純嚐鮮的个人专页

第一次惠顧正值Sogo感謝週，有九折。抹茶葛軟糍芭菲大大的一杯，賣相討好。頂層雪糕奶味頗重，也夠滑，淋上少量抹茶漿，是好吃的。但愈吃下去發現問題來了。底層的抹茶啫喱(?)很易碎掉，出水嚴重，令整杯芭菲愈吃愈稀，像喝抹茶飲品似的，實在奇怪。加上抹茶及黃豆粉軟葛滋軟而不韌，過份軟淋，毫無咬勁口感可言，不吃不可惜。總括來說，整杯芭菲只有上層雪糕＋紅豆＋cream的部份可取，下層則淪為雞肋。第二次光顧，送了一張$5現金卷下次可用。白玉黑芝麻冰淇淋這次製作比上次隨便，連黑芝麻漿都忘了淋上，經我提醒後也只是隨意地擠上了一丁點，心中已大打折扣黑芝麻味雪糕冰凍得過硬了，味道也是可以的。雪糕已經太硬了，加上稀少的黑芝麻漿，一整個就是乾巴巴！加上黑芝麻布丁和軟葛滋又是過份軟淋，布丁更十分容易全碎掉。說難吃實在不為過。沒法吃完。即使食物未如水準，但念在新店不熟手也說得過去。但製作不認真，則難以給予機會了。現金卷也無用武之地。…查看更多

訪茶居，意不在茶。因為甜品太出眾而掩蓋了對茶的著眼。Banana Cake吃過眾多Banana Cake（本人是香蕉愛好者）當中最滿意的一款。蛋糕內藏許多鮮甜的香蕉果肉，真材實料，每一口都是啖啖果肉和濃郁自然的香蕉甜味，正！加上蛋糕質感不是鬆化那種，而是十分的濕潤綿密，跟香蕉那種軟腍的texture匹配得很。蛋糕和香蕉肉由原先分開的個體，完美地融合在一起，再也沒有分開誰和誰。真的好吃。飽得肚皮快撐破也要吃完。（因這款是最後才吃的，但想先介紹）Green Tea Loaf Cake蛋糕質感鬆化。抹茶味淡而帶甘，不太甜，也不錯。但此款名物震撼性反而較低，可能因為個人偏愛茶家的綠茶芝士蛋糕那種濃得化不開的味道和口感吧。Green Tea Apple Cake蛋糕表面鋪一片片帶肉桂味的糖漬蘋果，蛋糕本身同樣是抹茶味，但較Green Tea Loaf Cake的為淡。有點像蘋果撻的＂蛋糕變奏板＂，也不錯。Banana Toffee Cake蛋糕面層塗上適量焦糖糖漿及以一塊塊香蕉果肉，薄薄一層剛好，甜度適中。蛋糕質感比Banana Cake更為濕潤軟腍，但有點過份了，像糊掉了的感覺，可能由於未加熱的關係?若有機會堂食加熱一下才下判斷會比較準確。Matcha Soul 奶泡漂亮，淋上少許蜜糖和幾片杏仁片，為整杯飲品增添不少風味。但喝畢面層奶泡後，愈喝愈淡，滿足不了我啊。個人認為綠茶味宜再加強，蜜糖多下一點也不過份。有機豆腐漢堡份量很大。漢堡包大大兩塊烘得香脆，中間夾著一大片滷過的豆腐（很入味～），加上半融芝士以及酸甜蕃茄醬。味道出奇地匹配，感覺新鮮，沒想像中淡，比漢堡排更清新好味，對我胃口。沙律菜也對辨，爽口新鮮，淋上適量黑醋汁，一整份就是健康美味的午餐。若有新款甜品。還是會心思思想來吃吃。正餐也不錯。但就是份量太大怕幹不掉。例如：茶之千層治的king size令胃口小的我卻步，不然是想嚐嚐看，但老闆娘說沒有半份出售也就沒法子了。這兒環境也好。老闆娘很親切。是一個會讓人再欲重訪的地方。…查看更多

久聞Roll之大名，故專程來試（順便跟Ceres的Roll Cake來個比較）。先來個大合照。喜歡這裡的Roll Cake提供Mini size選擇，讓貪心的我可以試盡所有口味！ 栗子味卷蛋蛋糕是鬆軟的，但偏乾，不夠濕潤，還是Ceres的Roll Cake較好啦。栗子味忌廉幼滑，淡淡的也不錯。藍莓檸檬芝士卷蛋糕存在同樣問題。檸檬味很淡，藍莓只有一小部分（如圖中的一小角）；忌廉由cream cheese（忌廉芝士）取代，沒有難吃的理由。雞蛋布丁卷蛋這個蛋糕的蛋味較濃，加上布丁和忌廉，比較好吃。芒果布丁卷蛋只是在卷蛋加入芒果布甸。味道也一樣。焦糖味卷蛋最不濟的一款。糕身最乾。焦糖味太淡。黑芝麻卷蛋黑芝麻味夠濃，最愛這款。竹炭綠茶味卷蛋蛋糕有淡淡的竹炭味，綠茶cream沒有死甜，嚐得出自然的綠茶甘味，這個配搭好吃啊。而且我發現竹炭口味的蛋糕質地較別的濕潤可口，有口感。總結這兒的Roll Cake基本功弱（蛋糕質感），但勝在口味眾多創新，而且忌廉也不錯，輕軟不過甜。普通，一試無妨。有新口味推出也可吃吃看。…查看更多

Panash係我喜愛嘅bakery之一。北海道煉奶包外層脆，微甜，內裡鬆軟。簡單黎好味。比Little Mermaid Bakery同埋A-1 Bakery嘅同款好食得多。因為面頭無撒上甜到膩嘅糖粉。藍莓芝士撻包中間個芝士滑溜到好似蛋撻咁，芝味濃，加上少許藍莓醬，美味。明太子糯米軟包呢個就唔推薦。雖然包身軟熟得黎帶煙韌，唔錯；但係明太子只得面頭嗰少少，食味不足。若果在包入面都加上明太子會好味好多。蕃薯糯米小食呢個都唔推薦。呢類包始終都係Yamazaki出品最好，Panash嘅太硬了，就算返到屋企叮熱後都咁硬。蕃薯紅豆軟包入面有一細條黃芯蕃薯，包身混入少許紅豆碎粒，非常鬆軟。可惜料少，否則會更好。蕃薯包個人推薦A-1 Bakery嘅＂日式蕃薯包＂，入面真係有一大舊甜薯好正！合桃楓糖卷最鐘意呢度嘅楓糖醬甜度合適，唔會過多，薄薄一層沾在卷狀麵包上，層次分明，加上合桃粒，不錯。曲奇脆皮芝士包外表微脆，內面係cream cheese，包身鬆軟依然。新鮮出爐食最正，微脆外表無變腍，芝士熱辣辣，好味！cream cheese餡包好多地方都有，但Panash就多花啲心思，加上曲奇脆皮，口感豐富咗，更加好味。焦糖布丁好鐘意呢度嘅焦糖布丁。面層同玻璃瓶底都有焦糖醬，唔會出現食到最底先有焦糖味嘅情況。焦糖甜味同香滑嘅牛奶布丁味道平衡，結合起來十分美味。同埋個布丁真係滑溜到震。讚。…查看更多

其實幾怕去主題餐廳，因為多數都係樣靚但食物水準唔掂，所以無乜信心。但見呢度好評咁多，而且都開業咗咁耐，應該不錯才捱得住吧。一去到門口，已見到大大個Charlie Brown好醒目咁企係度招呼我喇，令人易搵。入到去都有好多公仔。餅櫃可愛吸引。薑汁芝士餅一入口已食得出濃濃薑味同芝士味！不錯！兩者味道平衡到，無話邊個搶味。餅底都不錯，但芝士質感好結實，食完有點濟。燕麥豆奶咖啡雖然貴為cafe，但咖啡唔掂。無乜咖啡味。下次可能order返普通款睇吓會否好啲。白咖啡香蕉Mousse Cake白咖啡味嘅mousse入面有啲香蕉蓉，幾新鮮嘅組合。mousse質感順滑，無芝士餅咁實。幾好。南瓜大王南瓜好突出味嘅cheese ckae，啱晒我嘅心水（鐘意南瓜又鐘意芝士）；但同樣有問題，就係芝士質感太實，食完好濟，濟到上心口。總括黎講，呢度嘅芝士餅雖然芝味十足，但食完真係好濟，幾乎食唔落下一餐（諗起都怕～），所以我嘅Best choice會係Mousse Cake。我建議想食Cheese Cake嘅話搵多幾個人一齊share會好啲。仲有一點值得一提，就係呢度嘅服務好好。店員親切有禮，即使我不斷要添水都好樂意。除咗太濟膩，基本上都係愉快嘅一餐。期待下次試正餐。…查看更多

The One有幾間target餐廳想試，第一站係呢度。裝修得幾有風格，環境舒適，木餐桌感覺好warm。加上人少，樂得清淨。跟餐Caesar Salad生菜爽脆新鮮，每片生菜都均勻地沾上沙律醬，麵包糠香脆，不錯。Full/half Canapes（crabmeats tart／slow-cooked salmoncube／goat's cheese biscotti／parma ham with rocket leaves & marinated olives）（蟹肉批，慢煮三文魚，羊奶芝士，風乾火腿，酸橄欖）蟹肉批嘅蟹肉味突出，而且批底鬆脆，有牛油味，不錯！幾特別，用個玻璃罐裝住三文魚。慢煮三文魚真係好食啲喎，每粒三文魚都好肥美鮮甜，仲有種入口即溶嘅感覺，浸在微酸嘅醬汁中好入味，正！至於羊奶芝士多士，芝士無乜羊奶味，味道普通。而芝士下嘅biscotti略硬，但都可以接受。風乾火腿火箭菜卷都好味。風乾火腿公整地包著沾上醋汁嘅火箭菜，前者味道鹹香，後者則因為沾上少許醋汁食落酸酸地無咁寡。由於食完三文魚剩咗啲醬汁，我索性呢個卷浸落個汁度，仲好食，無咁乾。Tiramisu樽仔形出場嘅Tiramisu好別緻，如果take away要收好貴，堂食就40蚊。Mascarpone cheese香甜，口感輕軟幼滑，唔錯。但食到落去就發現問題了。浸咗咖啡既lady fingers太濕了，咖啡液過多，樽底水汪汪，好稀；酒味淡薄，俾咖啡味蓋過了。只係賣相取勝嘅Tiramisu罷了。對呢度嘅Brunch感覺不錯，下次可以試吓呢度嘅Set Lunch同埋dessert。…查看更多

見到好多人排隊，而且係一間裝修幾有格調嘅Cafe，餅櫃吸引，啱我心水（有靚cake又有靚包～），就入去試吓。坐餐廳入面嘅位唔洗點等，好快就有位。其實入面嘅位都坐得好舒服，燈光微暗幾有氣氛，仲可以望住個靚靚餅櫃，心情都好啲哈哈～而出面嘅位就要耐心等候喇。麵包微暖，香脆有麥味。餐湯係南瓜忌廉湯，淡淡南瓜味，幾creamy，都不錯。跟餐青瓜沙律都幾大碗，有誠意，同埋沙律菜都好新鮮。香煎鰽魚茴香有機糙米飯Risotto口感煙韌，唔會過淋過濕之餘又夠creamy，每粒糙米沾上醬汁嘅比例均勻，食完沒有濟胃感，幾好。煎鰽魚肉質嫩滑，但就無乜魚味。燒香橙鴨胸鴨胸肉質略為粗嚡，好一般，個醬汁加埋啲配菜反而仲好味。Cheese cake（跟餐＋$10）除咗芝士味，仲帶點檸檬清香味，幾清新。蛋糕質感細膩順滑，牛油餅底都做得好，濕潤但挺實（無變腍／濕），整體好滿意，加十蚊好抵食。Apple Danish格子網狀嘅Danish內餡係混上適量蘋果醬嘅軟淋蘋果粒，甜度適中，不酸；酥皮鬆化香脆，似食緊Apple Crumple，唔錯。Strawberry Danish大大粒鮮甜草莓下藏著滿滿嘅custard，香滑甜美，加上牛油味濃郁嘅鬆軟包身，十個讚！唔似其他Bakery面頭嘅生果Topping加上多餘嘅糖漿搞到過份甜膩，呢一點又要加分。食Danish始終鐘情呢度嘅！Ham & Cheese Bread呢個就好一般了。都係推薦Danish。下次黎要試吓Brunch同埋其他cake。…查看更多

玉桂蘋果（Cinnamon Apple With Ice-cream）（麵包，碎果仁，蘋果，忌廉，玉桂粉，雪糕）想試呢個好耐喇。但希望愈大，失望愈大。早就試過BO-LO’GNE名不虛全嘅81層丹麥麵包，今次再食依然有層次，但比上次的乾，無咁鬆軟。丹麥包上放上一球俾一圈忌廉公整地圍住嘅雲尼嗱雪糕，移開雪糕，會發現煮得軟淋且味道酸甜嘅蘋果粒，再撒上少量玉桂粉同碎果仁；本來係個不敗配搭。不過個丹麥麵包竟然唔係熱嘅，甚至連丁點微溫都無，明顯係無經烘熱隨意擺晒啲配料上去就算。最基本烘熱個包都做唔到。真係好失望。個包唔熱，又點做到冰凍嘅雪糕與熱辣辣麵包一齊食落口嗰種冷熱交融嘅效果呢？！宜家咁食法，只係配料還配料，麵包還麵包，完全沒有丁點融合之感。咁無誠意就75蚊喇。係沙田分店嘅失色定本來就是如此？總店會否好啲？有無人講到俾我知？因為幾想試焦糖香蕉／蜜糖雪糕味，不過好怕製作又係咁hea...法式多士（French Toast）（麵包，牛奶，雞蛋，蜜糖）呢次終於係微暖！加咗牛奶同雞蛋整成嘅多士，香軟可口煙韌，蛋奶味同樣出眾，不油膩。無沾蜜糖已經好好味。如果溫度再熱啲會更好。同場加映除咗丹麥麵包，呢個同樣係my favourite。焦糖醬加在烘得脆卜卜嘅麵包邊條上超級美味。經過親都要攞少少試食先安樂。一包單買好似要45定48蚊，偏貴。…查看更多

Bo-Lo'GNE除咗最出名嘅81層丹麥包好食之外，原來仲有其他同樣美味嘅特色麵包。就係位於圓方嘅呢間Bo-Lo'GNE，唔做餐飲，只賣零售麵包。芝士紅豆包望落小小一個，其實內餡十分豐富澎湃。甜紅豆蓉配上粒粒鹹香芝士，兩味俱全，加上包身鬆軟，外層撒上薄薄一層麵粉，呢個配搭實在好食。繼Ceres嘅黑麥紅豆芝士包後嘅另一心水。忌廉紅豆包同上面嘅芝士紅豆包異曲同工，只係芝士變成忌廉，配上飽滿嘅紅豆蓉。包身同樣柔軟。同Ceres嘅大福豆沙包有得揮。不過Ceres稍勝，因為呢度嘅忌廉偏甜，厚實；而Ceres嘅忌廉甜度較低，輕盈幼滑一點。茄子蕃茄薄脆面頭茄子蕃茄幾好味，但個包太硬，烘熱咗都解決不了問題。吞拿魚沙律法包法包過硬，硬到好難咬開，同樣係烘熱咗依然咁硬。玉桂砂糖包好香玉桂味，表面撒上玉桂粉同少量砂糖，甜甜地幾好味。啱晒喜歡玉桂味嘅我。飛碟包有啲似鮮奶球，但好食過一般鮮奶球。外脆內軟，特別係個邊位最脆最好食，不錯。p.s服務值得一讚，店員好樂意幫我加熱（暫時幫襯過咁多間，只有DonQ，大班，少部份美心肯幫顧客加熱！） 加熱後食美味倍增。…查看更多

最鐘意Ceres出品嘅麥包，無論黑麥抑或裸麥，都係咁香麥味，好實在的，比A-1 Bakery或其他連鎖大集團嘅真材實料得多，唔係混上好多白麵粉或者染色黎魚目混珠。當然價錢相對較高。質素有時同價錢都係成正比嘅，兩者只能二選一。不過甜品就真係咪搞喇。忘了名字，Raspberry味嘅cake見到寫住Chef推薦，諗住應該無衰掛。點知。唉。呢度麵包出色，但甜品失色。層層相間分別有紅莓啫喱，椰絲，同埋最底一層白色類似忌廉+芝士嘅混合物....整個味道就是說不出來的怪。Tiramisu絕對不對辦嘅Tiramisu。最上層係一陀好似放咗好耐而硬咗嘅cream。入面嘅cheese位滑溜度一般但味道都夠，奇就奇在Tiramisu竟加上巧克力醬（十分討厭）都算喇，杯嘅最底係大量水汪汪嘅咖啡味液體，一攪就成杯野溝稀晒。發生緊咩事啊？呢杯真係Tiramisu？！Mango cake（類似..)蛋糕口感有啲乾，白色嗰層唔係幼軟嘅ceram而係硬實嘅糖霜，格格不入。黑麥紅豆芝士包咁啱撞正新鮮出爐，當然要親熱食。外皮脆，內鬆軟；但外皮得有過硬了，要幾吃力去咬。食到中間，熱辣辣微溶嘅芝士粒加上保留顆粒有口感嘅紅豆蓉，好味道。第一次食呢個配搭，幾新鮮，可以encone啊。Rosemary Focaccia可以話係Focaccia之最。比Little Mermaid Bakery嘅出品好太多了。料多（蕃茄乾，橄欖，香草etc..），橄欖以及香草味香濃，麵包外層富適量油脂，口感煙韌，推薦！真係香到一路行街攞住佢都會聞到！加上價格合理，17蚊幾大個。對比Ceres其他包算係平。好多Bakery出品嘅Focaccia都太唔似樣喇！蜂蜜方包方包就有點失色了。完全食唔出蜂蜜味何在。但勝在包身鬆軟得黎有彈性。大福豆沙包粒粒紅豆蓉配上軟滑忌廉，加上包身輕盈軟熟，唔錯。值得一說嘅係Ceres用嘅忌廉好出色（食過Roll cake就知）。甜度較低，輕幼香滑，清新不膩，讚。p.s.唔知點解呢度嘅麥包全部都勁大個，一個人食實有剩，好浪費。如果有mini size或者切半個賣就好了。成日想買，但就因為佢嘅king size而卻步。p.s.2 本來想俾笑臉，話晒係我最喜歡嘅bakery之一，但一諗起甜品...內心好掙扎。…查看更多

親子丼沙律清新。親子丼即係滑蛋+雞肉飯。滑蛋呈流心蛋絲狀，十分嫩滑，蛋汁豐盈，甜甜的，相信係加咗日本甜醬油。不過由於蛋汁太多，底下嘅飯變得好濕，好糊口。米飯本身亦無甚咬口。另外，雞肉係雪藏貨色，無雞味，但勝在唔嚡口。以58蚊一個套餐嘅價錢，不能要求太多喇。芝士炸薯餅薯蓉內藏滿滿芝士，一咬落去，芝士呈半溶流心，可以拉成絲狀，不錯。但炸皮太厚了。整體普通，一試無防。…查看更多

見到新開張，以抹茶為主題，Menu賣相吸引，食物望落有特色，便打算一試。抹茶提拉米蘇（Maccha Tiramisu）鐘意食Tiramisu，一於試吓抹茶板本嘅Tiramisu。以小木盒裝住，設計別緻。芝士面頭撒上少量抹茶粉，味帶微甘，不俗。第一口食到濃郁芝士味，好滑溜，讚！但愈食愈唔對路，因為內裡薄薄嘅海棉蛋糕層只有極少抹茶粉，完全食出唔呢份係抹茶口味嘅Tiramisu，實在有失主題！宜家只係似食緊無咖啡及酒味嘅原味Tiramisu。如果抹茶粉落多啲，或者索性將原味海棉蛋糕轉成抹茶味，相信一定會好食得多。幾失望。雜錦銅鑼燒雜錦材料好豐富，兩塊銅鑼燒中間夾有抹茶&雲尼嗱雪糕，大量忌廉同埋紅豆蓉，再淋上少量抹茶汁。睇返相先發現：點解無咗白玉丸子嘅？明明Menu上係有架喎！唉，算啦，講返食物。抹茶雪糕嘅抹茶味雖然不及菓匠茶屋，但都夠濃，幾好。忌廉軟滑不過甜，紅豆蓉同雲尼嗱雪糕都無乜問題。整體配料不錯。但銅鑼燒需要大大改善！銅鑼燒質感粗糙，唔軟熟，幾硬；而且無蛋香，沒甚味道可言。真係美心嘅紅豆沙燒餅仲好過佢。另外一提，每款甜品都會附上茉莉花茶，飲啖茶消消濟，係幾貼心嘅做法。原本諗住無下次架喇，但見到其他食家大讚抹茶芝士慕思蛋糕，而且我又想試吓呢度幾有特色嘅熱食－卡邦尼溫泉蛋烏冬。所以會再做多次勇士，希望唔會失望啦。同埋都真心希望餐廳會進步，畢竟屯門有特色嘅食店實在好少。…查看更多

好靚餅櫃，琳瑯滿目，好吸引，真係要黎幾次先試得晒心頭好。Whole Wheat Carrot Muffin同樣由La Rose Noire Bakery嘅主理人開嘅Passion by Gerard Dubois，我對呢到嘅Muffin當然有信心。果然，Muffin外鬆脆，內鬆軟；因為使用全麥嘅關係，變得有咬感，加埋面頭粒粒crumble同埋入面嘅合桃以及蘿蔔絲，口感更豐富。百吃不厭！Orange Panettone無味包。又唔係特別軟熟。價錢也不便宜，不值得試。Blueberry Tart藍莓filling似藥水味，唔掂。Vanilla Cup cake嘩，實在太甜了，甜得令我招架不住！Cup cake都係COCO同埋Sift好啲，唔會甜到似食砂糖。Mango Mont Blanc外面嘅栗子蓉香滑，薄薄一層栗子蓉內藏驚喜！栗子蓉內包著幼滑嘅忌廉，忌廉入面更藏有新鮮的芒果肉，三重美味。加入芒果肉真係幾創新嘅組合。幾鐘意呢款Mont Blanc。Raspberry Milles Feuilles一層cream一層蛋糕，做得好細緻。食落失望，整件蛋糕無乜raspberry味，只係得個甜字。最推薦Mango Mont Blanc同埋Whole Wheat Carrot Muffin！…查看更多

人氣大熱嘅bakery，即使不太喜歡牛角包都要黎試一試杏仁&芝士味牛角包排隊等麵包出爐都係第一次。新鮮出爐熱辣辣，幾有牛油香，咬落去好酥脆鬆化，層次分明，鐘意食牛角包嘅朋友應該鐘意。但其實兩隻味道分別不大。花生醬吐司花生醬內藏著很多花生碎粒，Toast烘得香脆，特別係麵包邊位；店員很好，肯幫我加熱（暫時幫襯過咁多間，只有DonQ，大班，少部份美心肯幫顧客加熱！），加熱後食美味當然加倍。吉士烤法包幾好，吉士份量適中且甜而不膩；法包香脆但略硬，表面見唔到有燒焦糖嘅蹤跡。上次見到好多，燒到金黃略黑望落好正，不過無買到Honey Crumb Cheese Cake甜品唔係好掂。Cheese Cake質地太結實，好硬，要幾用力先拮到黎食；無乜芝士味，只有鹹甜的味道，好怪。Banoffee pie（香蕉拖肥批）拖肥似朱古力醬；撻底既無牛油味，而且一叉落去就散開了。唔好食。見到其他麵包有：香薯小鍋，楓糖吐司，花生醬吐司等等都係灣仔間Bakery Café by Maxim’s有售，完全一模一樣，莫非呢間Urban Bakery其實係美心集團？…查看更多

耐唔耐就會走一轉Starbucks睇吓有無新野。Lemon Tart由我寫Lemon Tart其實不公平，因為食親甜品都唔會揀酸味嘅，例如：檸檬／raspberry味。（除咗caffè HABITŪ嘅檸檬蛋白撻）呢款檸檬撻對我黎講係幾酸，同埋唔鐘意佢面層薄薄嘅啫喱，好甜。但撻底幾鬆化，有牛油香。可能有人鐘意，但就唔啱我胃口了。Blueberry Muffin好搵笨，收我16蚊嘅Blueberry Muffin入面嘅藍莓寥寥可數。Muffin始終都係La Rose Noire Bakery嘅足料好味又大件又抵食，只需13蚊。小龍蝦露荀甜椒蛋批蛋算幾滑，料都多，有露荀，甜椒，蕃茄，茄子同埋洋蔥。批底有牛油香，鬆化，係一貫水準。唯一唔好係小龍蝦肉質好老。Blueberry Cheese Cake（藍莓芝士蛋糕）見到Starbucks長期有呢款Cheese Cake坐鎮，又好似幾多人嗌，一於試吓。芝士味幾濃，質感順滑，溶溶地幾討我心；配上牛油餅底以及大大粒新鮮藍莓（好多啊～讚！唔係藍莓醬），三十蚊實在抵食。Crunch Cake食完都無乜印象。只係記得cream太薄，蛋糕鬆軟度ok，中間有一層焦糖，又係好薄。Hazelnut Cheese Cake（榛子芝士蛋糕）影得唔好，sorry，因為係takeaway，層cream樣衰咗。芝士和榛子兩者味道平衡，不錯，仲食到不少榛子碎粒。但質感過於硬實，唔滑，比Blueberry Cheese Cake差太多喇。…查看更多