janetcat的个人专页

睇返D舊相，先記得上個月食左間好野，要記錄一下。辣炒豬肉 $268記得響韓國食過呢個辣炒豬肉，原來香港都食得到！ 以韓辣醬醃過的爽脆豬肉片，加入大豆芽、韮菜同洋蔥等配料，真係愈炒愈惹味！豬肉好爽口，是韓式的甜辣醬，香多過辣，怕辣的朋友都可以試試。盤邊有菠蘿配菜，好清甜！在滿天星的裝飾下食飯，真係特別有氣氛架！粟米芝士煮到半溶就食得，邪惡的拉絲呀！海鮮煎餅 $118煎餅餅底脆脆地又軟綿綿的，口感一流。配料份量足，有魷魚、蝦仁、韮菜、辣椒絲等。煎餅點吓旁邊的特制醬油，更滋味，記得襯熱食呀！原味米酒 $105初試韓國米酒，甜甜地米味濃又好滑，酒精味唔算太嗆。不過真係好太碗，兩個人飲唔曬，三至四人分享都夠。…查看更多

最近試左間西餐，無論食物質素和環境都唔錯，值得推介。主菜類的價位平均二百幾，任何一款加$50可以變成 set （餐湯 +飽 + 茶啡 + 甜品）。鍾意佢夠 flexible, 唔使成日限定 dinner set A, B 餐咁單調。套餐包括蕃茄濃湯同芝士蒜蓉包小小一片包包勁芝士，簡直大愛，蒜味唔太濃，口感係軟淋淋果種，好好味。蕃茄濃湯真係好夠濃，明顯足料打出來，味道酸酸地，幾開胃。櫻桃木輕煙熏生阿根廷粉紅蝦咯嗲- 餐廳的 signature dish, 見 menu 張相都好吸引，忍唔住叫左，果然冇令人失望。上枱時有個玻璃蓋住，內裡煙霧瀰漫，隱約聞到少少木香，成件事充滿了仙氣。開蓋之後飄出了一陣陣輕煙，然後就見到靚靚咯嗲了。有兩隻大份的原隻刺身蝦，結實鮮甜，仲有類似食生蠔用的茄汁調味，一人一隻都幾滿足。鋪底圍邊的亦是刺身蝦肉，配上少少黑橄欖，另一番風味。有食得既鮮蝦 cocktail,又豈能冇杯飲得的呢？呢個時候，飮 Margarita 最夾。清爽的口感，加上咸酸苦的味道，凍凍地幾醒神。清一清味蕾，再歎隻大蝦刺身，感覺超正。法式紅酒燴和牛臉 - 和牛臉用紅酒汁來燴，煮到好淋好入味。食到好香牛油味，有少少似牛舌的味道。唔會似牛扒咁韌，好容易食，最啱D喜愛淋滑牛肉的人士。伴碟有很多蔬菜，例如車厘茄、蘆筍、小红皮蘿蔔、黑松露薯蓉，全部高級野，亦真係好好食。套餐甜品- 芝士蛋糕，口感好軟好滑，有豆腐的感覺。而且伴碟的 declaration 亦係好有誠意，套餐甜品來講真的攞滿分。濃香熱奶茶用來送甜品真心 perfect match! 窗邊的卡位，氣氛都唔錯架。餐廳有 live band, happy hour 又有買二送一，下次放工再來飲返兩杯。成餐飯由頭至尾都好有水準，抵讚。…查看更多

又係單拖的日子，對自己好D，食碗貴野。天文台道的斜路上，以前好似係間酒吧，而家變左拉麵店。牛骨超濃厚秘伝醬油，聽到已經夠吸引。佢仲有個好勁既名，叫 「極牛拉麵」，等我試下有幾牛先！一張 order 紙上選擇多多，由湯底的濃度、麵的硬度、配料如紅椒絲、葱粒、洋蔥、荀、紫菜同芽菜等等全部都可以選擇份量。除左牛之外，全部配料 double up ，不另收費，當然咪蝕底。牛骨湯底夠濃醇，火炙和牛又夠淋滑夠滋味。牛肉味好香，食得出係真·和牛。不過數量只有5小片，略為唔夠，唯有少食多滋味。溏心蛋係另一個亮點，豐盈又滿足。有炸蒜片可以吊下味，同極牛湯底都幾夾。餐廳裝修得幾舒服，non peak hour 人唔算多，可以慢慢歎慢慢食，都唔錯。…查看更多

朋友指引下，去左間隱密的泰菜餐廳。抵食多選擇味道又夠正宗，個人覺得值得推介。辣椒膏炒青口 $78甜辣濃郁的辣椒膏，加入左青椒、洋蔥、九層塔同青蔥，炒起上來好好味。薄餅 $28薄餅唔一定要配咖哩，用來點辣椒膏汁一樣掂。馬拉盞炒椰菜苗 $59馬拉盞好惹味，又香口，椰菜苗夠鮮嫰，可能呢個季節好啱食，正！菠蘿海鮮炒飯$72有別於一般菠蘿炒飯用上的半殼菠蘿，佢係成條切左粒粒的菠蘿上的。鮮甜之餘，仲食得好方便。炒飯大大個，炒得夠乾身。足料海鮮饀，有魷魚、蝦同青口肉等等，真係幾 good ! 泰式燒烏頭 $118好大條，表面舖滿鹽霜，仲用左香茅、薑葱、蒜等釀入魚腮位，增加香味。燒到脆卜卜的魚皮之下係嫰滑的魚肉，大大啖厚肉得來又唔會嚡口，幾 good 的。泰魚辣汁，冇限潻加，正呀！龍眼冰 $25龍眼冰的茶底好香，有淡淡的香葉味 （班蘭？）在香港實熟少有的，應該係正宗泰式做法。西瓜沙冰 $28上枱比較慢，加上已經溶溶地，可能係放左一陣先出來，少少失望。影相冇咁靚，但無損味道的。夠大杯，飲極都有夠過癮。…查看更多

年前食過，今天再臨為的係佢嘅小籠包同高力豆沙。鮮肉小籠包 $36佢做的小籠包皮，真係可以算是皮薄饀靚。皮好有彈性，內𥚃雖然多汁但唔會容易穿。水準仍然 keep 到，實屬難得。三十六蚊有4隻，抵食的，大推。涼伴雞絲粉皮 $42小食來講真係算勁大碟，粉皮好正有彈性，滑嘟嘟又夠 Q ，第一次食到呢種口感。麻醬夠多又好香好濃，不過就蓋過了雞絲味道。糖醋魚塊 $75大大塊的糖醋魚塊，酸酸甜甜幾開胃。魚塊炸過表層都幾鬆化，冇雪味冇腥味。俗氣擔擔麵$45花生醬很濃的擔擔麵，香而不辣。超大碗，兩個人 share 都食唔曬。麵底幾靚，幼細而有彈性。不過最好叫餐廳幫忙剪麵，我地忘記了，太長有D難夾。奶油津白 $55又係大碟夾抵食之選，感覺有少少似西式的白汁焗菜，好香奶油味。每條津白都 carry 左好多汁，好味呀！雪山高力豆沙 $38另一主角，為佢而來，果然不負眾望。外層佈滿雪山糖霜粉，棉花糖般的高力豆沙皮真係做得特別好味。豆沙饀其實唔會太多，亦唔係甜，好啱我。價錢平，新鮮即做又熱辣辣，亦係必食項目。沒有加一，食到好飽二人埋單都唔使三百，高 CP 呀！…查看更多

美麗華買完野，去basement hea 住食，呢間裝修不錯，感覺好 relax 。有我最愛的 all day breakfast ， 當然係首選。三文魚 toast ，大大片三文魚，吐司夠脆，幾精緻架。煙肉有煎過，感覺 over 左少少，太乾了。薯仔好香薯蛋味，真心正！有杯野，原來係 yogurt and cereal，鬼佬早餐的鐵膽。青檸梳打，用上了蜜糖調味，感覺健康又好味。咖啡芝士餅係 tiramisu ，再加餅乾條。芝士餅好 creamy，非常濃的咖啡味，仲有少少酒，真的幾好味，好飽好滿足。埋單二百幾，略有少貴。環境同服務都一流，而且格調高雅的cafe ，仲要無限時任坐，香港屬少有，辛苦得來自在食麻。…查看更多

呢間店子小小，但經常都幾多人幫襯，之前有食過，水準不俗，可以寫吓。黃金時段，真係坐到門口的。好彩已經入秋，室外食川菜亦唔會太熱。門口掛有大菜牌，標明了午市套餐的價錢，五十左右包飲品，都幾實惠。乾扁四季豆 $65一般的乾扁四季豆會帶有肉碎，而且十分油膩，食頭幾啖 ok, 底層就怕怕。呢間只用上梅菜和四季豆，沒有肉粒的，亦唔油，從頭到尾都食到好乾爽。梅菜炒乾了，咸咸甜甜好香好惹味。四季豆條條新鮮清脆又爽口，係我食過最正的乾扁四季豆。樟茶鴨 （例）$58好香的熏鴨味，乾身冇乜汁，但鴨卻完全入味。鴨比較瘦，幾乎沒有肥膏油脂。唔太清楚點煮，但食到佢有啖啖花椒八角等的滷水味，用來送酒應該相當不錯。干鍋田雞 $98有個火 hit 住的干鍋，份外熱辣。多辣椒，多麻子，多洋蔥，十分惹味。唯一係D田雞切得太碎，索左多汁，好辣，亦食到有點累。不過味道實在是不錯的，久違了的好川味。凍檸樂 $19夠大杯又多冰，係食辣野的好伴侶。店子雖小，枱櫈已經全舖滿，但餐廳亦唔會為左做多轉生意而要求客人坐迫D。一般細 size 的四人枱，兩位坐左之後亦沒有被要求搭枱，呢點相當抵讚，所以實際坐位還算是寛敞的。…查看更多

放工後趕上堂，要食餐快的，去左呢間車仔麵。之前都有食過，今日終於記得影相，可以介紹一下。位置方便，佐敦站附近。一坐低就 tick 得，已經有曬心水選擇。面底十五蚊，普通餸九蚊，高級野十三，必加小食八蚊。話咁快就有得食。我叫左墨丸、豬膶、豬皮、魷魚麵小辣。知道份量超多，不過又樣樣都想食，冇計啦，有錢就是任性的。墨丸有兩粒，唔算好重墨魚味，但勝在夠彈牙，唔會太多粉。豬皮份量足夠大片，索曬D湯，正！豬膶是緊緊熟的，新鮮好味，豬膶控必吃。魷魚亦係我至愛，咖哩味，好入味，又多又爽口。叫得太多餸，反而D麵食唔曬，浪費了，下次記得要小麵。小食叫左酸辣木耳，都幾大碟，酸酸辣辣好開胃，都係八蚊之麻。餐飲熱飲免費，特飲或罐裝加六蚊。飲品叫左珍珠紅茶，D紅茶好得好香濃，可能係錫蘭紅茶，唔會澀。而且加左少少糖，夠熱幾好飲。珍珠有咬口，唔會淋。好欣賞呢杯野…查看更多

早餐來呢間，門面裝修不錯。舖位不大不少，十張枱左右。半場已 full ，另半場係冇執枱，有客入先會清理，人手不足。望返D靚野，後面牆係個黑板，即係好細個時上堂用果D ，手繪都幾有趣。餐牌選擇都算多既，揀左 B5 ，煎太陽雙蛋，配火腿鮮蕃茄湯螺絲粉。 睇真D原來通粉 or 螺絲粉只得蕃茄味，唔鐘意蕃茄的人便冇得揀了。太陽煎雙蛋，都幾精神，比一般食開的蛋細隻。火腿正常。蕃茄湯螺絲粉，很大碗，蕃茄味唔會太濃，都 ok。但敗筆在配菜粟米粒，好乾好硬冇汁，偏偏數量又奇多，啖啖都會食到佢。嚴重影響口感，要揀返佢出來又有D煩。加左 $3 歎即磨咖啡，有糖有奶自己添加，幾好飲。埋單 $40 有找 ， so far ok 啦。…查看更多

食潮州野，沙田有呢間。開左好多年，不少人都會誇區來食。早餐午餐茶餐通通不推薦，唯獨晚市食返潮州野就真不錯，有理由懷疑不是同一廚師出品。夜晚多人食，好有大排擋 feel 。牌餐有呢D：打冷唔想食滷水，所以叫左條鹽焗烏頭 $128。都算大條，肉質唔鞋唔滑叫及格，但黃油唔算多，唔夠香囉。魚肚部份有檸檬，加添香氣；而且魚肉點上豆醬，真係非常美味。另外叫左小炒皇 $88， 配料超多，有韮菜、腰果、魷魚、蝦干、魚干同菜𦡮⋯⋯又香口又惹味，熱辣辣又好大碟，送粥簡直不得了 👍再整多碟蝦醬炒通菜$55，大碟又惹味，火候控制幾好，唔會 over cook 。潮洲白粥 $9 一碗，滿到傾 😆環境一般，坐位逼夾，沒有加一，價錢算親民。…查看更多

假日下午茶，來左呢間。雖然位於繁忙嘅沙田，但係遠離新城市食飯兵家必爭之地，都要排隊，但係快好多囉⋯⋯環境幾好，大部分都係卡位，尤其下午茶時段，都幾休閒架。提供的綠茶幾好味，好過果D綠茶粉。由於無食午餐，所以下午茶都叫得幾豐富。鹽燒三文魚頭鮫 （$45）明顯唔係即燒，食得出係翻熱的，一般啦。而且比較細份，唔多抵食。牛肉稻庭湯烏冬 （$72）牛肉偏韌，肥膏邊好難先咬得斷。但烏冬都算滑漏既，但呢個質素，貴貴地。特選海鰻壽司盛 （$128）第一次食呢個 set , 128 十件算係咁。味道呢⋯⋯好難判斷。因為上菜的次序好錯，食完個燒魚頭，再隊半個牛烏冬，都已經飽左大半。最後先出壽司，好唔好味都食唔出了 🤷‍♂️🤷‍♀️希望可以注意吓啦⋯⋯…查看更多

機場禁區開咗一間平民食肆，理應十分感動。由於價錢平，仲有燒賣和蛋撻食，排長龍都係值得嘅。B餐有燒賣10粒加一杯熱飲，都係$30，機場禁區內來講已經算係最平。全部蛋撻標榜係90分鐘內出爐，加上只係$10 一個，冇得唔食啦。眼見都幾多人買上飛機，半打半打咁買。仲有其他產品芝士撻、黃金蛋撻（即係鹹蛋蛋撻）、同埋鮑魚叉燒批（堅係有成隻鮑魚仔）喎，選擇之多，同價錢之平（機場）簡直無懈可擊原來仲有鳳凰卷，可惜唔見有人買喎⋯⋯最後我叫咗一份燒賣餐，另加一個蛋撻，都係$40。可惜無論燒賣同埋蛋撻都係凍嘅😩，好失望，咁大個人第一次食凍嘅燒賣同埋凍嘅蛋撻，完全唔好味。好懷疑佢嘅暖櫃功能，都唔熱嘅！標榜90分鐘內出爐又有乜意思呢？希望可以改善下。最後，奶茶OK！…查看更多

第一次食牛涮鍋，有以下心得 ：1. HSBC 套餐，澳洲和牛海鮮只是得一客，之後追加的只能是牛小排或以下級數，因為有大有細，但佢大小同價$263唔抵食噃。於是叫牛小排算了， 大人 $268， 小童 $168 。 2. 牛小排都算幾好味，有牛味，又夠腍，唔算太薄，encore 左幾碟。3. 豬肉唔好味，鞋鞋地，叫左一碟由頭放到尾都冇乜人吼。另外，明明 order 叫左要走雞，點知都仍然有雞，好混亂。☹️4.有 pad 可以 request 加湯，但襟左好多次都冇人幫手。最後要自己動手 ☹️5.主題似親子餐廳，但全部的汽水機、雪糕機、topping corner 都 set 得太高，跟本唔啱小朋友。而且如果用ice cream cone 落topping, 由於冇碟墊住，d 粒粒係會彈到成個吧枱甚至地下都係。難為D清潔人員，bad design 。6.注意！ 如果你是單數食客 （3 /5/7 位）原來係需要搭枱的。佢會拿開中間塊板，咁就可以變大枱拼左兩張單數枱，完全的搭枱 feel 。7. 另外，女員工突然間要客人地讓開一個位時都幾冇禮貌，會話客人唔可以「霸」左個吉位。鬼知呢間會玩搭枱咩？！冇話唔俾返個位你，但有禮貌少少得唔得？8.然後，送食物的員工跟本唔知大家在搭枱，所以將兩枱的食物都送曬去其中一邊，而大家選的套餐都唔同，好混亂。9.食物碟設計問題，不能疊起；枱的位置又太逼，放兩肉兩菜其實都幾逼。而逐碟叫的話上菜時間又慢。10.有個羅宋湯湯底，外面少有幾得意，涮牛味道很夾，值得一試。11.清曬枱面食物送一張 green card, 一個月內的晚市可以平 $10， 午市平 $5，好冇誠意。總結： 設計唔得，服務唔掂又唔係特別平，應該唔會再食了，寧願試其他店。…查看更多

約左老友吃飯，佢揀左呢間位於油麻地的，因為大家去都方便就腳。是一貫中式小菜餐廳的格局，雖未至於古色古香，但也充滿濃濃的香港風情。叫了四人餐，包一條蒸魚，粟米魚肚羹，燒味雙拼同兩款小菜，都幾豐富。見隔離枱D乳鴿好似好正，又叫左兩隻。嘩！洗淨雙手即刻用手食，好辣手 +香噴噴。不是妙䶖的 (bb 鴿），所以多肉食。但肉唔夠嫰滑，不過皮脆同香，大家都食得好滋味。粟米魚肚湯 ，多料但味道偏淡，全枱人都爭住要落胡椒粉。燒味雙拼是叉油雞，叉肥雞瘦，味道可以。美極海生蝦，大約三份之一的蝦唔算新鮮，但用美極煎香了，感覺良好左D。蒸沙巴仔，都蒸得幾靚，夠滑夠大條，很滿意。金銀旦菜芯，唔老，味道不錯，用料足。附送的糖水，水多料少，唔夠 「溶」，而且偏甜。埋單七百幾，足夠五位食，都幾抵。…查看更多

新城市食飯唔想排隊等位，呢間係唯一選擇。雖然沒有期望，但仍然會失望的。四色芝士 pizza （$78）係油浸的薄批，用紙巾吸乾啲油，其實味道都ok 。附上蜜糖汁可以點，但感覺怪怪地所以冇用。西班牙海鮮飯（$98）大碟，外表正常，但聞到有強烈腥臭味，唔知青口定蜆係害群之馬，一併隔離......最後主要係食蝦、魷魚同埋少少飯，因為有點反胃。午餐有沙律，一般啦⋯⋯食物好一般😑，如果好味，價錢唔算貴。服務沒有，員工一般黑面，扮忙 （其實唔多客）同選擇性睇唔到野。唯獨環境可取，冇乜人，唔使等位可以直入👍…查看更多