kaling00的个人专页

真係估佢唔到，中環竟然都有咁正宗嘅泰國菜！ 食個 lunch 仲可以平過出面，抵食又有驚喜。最意外係期間限定嘅咖哩羊肉飯😍話說，我平時真係好少食羊嘅，因為我怕處理得唔好就好容易有陣羶味，但見期間限定就膽粗粗一戰！真心要一讚THAI Q嘅廚師，居然可以將羊煮到又香又腍，有羊味但一啲羶味都冇～而且份量仲好足，大滿足呀！！呢間隱世小店就位於中環6號碼頭， 唔係咁啱見到有食評介紹，行過都可能miss咗！🙈下次經過真係唔好錯過！ …查看更多

事源係朋友話我知呢間酒吧最近有新力清啤優惠，於是我就過去chill下！但因為太肚餓，就叫埋炸魚薯條。因為知係酒吧，所以老實講，本來無抱有好大期望…結果先到嘅餃子就驚艷咗我！見係優惠套餐，應該都係普通野，點知炸得啱啱好，完全無雪藏味，甚或油膩感！之後嘅炸魚薯條根本係餐廳嘅水平！大大份都唔使$100大癲！之後因為未飲完酒（自問係掛住食無乜飲），就追加埋雞皮餃子，根本水平同香港好多自稱居酒屋賣埋$100+嘅雞皮餃子一樣味…（唔排除係同一個source）。大滿足都係$300有找！酒吧仲有飛標機，可惜我唔識玩，下次可以同識玩嘅朋友一起去chill！…查看更多

原本我是想慕名前往鼓油街另一間台食餐廳，誤打誤撞來到餐廳坐下，才發現自己去錯餐廳。可能因為不是繁忙時間，餐廳的客人只有2-3桌，然後我看了看Open Rice的食評，評價很兩極。既來之則安之，如果不好吃就當作「試伏」吧！話口未完，店員端上其貌不揚的飲料，還稱呼它為「熱檸茶」，我內心當堂打咗個突，準備好心情去試伏之際，一陣鹽酥香噗鼻而來😱我點了我常點的鹽酥雞+甜不辣，這家的ranking直迫我心目中的頭3位餐廳。首先是甜不辣，它是以圓條狀炸起端上。可能最近我吃到的都剛好是片狀，這甜不辣外觀上是有驚喜的。然後是口感和味道，都調配到恰到好處。口感煙韌但不會太韌，鹽酥粉平均遍布每一顆，所以不會有些有味有些無味。美中不足是難免有一兩粒剛好沾上粉太多，有些微咸。至於鹽酥雞，果然是「店家的推介」。每一粒都炸得剛剛好，不過炸過頭或者不熟。嫩嫩的雞肉被鬆脆的外皮包裹，吃下去口感也不錯。鹽酥粉的部分跟甜不辣相約，所以不重複了。結帳時跟店員稱讚食物好吃，博得店員一笑 LOL其實店員笑得很美，希望下次去，可以看到店員是笑的。…查看更多

話說想喺沙田大圍搵間好味+價錢親民+可以訂座+無限時用餐嘅餐廳，真係唔容易。重點：仲要星期日！好多餐廳都不設訂座/有限時用餐/甚至有用餐時段限制，輾轉之下，我就搵到一間：睇落好味+價錢似乎合理+可以訂座+似乎無限時嘅餐廳=風車。未到餐廳，媽媽已經問有冇限時，所以我第一句就問侍應，佢答「無」，即刻答返媽媽。坦白講，星期日嘅傍晚7點嚟講，呢間餐廳唔算話好多人。不過香港地宜家好多餐廳都限時限刻，所以如果同老人家食飯，呢間餐廳應該係少有啱佢地坐嘅。講返食物，因為原本無諗住寫食評，所以無影低menu，唔係好記得餐點嘅名，以下主要以圖帶過。白酒煮蜆，跟機有4塊脆卜卜嘅蒜蓉包，家人表示滿意蟹餅，雖然好足料，但賣相一般，味道滿意唔記得咩腸+蝦薄餅，味道其實幾好，唯獨蝦無咩味，可能試另一個薄餅會開心d德國腸，媽媽喜歡雞肉腸，我大愛芝士腸，雖然豬肉腸都好juicy燒豬手，雖然要等20分鐘，不過係全晚最好食嘅一個菜式外脆內軟，仲要放耐咗都仲係脆皮架！好似係叫大蝦炒薯仔，開頭都有d擔心蝦會好似薄餅嗰個咁無味，但原來又幾入味，唔錯唔錯水牛城雞翼，我個人（食開小小辣/十小辣）覺得辣得嚟係接受到嘅，同埋唔係死辣，有少少甜，同埋雞翼本身都炸到啱啱好，又係外脆內軟嗰種。不過怕辣嘅朋友就唔好㨂了最後係燒春雞，入味得嚟又好嫩，不過略嫌濕咗少少，所以扣咗少少分。至於酒水方面，估唔到星期日都有Happy Hour價，仲要到夜晚9點！但最驚艷到我地嘅係，餐廳侍應用高級餐廳開紅酒嘅方法去照顧我地。詳細我都唔係太識，但睇落有板有眼，由摺餐巾到斟酒，令食客彷如光顧人均過五百，甚至一千嘅高級餐廳。但我地開埋枝酒都只係人均三百幾蚊。咁抵食嘅餐廳，原本諗住私藏。但驚太少人知，佢會做唔住（始終香港租金呀，人工呀都唔平）。希望佢地客似雲來，下次再去開大圍都可以見到「風車」！…查看更多

又一城一齊比我嘅印象都係「嚟嚟去去」得嗰幾間好食/抵食，所以嚟親都覺得無咩選擇。朋友話之前食過間既好味又有卡打嘅餐廳，搵咗一陣，原來間餐廳座落於Salon，因為裝修風格都幾融為一體，所以之前一直都留意唔到LOL一入到嚟，呢一面就係餐廳落單嘅地方。因為唔係太肚餓，諗住食d輕食，點知樣樣都好似幾靚又幾好味咁，結果就精選咗3碟嚟食。純粹好想食炸雞+見到有黑松露薯條就好想叫。炸雞原本以為係普通嘢啦，點知食落有驚喜！點解可以外脆內嫩！係「嫩」炸到啱啱好，同埋唔點醬都有味。不過我重口味，點埋松露醬，味道更上一層樓。而薯條，就用嚟睇間餐廳抵唔抵食。廚師無吝嗇d松露粉同埋薯條係即炸呢一點，足以令我下次再嚟encore！再嚟我叫咗個「龍蝦熱狗」，雖然睇返menu有個靚d嘅名嘅Lobster Roll坦白講，睇唔出點解叫Roll，但名唔係最重要，重要係呢碟嘢睇得又食得！滿滿嘅龍蝦肉，再附上魚子醬鋪滿咗個面….同埋中間！呢個真心推介！最後，仲有個side叫咗個薯蓉。朋友仔話睇menu好似龍蝦抵食d，我地就叫咗個「龍蝦薯蓉」。（餐牌好似有另一個名，但我忘記咗，不過正常應該搵到）個薯蓉係焗出嚟嘅，面到有滿滿嘅芝士同龍蝦粒。近睇是咁的。原本以為龍蝦僅限個面啦，點知食落原來內含龍蝦！但張相影得太唔靚，大家有機會自己去試下。不過以我多年食薯蓉嘅經驗，呢個薯蓉同我平時食開嘅好唔同，唔知點解特別滑，同埋唔似粉開嗰種，似係去歐洲/本地高級餐廳用真薯仔造嘅薯蓉。成件事即刻勁抵食！我地仲叫咗杯茶同咖啡嚟飲。我杯茶算係中上品，而朋友仔杯Cappuccino，朋友大讚個咖啡底有料！下次經開可以再飲，而唔再去隔離d連鎖咖啡店（雖然比連鎖貴少少，但好飲好多咁話）。下次有機會再嚟試埋其他款式先！…查看更多

午餐時間嘅荔枝角，真係間間餐廳都多人，結果我就搵左間工廈入面，前面得一枱客（我排第二）嘅餐廳試下。試之前，喺open rice望望，幾乎都係好評，咁真係要一試！排左一陣（我諗10-15分鐘），有張2人枱，店員逐個問，因為排第一嘅係4人，店員同佢地道歉解釋話4人會等得耐啲，之後我好好彩咁就入咗去。呢個安排既公平又友善，店員服務值得一讚！（相對其他工廈餐廳嘅服務）講返食物先，因為又想試蛋餅，又想試吐司，我就散叫。*註：大家留意係自助落單+先比錢。話說我都幾鍾意食蛋餅，呢間係暫時我食過最好味嘅。層次分明嘅內涵。但如果真係要改善，就係食到尾會覺得有啲咸。不過正常人都係2人起share，係我咁痴線一個人食一份。呢個又係暫時喺食過最好味嘅台式吐司（可能係我孤陋寡聞）餐廳驚我地食到整污糟自己雙手，跟機比埋手套，貼心。可能因為芝士真係太足料，食完發現仲有一部分喺包裝個底部，所以食完個包仲可以食埋厚芝士（芝士愛好者必叫啦！）「肉」應該係指豬扒，個人下次會試雞腿。環境其實都坐得舒服，係食食下坐咗枱講野比較大聲嘅食客，因為樓底唔算高，所以都幾應聲。希望各食客自重。總結：好。…查看更多

話說見到最差嘅評語都只係話上餐慢，咁食物味道應該ok啦，見唔趕時間，就去試下。一入嚟，有個戴眼鏡+高嘅女同事叫我坐門口，心諗入面大把位，點解唔坐得入面，喺我想出聲之前，有個男同事帶咗我去坐入面。叫完餐，大約5分鐘左右，食物就到咗。（可能餐廳管理層有留意comment，改善咗）泰式香茅燒雞扒紅咖哩 配椰香飯呢個真心出色，同埋意外嘅係廚師將香茅包咗喺雞扒入面，件雞扒好入味，但美中不足係雞扒唔夠熱同埋少少「鞋口」（所以我估出餐「慢」的不是廚房，好大機會係樓面人手不足？雖然驟眼看，人數上就唔覺不足嘅，可能係同事忙梗嘅嘢，唔係送餐，而係收碟，催埋單？）講返呢碟食物，紅咖哩夠辣又唔會過辣，椰香飯粒粒分別又有「椰」味，廚師技術真係值得一讚！另外，值得留意嘅係份量，「大食」嘅朋友可能會唔夠飽。然後，去到跟餐小食，就出事了。鹹蛋薯條大約等多5分鐘左右，就見到。期間聽到左右兩邊嘅枱都話等咗好耐，然後嚟到都話唔夠熱，係「暖」嘅。咁我都冇咩期望。嚟到，係熱嘅，有少少驚喜！讚嘅係味道，真係好重鹹蛋味，又要讚一次廚師嘅手勢！但不幸嘅係，薯條似係微波爐/翻炸過，個外皮咬落去一d都唔脆，浪費咗薯條嘅味道。嗰頭食完薯條，問同事拎牙籤，張單就嚟了。首先，嗰陣時我只係坐低咗30分鐘。隔離枱早過我坐低（我嚟嗰陣佢地已經食梗），食完坐喺度傾計都未有單，嗰個戴眼鏡+高嘅女同事就拎咗張單放低，咩都冇講就走咗。我問另一個侍應：我可唔可以飲埋杯飲品先埋單？（嗰時杯飲品係滿嘅，同埋飲品要加$8）男侍應話：可以，驚一陣間埋單人多會等好耐，所以拎定張單過嚟。咁好啦，我繼續飲啦，飲完先比錢。點知同一個戴眼鏡+高嘅女同事又走咗過嚟，睇下我比咗錢未，而冇去叫我隔離枱仲傾梗計嗰2個人埋單….咩事呀？因為佢地「未加」飲品，覺得仲可以做佢地生意？咁我呢？我唔可以再加小食嗎？我嘗試睇下佢叫咩名，但佢地冇名牌。可能係新嚟？但咁樣做係唔係等於趕客？雖然我唔係咩大客，但加埋一都食咗超過$100。跟住佢睇完張單，又行開咗。隔咗無幾耐，有個男侍應終於拎住張單去我隔離枱問佢地「介唔介意埋咗張單？」（我心諗點解做法差咁遠嘅）隔離枱走咗，個男侍應就走嚟望下我張單。（當時我仲有20-30%未飲完）一杯檸檬茶嘅時間，原來咁「長」，要勞煩咁多人走過嚟「服務」我。我忍唔住問：我可唔可以飲埋先比錢？其實宜家係唔係要趕我走呢？男侍應話：唔係，我只係以為入面有錢，我宜家幫你收返張單先。其實，你只要比多一分鐘我，我就飲完比錢，何必要勞動咁多人力資源去「提醒」一個人埋單，而忽略咗其他客人嘅需求呢？一個人食完就走架啦，點解要咁？唔怪得侍應們好似「做唔切」咁。最後，由返嗰個戴眼鏡+高嘅女同事拎返張單過嚟。其實都唔使等，只係幾秒就拎咗過嚟。我了解繁忙時間，都未必想外面嘅客等太耐。如果一開始個女同事直接講：唔好意思，外面都人多等梗，介唔介意埋咗張單先？我會欣然接受。但係佢就咁放低張單再走咗去，我真心覺得很不爽，同埋有「比人趕走」嘅感覺。如果管理人員真係有留意comment，希望可以善用資源。另外，溫馨提示嗰位同事，如果咁唔鍾意「對客」，可以尋找返更合適嘅工作。希望有緣再臨，或者其他客人，唔會再遇到我上述嘅經歷。謝謝。…查看更多

原本諗住收爐食好d，見到有爆丼屋就衝左入去，見到無人，心諗可能因為仲早呢，不過由12點坐到12點半，都只係得70-80%左右，如果想容易搵位，爆丼屋都係一個選擇。樓底都幾高，相信人多坐滿都未必會好嘈嘅。可惜想食嘅極上拖羅盛丼售罄結果試下個牛丼，驚大份食唔晒，叫咗個230g。等咗一陣，個丼嚟了，賣相都幾好，都幾「爆」，於是我帶住滿滿嘅期待去食。結果…（以下圖片略為不美觀，敬請原諒）白飯成份極高…可能因為d牛真係鋪滿咗個丼，所以d汁流唔到落去，結果d飯又dry又硬強烈建議大家如果order記得要牛汁另上同埋細食嘅朋友記得叫少飯…查看更多

下午2點先lunch，但驚見隔離一虎都仲要排隊，然後附近又有間門面幾日系嘅餐廳，未望Open Rice，就入左去，跟住見到好多負評，我就知道無期望就無失望。唔緊要，都有正評嘅，比個機會佢，以觀望嘅態度。日式三餸飯，店舖裝修以簡潔為主，座位唔算好多，但因為已經過咗繁忙時間，所以都尚算舒服。點完餐，店員好快就端上一杯跟餐嘅熱八寶茶。八寶茶我問店員八寶茶即係咩野，佢答我有龍眼、杞子etc，不過店員送嚟嘅時候已隔渣，我已經分唔到有邊八寶了…跟住都好快，正餐就嚟了。不過一大一小嘅匙羹，究竟點解有2隻，店員冇講就行開咗了。根據我食嘅次序做食評：首先係微塵南瓜凍湯。真心，應該唔會個個鍾意，我都係貪得意加$12試下。係酸忌廉+南瓜濃湯雪凍咗咁。然後我去試最初吸引我入餐廳嘅馬鈴薯燉牛肉。雖然薯仔好入味，但牛肉似吉x家再鞋口少少啖味少少…嗱～唔係話佢唔好食呀，送飯都還可以，只係CP值低咗少少。跟住係核桃味噌煮大根。記得要先食核桃味噌，唔係大根會冇味。不過我欣賞大根夠腍，而且冇渣。最後係南瓜薯餅。呢個真心欣賞，因為應該係手工製作。但喜歡濃味野嘅人就未必太啱，因為同出面買到嘅南瓜薯餅唔同，呢個味道好天然！…查看更多

首先，戴返頭盔先，以下純粹個人今次嘅體驗。本人深明小店唔係咁易做，所以奉勸各位：如果一個人去，就最好㨂非繁忙時間，否則，唔知要等幾耐位呢？話說我都盡量㨂大部分人都食完lunch嘅下午1點半到訪架喇，不過啱啱好我後面有2張2人枱，門口位同事就話要比2人枱入咗先，叫我等10分鐘，等大枱走….眼見剩低2張2人枱都坐滿，咁我無奈去行個圈睇下有咩其他嘢食。行行下聽到好大聲嘅傾計聲，原來咁啱有張4人枱走，後面又無人排隊，就去碰下運氣，睇下比唔比我入去。然後終於入到1個人坐4人枱。唔知之後如果仲有人嚟會點安排呢？環境其實幾舒服嘅，有少少音樂，但可能因為樓底唔高，人多嘅時候都幾嘈。樓面得一位負責接待、送餐、收錢嘅員工，所以嚟食仲要有耐性。講返食物先，始終未食正餐，所以叫左個定食先。我叫左個主食（跟飯+湯）：名古屋炸豬扒坦白講，因為Open Rice未有圖，我一開始唔知道原來豬扒有跟醬，直到我見到隔離枱有….後加嘅醬～不過個豬扒係幾好食，唔會太硬，食到肉汁。係一開始冇醬會dry咗少少。配菜同小食我㨂左蟹膏同雞翼。呢個真心普通，但因為跟餐個飯偏硬身，用嚟送飯就啱啱好。同埋跟餐只需要加$8，都抵食嘅～估唔到填咗「少飯」都仲有咁多芝麻雞翼就超好味，好少食到可以鎖住肉汁得嚟，個外皮係脆嘅炸雞翼。仲要跟餐只係加$6有一隻，性價比之選！最後餐湯（跟餐免費）同餐飲（加$23）就不過不失。食完已經差唔多2點半，見到1位成功有2人枱座，所以話1個人想嚟食，請㨂非繁忙時間食完都有個迷思：點解繁忙時間唔招待1位呢？1位相對食得快，翻枱率高，大家都係排隊嘅情況下，一般都係1位入咗先，難道呢度有獨特嘅入座安排？唔係好明，不過啲食物係好味先咁串，食客請自求多福…查看更多

其實真係好少入元朗，但每次入元朗都會有意外驚喜，令封筆多時嘅我又寫返食評這是一間毗鄰元朗廣場，其貌不揚，卻富有「香港味道」嘅冰室/茶記。同現今時尚的裝潢不同，大寶冰室保留住舊日香港隨處可見的冰室特色。店內的大電視，陪隨住傳統香港大排檔常見的餐桌和椅子。比起近年常見裝修華麗、氣派、有主題嘅茶餐廳，呢度嘅特色，就係自然、真實嘅舊香港味道，而且食物嘅價錢好貼地。餐牌林林總總都係茶餐廳常見嘅餐點，掙扎咗好耐食咩好，就參考咗Open Rice暫時可見唯一嘅照片，榮獲4星嘅茄子雞扒飯。剛上桌嘅茄子係外層有少少香口，食落去居然唔會乾雞扒不過不失，但我大愛個醬汁，令到平平無奇嘅雞扒同埋本身冇咩味嘅茄子味道昇華。可以encore之選！唔怪之得入得餐廳食嘢嘅客人，幾乎都係熟客仔啦～可能呢個就係傳統香港冰室嘅魅力～話說餐廳叫蕃茄湯專門店，下次過嚟要試下蕃茄湯料理先！P.S.我估係疫情期間，冰室只係營業到下午4點，所以想試嘅朋友，記得早少少去～…查看更多

雖然唔近地鐵站，但跟住地圖行，都好易搵到。雖然係小店，但計埋戶外嘅座位，座位數量尚算足夠，唔使等位就可以坐低。好似平時d coffee shop咁，叫野食要去cashier直接order。但唔同嘅係，侍應會送餐，可以坐定定等食/飲。我坐室內，室內唔算太大，有3張枱，同埋counter。餐廳仲貼左唔少相信係店主去旅行影嘅雪地相。我order左櫻花咖啡（其實係Rose Latte），拉花好靚，果然係signature。另外，因為有d肚餓，叫左個雞肉牛油果薄餅（可以自由選擇配菜），都好好味。食完之後，有位侍應（我懷疑係店主），一位好親切嘅伯伯，話我知，原來仲有另一款拉花，下次再嚟打卡先。…查看更多

是日午餐，見到Open Rice的評分尚算不錯，亦都好耐冇食印度菜，就去試下。一坐低就比左以下嘅Menu我地。但老公留意到樓下d人係有埋Lunch Menu，我地就開口問侍應拎（原來要chok出嚟）。溫馨提示：星期六都有lunch set，其實都幾抵食，但要記得問～我地叫左一個6號餐、一個8號餐share。未嚟主菜之前，有前菜。好少食印度菜嘅我都唔知呢味叫咩名，不過幾脆。紅色個配菜都幾辣。（個人唔係好食得辣）主菜到，大大力推「蒜香烤餅」，啱啱嚟到熱熱地真係香口又好味。飲品我地加錢要左杯芒果乳酸飲品，估唔到唔係咖啡都有拉花。除此之外，我地仲叫左碟類似咖哩角嘅小食，味道不過不失。（老公稍嫌層皮厚左d）雖然間野喺小街，不過都幾易認。門外有壁畫可供打卡。…查看更多

夏日炎炎，胃口一般，荃灣廣場又勁多人，所以過左對面試新野。門口見到有假日set lunch之餘又唔太貴，所以就入左嚟（冇睇Open Rice嘅情況之下）。店面唔大，一入門口右邊有個吧枱，然後就係座位，位置並不多。但因為有高樓底，上到閣樓，有多20個位。為左方便樓上客人叫waiter，有個門鐘可以「呼叫」。樓上雅座是日午餐未食之前有杯橙汁開下胃（意外驚喜）炭烤安格斯牛扒蜜糖芥茉脆法包配薯角啖啖肉個蜜糖芥茉醬都好matchWaiter都好有禮貌，又問下我地覺得點...美中不足係食材一般，牛唔係太有牛味，咁一分錢一分貨，所以都理解。但係，烹調技巧搭救，口感味道加晒分～連埋加一，人均$100有找，真心物超所值。…查看更多

其實只係諗住買個早餐，諗住前面果個人買完就到我，點知門口個阿姐唔做我生意，直接幫排我後面嘅人...無奈至極，就算做完果個人生意都唔幫我落單...令我深深體會到咩叫「㨂客做」。入嚟諗住寫食評先發現原來都有人遇上類似嘅經歷。但可能因為開得耐，港島東嚟講價錢算平，但係有必要做到咁「串」嗎？希望大家唔好剩係睇到d正評。如果經營者見到此留言，希望可以留意一下，甚至乎聘請生面口嘅人做「神秘顧客」，就會理解點解唔少人會對貴店嘅店員態度有意見。謝謝。當然唔介意體驗一下嘅話，都可以照去食。…查看更多