Chrischan123456的个人专页

幾年前嚟食過呢間麵店，水準還可以，又未至於好好(唔明當年點解俾笑臉)，朋友話我知好似個伙記頂咗嚟做，麵店裡翻新咗之餘，仲話食物好食咗好多，於是就再嚟食一次，睇下係咪真係咁多食。我都幾鍾意食麵同好滑嘅河粉，印象中呢度嘅麵有鹼水味，所以點了肥腩撈河，$36，先食一件肥腩，3分肥膏、7分牛腩肉，牛腩肉不會鞋口，幼身河粉，本身已經有腩汁，再加埋蠔油一齊食....河粉就普通滑溜，但已經好過好多地方了，可以再來一次。…查看更多

其實之前嚐囍未攞米芝蓮推介時嘅夜晚已經好多人幫襯，但未至於要等好耐位，又試過業主要收回而最後又繼續續約；之前係得煲仔飯同小菜食，又唔知幾時轉咗做24小時之餘仲要有點心食，下午4點至6點應該落場時間。朋友住附近，凌晨2點由佢帶我去呢度食宵夜，見到八成滿，好彩仲有細枱，我哋兩個都唔飲熱茶，同侍應講唔駛斟茶，茶錢照計，而佢係會收起隻啲茶杯，而且無收到茶錢，仲可以響便利店買凍飲。叫了鮮蝦菜苗餃，$21、臘味糯米飽，$19、豉味蒸排骨，$21，唔知係咪因為太多客，所以等咗成30分鐘左右，不過傾下計好快就過。鮮蝦菜苗餃，皮薄餡靚，蝦肉彈牙。臘味糯米飽，已經唔係好多地方有呢款舊式點心食了，好有兒時感覺，一咬落去，熱辣辣，糯米飯夠煙韌，臘肉臘腸夠香口。豉味蒸排骨，肥瘦適中，水準之上，另外芋頭有炸過才蒸，吸哂啲味，正。凌晨響西環食到呢啲質素點心，唔飲熱茶仲可以唔計茶錢(我強調要照收的)，都係$59，真心宵夜推介。…查看更多

我本身都好鍾意食焗豬扒飯，以幾間有名連鎖快餐店而言，以前「大家X」的豬扒飯是我認為比較好食的，但最近聽朋友講美心MX的焗豬扒飯好食咗好多，所以想去試試其豬扒飯的水準，經過馬鞍山新港城廣場美心MX，原來呢間美心MX已經改為叫「MX」，雖然無咗美心，但應該仲係美心集團的。先去收銀處向店員落單叫一客焗豬扒飯，$40，加一杯七喜，加$6，共俾$46後攞飛，去揾位等叫號碼，呢間MX有自助凍/熱水機，唔駛下下去店員攞水，幾方便。等咗幾分鐘就有得攞，將餐盤攞去我已放低袋嘅枱，未開始食前，先將焗豬扒飯上的一塊豬扒、番茄、菠蘿、茄汁及炒飯放到另一隻碟上，並將豬扒切件，才開始進食，豬扒都叫有咬口、番茄外皮焗到乾身而裏面仍留住水份、芝士焗到夠香口、茄汁沒有過酸、不過靑豆少少乾、炒飯底算夠乾身，真的比起「大家X」同「大快X」好食咗。…查看更多

去完浸會醫院探病，揾地方醫肚，行過對面商場見到金記冰室招牌，究竟依家開咗幾多間金記？不過眼見好多人響門口等，原來仲要攞飛等位，好彩一個人好快有位，但係要同人搭枱，係一張4人卡位再加一張枱，其實可以坐6人，對面坐了三位，反而我一個人坐另一邊三人位。叫咗佢哋嘅精選小菜晚餐，D5：豆腐斑腩煲，$88，奉送白飯、例湯，跟檀島咖啡或香滑奶茶，凍飲+$3，紅豆冰加$13，我叫了中湯，凍檸茶。豆腐斑腩煲，上枱時一開蓋仲吱吱聲，冒起白煙，紅燒豆腐，一咬開裏面仍然熱辣辣，但又好滑身，斑腩外皮脆漿不會過厚，魚肉仍算嫩滑，又沒有過多汁，幾好；中湯應該係老黃瓜湯，都算係咁上下。凍檸茶，夠凍夠甜。…查看更多

忘記了有幾多年無再來了，由十幾二十年前街邊小販檔到入鋪，之後再搬到依家呢個鋪位都已經4年了。一入到門口，人客不多，阿姐好快直接問：大碗、細碗、多渣、少渣？我通常會叫細碗多渣，$23，5條芝士腸，$5，不夠一分鐘就到，未起筷前就是要加辣椒油，呢度辣椒油自家做的，好夠香但都幾辣，仲可以買走的，油渣麵的麵沒有太淋，不過油渣過瘦過乾，冬菇算入味，好彩辣椒油救返碗麵。芝士腸微暖的，已經煎到爆開哂，甜甜地、脆脆地，不過不失。…查看更多

雙十節，因為有突發事，所以要去西環一趟宵夜開會，可可店又太嘈，唯有去新開的金記冰室，可能新開，開頭得我哋一枱客，之後有多三、四枱，西環店裝修跟其他店差不多，可以叫無特別，所以話設計裝修一定要揾有信譽同做實事的，否則......大家都好準時，原來......原來得我一個肚餓......大家只叫嘢飲，我就叫了一份西多士，西多是炸的，外面放上一大舊牛油，由我操刀，分開九件，才放上蜜糖，西多裏面有花生醬，味道不錯，大家又話唔食，但.........最後因為只有我食嘢而要我埋單....公理何在？…查看更多

一早六點到太子辦點事，仍未食早餐，西記粥店是其中之一個選擇，其實很久沒有來過，叫了早餐/茶餐，$26，牛肉豬紅粥配炸両。牛肉豬紅粥，牛肉已沒有從前的像小粒牛肉球，綿綿易咬口的，現在也是易咬口，不過是全部碎在粥內；豬紅尚算合格，不過也是一咬就散；粥底夠綿，不過相信有味精，因為食完好口渴。炸両，油炸鬼是一早炸定，因為是凍的，但才剛開門，難道是昨晚的，連包住的腸粉都是凍的，狂加芝麻醬才能食完。…查看更多

因為夜晚要送朋友去機場，未夠鐘去屯門接朋友但又好肚餓，所以同另一朋友去了三聖邨搵地方食晚飯，去到已經夜晚9點，海鮮街已全部關門，咁唯有求其搵一間餐廳去醫肚，見到有間叫「泰海鮮」門口仲有人等緊位，原來等大枱，細枱只等一張，我諗頭輪晚市差不多完，所以好快就有位。無買海鮮加工，唯有叫餸食，朋友是食肉獸，兩個人叫了招牌炸子雞半隻，$150及一碟生炒骨，$88。侍應話我哋好好彩，平時炸子雞好快賣哂，通常都要預留，因為有枱熟客點咗好多食物而最後只要半隻炸子雞，所以先有半隻俾我哋......心諗真定假呀，要食過先知，一夾起塊雞皮去食，雞皮夠薄夠香脆，雞肉又幾嫩滑，皮肉之間不會過肥，整體隻雞有88分，真的唔錯。生炒骨，酸酸甜甜，越食越開胃，排骨炸得算香口，而且肥瘦適中，我哋兩人加埋食咗5碗白飯。…查看更多

星期六都要做，去數碼港嘅貝沙灣交收完，但又要等另一單交收，唯有行去數碼港醫肚，咁去平時食開嘅餐廳，照直入揾位坐，坐低後侍應放下餐牌先發現餐廳轉咗名，轉咗做金記客棧，咁咪即係有幾間金記冰室嘅金記？呢度餐牌仲叫美味秘笈，但其他裝修好似無變，原來做室內設計師咁好揾，呃下呃下又一單。其實最後都無睇過餐牌，我見隔離枱食緊薯條，我又想食，咁叫咗雞翼薯條，紅豆冰，最後想睇餐牌幾錢，原來餐牌無雞翼薯條，張單打$34，紅豆冰就$22。雞翼薯條，雞翼是用瑞士汁鹵完才炸的，所以味道與普通炸雞翼更入味香口，薯條又夠脆口，幾好食。紅豆冰，紅豆雖然夠淋，仍好咬口，椰奶沒有太甜，夠冰凍。…查看更多

去完炮台山交收後又一人晚餐，記得之前此店是瑞士咖啡室，現已轉了蔡瀾的「粗菜館」，見到一菜式，惠州梅菜扣肉，$82，寫住保證隔夜，見好似好多人叫，又試下，再叫多一客豬油撈飯(一碗)，$20。惠州梅菜扣肉，梅菜真的夠入味，夠哂咸，扣肉夠淋身，肥膏位置入口即融化，食落感覺真的不錯，應該真係隔夜先做到此效果。豬油撈飯，先將豬油及醬油加入熱辣辣白飯中，再用湯匙攪勻，雖然豬油可以再香口，不過已經好香好入味，再加上扣肉一齊食，都幾...下餐食清啲。…查看更多

原來連銅鑼灣都開了金記冰室，在試業中，啲圖畫劃得不錯，啲裝修設計就普普通通，其實只要食物水準好，其他都不重要，叫了一份火腿奄列($23)，滑蛋可以再炒滑身啲，不過炒得算剛熟，沒有過火，奄列內仍有蛋汁，火腿絲不過不失，希望繼續加油。…查看更多

旺角附近做完嘢，上次晚餐時見梨滿園隔離枱個紅燜牛肋骨好似好好味，所以上去試下，即刻叫咗紅燜牛肋骨，跟前菜、白飯同飲品。牛肋骨燜得夠入味，不會過韌又好咬口，蘿蔔也是夠淋夠甜，浄係撈啲汁已經可以食兩碗飯。…查看更多

朋友帶我去中環蘭桂坊，去了加州大廈2樓Fovea，原來有飯食的，因為夜啲要飲嘢，所以只叫了幾款食物試下。 黑魚子燻蛋，$120，煙燻味夠，鴨蛋有蛋香、蛋黃仍流心，加上咸咸的黑魚子，味道很好。 麻辣脆牛根，$128，這是冷盤，脆牛根早已切成條狀，半肉半啫喱狀，幾好咬口，麻辣又不會太濃。 避風塘松葉蟹鉗，$168，松葉蟹鉗肉質爽口，外面炸得香口，避風塘做法之蒜粒同辣椒夠辣夠惹味。 百花樟茶鴨，半隻$168，鴨肉夠肥又夠酥香，鴨肉底釀上百花膠，仲有香口的芝麻，伴碟的是羽衣甘藍，鬆化香脆，是做得不錯的菜式。 貢品桃膠功夫豆腐花，$68，單看豆腐刀功已有90分，師傅將豆腐切成幼絲狀，形成菊花狀；桃膠是桃樹分泌出來的樹脂，非常養生，整碗甜品嫩滑清甜。…查看更多

凌晨四點飲完酒響九龍城覓食，去城南鴻陞小食宵夜，叫了燒牛仔骨、油飯同芒果沙冰。 燒牛仔骨，比較韌同鹹，沒有燒得過火，肉質是不錯的，夠辣，配飯一流。 油飯，與海南雞的黃薑油飯不同，是即刻加油炒的飯，飯粒分明，夠香夠煙韌。 芒果沙冰，芒果夠新鮮，夠凍夠甜。…查看更多

原來炮台山開了粗菜館，前身為瑞士咖啡室，見試業中，同朋友入去試下，朋友今天要食素，所以叫了蒜茸蒸勝瓜，$72同清炒西蘭花，$72，朋友叫了白飯，而我叫了豬油撈飯，$20。 先到蒜茸蒸勝瓜，勝瓜沒有蒸得過火，勝瓜肉夠淋而外皮仍好咬口，蒜茸炸得夠香口。 清炒西蘭花，西蘭花夠綠夠爽口，算幾甜，其實都用了不少油去炒。 我叫了豬油撈飯，首先將豬油及醬油加入白米飯中，再將其撈勻後進食，每粒飯都沾滿了豬油及醬油，簡直是邪惡之選，不過真的幾好食，健康定邪惡？食完先算。…查看更多