏去做個汁，好濃郁。不過主食既飯類就差少少，係珍珠雞，感覺一般。以呢個位置同埋成個配套，食個慶祝飯，或者商務晚餐其實都唔錯，不過會建議單點，咁個份量會多啲。最後就係不得不讚吓佢哋嘅服務，真係幾好👍🏼…查看更多

Sharishari 開左咁耐，真係第一次食，之前得銅鑼灣店果陣，每次唔係因為太晏去截左單，就係太多人排隊，唔想排🤣 今日食完飯經過中環大館，見到Sharishari開左新鋪，緊係gogogo啦🤤 最重要嘅係咩呀，係唔使排隊呀😆餐牌有好多唔同嘅冰，第一次食，梗係食季節限定啦，叫咗一個栗子焙茶冰。試過之後，就真係知道點解佢咁多人排隊，佢個冰係用日本進口嘅淨水黎做，雖然佢唔係綿綿冰果中咁腍，但係都食得出佢非常之輕。上面嘅配茶糖漿同埋栗子糖漿配合得非常之好👍🏼 唔係好甜，茶味好重。枱面其實都有只是講話啲冰融得好快，所以如果要影相真係要快手😗 呢間真係會encore，值得一試👍🏼…查看更多

經過見到好似幾特別，好似嗰啲日本家庭式居酒屋，老實講價錢唔算太貴，但係價錢亦都反映食物質素。個燒牛肉定食唔係好夠熱，如果醬油叉燒拉麵食到最後好鹹。唔可以話佢唔好食，但係真係無咩特別既food court日本野🤔啤酒都算幾抵，同埋佢個餐牌都幾有特色。但同時都留意到一樣嘢，好多人都會嚟買外賣，可能因為外賣自取有八五折。咁都相對公正咁樣講，如果八五折嘅價錢你到呢個質素，都真係算係咁。但係同一條街有其他選擇嘅情況之下，未必會揀佢🤔…查看更多

星期五諗住簡簡單單食個晚飯，喺灣仔見到呢一間好似唔錯嘅台灣菜，點知真係中哂伏🤷🏻‍♂️叫咗一個二人餐 $288，套餐包一個小食、一個主菜、一個蔬菜、兩個飯（轉肉燥飯加$18）同埋兩杯野飲。點知想切菜，足足等咗一個鐘🤷🏻‍♂️ 真心唔理解🤷🏻‍♂️唔知道係間鋪嘅問題定係個廚房嘅問題，因為在場嘅顧客，唔止一台都等咗好耐。隔籬枱個叔叔因為等得太耐想叫埋單，點知個侍應同佢講話煮緊煮緊，最後佢都係同我哋一樣差唔多等咗一個鐘多啲是上齊菜。真心無下次🤷🏻‍♂️…查看更多

一間收藏左但一直都無時間去食既和牛鋪頭😋Mashi No mashi個位置其實都幾方便，靜中帶旺，間鋪位置唔多，買完飛等大約廿分鐘到就入到去。叫左三樣野，和牛沾麵、和牛丼，同和牛餃子。上菜速度都幾快，10分鐘左右上齊哂三樣野。- 和牛沾麵（叫左凍麵，感覺彈牙啲）有交足貨喎，一大塊熟成和牛，入口即溶，凍麵好彈牙；個牛骨湯夠哂濃，有少少牛肉碎，可以掛哂上個麵度，唔錯！食哂啲麵之後，可以叫店員加湯，係加鏗魚湯，飲埋，啱啱好👍🏼- 和牛丼睇落好似細細碗，但係比足兩塊和牛，和牛會燒過，加埋啲肉汁，比沾麵肉味更濃，仲有啲燒香味；面頭仲有一個日本蛋黃，撈埋飯食一流；啲飯都同樣有啲和牛碎，好味👍🏼- 和牛餃子雖然價錢真係貴左啲，$120/6粒，不過真係幾唔錯，全隻餃都係和牛，加埋少少黑椒、蔥，煎到好香口。吧枱後面有一間熟成房，放滿哂和牛，熟成左既牛比一般牛濃味好多，而且佢地揀既部位都好好，好淋，油花好平均，真係值得一試👍🏼…查看更多

星期六入長洲行去，係咁食食食🙈去到旁晚5點幾又口痕，想搵啲野食下，天氣熱到未想食正餐，睇到有間新鮮炸海鮮既鋪頭：漁樂一開始叫左去骨鱭魚、厚切墨魚、冷泡冬瓜玄米茶。炸海鮮真心新鮮喎，加杯涼浸浸又足料既冷泡冬瓜玄米茶真心解暑喎😏食到差唔多，老闆見就收工出黎請我地飲啤酒，嘩，真心正，啤酒勁夠凍👍🏼 之前再追加左個炸本灣海赤米蝦，送酒真心爽皮😆老闆Ronald哥隨後出黎同我地吹水，真心好人，野食正不得止，重點係同聲同氣呀，明既就明啦😏 大推，入長洲必試👍🏼…查看更多