Andy.KK的个人专页

餐廳地點都幾就腳，就喺諾士佛台側邊入去。經過聽到歌聲吸引，所以我哋入咗去坐嘅位置都闊落。第一個頭盤我哋有生蠔，生蠔嘅size都幾大，而且夠新鮮仲有擺設，佢個碟中間放咗乾冰，所以上枱嘅時候有煙既效果，可以影相打卡。之後由佢哋自製嘅辣醬焗薯仔，薯仔夠脆身，都幾香。而且個份量都幾多，我覺得夠三至四人分享。個餐仲會有小食，係蟹餅。蟹餅揸得唔會太鬆脆幾有口感，如果飲酒食會幾夾。佢上面仲會有啲魚子添，見到魚子就會覺得幾抵食。之後main course有意大利飯，我個人比較鍾意食濃綢小小嘅汁，以佢呢個就會冇咁濃，但係味道層次啱啱好。如果鍾意食得冇咁鹹嘅人就會覺得呢個味道適合。另一個主菜係牛扒，佢會另外有醬汁擺喺側邊俾你自己點，牛扒我叫咗5成，食落有肉汁，有少少脆身，一路飲酒一路食，覺得味道非常好。呢間酒吧算喺香港，比較新式嘅酒吧，因為冇乜見到有配備有埋手機appVSING去俾你登記做會員，之後點歌上台挑戰，然後台上嘅螢幕會出現你嘅會員名同挑戰歌曲，台下嘅人仲可以用app入面嘅貨幣去為你製造唔同嘅舞台效果，仲有加油字句，送禮物都得。舞台設計都夠大，而且仲有燈光配合，所以氣氛一流，感覺會好似同一班朋友慶祝緊開party。…查看更多

中秋節已經同長老們食完飯，今日就搵咗間特別啲嘅餐廳同老虎🐯撐下枱腳之前上網睇到呢一間摩洛哥裝修風格嘅餐廳，有好多特色嘅打卡位，一於趁節日嚟食個飯影吓相呢度都用咗幾多空間去做一啲特別嘅裝修，例如有水池、小小沙漠、戶外特色餐桌等等，入到去真係有小小好似去咗另外一個空間咁，都係一個幾好影相打卡嘅地方食物方面就係一般正常嘅西餐廳，我哋叫咗：<火焰白酒煮青口>白酒煮青口都食得多，呢個青口侍應上餐時會即場點火，慢慢會聞到一啲燒海鮮嘅香味，非常吸引，而且個汁有小小辣，非常野味<避風塘雞翼>都幾搞笑，食西餐有港式嘅避風塘食物，食落係ok的，不過就略嫌蒜香味唔係好出，同一般炸雞翼差不多<意式蕃茄松露牛肝菌雲吞扁意粉>有4大塊意式雲吞，雲吞下面有意粉。個蕃茄汁香濃，同松露味配搭得幾好，再加埋雲吞入邊啲牛肝菌令個口感好rich，唔錯唔錯整體而言食物質素唔錯，但價錢略為偏貴。不過見到餐廳咁多咁有心思打造同埋打理嘅打卡位，偶然來食嘢影相都唔錯啊…查看更多

以前同老虎拍拖嘅時候，有一間日式餐廳我哋成日去，前幾個月突然知道佢已經結業時簡直係晴天霹靂但係最近比我搵返呢間個名有啲似，裝修有啲似，食嘅嘢有啲似嘅餐廳，一睇之下原來同我哋以前食開嗰間係同一個老闆啊！趁着老虎仲放緊假就同佢去回味昔日拍拖嘅感覺<東洋卷>幾大程度我地都係因為呢個東洋卷而嚟嘅，外皮稍為有少少甜，同埋個鰻魚可以澎湃多少少就正啦，不過整體而言都好好味<一杯關西燒>呢個上網睇到好多人介紹，食落都好有驚喜，上枱時侍應會幫你切開做9份，食落啲醬酸酸甜甜，外層煙煙韌韌，入邊有好大量嘅切絲椰菜，同埋surprisingly竟然有牛筋，整體口感好好，非常唔錯<壽司定食>6件壽司+4件卷物+一碗烏冬，唔算好平，但係個質素幾好，魚生處理得唔錯，特別係隻蝦都幾彈牙，而且啲壽司飯我覺得好好味<咖啡>呢杯咖啡都係我念念不忘嘅item之一，我唔係好識形容個味道，只係講得出好香濃，比正常餐廳跟餐嘅咖啡好飲好多呢度嘅裝修好靚，真係有種去咗日本居酒屋嘅感覺，牆上都貼咗一啲日本嘅poster幾得意…查看更多

放咗一排暑假，終於要返返嚟啦哈哈！近排見到有新開嘅流水蝦，就約埋老虎🐯去試試入到去見到個環境都幾乾淨同舒服，每張枱都有一缸流水蝦喺隔離，入邊好多生猛大頭蝦游嚟游去，隨時都可以夾，都幾盞鬼一坐低侍應會比一盤大頭蝦、一碟牛肉、同埋一盤海鮮船，上面有扇貝、蜆、鱔同埋鮑魚，款式都幾多，整低嚟講都好唔錯(順帶一提，侍應哥哥服務好好)至於主角大頭蝦，好生猛同埋新鮮，同埋個蝦頭啲蝦膏好香，非常好味比較推薦用鹽燒會更加好味，不過記住要凍暈啲蝦先好燒啊餐廳仲有其他海鮮、肉同蔬菜都係俾你任燒嘅：雞翼、雞腎、生蠔、魚、魷魚、金菇 … 等等，應有盡有，另外仲有一啲熟食、飲品任飲、生果、甜品同埋雪糕，基本上都一應俱全對於我嚟講，嚟呢度就緊係最主要食新鮮大頭蝦啦，2.5小時專攻大頭蝦基本上都回晒本啦哈哈哈…查看更多

我成日都好鍾意得閒嘅時候去行吓中西區，總會睇到啲好得意嘅嘢哈哈今日行到過嚟，記得呢度之前好似係另一間Cafe，應該係轉咗手，不過依然係咁IG-able，一場過到嚟，就同老虎坐低飲返杯咖啡<本地有機豆腐配牛油果醬酸種吐司>店員介紹完後就好想食，因為佢哋係同本地豆腐廠合作，用有機豆腐去做呢個吐司，加上有牛油果，同埋我好鍾意嘅流心蛋簡簡單單，煎一煎個豆腐，同埋有少少調味嘅流心蛋就已經好正好好食不過如果層牛油果醬多啲就完美啦哈哈<Iced Orange Cold Brew>夏天飲呢啲就啱晒啦，一睇都知好清涼，飲落幾得意，橙味同咖啡味balance得好好，飲飲下有少少錯覺好似飲緊檸檬茶哈哈另外我好鍾意佢塊乾橙，個味好出<Espresso Yuzu Tonic>呢杯都係夏天嘅飲品，柚子味都幾出，好易入口，夏天飲好舒服，不過要小心，其實佢都係一杯expresso嚟，咖啡濃度好高，嗰晚我好夜都未瞓得着…查看更多

呢間海鮮站，以前在炮台山食過，海鮮用料好新鮮，而且烹調都好出色，好發揮到海鮮嘅味道，都係我其中一間幾鍾意食海鮮嘅地方後來唔知道幾時，炮台山的店沒有了，以為沒有了這個吃海鮮的好地方，點知最近在佐敦見返呢個名，仲有同一款龍蝦湯湯飯，我就知道係同一間舖頭了講講個飯先，啲龍蝦湯多到瀉出嚟，龍蝦味好濃，勁足料個飯仲跟咗條龍蝦尾肉，ok彈牙同鮮甜，龍蝦處理得好好唔好睇佢一碗飯好似好細碗咁，食落都非常之飽肚😆自從自己要開始煮飯起，就知道要將海鮮處理得好同煮得好，絕對係非常唔容易，以呢度嘅食物質素同價錢來講，我覺得性價比都算好高，而且好近我office，一定會多啲過嚟食😝…查看更多

有個好同事就嚟要last day了，平時工作都好忙，於是就約咗食個farewell lunch好好傾下計其實我地都冇特別想食咩，行吓行吓嚟到呢間「野玩田店」好似幾唔錯就入咗嚟試吓。我叫咗份燒春雞拼薯菜，店員話係即叫即燒，要等25分鐘，不過係值得架隻雞燒得好靚，一切勁多油標出嚟，同埋啲雞肉好嫩，皮脆，非常好味另外啲薯條都幾薯條，食落好實在、好香，唔錯唔錯同同事食咗餐好嘅，希望佢未來都一帆風順、順順利利…查看更多

之前已經有一次想約朋友嚟，但嗰時疫情嚴重，嚟到先知冇開，後來又冇乜機會過嚟，因為自己唔係呢頭返工，呢間餐廳又只會開平日中午，所以一直都冇機會過嚟。前幾日突然見到佢結業嘅消息，就特登安排一日早啲過嚟試吓。我11:15am去到餐廳，原來已經開咗門，而我去到都已經要排隊啦，不過因為我得一個人，排咗一陣就有位”攝”，搭枱有位坐我第一次嚟，又聽講好多嘢都好出名，但一個人又食唔到咁多，幾經掙扎下叫咗個<大細腳黑豉油乾撈麵>同埋一杯<腐竹薏米冰>由於佢哋就嚟結業，實在真係太多太多人，廚房樓面都完全做唔切，我點咗餐後大概9個字左右先上到，不過都體諒嘅個黑豉油甜甜地，同我想像中有啲出入，黑豉油同個粗麵都幾夾，入晒味，味道唔錯，不過就比較油；大細腳係指豬腳同雞腳，豬腳得1隻，雞腳就有3隻，炆得好琳好入味腐竹薏米冰有種好似食緊糖水嘅感覺哈哈甜甜地有冰冰涼涼可以解一解嗰個油膩嘅感覺見到其他食客叫肉骨茶、豬皮、海南雞等等都好似唔錯，如果有一日佢再開鋪應該都會再試其他嘅食物…查看更多

小chur完一輪終於有一日可以休息吓，瞓醒後入咗西貢四圍輕鬆行下、食個lunch、睇下艇上面啲魚同海鮮入到去行咗一陣，經過呢一間越式餐廳，諗住食Pho都幾好，老虎🐯行過見到人地食越式法包又想食，點知今次真係有啲驚喜我哋叫咗個<招牌越式法包>，入面有豬頸肉、越式牛肉、扎肉，一咬落去啲肉汁爆晒出嚟，口感勁rich勁野味！仲要啲配料勁多，同埋最緊要個包唔會非常硬，完全改變左我對越式法包好硬好乾嘅印象。(不過如果下次我再食，我諗我會食豬頸肉)另外，我本身諗住入嚟食Pho，都叫咗碗<火車頭牛肉鍋粉>。個湯幾濃同甜，加埋啲河粉好好味！另外啲牛肚、熟牛肉、牛丸、生牛肉，其實都幾好味，處理得幾好，不過我總係有一種配料同湯粉好像有點分開、不是一個整體的感覺，我諗我下次都係食返普通嘅生牛肉湯河就ok，因為我最主要都係個湯同河粉哈哈嚟到越南餐廳，梗係叫杯<越南滴漏咖啡>啦，睇住咖啡慢慢滴落嚟的確係幾治癒、感覺幾慢活，不過杯咖啡略嫌煉奶多咗少少，偏甜，下次會叫佢落少煉奶哈哈…查看更多

茶果嶺，以前都有聽過呢個地方，但都係最近喺一次巧合嘅情況下先知原來係喺觀塘藍田對出的海旁，就在市區的附近。既然知道了，就趁今日假期去行了一轉。去之前做了些少功課，比較多睇到嘅係今日會去食嘅餐廳 ─ 榮華冰室。呢間冰室以前係間教堂，已經有好多年歷史，入到去的確有種時光回到三、四十年前的感覺。呢度嘅枱櫈、海報、餐牌等等年紀都比我大。冰室現在由一位老闆主理，所有食物都是他烹調的。<火腿炒烏冬加蛋> 其實都炒得幾好味，落咗少少生抽去炒，唔會太鹹、味道啱啱好<滷水雞翼尖>我覺得滷得好好，平時我唔特別鍾意食雞翼尖，但呢度嘅雞翼尖煮到好淋，一啜就可以食晒雞翼尖啲肉，而且滷得好入味！下次真係試吓個雞翼尖米粉，應該都好正<西多士>老闆每塊西多都啱啱好用哂一隻蛋，上枱前老闆已經切好9格方便進食，而且已經搽好煉奶，唔使再另外搽牛油同加糖漿，味道同正常茶餐廳差不多<奶茶>奶茶就同外面飲到嘅味道唔同，比較稀，有種奶水嘅味道，茶嘅味道反而就唔係好出，我自己就唔係好飲得慣整體而言食物味道也不錯，正常茶餐廳水準，當然唔會驚為天人啦，但配合上呢度嘅氣氛、情懷，食嘅時候亦會有一種寧靜、享受活在當下的一種感覺。食完我哋都去附近行咗一陣，平淡舒服地享受這天的假期…查看更多

公司話可以返office工作，聽日就要完結WFH嘅日子，所以今日跑完步之後去咗平時去開嘅茶記食咗個lunch，好好享受WFH連埋假期完結嘅最後一日講到北記，最出名嘅一定係佢哋嘅<瓦煲奶茶>，茶用瓦煲煲出嚟飲落會更加有茶香，比一般奶茶冇咁澀。我自己鍾意飲茶走，呢度奶同茶嘅比例，加埋煉奶份量，無論係甜度、茶香、入口順滑都好啱我口味，而且奶茶都幾掛杯，係其中一間我最鍾意飲嘅奶茶另外佢嘅豬扒麵都好出名，炸豬扒鬆軟、彈牙，浸咗落啲湯度掛埋啲湯汁一齊食都幾好味；麵就用咗大光麵，反而個湯底我唔係好飲得出係咩哈哈但總係覺得麵同湯同啲豬扒好夾我鍾意加多份蒜香炸雞翼，師傅會即叫即炸，熱辣香脆不特止，仲有好強嘅蒜香味！不過比老虎列咗入違禁品，而家我冇食咁多啦其實我都幾鍾意食街市、茶餐廳、大排檔等等呢啲好local嘅食肆，總覺得比起好多靚靚餐廳，呢啲小店環境冇咁好，但主要嘅心思都放喺食物上，以及用咗好多年嘅時間去鑽研點樣做好食物同維持質素，從食物中感受到努力和用心…查看更多

今日去我朋友屋企，之前佢介紹呢間餐廳幾好食，本來打算食魚，但入到門口聽到有人不停斬嘢，原來師傅喺度斬緊隻雞，啲雞睇落幾新鮮，所以突然改變心意叫咗個雞煲餐廳好企理乾淨，坐得舒服。飲品好快就嚟咗，我去親餐廳如果有鹹檸七就多數都會叫，因為粒咸檸我唔會喺自己屋企整，比較少飲到等咗冇耐隻雞煲都上咗啦，再焗多陣就食得！我哋叫咗多芫荽，因為我哋都好鍾意食隻雞又真係幾嫩滑，而且啲醬汁好香同杰身，好掛到上啲雞件到。我哋本身叫咗小辣，但係覺得唔係好夠辣就叫佢俾咗啲辣椒我哋自己加，點知加咗唔係好多，就越煮越辣哈哈由於太耐冇出街食雞煲，差啲唔記得可以加湯落去打邊爐哈哈食完雞我哋都已經半飽，就叫咗：<油麥菜><牛黃喉><紅薯粉>比較少見到牛黃喉就叫咗嚟試吓，處理得好乾淨，食得好放心，牛黃喉淥一陣就得，幾爽口彈牙紅薯粉上次食過真係返唔到轉頭，放埋入啲辣汁一齊煮真係冇得輸為我哋放寬後嘅第一次雞煲做咗個幾好嘅結尾…查看更多

放咗幾日假，一返工就好多工作排山倒海咁衝過嚟，成個朝早忙到嘔電，所以決定lunch要食返啲好嘢獎勵吓自己突然間諗起附近有間傳說級餐廳，就不如去買個外賣試一試<馬坤記>係一間港式大排檔，因為有幾套電影同電視劇去過取景，所以好多人都特登嚟試吓，我都係其中一個哈哈依家疫情，大部份人都係嚟買外賣，去門口點餐時見到師父攞住大大個鐵鑊喺度炒嘢，已經感受到果一種鑊氣，突然好想食<鹹魚雞粒炒飯>，就叫咗盒外賣。由於都真係幾多人，等咗大概20分鐘左右先攞到外賣，不過食落口嘅時候都覺得好值得炒飯真係炒得好有鑊氣，粒粒分明、乾爽同有蛋香；鹹魚份量適中，食飯嘅時候食到鹹香但係又唔會過分太鹹；雞粒就基本上都OK，有處理過冇雪藏味，配合埋鹹魚同埋個炒飯，整體嚟講都係非常好味嘅真係好鍾意佢用個大鐵鑊即叫即炒，下次再去買外賣試其他鑊氣lunch先…查看更多

以前住咗喺筲箕灣好多年， 安利真係由佢細鋪食到大舖，而家我就算搬咗出去，但都會成日返嚟筲箕灣探親戚，有時都會嚟食返碗麵。一般嚟講安利都係好多人排隊，今日我哋行山早嚟，比較少啲人，攞飛後等咗10分鐘左右就入得我叫咗碗<切腩片頭撈粗>，撈粗稍為比較重鹼水味，不過唔會太鹹同埋都有香味；切腩就比較乾同埋柴，有部份會癡口有部份好鬆散； 片頭都算彈牙，但係就冇乜魚味；碗湯稍為偏鹹。反而件<鮮油奶多>有啲驚喜，底面都烘得幾脆，加埋中間嗰件凍、邪惡嘅牛油，一下咬落口好鬼澎湃同埋滿足杯奶茶都唔錯，幾有茶香同埋好順滑。但整體而言食物質素比以前稍為退步了，希望名氣大了之後都可以保持返個水準啦P.S. 依家冇得「跟跟佢」了…查看更多

喺屋企困得太耐，今個週末終於出嚟去行吓我哋入咗坪洲悠閒一日遊入到去第一件事就係食咗lunch先行過呢間茶樓，比佢地下一籠籠嘅點心吸引咗，呢度點心要自己攞，我就好鍾意呢種飲茶方式有時如果出面冇但係廚房有嘅話，佢哋係會即刻蒸俾你㗎！即蒸即食真係好正啊我哋今日叫咗有：<鵪鶉蛋燒賣><豬潤燒賣><魚肚燒賣><蝦餃><煎蘿蔔糕><雞扎><叉燒包><柴魚花生粥>飲茶嚟講燒賣同蝦餃我係一定要食，如果唔係就好似差啲野咁哈哈但我去攞點心嘅時候發現除咗平時食嗰種燒賣之外，仲有傳統、唔係成日見到嘅鵪鶉蛋燒賣同豬膶燒賣，咁梗係要試吓啦整體嚟講啲點心都好好食，唔會好鹹，用料好足，好傳統飲茶嘅風味，特別係個豬潤燒賣，豬潤好脆、唔會腥，鍾意食豬潤嘅人都應該會覺得好好食個魚肚燒賣係餐牌上冇嘅，係有店員攞住問食客要唔要，一場入到嚟就都試吓啦！不過老實講，蝦膠加魚肚，仲要啱啱蒸好出嚟，點會唔好食呀…查看更多