招兵買馬的个人专页

孫子兵法有云: "夫用兵之道，攻心為上，攻城為下，心戰為上......", 即心戰先係用兵上上之道, 而用雞脾打人牙骹可謂兵家常用心戰妙計, 但我發現, 鴨脾打人亦有令牙骹軟晒之神效!!!話說有日加班之後, 同老闆走左去深水埗食飯, 隔遠見到十八座狗仔粉好光猛, 走左入去試試, 一坐低, 見到一樽二樽菜莆, 見到人人都一碗火鴨翅, 愛跟風既我都要左一碗, 順便要左隻鴨脾, 侍應姐姐問左出面, 之後話得番上脾, 冇下脾, 有d失望, 照樣接受, 等左一段可觀既時間, 見除左火鴨翅之外, 有其他小食選擇, 不過係深水埗, 其他既小食見怪不怪。配菜菜莆有2種, 因自己口味而異, 較特別的係菜莆似係店自己人調制而唔係出面買。 火鴨翅一到, 見裡面真係有一條條火鴨絲係度, 入口啖啖肉, 味濃而唔水淋淋, 自己多手放左好多菜莆落去, 咬口多左, 菜莆唔係行行企企, 佢地幫盡火鴨翅出味, 所以當時我都唔知落左幾多菜莆。另外, 自己唔敢飲得太快, 因為主角火鴨仲未上場, 但試問, 一碗火鴨翅放係你面前, 點可能話唔食就唔食, 惟有食一啖, 係口裡面慢慢回味, 之後先放落肚。其他台都叫火鴨, 但係侍應呢個時候話火鴨無晒, 眼見好多點鴨脾既食客都面露慘痛, 我地當然係憂心如焚, 因唔知會唔會冇而俾人cut單, 問左侍應姐姐, 得到既回應係, "得番你地兩隻。"跟住我就更驚, 萬一侍應一陣捧火鴨上台, 有人衝出黎咬左隻鴨脾去點算, 一路一路等, 四方八面既目光都集中晒係我地身上, 而身邊既火鴨翅亦飲到所餘無幾,一輪沈默下, 火鴨終於上場。我緊慎睇住侍應行埋黎, 確保火鴨安全去到我張台度, 其他人既眼光道明一切, 我一手緊握火鴨, 一口咬菅去, 保留住汁既皮, 牙骹即刻鬆晒, 用盡自己既力咬緊, 經火鴨翅煮過既火鴨鬆軟易食但唔會散開晒, 每一舊肉都重重打軟晒我口部既神經, 而一路食, 亦都飲埋火鴨翅, 兩者既配搭發揮得好出色, 佢唔係好似普通燒味咁乾, 沈住火鴨翅反面更易入口, 連住骨附近既肉入左味, 我無辦法忽略佢地, 最後只留下光滑如鏡既碗同埋一條乾淨既骨。…查看更多

經過幾間快餐店, 見到冇位食早餐, 諗起一直都未試過呢間餐廳, 本著早餐貴極有個譜既心態走左入去, 唔洗等已經有卡位坐, 見餐廳乾淨有cafe感覺。睇完餐牌, 價格微高過附近翠河餐廳, 點左火腿蛋腸仔通粉, 跟住留意下餐廳既佈置, 之後黎左個奶茶, 試左啖, 不過不失, 機沖較穩陣, 茶唔老, 又唔會太多奶, 可以接受。跟住出場既係通粉, 諗住第一次試都係點較穩陣簡單既食品, 發現湯係滑滑奶白色, 同埋有好多粟米, 見有配菜喜出望外, 餵左手機食之後輪到自己食, 入口第一啖腦內靈光一閃, 第一下既感覺係.......凍既?!凍既意思即係已經離開左暖一d, 凍既意思亦都係指炎炎夏日都仲可以感覺到既寒意,師傅唔似一次失手有d冇番熱, 而似平時都係咁, 因為全部都係凍凍地既(材料凍, 通粉凍, 最愛粟米都...) , 根本就無考慮過煮熱, 推斷d材料係整定, 客人要乜就放乜, 跟住上湯滾一滾(d湯係微暖既......), 上台俾客人,以為每個客人唔考慮食物冷熱既問題, 就算食完會支付$27-30都好...以平時做野填飽肚既方式火速食左個通粉, 飲埋杯奶茶埋單走人。一個失望的早上。…查看更多

夜媽媽, 加班做到9點幾, 附近食店都收晒工, 肚仔餓, 腳仔軟, 一行三人到左七喜食飯。唔係第一次幫襯七喜, 以往都有食開客飯同粥, 今次叫左幾個小菜食。去到見唔少人, 岩岩有張台起身走人, 坐低叫野食, 一開始即叫豬紅羅白, 一般街坊食品但係例牌菜, 夜晚入去食通常都走唔甩, 送飯就咁食又得, 食住再諗食咩又得, 羅白大大件, 唔太辣, 豬紅又滑。I之後叫左個豉椒炒蜆, 唔係太入味, 可以花心機試其他。金銀蛋浸時菜唔會淡味, 我叫開白菜多, 菜心容易受時令影響, 蛋花落好多, 分量亦好多, 食果陣好有滿足感。豬頸肉第一次叫, 不過不失既菜式, 叫左唔會擔心叫錯野, 反正就係有碟肉食下。…查看更多

朝早入荃灣大野, 搵機會黎呢間餐廳試蛋, 睇過之前一d食評, 有d擔心呢間餐廳可能只係名牌效應, 十點半到, 已經見到唔少人排隊, 原來除左下午茶時段, 朝早都一樣多人。坐低即點奄列, 再黎多杯奶茶, 打算食完奄列再諗加唔加其他野。先飲奶茶, 係茶餐廳奶茶, 多奶熱滑。見有人點熱華田, 都好大杯下, 不過今次飲完奶茶先算。 主角奄列上場, 一黎嚇一嚇, 一大碟蛋, 再加一個包, 早餐份量夠晒, 再配埋杯奶茶做比較, 我諗最少用左三隻蛋黎炒。一聞有豉油味, 蛋炒得岩岩好, 好怕食好乾既蛋, 而個火腿奄列炒得濕濕地, 岩晒心水, 食落仲有少少蛋漿慢慢流出黎, 入面好多火腿, 而且仲好厚, 火腿相對黎講比較暖些少, 接受畢竟主角係蛋, 一路食, 送完包之後再有好多, 唔停手食晒, 好滿足。…查看更多

工作後, 和同事選擇了到小王牛肉麵用晚餐, 時段較晚, 去到差不多去到Last order, 同事叫了牛肉面, 而我試回雞排面, 另外點了一些小點。先上場的是炸墨魚丸, 開胃菜式但較尋常, 其實可以還有其他選擇。黑椒豬排, 分量不錯, 雖是黑椒但不太辣, 如果要比較的話, 我會偏向要黑椒豬排, 而不點炸墨魚丸。雞排面上枱時, 雞排是分開另上的, 因為雞排太大塊, 比黑椒豬排分量大得多, 岩岩炸完就上枱, 仍是熱辣辣, 而且唔會粉, 我們當晚3個人分這個雞排, 差d食唔晒, 當然也加上其他小點食既。…查看更多

年初一去左影相, 之後由西環一直行到落銅鑼灣, 為既只係想食餐好既, 但沿路既餐廳大部份都休息, 自己亦唔甘心年初一食快餐, 腦海中突然閃過去一蘭碰運氣 去到一蘭竟見有做生意, 諗都唔諗排隊等食, 之前未試過一蘭, 令自己更期待同肚餓, 坐定定立即填單等食, 因為自己未去過所謂正式拉面店, 見到d位前面有廉覺得好新奇, 填完禁前面個鐘仔就有人拉開廉子拿餐單, 自己要了叉燒, 沒有追加面。碗面到左, 望一望, 驚問自己:"我隻蛋呢?隻玉子哩左去邊呢??"原來一蘭拉麵沒有跟蛋, 需要另叫, 二話不說立即追加。吃落感覺跟想像中有點相差, 湯底著實不錯, 但感覺不像是朋友們所說的要加面加飯(ps.一蘭係可以加飯撈湯的)撈晒d湯, 面質不錯, 但食完後不是太難忘, 唐幸子既配搭不錯, 自己要左1/2, 其實再多d都可以接受, 叉燒就好似較瘦, 食落去好像沒有滿足感, 如果需要追加配菜, 叉燒未必是一個好選擇。流心蛋食落不錯, 蛋白正常結實, 咬落去, 蛋黃慢吞吞流出黎, 食落唔會重味, 感覺自己冇追加錯。自己之前的期待太大, 食完之後有點失落, 感覺一蘭同其他對手其實都係伯仲之間, 冇坊間所提到咁強勢, 如果好似之前要等三四小時才可以食到, 著實唔係咁抵, 暫時都係試一次之後再觀察下先。…查看更多

同同學去東涌踩完單車後, 聞到附近餐廳香氣, 反正沒有目標, 決定睇睇呢間餐廳試下。因為同行得2個人, 所以較易有位, 聽到附近入座既人都係預先訂左位。坐低叫餸, 分別叫左炒通菜, 泰式生蝦同埋海南雞半隻。期間服務生提供左暖水俾我地, 飲既時候發現有暖暖既椰子味, 挺特別。頭盤出現既係生蝦, 點既醬酸酸地好開胃, 食完蝦見仲有炸蝦頭食, 蝦頭可以伴飯。之後上既係海南雞飯, 雞肉唔凍冇雪味, 但雞皮味道一般, 而如果師傅可以將雞肉切薄一點, 入口將更佳。泰式炒通菜不過不失, 食落唔會過晒味, $58都覺得算係幾抵食總括, 黎到一定要叫個生蝦, 食緊果陣都見唔少人叫, 個海南雞就隨自己喜歡, 人少有好多菜都冇試到, 如果有機會會再試下。…查看更多

舊同學生日, 打算到中菜館吃飯慶祝, 當天8時30分左右到達, 發現已人頭湧湧, 幸好自己早了一天訂位, 坐低開始叫菜, 之前已看過這裡的食評, 看到對燒肉的評語好壞不一, 十五十六之下照叫了燒肉一試, 還試了炸鮮魷...燒肉黎先, 食完一舊消去之前睇到劣評的懷疑, 趕緊去搶夾第二舊, 全部同學都好受落, 一致讚好, 另外炸鮮魷亦交足功課, 唔太溜, 脆口好食。之後上台的走地雞保持水準, 之前好怕食d雞凍, 但一食之下, 伋熱辣辣同埋有咬口, 我地當晚一行8 人, 叫了半隻雞, 加其他菜感覺份量足夠, 如好雞人士可再叫全隻。沙律骨也不錯, 但吃多兩件都會幾溜。素菜卷一般, 有同學好素, 所以叫了這個菜式, 但感覺麻麻, 可以自行商量是否需要叫這個。對比素菜卷, 草菇西蘭花的表現較好, 基本菜式唔會水淋淋。另一期待焗魚腸, 對於平時不吃內臟的我也抵受不住, 叫飯之後一定要叫埋, 料足沒有腥味, 凍天食岩岩好。爛魚煲一般, 相信可以有其他選擇。…查看更多

行完石板街，四周圍餐廳都排滿晒人見到門口無咩人，又見西紅柿雞蛋餃咁得意，入左去試下裡面無咩人坐，待應姐姐冇限我坐邊度，搵左個位坐之後就開始叫炸醬麵一上台靚靚地，d面唔乾，整個面唔辣，最鐘意食既青瓜絲煮得唔錯番茄雞蛋收餃睇到招紙以為要到6點之後先有呢個供應， 多口問一問，原來午飯時間已經有得食， 內涵簡單， 好番茄好香好好食番茄雞蛋收餃真係份量十足，而且顏色好吸引豆漿枝裝豆漿，午餐岩岩好地點可能不是最就腳，門口也許不是堂皇，但裡面的感覺不錯，食品也很特別，之後會再來試其他的款式的…查看更多

約了女友行街睇戲，自己先到了尖沙咀準備禮物，女友打來要遲一點才到， 見還有一點時間，經過餐廳，見裝橫不錯，就吃個下午茶。看過餐牌後，就開始點餐，遠處看到一個女待，向了她打招呼，著意點餐，但只在我面前離開，進了廚房，我以為佢比較忙，又見冇待應係度，故此再等，跟著佢出左黎，我再著意點餐，佢都係係我面前行過就算，之後有另一女待接迎，我再示意，今次佢有給我回應，她先表示要先幫另一台點餐，咁我等一陣，但再望就令人不憤，點餐後她跟客人聊天，好像忘記了我.......終於找到一個待應協助點餐，始終自己太肚餓，不想轉餐廳了，點餐後影相等食，此時見一個好像是餐廳店東的人才來問點餐，我無奈地回應她已點餐了......點了一個肉醬意粉，不過不失，下午茶的份量算挺充足的了。食物質素不錯，但服務令人失望，希望可以再加改善。…查看更多