Photolab的个人专页

呢間係位於K11 musea地底food court（最近先發現有）既拉麵店。當日係星期日兩點幾左右，佢好多拉麵都已經無，包括本身想嗌既安格斯牛。所以叫左個九州拉麵，因為個人幾中意福岡系拉麵既湯底。整碗拉麵同湯底都合格，豬軟骨一般，湯底都合格，但又未話去到超級好食。但值得留意係，佢d筷子匙羹係自己拎，拎完發現有兩隻匙羹痴左d飯粒，未洗乾淨，呢個大家要留意下。杯茶就係後面一間叫robot tea整既，味道都係一般般，不過佢可以由機械人負責沖，比較有gimmick。…查看更多

呢間野係咪好多打手？明明咁伏。成日見openrice好多食物圖片，一睇就知唔係平民影，而係特登用專業少少既數碼相機／foodie app，再加埋食評有好多hashtag、emoji－擺明係ig寫開食評既KOL/foodie, 成篇抄上黎openrice。無論如何，自己條脷最準，唔得既借埋隔離位條脷，夠中肯啦掛？嗱，今次第一次試呢間台灣野，就叫左呢個「蘋果咖喱豬軟骨飯」。d飯份量少，一個人絕對食得晒。問題黎啦，碗咖喱完全出事！日式咖喱都有最易整（或者咖喱之中最頹之選），佢好明顯係日式咖喱，但淡到一個點，成碗好似溝左水咁仲有，佢有面浸住既根本係薯仔－隔離位試左舊薯仔，見仲有皮痴住要搣，但塊皮黃色一點點，明顯係薯仔皮，唔係蘋果囉。雖知菠蘿包無菠蘿，鯨魚唔係魚，你呢碗蘋果咖喱好歹都有返蘋果丫？成碗都無食過有蘋果味。得薯仔你唔直接叫薯仔咖喱？d豆角又係煮唔熟，一咬中間有好大浸草青味。唔係想浪費食物，但真係食到一半已經覺得自己好勁。…查看更多

是次朋友帶我到佢成日去開既「食堂」。呢日天落住毛毛雨，我地就係天后站行過去。大約7pm左右，店入面都幾多人，係門口等左大約5分鐘左右就入去啦。入面位同位之間較迫，我地就坐左係近收銀既位到，隔離係一張擺外賣既枱。一入去已經聞到好大陣日式咖喱味，雖然餐廳提供除左咖喱以外好多既食品，但見大部分食客都係食緊咖喱飯，所以我都叫左豬軟骨飯。咖喱幾香，同平時既日式咖喱無異；飯份量唔多，幾岩女士食，本身仲擔心會唔會太大份食唔晒。咖喱飯最忌少汁多飯，多汁多飯或多汁少飯，總之飯夠撈黎食就最好。豬軟骨好似係佢既招牌，煮得非常腍，好易就咬得開，入口即溶，非常好。另外配菜都非常多，應該都係佢signature之一，友人話非常健康。呢個就見仁見智，食肉獸或者覺得菜太多，肉可以再多d。菜既質素就一般，同普通日式炒雜菜差唔多。賣單二人total ＄120左右，計埋野飲。…查看更多

天氣有如沙漠般酷熱，雖知元朗街頭有好多美食，但周日中午時份，間間爆滿，事前又未做好research功夫，所以都係lei返入個商場覓食。旁邊既天井好多年輕人排隊，反而隔離呢間西餐廳，長期都無乜人，上openrice睇下都有幾篇負評；咁今次就抱住試伏既心態黎試下。俗語都有話，唔試唔知身體好。餐廳大概4成滿，一個人黎食都坐到門口靚卡位。餐廳特色係裝修非常之高雅，有酒店fine dining既格局，以金色同湖水綠色為主調，俾人一種上世紀art deco既感覺。卡位梳化非常舒服，所以我都會列入為「適合閒聊的餐廳」，況且顧客不多，可以輕鬆坐幾個鐘都無人趕。但我地黎睇下食物質素先。唔講唔知呢間原來係食西班牙菜。咁係lunch menu度我揀左個意大利雲吞意粉，感覺最岩食亦係最平既一道菜，都要＄98d餐具係金色的，幾靚，旁邊有一大樽水可自己斟。侍應服務態度都ok，唔似負評咁咁差。呢碟意粉味道唔差，汁夠多，好食，三文魚都幾好口感。份量對女士岩岩好，男士應該唔夠食。佢個lunch set包埋南瓜湯（或沙律）－有d淡蒜蓉包－少硬同乾，但夠香脆熱咖啡－好普通甜品好普通，已經唔知食左d咩，但好過無。就係咁，有時網上評論有好有壞，打手難分真與假，除非自己親身試過。個人認為餐廳裝修靚，舒服，食物質素ok，就係太貴－意粉98已經好overprice。問題而家愈黎愈多餐廳（尤其小店cafe）都動輒100蚊起跳－有咁既價錢，食物味道都要對得住有咁既質素，食物世界裡一切以味蕾既感受為指標。…查看更多

旺角平日晚上都較多人，餐廳難求，呢間朋友介紹，話岩一人坐，就黎試下以前對春水堂既認知係只賣奶茶（仲要唔太多人幫襯，俾貢茶果d搶晒客），原來旺角呢間分店仲有熟食。入到餐廳非常闊落，平日晚上7pm左右，坐左4成滿，位同位之間都夠空間，一人或多人黎都會坐得舒服，亦屬於「岩傾計餐廳」。咁黎到就叫左個手工麻香麵線，望落有d細碗，但食落去都夠飽同好食。但重點個人覺得都係杯奶茶，真係幾好飲。唔夠字數，繼續講下。奶茶非常香滑，雖然大杯，但唔會飲唔晒，配住d麵黎食確實幾好。環境用上左唔先木造傢私，令我諗起牧羊少年餐館既風格，亦好岩文青。記得多年前去台北都有品嘗過春水堂，都係飲奶茶，有時實在慶幸東南亞既奶茶文化－所謂milk tea alliance，將奶茶呢樣野發揚光大。英國佬視飲茶為高尚文化，但東南亞既人將茶加入奶，頓時變得地道，茶餐廳、珍珠奶茶店，街邊小販，買圍都有得賣。…查看更多

意志消沉時，一碗好食既喇沙可以燃燒起你既tamashi。當生活苦悶，連街邊刺鼻既拜神味都可以令你覺得香時，突然覺得要食返d有味道，具刺激性既野。本來想食隔離壽司，但見佢未開，就黎食呢間好耐無黎既馬六。呢個舖位易手多次，上次黎仲食到肚痾（唔記得係上一手定馬六）好彩今次無事。店內好多人叫左海南雞飯，應該唔錯。但目前唔想食飯，所以叫左碗海南雞喇沙+凍馬來拉茶喇沙一上黎就聞到好香，有時生活就需要呢d物質上既小刺激，同時提醒自己要面對現實。好多時我地面對既緊張壓力抑鬱孤寂，都係自己既想像，而食物既香氣正正如當頭棒喝，敲醒你呢點。所以食完係勁精神！好講返碗野，海南雞非常嫩，令我下次想食海南雞飯。喇沙湯底非常香，濃郁既椰汁味，食落又唔會太辣，恰到好處。麵我叫左「掺掺」，即係幼麵加油麵，食落口感都唔錯。奶茶非常香滑，同港式奶茶好唔同。食喇沙呢類食物一定要配凍飲，凍奶茶係好好既選擇。無事我返出去做野先。…查看更多

以前openrice3日就批核到食評，而家成個禮拜都未批？仲有，有人話負評會批得慢d，好評就不斷ok，係咪做馬都唔知。入正題，與友人相約於佐敦食晚飯，佢係一位小籠包控，連pro pic都係小籠包！咁佢就介紹我黎呢間啦。店內格局同普通茶樓無異，夜晚時分大約6pm，唔算多人，3成滿左右。小籠包後來叫左兩籠，好食多汁，不過不失。雞絲粉皮好食，唯粉皮薄左d，份量細。酸辣湯好飲，唔太辣，非常開胃－食到好濟既時候抖下，飲下湯，又可以再食。三色百頁卷個人麻麻，但係健康之選。醉雞好食。侍應們年紀頗大，但非常勤力有禮，好主動幫我地斟水傾計。…查看更多

本來想食喇沙，去隔離一間叫味王既餐廳食，但就比隔離呢人氣較旺既小店吸引左。店內冷氣開得大，但室外非常熱，入到去都唔會覺得凍或需要著褸。時值12點半左右，大概坐左半滿。侍應哥哥的態度就麻麻，黑面唔耐煩，不過唔緊要，始終覺得食好西就真係食好西，服務差還可接受，野唔好食真係大忌。另外，當你應付到世上稱為「阿媽」同「老細」既人，其他態度差既人彷彿一律可接受。餃子有蒸餃同煎餃揀，咁我就揀左煎餃，唔想佢濕that that，配埋菠菜麵。哇！個韭菜豬肉餃子真係好好食，皮薄，煎得靚，餡既味道又好食。麵都幾好，湯底唔會太咸或多味精，淡淡地，令麵既味道更出。凍檸茶就一般，比較濁，識飲一定係飲比較清澈果d。仲有，埋單價錢都係＄45（麵多數30－40蚊），咁既價位而家真係好難見到。馬鞍山仍有呢d高質小店，要支持下。以前貴為美食沙漠，近年好似多返d好野食，沙漠終於有綠洲。食完出黎大概1pm，呢個時候就多人啦，好多學生lunch time，湧入餐廳，所以最好避開呢個時間。…查看更多

荃灣西如心廣場呢間有好多落地玻璃既餐廳，位於商場轉角位，經過好多次無入去食，今晚得閒終於試下。夜晚8pm左右入座，人唔算多，3成滿左右；環境好舒服，枱同枱之間闊落。咁我就坐窗邊位，有窗外馬路風景睇下。餐廳用QR code落單，選擇並不多，最平的食物都要100up，大家記得帶多d錢。桌上有齊餐具同水，裝水既飲器幾摩登，夠水飲。叫左個黑松露意粉同南瓜湯，意粉入口幾好食，質感係al dente（雖然我未食過真正al dente，但同普通淋patpat既意粉唔同）汁唔算多，但幾掛到係意粉到，味道唔錯。食完會比較乾，可能平時食開多汁既港式意粉南瓜湯不過不失。整體而言，食品唔差，環境舒服同安靜，岩同人食飯吹水。附近仲有間店賣日式杯碟，極靚。…查看更多

壽司郎識揀一定揀平日黎，仲要係黎食早餐，如果唔係排到扒街。屯門呢間食過4次，佢朝早10:15am開，我地就9:45am黎到，門口都已經排左30人左右。真誇張，日本野係香港既威力幾咁大。一到10：15am開店，拎左飛就係門口等，期間非常墟撼，門口塞滿晒人。籌號係30左右，等左10分鐘等侍應慢慢嗌飛就入得。每次入去都有專人帶路，侍應講歡迎既日文都比普通連鎖壽司店準確，而唔係求其「1314」；而坐低後都會認真問我地係咪第一次黎，係既就會詳細講解點用ipad落單等等要注意事項。呢種細心既服務真係日式企業先有，而且食野講求EXPERIENCE, 所以中意壽司郎既原因就係，每次有門口都食完走，都有種好貼心既服務，成個體驗非常好。食物質素方面當然唔差，個人幾中意食佢既大吞拿魚腩壽司，雖然幾個月前會較新鮮，近期比較普通；仲有芝士三文魚壽司（粒芝士幾好食）田樂味噌三文魚壽司（燒得幾甜）甜品方面，正如個個都話黎壽司郎一定要試佢既甜品，係真係好食：抹茶芭菲（正確食法係要瘋狂加抹茶粉）半熟芝士蛋糕都非常好食兩人埋單一般都係400－450左右。食完都非常飽同滿足。…查看更多

IKEA個人覺得一向抵食－價錢平，質素好。如果以前中學附近有間ikea餐廳，一定日日黎食 <---（點解openrice d emoji咁樣衰？）今次係禮拜日lunch time黎，所以都比較多人，排左約15個人係門口，等位入。不過排ikea好處係唔洗曬，係室內有冷氣咁等，食完仲可以行埋睇傢私。其實都好快，等左15－20分鐘後就有得入座。我例牌食羊架（無就會食西冷牛扒），因為真係好抵，而家香港已經搵唔到邊度有靚扒又係under100蚊架啦羊架幾有羊羶味，中意既朋友一定要試！汁都非常多，肉夠淋，唔會多筋，脂肪都多，好食。仲配埋好食既薯蓉同蕃茄仔。兩個人食，埋單都係16x左右試過沙田，cwb、荃灣等等幾間，都係荃灣呢間食物煮得好食d，沙田既扒有時比較柴。…查看更多

是次同舊友聚會，揀左黎銅鑼灣登龍街呢間居酒屋。由於係居酒屋，都預左食物比較貴，大家傾計為主。店舖位於商場既1樓，搭扶手電梯上一層就見到。偶爾有客人入座，侍應就會敲門口既鼓歡迎，氣氛幾好，都令人幾放鬆。menu選擇非常多，我地都揀左一輪，包括6件壽司，大量串燒，枝豆，鯖魚等等。食野途中，鄰桌生日，staff搞起氣氛令大家一齊唱生日歌，但最重要都係每枱每人都有一小杯清酒送，幾好飲由於清酒好飲，我地又叫左一支。當大家開始飽時，就係飲清酒既時候，途中有講有笑，直到清酒有完就散場。我地坐既角落位近門口，有棵假櫻花樹佈景係後面，影相唔錯。…查看更多

港大呢間coffee academics裝修幾靚，經過一定會望一眼，幻想自己坐係入面睇書傾計，幾chill。但！佢冷氣唔洗錢咁，超凍，凍到塊玻璃長期有水氣，為店舖增添朦朧既氣氛。所以去堂食長坐既，記得戴定外套。本人最中意就係佢d signature coffee，有agave，jawa，okinawa，manuka，試過晒4隻最好飲都係agave佢加左黑椒係面，少少辛辣得黎又夠甜。不過成間野除左呢隻，試過latte、dirty呢d全部唔好飲。要飲真正好既咖啡，建議行去國殤之柱（舊）學生會大樓既「學食」餐廳。…查看更多

由輕鐵豐年路站行去餐廳，大約5－10分鐘距離，位置係雀屎河旁邊，建議大家預定時間。餐廳行簡約日系文青裝修，應大受年青男女追捧，幸好朋友早幾日就book定位，建議大家想食就預先透過whatsapp book位。店內裝修幾舒服，坐唔到幾多人，但空間幾舒服，都幾岩打卡。唯位同位之間可能稍為迫少少。野食就介乎$140-180之間，個人就覺得比較貴，可能近100或100內會較合理（相較其他同類型舖頭）。食物非常豐富，比想像多，有飯仲有麵牛舌非常好食，咬落去淋，唔會太硬，佢d可以點既芥末都幾好食。面豉湯清甜；沙律正常，凍豆腐好食，仲有個用菜包住塊餅狀既甜品類食物，都好食。茶碗蒸好食。烏冬就得幾條，全部加埋飯，女仔食應該超飽，男仔食應該岩岩好。唯牛舌我覺得可以加多幾塊，而家有d少唔夠囉，好快食晒甜品有好似牛既黑芝麻蛋糕同抹茶布丁，size岩岩好，作飯後甜品唔錯。呢間野食豐富，打卡一流，食物質素都ok，唯獨係有d貴。平少少有更好，不過佢都唔憂做…查看更多

之前一直唔知西環有mos burger，直至見到d路人拎住mos burger外賣紙袋，google先知。下午茶時間黎到，無乜人，佢位少，大概只有4張枱（food court也算不上），所以最好避開lunch time peak hour。每次去mos多數都叫佢招牌，佢d漢堡包一向高質唔伏，所以嗌邊個都無乜所謂。中間夾左菠蘿幾搞笑，幾甜，但個人覺得麥當勞個菠蘿蝦堡既菠蘿就好食d。整體漢堡包唔錯。雪糕無論海鹽味定抹茶味，都好味，夠甜。首推海鹽。奶茶就唔得啦...mos既奶茶往往好似溝左水咁，好淡建議大家野飲都係嗌其他。…查看更多