christinedin2047's Profile

昨天在此分店預訂了生日蛋糕，問smile yogurt有冇提供生日牌，大量雀斑嗰位中年女店員用非常冷漠的口吻告知有兩款生日牌提供，分別係紅色同粉紅色，想襯返個蛋糕就同佢講想配返粉紅色那款，全個購買過程該店員都係keep住冇笑容冇音調好唔願意你幫襯嘅咀臉。到今日去拎蛋糕，中年女店員繼續貫徹佢冇笑容冇音調嘅服務態度，再指揮灰色年青高大男店員拎蛋糕比我，比蛋糕我check時冇打開全個盒，只係開左一邊，仲要佢係放喺高枱上面比我check，基本上只係睇到蛋糕側邊，蛋糕面完全睇唔到😑咁都算，提佢比個粉紅色生日牌比我，佢哦完一聲都係比返橙色嗰個，由於我覺得佢態度都同女店員一樣，非常一般，所以我專登望下個生日牌啱唔啱，果然兜口兜面提都係錯，叫佢換返比我，佢同女店員都聽到但完全唔覺得有問題，一聲唔好意思都冇。其實成個沙田連城以至新城市都係蛋糕店，蛋糕志在慶祝時開開心心，但拎蛋糕已經令人唔開心，咁嘅服務幾好食都假啦！唔會再幫襯沙田分店，唔想做嘅就唔好做啦，好多人等住有工返！服務想比0星！…Read More

上網見到8：30pm後有8折，即刻book嚟試下，地點喺上海街鄰近朗豪坊，易搵又就腳，叫左香草吉列牛同安格斯牛湯鍋，兩樣味道都不錯，加$38可升級套餐，有刺身飲品同湯，性價比👍🏻。餐廳職員好有禮貌好笑容，非常親切，服務很好，小店裝修都好清新，環境乾淨整潔，會再次回頭幫襯。…Read More

今日跟先生book左嚟呢度晚餐，嚟到環境不錯，戶外及半戶外座位佔多數，我哋被安排室內座位，入座流程好順暢👍🏻呢間同隔離餐廳應該係同集團，所以兩間嘅menu都可以order，其實兩間都係酒吧為主，品酒應該係重點，有好多唔同種類嘅酒。本身一路都酒吧餐廳嘅食物冇乜期待，但呢間食物幾好味，我地叫左個pama ham露荀沙律、西班牙蛋餅、西冷牛扒、黑松露薯條、一杯signature drink同一杯柚子tonic，除左沙律冇咩味唔夠汁之外，其他食物都水準之上。所有員工都好有passion，好細心解釋餐牌上食物飲品同會有推薦給客人，所以會再嚟encore…Read More

今日一行四人到牛大人午餐，首先想反映就是90分鐘真係太少時間，每次點菜都唔係嚟足份量，例如叫5碟牛只會嚟3碟，每枱只係比一個兜仔你出去夾自助嘅餸菜，其實個兜只要夾三棵娃娃菜已經滿左，真係好小家😩預早半小時比定單叫你埋單同話比客人知截單，但前一轉點嘅野仲未到齊，最緊要係我哋叫和牛餐，明明點埋一樣款嘅牛肉，但次次嚟都唔同款，頭一轉係最好，之後上嘅全部都又薄又碎，我晚市喺旺角荷里活食過好多次都好正常，唔知今次係午市時段定分店嘅問題，總之好失望😮‍💨…Read More

今天約了朋友到尖沙咀，一心想幫襯一下黃色小店，所以喺openrice搵左呢間餐廳。首先，入口非常不顯眼，大廈門口係行過左都睇唔到得一個身位闊嗰種，門外冇易拉架指示，都冇水牌。上到去好大油煙味，不過都冇所謂，行到辛水辛汗至在食餐好嘅。Weekday都冇任何lunch set，咁我地叫左兩個main course貓耳朵同意大利飯另點左兩杯凍house coffee，main course味道賣相都合格，咁兩杯house coffee嚟到冇糖冇奶，就以為餐廳唔記得比我地，隔左一輪食物都到齊仍然未有，咁我哋就問餐廳攞，點知店員問我哋係咪想叫Latte，我地就話唔係，只係想要返啲糖奶，店員竟然話如果加奶要收$5，我哋當堂O哂咀，我哋冇expect過係齋啡，店員就話佢哋house coffee係咁，又問多次我哋係咪要轉Latte，其實咖啡應該唔係加左奶就等於latte卦，咁好啦我哋加返啦，店員再問你哋邊位要加奶，我哋表示兩位都要，佢竟然話價值$5嘅奶唔夠比兩杯用，所以另外嗰位都要再加，即係$10兩小杯仔奶，基於服務同價錢嘅考慮，我地都冇再問糖水有冇啦，睇怕都係要加錢。坦白講，main course唔係平，平均要成百蚊一個，拍得住商場食肆，雖然包一杯$40下嘅飲品，但基本上得一兩款，全部要補差價，仲要收加一服務費，咁嘅service叫服務？就算我哋真係唔識野，誤會左house coffee有糖奶，咁糖奶係咪真係貴到咁呢？係咪要補錢到等於一杯凍latte價錢先得？打正旗號係黃店，我都因黃店而去，但事實食物環境性價比唔高，大把餐廳更好，而服務仲要咁，我唔會盲撐，咁嘅黃店不了。…Read More

空間非常大，食物都好好味，份量足夠，就是有啲唔夠冷氣，佢哋賣嘅傢俬都好靚，但好貴買唔起！侍應服務態度都好好，價格襯得起環境、裝修、服務，香港少有空間感十足嘅Cafe，順帶一提，內裡更有剪髮服務，有興趣可以一試。…Read More

當天下午茶時份幫襯，冇咩人，環境幾舒服開揚。因為中環分店食過好幾次，啲野食多數都幾好味，諗住尖沙咀分店都差唔多，所以叫左個卡邦尼意粉$48同黑毛豬柳珍珠麵$158，卡邦尼意粉好味，作為優惠價嚟講質素相當好，但估唔到黑毛豬嗰個出哂事，首先主餐牌係有星星推介，睇圖片見到珍珠麵一粒粒咁得意就想試下，黎到賣相冇咩問題，食落就出事，第一黑毛豬柳係鞋嘅無味同好韌 ，少少燒過嘅香味都冇，個汁好怪味，唔似西式汁，反而似蠔油汁嘅味多啲，成個夾埋超怪味，成碟夾硬都食哂嘅，但本身想食完野嗌杯咖啡嘆下嘅意慾降至零，嗱嗱聲埋單走人算數。…Read More