baby120的个人专页

大約早上11點幾，想搵間咖啡店食個悠閒早午餐。入到呢間店，全店冇人，得我一個。叫咗個全日早餐，餐廳有兩位店員，不停傾偈勁大聲。等咗好耐先有食物上，然後問吓點解冇餐具，店員叫我自己拎？！其實點解冇人都唔拎俾我呢？價錢一啲都唔平，俾啲咁嘅服務。百幾蚊一個全日早餐，個bagel又唔熱又唔好食，賣相睇落OK，但一啲都唔值。咖啡偏酸，唔好飲。而且成間店非常之油煙，一定唔會再去。元朗咁多咖啡店選擇，未試過去一間服務咁差。…查看更多

午餐經過見到好多人排隊，又有時間就試吓。叫咗豬頸肉湯河、越南春卷，同埋一杯越南泡沫咖啡。豬頸肉湯河非常普通，湯底尚可，約$5-60一碗湯粉，沒有跟餐飲品，價錢小貴。春卷都幾好，熱辣辣炸起，春卷皮夠脆，餡料都幾多。泡沫咖啡都好飲，不過就唔係好夠凍。環境就比較差，坐得好迫，同埋要搭枱，側邊侍應會走來走去，好繁忙。令人感覺食得好趕急。如果經開又唔使等位，試吓都可以。不過想坐得舒服啲傾吓偈，就不是一個好選擇。…查看更多

第一次嚟，試咗個all day Breakfast，餐可以跟牛角包或酸種麵包，仲有香腸、炒蛋、沙律、煙三文魚、豆腐、百香果同埋焦糖香蕉。沙律比較少；麵包可以但唔夠熱，應該不是自家製，如果可以焊一點會好啲；香腸、炒蛋和煙三文魚正常發揮；焦糖香蕉幾特別，好食！價錢唔算太貴。另叫了一柸美式熱咖啡，味道唔酸，夠香有層次，而且幾大杯，咖啡質素幾好。 店員服務都殷勤，見到冇水，會立即斟俾你，整體環境舒適，會再幫襯的。…查看更多

Halloween想食西餐。見朗屏地鐵附近有呢間西餐小店，感覺環境幾好又有氣氛，就去試吓。點了二人餐，再加咗兩位Wine pairing, 二人餐約$6xx 有湯，沙律，另外三個主菜，我哋要咗牛扒（要加錢），墨魚意粉 同 煮蜆，仲有甜品。蘑菇湯夠熱，正常發揮。沙律好食，不過份量少。墨魚意粉好煙靭，好食！牛扒質素高，有高級餐廳質素。解釋。煮蜆都好有特色，有啲東南亞味道。甜品tiramisu 好正宗，不過份量偏少。Wine pairing 每人約$18x 三杯酒，普普通通. 另外再叫咗burger 同炸雞，burger中規中矩，炸雞好好食，外脆內軟。整體好食，上菜比較慢，不過價錢小貴。環境好，服務態度都好，有氣氛。如果唔想出尖沙咀或銅鑼灣，又想搵啲有氣氛嘅餐廳飲下酒食吓西餐，都係不錯嘅選擇。…查看更多

非常之多嘢食的一間放題。首先刺身非常新鮮。有我最鍾意嘅海膽同埋三文魚子🤗,上菜速度都好快，不過張枱就細啲，所以唔好一次過叫咁多，如果唔係唔夠位擺。職員都會keep住嚟收碟，服務好好。另外，好欣賞個蒜蓉粉絲蒸蟶子，好新鮮，又夠大隻，平時其他放題好少有。仲有凍花蟹，鮑魚等等淨係食呢幾款海鮮都值回票價。串燒同天婦羅水準都正常發揮，牛舌都好食。出邊仲有大量飲品，啤酒清酒都有，仲有啲熟食比客人自己拎。雪糕有大牌子的，款式都算多。…查看更多

約咗幾個朋友慶祝生日。見呢間自助餐都算新開，又未試過，而且喺尖沙咀海港城，地點方便大家，就嚟試吓。餐廳啲位好舒服，座位與座位之間都好寬敞，我哋六個人安排咗個梳化位，坐得好舒服。服務員非常之細心，我哋叫咗支酒，服務員見我哋飲完都會幫我地斟酒。食物方面，龍蝦同帶子刺身都幾新鮮。熟食唔算好多種類，不過味道都算唔錯。因為朋友生日，餐廳會送一個小生日蛋糕及有蠟燭，侍應都安排得好好。總括而言，成晚大家都食得好開心，整體都好滿意。價錢亦都合理。…查看更多

隔離食完日本菜，諗住搵間咖啡店飲咖啡。見到呢間環境唔錯，就入去試吓。估唔到咖啡都幾有特色，而且環境靚，打卡一流。叫咗杯橙味又有啲鹽味嘅咖啡。估唔到又幾夾！好飲！下次再嚟試埋嘢食先。…查看更多

第一次嚟試咗麻辣紅燒牛肉麵。不過嚟到碗麵唔夠熱，叫服務員加熱，態度都好好，而且立即幫我整返熱。牛腱唔夠腍，都幾韌，份量唔算多。麵條質素係普通。湯底尚算濃郁，不過碗麵要成$100，就咁感覺茶X 性價比好好多。另外再叫咗杯檸檬紅茶，都係好普通。…查看更多

下午三點仲未食午餐。經過見到呢間餐廳環境唔錯，又未試過，於是入去試吓。由於已經三點，午餐已經沒有，於是就叫下午茶試吓。環境都坐得舒服。侍應服務都幾好。見到個蟹粉烏冬張相都幾吸引，就叫咗嚟試吓。點知一啲都唔好食，收費仲要成百蚊。烏冬上的蟹粉都算多，但係食落完全冇味，烏冬好淋又唔夠熱，唔好食，同埋成碗麵好多油。個底全部好似用油浸住一樣。唯一好少少就係杯咖啡。如果順路經過，同朋友傾吓偈，飲杯咖啡都可以。烏冬就真係唔好試了。…查看更多

朋友想食Omakase。之前一路都想試呢間，初初開嗰陣時好難book。依家平日容易book了，一於去試吓個午餐。午餐價錢都算抵$1080加一。有三道前菜,10件壽司、甜品和湯。而家係秋刀魚當做，前菜有個秋刀魚卷，非常新鮮非常好食！另一道前菜白子都唔錯，好軟滑。而每一件壽司都好精彩，每件都好新鮮，活北寄貝新鮮到不得了，非常爽甜。飯的軟硬度和酸度都好啱我口味。師傅會問你飯嘅份量足唔足夠，可以根據你喜好加減。由頭去到甜品都非常欣賞，絕對配得上米芝蓮的銜頭。…查看更多

見到新裝修後有promotion，而且食物都好吸引，見到好多網紅拍片有無限量供應海膽魚子、蒸新鮮龍蝦及海膽鴨肝意大利飯，淨係呢幾樣已經好吸引。自助餐6:30開始，我哋6:45到，餐廳周圍已經排晒隊，差唔多每一樣嘢都要排好長。我地叫咗紅白酒任飲，飲完第一杯，叫咗好耐都冇人再嚟refill。明顯餐廳人手係嚴重不足。海膽魚子醬：排好耐隊，份量唔多。基本上你全晚唔可能食到好多次。新鮮龍蝦：又係等好耐，不過龍蝦確實係新鮮。鴨肝意大利飯：呢度係等最耐，質素都OK。如果想食牛扒羊架燒蝦之類，唔明點解都要排同一條隊。總之你食啲咩都要排。其他凍海鮮：賣相唔吸引。麵包蟹完全冇膏。仲要成晚兩三個鐘都冇人refill過。總括而言，食物質素其實唔差。不過全晚都不停咁排隊一啲都唔enjoy。唔會再嚟。…查看更多

喺元朗又想食吓高質燒肉同飲下清酒，冇乜太多選擇。於是上網搵到呢間，即日book位就嚟試吓。餐廳坐得舒服，都有好多卡位，一啲都唔大油煙，估唔到煙囪細細，個吸力又幾好喎。兩個人叫咗個至尊二人餐$888，有前菜、一盤燒肉、海鮮有龍蝦同埋生蠔，唔要生蠔可以揀帶子。仲有兩杯大生啤！肉類質素都好高，龍蝦雖然唔係新鮮的，但係都好大隻，燒完都好彈牙，另外俾咗蒜蓉同牛油，加埋一齊燒又幾好食。最後仲有兩杯雪糕，整體都唔錯。…查看更多

今次第二次過嚟食，因為朋友未食過，就陪朋友再嚟試吓。第一次印象好好，肉質好鮮嫩，有驚喜的。但係唔知係咪第二次食嘅關係，感覺水準差咗少少，件漢堡扒好似冇之前咁Juicy咁。套餐每人包三件漢堡扒，一隻生雞蛋，廚師會分開三次上，見你食完一舊，就會立即上第二舊俾你。都要讚賞廚師嘅眼力。面對着個火爐，都係有啲特色。不過食過一次之後，第二次確實冇乜新鮮感。因為有會員可以訂位可以試吓。如果要排隊，就一定不會黎。…查看更多

慶祝老公生日，佢一向鍾意食日本嘢又鍾意飲清酒，就嚟呢間餐廳試吓。叫左個套餐，再加咗清酒free flow, 個套餐都好豐富，而每道菜都好精緻，最好食係壽司同天婦羅，壽司飯好食，刺身夠新鮮，天婦羅炸得恰到好處，炸皮唔會太厚。最精彩當然係有多款靚清酒任飲。staff仲會介紹每款清酒俾你，夠專業不過開頭去到，安排左一張好細的二人枱，位置又唔好，初時有點失望。然後要求先至安排另外一個望窗的位置。其實餐廳仲有好多位置，希望餐廳唔好成日安排咗比較差啲位置比客人先。整體嚟講，食物質素好，上菜速度都好。會再來的。…查看更多

其實多年來都係牛角VIP, 我和家人都係食肉獸，又係清酒愛好者。佢嘅燒肉放題加清酒放題，確實好適合我哋口味。質素多年來都冇乜改變，放題價錢合理，當然肉類嘅質素唔可以同去日本比啦，但比好多香港燒肉放題質素都高，其實我最欣賞就係只加$68 可以任飲啤酒、清酒、梅酒、菠蘿酒…啱晒我哋呢啲酒鬼。加上放題唔止有燒肉，前菜有芥末八爪魚、沙律、炸雞、炸蝦… 好多款式。而佢哋每一間餐廳，服務態度都真係好好。市道唔好，見佢哋就算假期都唔多人，真係要多多支持，希望佢哋可以繼續落去，始終服務好又保持到食物水準嘅餐廳真係唔太多了。…查看更多