肥小姐的个人专页

周不時都會幫襯下，今日算我唔好彩，見阿姐將撻由餅模＂反＂出黎時，撻邊有啲黑，仲以為係少少算數，點知俾完錢時聽到另一個阿姐問，呢盤蛋撻係咪好燶。 返屋企望一望，確係好燶呀，食落個皮係苦嘅。 …查看更多

好彩星期六下晝食o野唔駛等位。先點公司三文治 (本身係英文名)，香蕉朱古力pancake。另兩位朋友同BB到左，點一份沖繩xxx 飯(唔記得名)、漢堡扒飯，同埋一份肉桂蘋果pancake。等好耐，終於有得食。三文治好多餡料，食o既時候唔好拎走膠籤，要圍邊食，否則散哂，跌餡。凍檸茶無茶味，好淡，似飲檸水。Cappuccino 不過不失。凍烏龍茶有半杯冰，又係好淡無茶味。蜜瓜梳打被形容為藥水溝玉泉忌廉味。朋友力推Pancake，確實好味。之前侍應話牛油味重，怕兩個人share 一份pancake 太多，我地覺得份量剛好。Pancake 上o既忌廉同雪糕球(另上，加8蚊) 融得好快，要趁快食。另外兩個飯等比較耐，朋友話味道一般。我第一次食，服務無其他食家講到咁好。我地坐店外走郎，最遠離群眾，每次搵侍應(例如：落order、拎餐具)，都係舉手舉好耐無人見到，忍唔住要自己行出去(通常坐偏遠地區都有呢個情況，我明)四個大人，餐具盒只係有三隻叉兩把刀。最初我們表示唔夠餐具，侍應小姐 “哦”一聲，隔左一陣，無回頭，我地自己出去拎多個餐具盒。到另一位拎碟飯過黎，原來餐具盒無匙，請待應拎兩隻匙，又係 “哦”一聲，無回頭。(好....再出去拎)枱面有好多杯碟，一直無人收(本身食物碟再另加每人白色小碟一隻)，為免小孩亂搞佢面前d 野，我地想搬其中兩隻大碟過隔離張吉枱。侍應小姐幫走廊中間枱客埋單時，見我地咁做，佢遠距離喝止我朋友，面露不悅(黑面)話：小姐，你咁樣我會俾經理鬧架。呆左。如果有侍應收過杯碟，我地唔駛咁做啊~坐左兩個鐘，感覺無侍應願意顧及走廊呢幾枱客。其他枱都一樣情況，要自己走出去搵侍應。走o個陣見到有客人放幾蚊貼士落個盤(就係走廊中間嗰枱)，走左幾耐都無人拎走。原來連錢都唔理~總括：食物ok ，就算再o黎，都只會坐店內，因為無經理無服務。…查看更多

朋友記起雜誌有介紹過，唔食雞煲改左呢度試下燒烤。大約九點坐滿人，不過等一陣就有位，坐一個幾靜又夠冷氣o既地方，但係太過自成一角，好靜，好快見有位我地轉返出舖坐。雖然舖側係厚膠擋住，但依然冷氣十足。價錢唔算好貴，多數材料係廿蚊左右一串，海鮮約五十蚊一份。最貴好似係五花腩要七十八蚊。兩個人只係燒烤，無打邊爐。台灣腸、兩串雞翼、雞肝、雞腎、火箭魷魚、兩隻蠔、兩串豬頸肉、菠蘿、蜆、翡翠螺、大菇、羊架、白鱔、四罐汽水.....大約咁多，埋單齊頭四百(食滿$300免燒烤爐費$30)。雞翼、羊架、豬頸肉醃得好入味。台灣腸真係似台灣街頭食到個種，裡面帶少少肥肉，唔係"假腸味"。不過豬頸肉切出黎比較搞笑，點過兩次，都係出現一條手掌咁長，再撘D 短到似手指尾。呢種蜆(好似有兩三種蜆)細細粒，燒完好似無o野食過咁，下次唔會點。開餐之前無上黎OPENRICE睇食評，岩岩睇見人地燒到好靚間舖都幾衛生，餐具都乾淨齊全。佢地會主動講下點燒好D，不時都望下要唔要幫我地添燒汁之類。 座位唔算多，下次再去會訂位先。…查看更多

三個女子，計埋朋友肚裡面個小孩，一行四人 因為我同大肚朋友之前未食過Applegreen ，睇餐牌好多想試，最後點左五碟加兩杯Lemonade，包括(唔記得名，形容) 四條腸拼盤、意粉另加蘑菇、焗芝士通粉、半份沙律(連香蕉蛋糕)、焗薯皮。首先上沙律，一見就知瀨野....半份沙律都等於其他餐廳o既一份。總括，好食，好大碟，o岩一班朋友齊齊share，價錢合理($34 一杯Lemonade 係無限添飲)，埋單連加一$531。唔知係咪樓底矮，有點嘈，坐四人枱有時都聽唔清楚朋友講乜。特別一提係有一位染金短髮戴眼鏡職員，服務好好(收據寫係Frankie? )。入座時，見到我朋友係有小孩，即刻拉出少許張枱，方便朋友入座；我地打算點卡邦尼意粉，又提醒係有生雞蛋，可能唔o岩食(我地都唔醒起)；朋友想飲Lemonade，問可唔可以走冰(我地都明一大jar 倒出，難免會有) ，但呢位職員係慢慢倒，盡量唔跌冰落隻杯，勁細心！ …查看更多

食飯前先睇openrice網友建議，兩個人點左石榴咕嚕肉、一口牛柳粒、皮蛋子薑、金腿翡翠苗、爺爺栗子燴雞、桶仔飯同埋梅州醃麵(客家菜系列)。除皮蛋子薑裡面o既子薑，其他食物一上枱睇覺得分量少，好在食到最後都夠飽。最好食係牛柳粒，牛肉唔會太熟，好香口。石榴咕嚕肉係肉粒、無骨，比起牛柳粒仲要細。整體味道係唔錯，但有好多圓形、爽口o既 (唔肯定係咪”石榴”) 朋友覺得ok，我個人唔太鍾意。金腿翡翠苗上金腿切成極幼絲，好似跟小籠包o既薑絲一樣幼細，只有極淡金腿味道。金腿、翡翠苗兩者味道分開，只係放埋同一隻碟上。皮蛋子薑係唯一由頭食到尾，食足兩個鐘頭。皮蛋只有一隻，但子薑份量異常多。爺爺栗子燴雞我地以為係煲仔菜，上枱先知係一個椰殼…椰汁味濃，但覺得似將椰汁、雞肉、栗子、椰肉分別煮好再放入殼就算。飽肚之選揀左桶仔飯同梅州醃麵，最穩陣。之前有好多網友提到侍應無禮貌，我訂位接線服務員係ok o既。入座後坐左半個鐘等朋友，眼見有D侍應係好主動招呼客人，有講有笑，但只限面對我隔離枱熟客！我舉高手幾次搵侍應點菜，其中次個後生男職員扮睇我唔到(就係之前同隔離枱傾得好開心o個位)，點菜時問女侍應餸裡面有無菇類(朋友唔食得菇)，女侍應唔答我，即係落單就落單，唔好問/講其他野……. 尾聲都有一位戴眼鏡高大男職員係好o既，見我地睇甜品餐牌會介紹一下。呢餐埋單原價$4xx，信用卡折後$2xx(連加一)。總括，因為朋友有六折先會去。…查看更多

之前聽朋友提過有時買豬骨粥做宵夜，一路好想試。呢次去朋友屋企食飯，夜媽媽都未走，終於有機會買碗試下!兩個人share 一碗大粥 ($17) 成碗粥好足料，好好味!! 下次再帶男朋友黎試~…查看更多

總覺得細路時期賣五蚊一底雞蛋仔係最好食。當依家樓下麵包店賣九蚊一底，呢度賣十三蚊一底，又咁多人介紹，無乜人排隊情況下姑止一試。朋友話雞蛋仔係脆口好食，我反而鍾意少少淋，咬落係軟o既。所以...我覺得味道一般，尤其邊界位脆到界口....…查看更多

買小碗$30 牛雜。果然係貴精不貴多，無陣怪味，食得放心 (但覺得唔夠喉)相比起其他賣牛雜o既食店，通常滴到周圍都係汁，呢度咁乾淨，覺得佢唔似賣牛雜 嗌串牛雜有個碟仔裝住，唔會滴汁搞到條街污糟，很好。…查看更多

因為甚少去北角，查openrice 搵食搵到黎~一見係傳統豆腐店，相信味道唔會差得去邊，每款都好想試！外賣買左一支豆漿、$10 四隻鍋貼、$10 四件煎豆腐、豬肉包一蒸一煎，等豆腐時見牛肉包幾靚，又買一個。咁多野食只係$37 最好食包括牛肉包、蒸豬肉包同煎豆腐。煎豆腐有一塊薄薄魚肉，魚肉同豆腐一夾分離，魚肉味道普通，但塊豆腐好滑又有豆香味。至於煎豬肉包味道一般，個底煎到太硬咬唔到。鍋貼痴住左外賣紙袋，食時爛哂皮 再去北角會黎呢度堂食，我未試豆腐花同埋買腐乳 …查看更多

因為前兩日食過上海菜，但無食到酸辣麵，於是我一個人俾上海婆婆吸引入去。相比起其他餐廳，呢度下午茶餐算多選擇又抵食，當日兩點半差不多全場坐滿人。點左一碗酸辣麵，小食選京蔥牛肉包(兩小個) 配豆漿。酸辣麵味道略淡，反而兩個包即煎好味道。食左大約三十蚊，價錢中等。不過葵芳分店某位職員服務態度有待改善。落單職員很好，提醒拉麵要等約二十分鐘，京蔥牛肉包即煎等約二十五分鐘。(幸好拉麵等左十分鐘左右就有得食) 相反，帶位o既年青女侍應幫我斟熱茶時，係表演拉茶。彈到枱面好多水，仲彈左落我塊面....佢記錯隔離位女士係得一位，將女士對面份餐具收起時問人係咪兩位，到女士答佢有兩位，年青女侍應係掟返套餐具o係枱面。希望上海婆婆轉用膠/ 較輕身餐具，眼見碗碗碟碟都難哂角，一來待應傳菜都拎得好辛苦，二來侍應掟碗時食客唔駛受罪。…查看更多

見風月堂排七張枱先到，拎左籌去隔離萬寧買野...隔左半個鐘，返去睇仲有三張枱先到，去埋樓上中銀禁機，五分鐘後返落風月堂....無睇錯，我個號碼已經嗌左，仲要打後有十個號碼都嗌左!!!!問門口個職員，佢話過左號碼都係從前排過。係咁點解唔圍個圈，叫人企定定係度排度呢？我諗好多人又諗住行個圈返黎，落到去先知自己過哂要重新黎過。最多唔食都唔好浪費時間。…查看更多

七點幾先去買餸，路過時男友話呢間外賣小菜幾好食，見阿姐未收工拿拿聲買一盒廿蚊一盒小菜，要左炸雞翼拼雞扒份量唔少，炸雞翼原來係南乳炸，夠入味買外賣時阿姐入緊另一盒外賣，份量幾多。原來佢係免費請流浪漢食(阿叔企隔離等緊)。與期賣唔哂掉左食物，倒不如趁乾乾淨淨時請有需要人食，抵讚！…查看更多

朋友話既然去開 IFC 要試下起初唔覺有綠茶味，慢慢先食到有 (當日病緊，唔知有冇關係)$28 一杯細的...價錢還可以早排見TimeSquare CitySuper 有一間裝修緊…查看更多

因為facebook 見同事張相影得好精美吸引路經K-11 買左五件不同款式去朋友屋企有綠茶、長條型朱古力(店員推介)、士多啤士撻、黑莓(?)撻、同埋一件白色正方型的(唔好意思，本身外型真係好精美，但唔記得個名，形容得好衰 -_-")可惜試均五件都無一件令我有印象~ 話好好食又唔係，話難食又絕對唔係三十幾蚊一件，一試無妨，未必再試當日雖然星期六好多人，但店員都好有禮貌，慢慢介紹，值得一讚 …查看更多

一向我唔"好"酥皮類食物，感覺太油膩，有d 唔好食o既仲有陣油溢味之前收到親戚送o既蝴蝶酥禮盒，見包裝靚又多人讚好食，立即拆開試試蝴蝶酥真係鬆化唔硬、不太甜同太油，送禮俾老人家都o岩食開罐食左有四五日都依然好味 (當然到後期比起第一日開時，已經有d 分別，真係開封後儘快食用)上網睇返要八十幾蚊一盒，有幾十塊 (食到一半數仲有廿幾塊，估計起碼有四十塊..."啩")好似寫到好hard sell ，但我真係覺得好好食啊....新年送禮好適合，打開個盒實實在在有好多塊蝴蝶酥。唔同有d 禮盒價錢用哂落個包裝，一大盒餅但實情得十幾塊，得個大字。…查看更多