Irisbabe1169的个人专页

多次表達唔想比個強力吹風機吹住，一黎吹凍哂啲野食、二黎真係正常人都吹到頭都痛，果部機係有半個人咁大座既強力吹風機！其實店內冷氣都好夠，有幾枱客入到黎直頭都嫌後面既座位吹風太勁唔坐，不知幾多人望住部機想熄左佢！店員仲會係吹風機前包餃子，啲麵粉真係吹到周圍都係，到底食麵粉定餃子？店內店員又無禮貌，收到單聽到客補充應都唔應一聲，客以為無聽到咪補多句，店員都會即刻懟番一句「得啦我聽到」，成餐飯都見住態度一直咁差，講野使唔使咁倔平時去開既八方都無呢間咁，認真可一不可再，又多飛蟲烏蠅，衛生真係好差…查看更多

睇過好多YouTuber拍片講依間小店點心，on list好耐，今日黎換身分證終於試到佢既炖盅湯想試好耐，今次叫左花膠蟲草花炖土雞+猴頭菇菜樹菇瘦肉湯，認真其實兩個味道都差不多，原以為會有明顯的分別但比想像中有出入，不過的確飲得出係原汁原味無味精既，滿清淡，飲完係幾舒服不會太重負擔點心一口氣叫左幾樣：燒賣、蝦餃不能少，再有菜苗蝦餃、牛肉球，魚湯鮮竹卷、煎蘿蔔糕、牛栢葉、鳳爪。牛栢葉鳳爪我唔食，比唔到評價。燒賣大大粒，內質鬆但彈牙有口感，唔會似酒樓飲茶的過分硬身；本人最中意菜苗蝦餃所以蝦餃留番比友人食（友人不愛食翻版蝦餃），因為皮相對正常蝦餃薄身一啲，粒粒有手心咁大粒，菜苗一啲都不欺場掙滿晒成個餃之餘都仲有一粒蝦係入面，正宗皮薄餡靚；另一最中意嘅就係牛肉球，大粒，肉質彈牙但林，老人家無牙都「梅」得爛，林到咁咬落去都仲有彈彈的口感，牛肉蒸到岩岩好，菜苗蝦餃同牛肉球最後仲番兜左各一籠；魚湯鮮竹卷都不錯只係沒有什麼大特色，同埋飲完個炖湯飲個魚湯，就會覺得明顯重口味；蘿蔔糕正常發揮，無咩特別。服務一開始都無咩期望，職員都比較冷漠，所以呢點沒有失望；小店環境係的確細，所以如果唔係想食午市有的菜式，建議下午茶去會坐得舒服啲，坐耐少少都唔會有人趕；衛生都係可以接受的程度為左個牛肉球、菜苗蝦餃同燒賣，我會再黎😆…查看更多

成日聽啲人講依間米線唔錯，今日終於的起心肝行去食，事關佢的位置真係令我成日好唔想行咁遠😂叫左蒜蜜蕃茄湯米線、肥牛沙嗲湯米線、大腸拼雞腎、同埋脆米紙春卷蕃茄湯底唔錯，唔會太酸帶微甜，好怕有啲酸勁太厲害會越食越酸；米線唔係我中意的質地（我喜歡偏淋身落單都已叫佢煮淋啲），但今次依碗直頭我同友人都覺得有啲半生不熟；豬扒一般，就算浸係湯度都食到佢好柴好難咬；結論依碗除左個湯底ok外其他都不大滿意。肥牛沙嗲果碗，湯底沙嗲味淡，真係茶餐廳既沙嗲牛都比佢好食，肥牛就感覺係打邊爐最cheapcheap果種，真係我自己買料的都會好食過佢既肥牛，米線都一樣係半生不熟既口感，個芯感覺係未煮透，已經唔係話保持彈牙嘅問題。反而小食大腸同雞腎表現比米線仲要好，非常入味、都煮得夠淋；米紙卷都係新鮮整，唔會話炸定上枱微溫果種，但味道一般，屬正常表現。整體來講名過其實，而且樓面員工經常唔留意出餐位，我碗沙嗲米線係出餐吹到凍哂至拎過嚟，明明唔多客無乜野做企係度，試過一次就算，唔需要再黎了…查看更多

舖頭細細，之前行過見到有蟹湯同蝦湯已經好想試，今日平日下晝黎到試吓分別叫左黑蒜蝦湯拉麵、花咲蟹湯拉麵、加配小食餃子2件🥟、炸雞2件同1隻糖心蛋。再加一個下午茶小食拼盤餐（其實只不過係多份薯角同野飲，其餘嗰啲都係餃子同炸雞各2件）黑蒜油蝦湯拉麵一落枱都已經聞到幾香，但食落又唔係話好突出的香味同驚喜，麵身依碗點左偏硬彈身，是合格的，蝦湯味香且濃厚，都擔心後面會唔會食到好膩但又無，碗邊有兩塊大豚肉，但個人覺得口感太彈身唔太中意。我比較中意軟林口感的花咲蟹湯拉麵黎到既香味比蝦仲要吸引，湯底濃厚但不油膩，一直食到尾都無好膩既感覺，仲會附上一堆拆好既碎蟹肉，今次依碗既叉燒可能因為浸到湯底有熱力餘溫下肉質較林身是我喜歡的口感，麵身依碗點左軟身亦都合要求。小食方面不過不失，正常來貨水準。整體來說，比預期不錯但未到驚喜水準，偶爾經過唔知食咩可以食的選擇後話：依種筷子🥢非常難夾到麵，如果是乾身的食物還可以，但食拉麵遇上咁尖嘴的筷子，麵本身又有彈度，就會一直不停彈啲湯汁上面/衫度，非常之不便於使用及狼狽…查看更多

疫情嚴重其實真係少左出去食嘢，但真係日日煮飯煮到人都癲，一星期一兩餐出去食真係戒唔到，而且百業蕭條好多小店真係要我哋幫襯至撐得住，雖然一個人食量有限但做得幾多得幾多啦！今次叫左博多雞白湯同博多豚骨湯，個人其實偏愛雞白湯因為即使湯底偏濃厚一啲，都唔會有豬骨湯咁膩，但如果香啲既話咁的確豚骨湯係比較出色。雞叉燒做得不錯，有人可能接受唔到咁大塊雞皮，但有皮真係會香口一點，表皮仲有少少煎過既香脆，我自己幾中意；豚肉相對我覺得遜色左啲，比較柴同乾身，厚度都比較薄。麵係直身果種白身幼麵，我點了較軟身，整體口感我滿意因自己係比較中意依種拉麵多於太麵/曲麵身果種，但同行友人就不太欣賞依種麵了😅😅仲叫左炸雞、餃子，同無骨雞翼。炸雞我估唔到佢表面既粉漿已經帶微辣，因本人對辣椒敏感所以無食到好多，其實個人建議店家唔好整辣因為真係唔係人人食到辣架雖然佢對大家黎講既辣度應該好似黑椒同胡椒多啲既程度，但真係有啲人係一點辣都唔食得；餃子真心不錯👍🏻😌雖然都應該係來貨，但煎完到我口時咬落仲好有肉汁；無骨雞翼好食既不過我叫燒汁佢出左原味，試唔到我最想試的，整體好食，雞嫩有肉汁但唔算好驚喜整體來講還可以😌，比預期中好食的，希望小店撐得住疫情捱得過啦…查看更多

勁中意飲湯既我，有日剪完頭髮見到隔離有間咁既燉湯糖水舖，至知原來係馬鞍山果間既分店，之前見到講馬鞍山果間都一直好想試但好唔就腳，依家開左係屋企附近實在太好了！第一次叫左花膠螺肉燉雞，足料之餘，盅湯份量都對得住價錢，唔會話細到好離譜，佢呢度仲有蒸飯餐，或者你可以直接湯+$10配飯或米粉因為佢湯料都好夠送飯食。以後想飲湯一定會再黎！佢呢度仲有好多中式滋補糖水，款款都好吸引，就黎秋冬季了，睇黎都好岩時候飲，不過我次次黎到都為左飲湯而去，糖水真係要搵機會至試到了店內環境比較細，假日前如果一大班朋友用餐時間去可能要等等位呢，不過咁樣幾有溫馨感覺…查看更多

疫情問題去唔到日本不知不覺已經有兩年了，早前見到日本大島San拍片分享呢間大阪師傅主理鐵板燒已經好想試。餐廳比較細，所以都幾難訂位，連續問左好幾日都只有9點至有位。當晚叫左好多野食，諗住好好解下思鄉之情，係咪叫驚為天人又唔係，但係當你真係太耐無去日本時食到少少果陣風味，加上野食唔太差時係真係幾滾動。唯一要講既係，得兩位師傅煮野人手好唔夠，啲order根本做唔切，講緊我地入座都已經唔係正常晚餐時間都要等咁耐，加上日本人文化有食客請飲酒即使工作緊佢地都會飲，果晚都見有唔少日本人，請左師傅飲酒，所以可能有影響到出餐真係好慢好慢，好似食左個法國餐咁，平均一道菜等20-30分鐘今次用餐安排係bar枱位置所以可以睇到哂師傅煮既過程，總結，野食不錯，係真係要預時間當食法國餐咁食，同埋一定一定要訂位同要求坐bar枱，唔係等上菜既時間咁長坐order 枱會好無癮。…查看更多

前身呢度係8方雲集，開左之後都黎左幾次食野。次次黎必點佢既嫲嫲醬汁雞件同牛油炒雜菇，真係幾好食，但個人覺得有時雞件本身都已經好夠味，隔離跟碟上的汁可以轉做柚子蜜汁，一黎可以解膩，二黎變左有兩種口味變換，挺不錯的仲有另外必點的係佢既薯仔沙律，偶爾思鄉時，佢真係做得幾似日本既小店味道，$20/2球佢有6款湯底，但個人最鍾意豬骨湯底，佢呢個湯底擺凍左都唔會有陣豬腥羶味最近仲終於推出有晚市套餐，一個主食（價錢由$65-$72）配個小食，轉其他湯底/烏冬，同配野飲各加+$5其他野食不能話好出色，但我覺得可取的是老闆同老闆娘的態度，佢地好聽取客人既意思，服務很周到少少建議，拉麵既軟硬可以提供番比客人選擇，始終唔係人人都中意較硬身的麵…查看更多

分兩條人龍分別排狗仔粉同燒賣魚蛋，分開既原意唔係就要分類快啲分散人流唔使買$12燒賣都等成15分鐘，但啲阿姐好搞笑，啲人亂咁排又比人買，仲要鬧番守規矩既人，欺善怕惡！想食串燒賣要等成15分鐘，重點係人地唔守規矩亂排但要守規矩既黎受罪番，好心做老闆的就話下啲阿姐啦！…查看更多

上到黎根本唔多人，一入座有個帶眼鏡細細粒紮辮的妹妹仔帶位，行到位未坐底就好似規定兩個人要坐哂同一邊咁（明明係張好大既4人枱）我諗無人會中意坐正係爐前兩個鐘何況張枱根本就好大，有位頭髮再長啲高啲都係帶眼鏡既女樓面仲要再補多句「兩人坐埋同一邊好燒啲囉」點坐點食客人有權話事吧？明白佢可能善意提醒，但語氣真係令人覺有待改善，細細粒果個就睇得出佢好新岩岩出黎做野咁，講野倔啲所以我都算。野食黎得幾快，呢樣抵贊，傳菜的後生仔幾個都好有禮貌，落枱時都唔該前唔該後，依家個個帶住口罩，做樓面既語氣真係好重要，好令客人感覺到你的態度。刺身就唔好期望係好新鮮果種啦，不過不失啦，叫幾多就黎幾多呢樣不錯。牛既質素都中間啦，可以接受。仲有半個鐘就完黎叫last order，高啲果位長髮女樓面黎提醒順便落埋雪糕口味，呢樣好既係佢見我地仲有好多野食係枱，就hold起雪糕差唔多15分鐘後至送上黎，我本來仲擔心佢會唔會一落完就即刻拎個雪糕黎。埋單時都係禮貌欠缺，擺張單埋黎就算，真係傳菜哥仔都比佢有禮貌，全店只有兩個女樓面，都一樣長頭髮紮馬尾，高啲馬尾長啲同矮啲馬尾短啲既分別，高啲呢位明顯睇得出係有經驗啲，如果佢係呢間店最大果個，真係好希望檢討下。今日咁既時勢，態度好啲無壞既，黎食飯仲要睇你面色語氣受氣，帶住口罩遮哂樣都feel到你態度有問題真係可想而知，講多幾句唔該無壞既，語氣好點無壞既。去埋廁所諗住走人，番到黎已經有位後生仔執枱，其實餐廳不多人又不急翻枱比下枱客，可以考慮下比個客埋位著埋件褸走人至執枱既，仲要兩個人一齊兩邊執，比我著番件衫走至執都可以吧。咁既服務態度，野食又唔算特別好食，唔想受氣既唔好考慮，完全bad feeling既一餐。衛生係做得幾好，入黎要探熱手清毒，環境都整齊四正，野食雖味道一般但可接受，係服務態度最有問題，令到成餐飯扣哂分…查看更多

去得茶餐廳食野就係貪快，叫一個魚蛋河同一碗粥居然等成20分鐘！客又唔係多，樓面人手多到係度行行企企，追單既就例牌應你就到架啦，但又唔叫佢地真係入廚房幫你睇睇。粥就解釋話即叫即滾姐，咁碗魚蛋粉唔係即叫至即差麵粉去整掛！一碗魚蛋等成20分鐘，真係好過份！最過癮係佢不停出外賣既單，堂食就個個你眼望我望咁癡癡的等，咁不如做哂外賣唔好接堂食啦！都離哂大譜！侍應又無笑容，講真收到服務費麻煩比番少少賣笑樣係咪都唔過份啊！一係就唔好收我服務費囉！絕對係貼錢買氣受！…查看更多