Celinefoodie的个人专页

早兩日已經喺網上訂座，440$ (已計加一）下午茶set，今個月主題係芒果，就咁聽應該係穩陣之選。成個Tea set，可以話無大樣嘢好食，只有難食同唔難食之別，食完都唔覺有芒果味。第一層：鴨肝菠蘿包個包好硬，個菠蘿皮唔脆，似食豬仔包，鴨肝簿到無存在感、帶子一般、炸雞ok。第二層：三文治味道好怪、火腿多士個多士唔脆，Scone唔新鮮，凍嘅同無牛油味、芒果醬同個clotted cream麻麻。第三層：朱古力蛋糕ok，但無芒果，不過我見其他review有…😅😅係咪漏咗，芒果蛋糕成口冰，凍都未解😓，芒果糯米飯，稱唔上好食，但放到入口。飲品：Mango colada勁水，無咩芒果味，酸。整體來講，一無是處，都唔會再去依間hotel… 一個簡單嘅下午茶都可以做得咁差。…查看更多

星期六下午嚟到韓國街，搵韓國餐廳食吓，之前未食過依間，見裝幾靚，又唔使排隊就入咗去。入到先發現價錢偏貴，小食及主食至少1-200$，不過好食都唔緊要啦，但最大鑊係唔好食😅😅😅，可以話係食過最難食嘅韓式炸雞。叫咗個醬油味炸雞，炸皮冧哂，醬油味非常之鹹，雞肉本身又醃到好鹹，入面有啲薯條，唔算好熱，但勉強入得口，成兜嘢食咗1/4就頂唔順，去皮雞都放唔入口，好少難食到差唔多原兜唔食就放低😅。兩位連非酒精飲品320$埋單，價錢同味道唔成正比，非常失望，難食到忍唔著要嚟寫個食評。😂依到仲成千個好評。。。…查看更多

兩個人嚟到Pizza Maru，因為怕食唔哂，所以只係叫咗兩個Main Course，一個意粉加一個Pizza，香港唔多地方食到芝加哥Pizza，試吓依間嘅好唔好食先！第一樣上枱嘅係蒜蓉蕃茄蟹肉意粉，意粉上有一隻炸軟殼蟹，斬開咗一半。先講意粉，食落有少少辣，有蕃茄嘅酸味，但無甜味平衡翻，所以味道有啲單調，或者我會話係偏韓式味道多啲，唔係香港人慣常嘅調味，而軟殼蟹有驚喜，外脆內軟，蟹入面仲有膏，加少少咸味吊味，好食。推介單點炸軟殼蟹小食！之後上枱嘅Chicago Pizza，焗得好香脆，超多芝士，一切開就流哂出嚟，表面加咗糖霜，所以食落係比較甜，同樣都係比較韓式嘅味道，唔係好食得慣，辣肉腸同蕃茄份量少，成個Pizza只有芝士同甜味，味道單調，芝士量太多，即使個Pizza size唔係好大，但兩個人要食哂一個Pizza都好吃力，可能3-4個人嚟一人食1-2塊過吓口癮就啱。整體質素係OK，調味就比較韓式一啲，不過唔同人唔同口味，未食過都可以一試！…查看更多

星期日下午嚟到觀塘Urban Cafe食下午茶加同貓貓玩吓😍預約咗2:30，一到就馬上安排座位👍🏻👍🏻Staff非常親切😃！環境都幾大吓，場內差唔多有20-30隻貓貓🐈，唔同品種都有😍😍😍，叫完嘢食先去同貓貓玩。食物方面水準唔錯，比起其他貓Cafe多選擇，又有主食揀，味道OK，上枱時都夠熱，份量都足夠。食完餐點加職員清理好之後、就可以畀18$買零食餵貓貓，享受貓貓們嘅圍堵🐈🐈🐈。整體而言比一般貓Cafe好，有機會會再去👍🏻👍🏻！…查看更多

中午時間嚟到食個快飯，唔使等位即入，即刻叫咗個麵，落單十分鐘內上菜，好有效率！鹽酥雞加拌麵我就揀咗蔥油味，拌麵味道邊面就食唔出蔥味或油味，只有豉油味，不過味道唔差嘅，熱辣辣，仲要咁嘅價錢，可以接受啦👌🏻👌🏻👌🏻。至於鹽酥雞就普普通通啦，都香脆嘅，係唔夠鹽啫！整體味道OK，調味略微偏淡，如果怕肥又想食台灣嘢，咁就啱哂！下次經過都可以再食，尤其平日中午食晏時間，到到都要等位，係一個唔錯嘅選擇。…查看更多

因為知道過咗頭一輪入座就有排等，所以平日晚市6點前就嚟到攞位，直接入得，侍應安排咗張4人枱畀我地兩個人，所以坐得好舒服！平啲價錢嘅放題Set唔包飲品，我地就叫咗豪華燒肉放題。食物用手機Scan QR code落單，5分鐘內就送到枱面，好有效率！肉類有豬牛雞海鮮，望落顏色同食落都好新鮮，有質素，但肉類調味就差啲，食落無咩味道，鹽味同醬味分別唔大，而枱上只有一支醬油畀你燒完調味，所以喺依方面有啲失色。整體水平唔差，但無之前第一次食咁好食。…查看更多

今日放Lunch嚟到Five guys食晏，好多空位慢慢揀，可能價錢偏貴，少啲人會返工嚟食晏。叫咗個Regular size嘅薯條🍟再加Cheese Hotdog，Hotdog同Burger 都係可以再揀Toppings ，今次Hotdog我揀咗Tomato、Onion、Grilled mushroom同BBQ sauce。薯條畀咗超大份我地，Regular size但多到兩隻杯都裝唔哂🤣🤣，炸得好香脆，食唔停口，但略嫌太多鹽，有啲咸。至於熱狗🌭️有啲失望，食落凍冰冰，之前食普通熱狗係暖啲，加咗芝士只係覺得好漏，因為隻狗凍嘅，啲芝士溶唔到，食落麻麻… 下次唔會畀多10$，叫返Hotdog (55$)仲好。…查看更多

平安夜無Book枱嚟到iSquare睇吓有咩食，見到依間日本餐廳相對少人等，就拎咗飛，等咗唔使半個鐘就入得，平安夜嚟講算好快！坐低後會有Waitress畀QR scan完落單，Order完十分鐘左右就有得食！食物份量唔算好多，不過質素唔差，刺身方面帶子鮮甜，三文魚籽畀足，而串燒調味適中，燒大蔥好清甜，值得一試👍🏻👍🏻👍🏻。埋單唔使800$，喺大時大節嚟講，食到依個質素，我覺得算唔錯！之後有機會，睇完戲可能會再嚟食。…查看更多

平日下午嚟到，叫嘢食之前要自己搵位，搵完位再出去叫嘢食，Food Court玩法。叫咗個燒牛肉重（69$），加埋可樂（$6），盛惠75$大洋。牛肉同飯之間有一層紫菜碎，食落味道唔錯，但牛肉有啲少，個飯嚟到時唔覺，夾起一片，已經見到半個白飯😂😂，成個飯計計埋埋大約得4-5片完整嘅肉，有少少失望，肉片有牛味同油香，好夾配埋嘅醬汁，而飯量適中，女仔食夠飽。味道唔錯，夠熱，如果牛肉可以多啲就會更加抵食！…查看更多

喺鑽石山荷里活廣場新開嘅日式丼飯店，除咗抹茶館同丼丼屋之外，終於有其他選擇！下午4點睇完戲去醫肚，唔使等位直接入得，其實之前都試過佢哋屯門同沙田分店，質素唔錯，睇吓鑽石山點先。我就點咗個月見豬腩肉丼($82)，而同行朋友叫咗宮崎和牛丼($149)。豬腩肉上枱時好香，食落充滿油香，不過食多幾塊就有啲油膩，而和牛食落軟淋，都有少少油香味。兩個丼飯量都唔算好多，女仔食就啱啱好，男仔可能就唔夠飽。飯上面食淋咗少少燒肉汁，整體味道適中。總結而言，味道唔算超好，但有誠意，食材唔係啲好Cheap嘅肉，而且保持到同其他分店水準相約，下次行街諗唔到食咩，見到食間餐廳絕對會再幫襯。…查看更多

星期五下午嚟到沙田新城市廣場搵食，見到有間新開嘅拉麵店，就去試吓先！單人匹馬好快有位，Waitress姐姐好有禮貌，見我一袋二袋就畀個箱我裝著。應該係啱啱開業，同埋人多，所以叫完拉麵都要等大約20分鐘先上到拉麵，飲住茶等拉麵。我就叫咗個醬油拉麵，嚟到時賣相好吸引，最香係個叉燒，油香十足，仲要表面輕輕燒過，引咗啲豬油香味出嚟，食落好滿足。半熟玉子，食落好入味，麵條彈牙，加埋隔離嘅蔥食，就無咗叉燒嘅油膩感。而湯底比較清淡，普通但食落岩岩好，我會講配料比較出色。…查看更多

星期六下午兩點，Walk-in拎位，等咗一陣就入得喇。但餐廳3點落場，所以要食快啲！今日只係同朋友兩人一齊嚟食，所以只係叫咗半隻鴨同埋一個鴨肉泡飯。烤鴨比想像中快上菜，落單後十分鐘內已經上枱，而餅皮有個酒精燈熱著，十分細心。鴨肉份量都幾足，兩個人食夠哂，餅皮好有咬口，味道唔錯。配料唔夠，例如青瓜、京蔥絲，可以叫Waitress refill。而海鮮鴨湯泡飯好足料，啖啖都係鴨肉、蝦仁同埋帶子，再配上脆米（有一大兜！），口感好豐富！整體嚟講唔錯，有Coupon就更加抵食！用咗coupon埋單先三百幾！…查看更多

星期五入迪士尼，點知勁多人，想搵個地方醫下肚都唔易，天氣又熱，想搵個有冷氣嘅地方抖吓，唯有搵間最少人排隊嘅地方食嘢啦。排咗半個鐘多啲，終於入到中菜廳，坐落都舒服，環境唔錯，冷氣好勁。叫完嘢食等左廿分鐘先上第一道。豬仔奶皇包、燒賣味道正常，不過唔太夠熱。暗然銷魂飯份量唔多，好唔好食就一般般啦。再叫咗個鮑魚汁荷葉飯，比想像中細份，不過所有食物加埋哂都好夠飽。總結而言，入樂園食嘢就一定唔抵，中菜廳食物無咩特別，外形無卡通人物Features，唔係為咗休息，喺大街買小食會比較好。…查看更多

平日傍晚時間嚟到La Vache，未到6點已經有人排緊隊，估唔到平日都咁多人嚟食，早到無訂位Walk in入到。一坐低Waitress就會問牛扒幾成熟同埋飲Sparkling/Still water，叫Tap water就唔使錢。沙律會先上，跟著就到牛扒同薯條，牛扒上枱時會有個酒精爐喺底Keep warm，所以可以慢慢食，唔怕凍咗，但牛排唔好叫咁熟，因為上枱都會Keep著heat 煮緊。牛排個味道比較咸，肉質軟淋，而薯條炸得好脆，不過同時都好咸，結果要係咁飲水。食緊時有Waitress過嚟Refill 薯條，Refill一次已經好飽，食唔落甜品。總結價錢上CP值唔高，味道普通，現場環境氣氛好好，嚟食薯條過下癮或者朋友聚餐都唔錯。…查看更多

經過旺中口痕，就上咗一樓，行咗過去近新之城嗰邊食雞蛋仔。之前都食過其他口味，味道同質素都唔錯，夾餅都好好食，而且落料唔手軟，畀勁多餡。今次就叫咗$26比利時70%黑朱古力（Belgium 70% Dark Chocolate）。即叫即整，大概等咗10分鐘左右嘅時間，嚟到時熱辣辣。老闆娘好好禮貌！同以往一樣，雞蛋仔外脆內軟，好足料，每一粒雞蛋仔都有好多朱古力喺入面，黑朱古力無咁甜，一個人都食得哂成底雞蛋仔。…查看更多