allywu614的个人专页

自從1月生完仔之後，我嘅人生就不再是我的😢得番番工、湊仔。美食已經消失了。終於仔仔有差不多5個月啦，肥A我終於可以同朋友出去食下好西，me time一下叉下電。呢間餐廳係主打濟洲食物，雖然位置空曠，但裝修都幾靚，好似靚靚cafe，唯一不好就係座位後嘅草太茂密，會拮到背脊。🍴清甜柑橘窩夫濟洲嘅柑真係無令人失望，清甜多汁，貼心嘅係完全無白色嘅衣，啖啖肉。窩夫體唔係空氣形，係厚實，外皮有少少脆，中間有啲柑橘醬，酸酸甜甜，外配嘅柑橘醬有粒粒果肉，不錯，如果可以少啲忌廉就好啦。🍴慢煮雞胸紅菜頭沙律呢個沙律上枱嘅時候，肥A同友人都被佢嘅顏色嚇一嚇，不過食落係好味，紅菜頭有咬口，雞胸一啲都唔柴，健康又清爽。🍴燒醬油黑毛豬白切肉白切肉甜甜地，肥膏同肉體層層分明，一啲都唔靭，配上微辣嘅炒飯，好惹味。🍴清新牛油果飯卷第一次食韓國飯卷有牛油果，感覺特別，而家佢入面得蛋，牛油果同紅蘿蔔，感覺好fresh，可以去掉腩肉嘅油膩感。🍴水果忌廉三文治三文治包甜甜地，水果多汁，好味，個人覺得個三文治包好適合做早餐。🍴濟洲柑橘乳酪&韓式朱古力泡泡柑橘乳酪清新解渴，仲可以解辣，好適合夏天飲，超級透心涼。朱古力就係偏苦嘅，唔會甜。…查看更多

唔想煮飯，又唔知食乜好，收工喺市中心隨便行下睇下有乜好食，見到呢間專食鵝肉，又幾多人去幫襯，所以都去湊湊熱鬧。.收工都肚餓，所以叫左2人set。.🍴滷水獅頭鵝脾鵝脾肉肥瘦均勻，唔怕皮下脂肪過多，表皮滷水色澤光滑，聞落有滷味香味，食落唔會靭口過鹹，容易咬開，啖啖肉。唔怕有雪味，鵝味豐盈，不錯。🍴潮流滷味拼盤拼盤係例牌size，但係其實都幾大份，有紅腸、豬大腸，豬耳、腩肉、豆卜同滷雞蛋。紅腸正常發揮；豬耳有啲偏硬；豬大腸唔會太靭，都無乜肥膏；腩肉略嫌不太入味；但肥A最欣賞滷雞蛋，好夠味，用黎配飯一流。🍴滷汁油菜用左秘製滷汁取代一般餐廳使用嘅蠔油，無咁鹹，感覺較健康。🍴原盅健康鵝骨湯燉湯充滿藥材香，有薑，紅棗等，雖然有鵝骨，但都不會太油膩，而家涼涼地飲都幾舒服。…查看更多

開始漸涼嘅星期五晚，秋意濃濃，決定試下新開嘅彷日式居酒屋。去到果時，見到戶外枱已有幾個客人。原來鋪仔唔大，都幾的骰，鋪內有兩張吧枱，都坐到幾枱客。坐近靠水吧的一張，聞到食物香味之餘又唔怕大煙，不錯。.🍴日本雞皮韭菜雞皮外有焦香，內煙韌，包住沾有特色燒汁的韭菜，香脆怡人。.🍴豬頸肉爽口彈牙，配上燒汁添加香味，口感豐腴。.🍴脆皮豬大腸同雞皮一樣，燒得不錯，只係大腸質地都係略有少少韌。.🍴汁燒雞肉不錯，肉汁充足，不會過火而柴肉。.🍴醬燒鮑魚火喉控制不錯，肉質嫩滑，新鮮彈牙。 🍴牛油香蒜日本元貝是晚最愛一款，食材新鮮，配上無敵牛油香蒜組合，不得了，如果有碗白飯就更正正。🍴咖哩吉列豬扒飯外表不錯嘅炸豬扒配上一般甘口日式咖哩，食完暖笠笠。食物種類都幾多，好岩三五知己坐低chill一chill，不過要食飽飽嘅話就要叫多啦。…查看更多

懷孕之後一直都無乜大飲大食，不過踏入孕中期就突然好想食好多肉，所以就去左食韓燒。.🍴豪快濟洲黑毛豬拼盤拼盤有3款肉：五花肉，豬梅頭同豬脊肉，肥A最愛豬脊肉，好彈牙爽口，豬梅頭都好嫩滑，五花肉就略嫌肥左啲，不過就好耐燒。所以都有再encore多一條。🍴特選黑毛和牛上貝身肉好薄好嫩滑，友人大叫好juicy🍴芝士生蠔一碟有6隻，隻隻都好肥美，上火慢慢燒，睇住啲芝士溶再卜卜咁滾跳，好正呀。🍴濟洲海鮮鍋入面超豐富，有蟹、大蝦、鮑魚、大硯、青口，塾底有海量嘅荳芽，中間仲有半隻雞，湯底睇落好辣，但係其實好清甜，一啲都唔辣。豆腐吸左啲湯汁，好好味。如果有粉絲就更佳。🍴韓式前菜肥A最愛個泡菜，甜甜地又唔會好辣，涼拌荳芽都不錯，小青瓜就比較兒童口味，有果汁味，蘿蔔就不好了，個人覺得太辣。🍴梅子青檸梳打梅子同青檸原來幾夾，食左咁多肉，都解膩，不過就愈飲愈淡.🍴柑橘梳打呢個一飲就好淡，但係愈飲就愈濃味，柑橘都好清新解渴，果肉仲好甜。…查看更多

天氣好熱，但係心血來潮想去元朗行下街，就咁岩去果邊搵下有咩小店試吓食晚餐。🍴加拿大龍蝦芝士忌廉意大利粉龍蝦已經拆肉，食得好方便，忌廉汁由大廚獨有秘製鮮手打及烹調而成，好creamy但又不會太膩，配上雜菌，十分滋味。🍴鮮茄芝士豬扒焗飯茄汁都係大廚獨家調配，味道偏甜味，完全唔會酸，但係個人偏好蕃茄嘅酸甜味。豬扒份量適中，但略嫌較薄，配以普通飯底，不錯的。但肥A覺得炒底更佳。🍴忌廉菠菜湯&牛油厚多士&沙律忌廉菠菜湯好好味，忌廉汁都係大廚鮮手打，雖然有啲稀，但係就唔會有油膩感同溝水嘅感覺。厚多士正常水平，脆脆咁配湯不錯。沙律醬汁好開胃，但略嫌菜不是太新鮮。🍴四季鮮水果茶水果茶係夏天嘅清泉，好fresh，飲落唔會太甜，茶底不錯，幾解渴，而且叫少冰，真係有少冰呀。整體用餐感覺不錯，服務態度幾好，不過冷氣有啲不足。…查看更多

作為成功捱過黑雨blue monday嘅獎勵，相約朋友仔食下韓式燒肉，化悲傷為食欲。🍴護心肉以型補型，先黎招牌護心肉。之前未聽過，開頭以為係牛肉，點知問完係豬黎嘅，食落爽口，但唔會嚼唔爛，都幾嫩滑，配上店家特制甜口醃料，不錯。.🍴調味醬油雞肉係當晚比較失色少少嘅一樣。份量不足不特止，重要味道無咩特別，如果唔係有特制醬油，就好似燒白切雞一樣。.🍴喜來五花肉配特製醬汁肥瘦均勻，份量多，燒落油脂味都幾誘人，食到有少少超標。🍴海鮮葱餅食得肉多，都要食少少蔬菜同碳水化合物平衡下。用料都足，唔會得麵粉，蔥量都夠，海鮮可以再多啲，哈哈….最後題外話，現場燈光比較暗，燒果陣要小心啲，燒熟少少先好食。…查看更多

好耐之前食過一次都覺得幾好味，今次經過剛剛好有位就想再食下。.🍴蘋果玉桂燒烤醬豬肋骨一般都係食到BBQ 豬肋骨，但係多左蘋果玉桂會無咁膩，罪惡感都會少啲，豬肋骨嘅肉無雪味，幾彈牙，塾底嘅粗薯條，份量好足，脆卜卜，唔會乾。另外都有extra嘅醬另上，重口味嘅朋友就可以再沾醬。🍴蕃茄大蝦扁意粉有4隻大蝦，份量ok，咬落啖啖肉，肥A就最愛。扁意粉好Q彈，蕃茄味濃，汁都剛剛好，唔會太多。🍴菠蘿冰好有誠意嘅菠蘿冰，不單飲品充滿菠蘿肉，而且連枝飲管都印上小菠蘿，好可愛。.🍴桂圓紅棗杞子蜜超養生飲品，好適合女生，不會過甜。…查看更多

差不多成年無飲茶，好掛住酒樓嘅點心們，所以特登約友人一齊飲夜茶。.🍴8號蝦餃雖然得2粒，但係好大粒，又多蝦，而且都幾彈牙，蝦餃皮都幾簿，推薦。🍴鮮蝦菜苗餃應該係同蝦餃同一舊肉，不過撈埋菜苗，又有另一種口感。🍴蟹籽燒賣皇又係無令人失望嘅蝦肉，大大粒，蟹籽量都算多，同一般酒樓嘅燒賣有少少唔同，佢外皮係白色，唔係黃色，少左啲色素，感覺健康啲。🍴茄紅素湯鮮竹卷肥A覺得都係蠔油汁鮮竹卷夾啲，茄紅素湯就好似茄汁加水，有點奇怪，但係鮮竹卷係正常嘅。🍴蟲草花燉雞腳湯呢個汽鍋燉湯感覺好健康清新，而家一啲都唔口渴，有住家feel🍴溫室青瓜叉燒腸叉燒腸有青瓜係一個新鮮嘅組合，叉燒量一啲都唔吝嗇，青瓜都好爽脆，但略嫌腸粉皮有啲厚。總括食物質素不錯，家庭式嘅經營，感覺窩心，而且地方闊落，三五知己飲個菜食下點心都不錯。…查看更多

Happy Friday放工去接老公收工，行經見有間pizza 店，決定放縱下肚皮，一啖pizza一啖汽水。.🍴招牌炸雞每件都幾大隻，上碟重係脆嘅，咬落都有肉汁，美中不足係無手套。🍴千島海鮮Pizza （6吋心形）因為我哋唔食牛肉同辣嘢，又唔想夏威夷咁寡，最後叫左千島海鮮。特登叫左心型，食落有驚喜，全部都係手工餅底，餅底好鬆厚，而且煙靭，啱晒唔鍾意薄底嘅朋友，材料豐富得黎仲有芝士脆面。🍴白汁吞拿魚長通粉份量都幾足，最後係食唔晒架，不過不失，略嫌乾身，唔太夠汁，對比起pizza就有啲失色。飲品百事可樂真係比較甜身，配上檸檬冰底，加分。…查看更多

是日行街行到有啲攰，想搵個地方坐下cafe好似無咩新意，最後揀左呢間食crepe @crepedelicioushk 🍴芒雪千層一坐低睇到menu,已經比佢吸引，都幾有氣質。到真係見到，真係對得住個餐牌攝影師，無十成都有九成，而且都真係幾香，絕對係signature之選!顏色鮮豔，打卡之選。個酥皮不錯，有香口味道,gelato綿密。🍴Mango-Go嗌得芒果crepe，就順便試埋佢個芒果gelato shake,濃濃芒果味，加埋配上嘅cream,滿足。🍴情奏紫薯太多選擇，最後見佢新出左一個推薦set,於是決定試下。軟綿綿嘅crepe加上煙韌嘅麻糬，加上中間夾住嘅紫薯醬，香味充斥口腔入面。如果再加上紫糬雪糕，多重享受。🍴紫薯意式雪糕奶昔其實唔係好飲到gelato，但認真紫薯味幾出，飲落唔會太滯，唔知係咪cream係signature嘢，每杯都有咁滯，但又幾滑。…查看更多

諗起成個3月無紅假，心情確係有啲差，難得公司要清假，扮下文青都得掛？今日決定去南豐紗廠打下卡，chill 一chill!🍴炸雞柳捲餅配薯條炸雞卷餅配薯條，食到肥A要大叫!雞柳經過高溫油炸過都重keep到嫩滑多汁，配上溫厚卷餅，層次分明豐富，好味啊～以為薯條係配角？錯!食得出有比心機製作，尤其可以嘗試配搭卷餅個類千島醬，提升一個層次。🍴All Day Breakfast 日上三竿，食晏唔洗趕。chill級之選，全日早餐。飲食均衡，有蔬菜，肉食同穀物，份量唔欺場。尤其厚身煙肉，脆口得黎唔會乾凈凈，另外椰菜真係大推，因為個果味嘅配汁真係好fresh,蓋過草青味。nice!🍴Espresso Tonic咖啡肥A就唔識欣賞啦，不過老公就有以下評價：文青是清澀的，就如一杯Esprosso tonic一樣，濃濃嘅文藝氣息下有住年輕嘅酸甜輕狂，或輕撫，或緊抱，讓味蕾歌頌一曲，致青春!佢話青春返晒嚟😳🍴Chocolate 純粹嘅可可味，但唔會苦澀，又唔會太甜，啱晒用黎醒一醒沉睡嘅靈魂。…查看更多

荃灣真係越黎越好行，周圍都有天橋連接，商場一個連一個，唔經唔覺就行到晚飯時間。因為午餐太豐富啦，所以想食日式輕食，又揀返之前食過覺得不錯嘅~初見!🍴炸香草北海道南瓜餅南瓜餅真係肥A必點嘅一樣菜式~最怕食物質素次次唔同，要撞手神……但呢個南瓜餅真係無令我失望過。濃濃天然嘅南瓜香味，綿滑嘅內餡配上脆皮，Encore 唔該!.🍴野菜豆腐鍋配烏冬話明輕食，當然唔少得大量蔬菜加上喜愛嘅滑嘟嘟烏冬。原煲配上露營酒精磚，全程keep住暖笠笠，如果再凍啲食，一流!份量都唔少，說好的輕食呢？🍴信州蘋果汽水 一般，蘋果味唔濃，不推。.🍴龍鳳可樂龍鳳可樂，未上前有估過係咪鮮檸加鹹檸檬，但點睇個餐牌都唔肯定，因為英文都係得個"dual"字……鹹鹹甜甜都幾fresh,出奇地唔多氣，唔會唂住肚仔，但可樂愛好者可能都係吔返鹹檸七好啲~…查看更多

自從第四波之後都好少出街食飯，公司要人清假，難得平日放假，所以就出街搵下啲少去嘅地方覓食。.🍴汁煮豬軟骨定食豬軟骨好稔，入味，但唔會柴，漬物有加分，驚喜嘅係紫蘇葉，配上定食，一流，而家份量都好多。🍴招牌蒲燒鰻魚定食配貓飯鰻魚大大條，油脂重，但略嫌燒汁過多，有啲太甜。貓飯好特別，第一次聽呢個名，飯上面有紫菜、木魚花、日本醬油同牛油，配搭好好，不過一定要攪拌均勻，如果唔係會一啖好鹹，一啖無乜味，配搭新鮮好味。全部定食都附送前菜、煎菜同味噌湯。是日前菜係胡麻青瓜，胡麻醬配青瓜係經典不敗組合。味噌湯有好味菇菇，不過略嫌太鹹。🍴玉子燒有4舊，不過不失，甜甜的。整體黎講，食物質素不錯，店內裝潢帶點舊日本風味，而且有幾幅有名的動畫puzzle，引起90後肥A嘅共鳴。…查看更多

《泰美味》天氣凍凍，行過聞到燒烤經典嘅孜然味，留唔住飯前整返幾串黎止口痕～🍴泰燒雞腎呢個真係好有驚喜，雞腎爽脆彈牙，唔會靭，無一般內臟嘅腥臭味，配上濃濃孜然味，令人忍唔住想食完一串又一串。.🍴泰燒雞軟骨雞軟骨食得過出有事先醃製過，但都仲係有啲油膩感，可以再乾身。.🍴燒芝士丸可以食到拉絲嘅效果，包住芝士嘅魚糕都好彈牙，煙煙靭靭都好滋味。.🍴燒墨丸墨丸係經典嘅燒烤食物，佢比一般自己BBQ香脆，不愧係專業。食完幾串串燒暖下身，再鼓起勇氣面對寒冷。…查看更多

好耐無行置樂，變化好大呀，不過無變嘅係都仲係有好多高質小店。心血來潮想食韓式炸雞，所以就揀左呢間裝潢幾可愛嘅黃色小店。店員態度殷勤，有盡力介紹不同嘅食物，實在難得呀。.🍴時光芝士炸雞炸雞外皮脆卜卜，無骨，咬落啖啖肉，芝士醬濃郁，好惹味，食唔停呀。🍴蜜糖芥末炸雞蜜糖芥末醬係另上，呢個醬好好味，甜甜，微微辣，連肥A都食到呀，呢個微微辣可以去到炸雞嘅油膩感，配搭得宜，感覺對肚皮無咁重負擔。🍴忌廉蟹肉薯餅蟹肉量都頗多，但略嫌忌廉味不夠重，比較淡口，炸皮一樣鬆脆。🍴黑糖蕃薯薯條黑糖味不夠濃，但係蕃薯條本身已經夠甜，所以都好味，就算凍食都唔會變得難食。🍴香甜蕃薯年糕蕃薯年糕都有炸過，QQ嘅年糕皮包住蕃薯餡，煙煙靭靭。全部炸物拎到番屋企，雖然唔係熱辣辣，但係都仲係維持到脆卜卜，不錯喔。…查看更多