su27flanker's Profile

一朝早在牛頭角區活動，做完一round嘢揾個地方整個late breakfast。爬一爬 open rice 話呢度有特色，雖然由偉業街行過嚟一段路，都走嚟試下。街坊小鋪，地方比較細，十點幾都坐咗八成人。望吓menu 想試下特色嘢，見有豬潤，要滋味茶餐！個餐好快嚟齊晒。薑絲豬潤麵，葱花炒蛋，甜多士，熱奶茶，份量十足。豬潤切厚身，爽而不靭，冇騷味，湯混入公仔麵，好食！炒蛋厚厚，有葱味；甜多士脆口，但燶咗少少；熱奶茶就大路貨色。地方有限，搭枱離免。目測四周似都係附近做嘢，或者係路過歇歇腳。有機會再嚟幫襯！…Read More

老友快閃約飲茶，因要就腳，選擇唔多。年前曾來過同一位置酒樓，但印象麻麻，見佢轉咗名，姑且一試。上到去，一如所料，照舊街坊茶樓格局。求其指我地一張枱，老友醒爬自已揀咗第二張，佢又俾坐，冇搭枱，收貨。午市點心都機多選擇，兩個人叫咗五樣野：蝦米腸，百花魚肚，菜苗餃，潮州粉果同雞扎(雞扎唔記得影相)。點心算大碟，雖然係大路嘢，味道唔錯，係粉果有少少乾柴。可能蒸點每樣只得三件，食完點心有D唔夠喉，見隔離左右D炒粉面都幾睇得，加多個干炒肉片河。碟頭大，夠香，唔太油，交到貨。我地兩條友一野掃光埋。落樓$305，保持到水準會再嚟。…Read More

入粉嶺行一轉，睇完嗰果所謂的"花鳥蟲魚"展覽，四圍盪，想搵個地方歇歇腳。見呢間冰室幾光鮮，又有卡位坐，就試一試。見佢個餐牌都幾多野揀，我地兩個人又唔想食炒粉麵，決定要熱狗同作雞脾餐。熱狗嚟到感覺眼前一亮！未食已經覺得出品有誠意，好睇得！雖然只係簡單嘅麵包，腸仔同埋醬，味道都唔錯。炸雞髀都到，連薯皇同沙律幾大碟。雞髀炸得香脆，但有啲乾。薯皇同沙律一般水準，符合預期。熱飲(奶茶同杏霜)都唔錯，夠熱，杏霜好濃味。食緊嘅時間都仲有好多人入緊嚟，應該好多街坊客。有機會下次再嚟試其他…Read More

預早同家人食母親節餐，難得有人安排唔洗自己搵地方，準時出現就得。好多年冇行呢度，因為商場裝修過，面目全非，攪咗一輪先上到嚟。印象中應該係N年前"美X皇宮"嗰度。地方都算企理，我地人少少，就揀咗個好似樣樣都有嘅四人餐。閒日夜晚人唔多，目測都坐到七成人。啲嘢好快已經上曬嚟。講下啲餸，龍蝦冇乜肉，鮑魚普普通通，冇鮮味(我相信係罐頭貨)，燒雞脆皮好食，蒸魚ok，菜煮得唔透麻麻，炒飯甜品正路。總體食味一般la，喺旺區嘅大牌子酒樓算係咁，不過份量偏少。記得以前鴻星啲前菜小食花生有啲炸魚仔好好食，但而家就冇咗lu，得返啲花生。…Read More

朋友路過相約吹水，冇準備，冇心水嘅情況下就近上咗嚟，皆因觀塘廣場就喺地鐵站口。十二點上到嚟都幾多人。公公婆婆居多，街坊酒樓格局。好彩有枱，唔洗等。人手明顯唔夠，我哋兩個人，"樣"咗手一輪先有人嚟開咭開茶。朋友要香片，不是茶包，傳統茶葉冲水。但好老實，D茶唔得。得浸苦味，唔香唔甘，差。中午有幾張特價紙，算多野揀，嗌咗個迷你福建炒飯，蘿蔔絲春捲，煎釀双寶，點心拼盤。傾計為主，食嘢反而次要。啲嘢出得好快，兩嘢就上曬嚟。食味就ok，不過不失啦！不過全單要加13%服務費，值唔值，就見仁見智啦！…Read More

終於等到晚市堂食歸來，即刻來個飯聚先！久唔久都會黎海王一轉，水準算是比較穩定。不知道停咗晚市咁耐會變成點呢？6點半來到已經坐咗4成枱。望到枱上個牌做龍蝦餐，另外點兩set 孖寶(A+D)，唔使煩！想落單之際聽到隔離枱嘈話D龍蝦凍，唔夠熱，嚇咗我地一跳！部長好快過嚟了解，話再做過俾佢地。我地都hold 住唔落單，等一陣先。冇耐見隔離枱再上龍蝦，今次冇投訴喎，我地先落單。原本個餐係上湯龍蝦，但我地都驚中伏，寧願加$50轉芝士龍蝦。好快已經上菜。菠蘿咕嚕肉：香口，夠大碟，好味！百合炒上素：麻麻地，碎濕濕，又細碟。蟶子皇：新鮮嘅，但係啲粉絲偏乾。乳豬件：脆口但偏肥，份量少得幾件。芝士龍蝦：大路貨色，伊麵底比較乾。多啲芝士會好食啲。總括嚟講，味道不過不失啦！見個場未到7點已經坐滿。望下隔離左右上菜都係熱到標晒煙咁。應該真係聽到食客意見，立即有改善，算係咁！計番二百幾蚊一位。政府請！(消費券)…Read More

放假四圍"貢"，今次落禾輋走一轉。自從"吉"字頭超市搬走咗都好耐冇來。行咗一輪，又係揾食時間，想飲茶坐耐D，"龍"字頭果間把鬼，唔會考慮，"漁"字頭以前幫襯開不過又想換下第二間。走落地下見多咗幾間食肆。呢間招牌有個"滬"字，都估佢係食上海野。但望入去竟然見有人食緊鳳爪同馬拉糕! 咁攬鬼嘅?! 喺門口揾張點心紙睇下，原來午市有廣東點心。見佢都坐滿人，好!就試下呢度。等咗一陣就有位，甫坐抵太太就驚叫: 高力豆沙呀! 一碟有兩隻，太太至愛，走唔甩啦!話晒係上海食店，來個湯麵加點心crossover!先來小籠包，夠熱，有湯汁包住，唔錯!陽春麵，麵底普通，反而個湯有好濃雞香味，唔係咸到嘔果種。高力豆沙，夠熱，ok，豆沙饀足，但我覺得多D沙糖更加好。另外廣東點心就要燒賣和鮮竹卷。都唔錯，其實佢廣東點心選擇唔多，都係最最最大路果幾樣。食飽先見到隔離檯叫了個四小碟，好精緻咁，有肴肉，粉皮之類，好似都幾正，下次要試下!…Read More

收到朋友call 約飲茶，頓覺頭痕。正如我之前的食評，講飲茶，公司附近實在冇乜平，靚，正嘅選擇，諗起舊年裝修過的鴻圖樓，就過來踩下場。12點來到，已經半滿。麻甩大叔同OL都有，地方細比較逼，只能夠搭檯。拿拿聲揾點心紙睇，廿零三拾蚊個點心，唔太平，其實都預咗。見午市有個點心拼盆(六款)，問侍應知道一款點心有兩件。好，得兩條友，費事諗啦，要個A拼盆(蒸)先! 另加一個煲仔飯。點心拼盤好快上嚟，有D睇頭，頂爆籠咁滯。個流沙包"流"㗎(我意思係"流心"個流，唔係話佢"流料"丫)其他點心味道都唔錯，食完已經半飽。跟住就來鳳爪排骨飯($38)。夠大煲，夠熱。呢度原來星期一至五有免費自助生菓同糖水(今日係紅荳沙)。飲午茶有飯後果都係第一次。總算揾到個似樣少少嘅飲茶地方，希望佢保持水準啦!下次有人call 飲茶吹水就唔洗咁頭痕。…Read More

屋企人生日慶祝，今年不去大商場高檔食府，推薦此店老式粵菜風味，又即管試下。舖面較細，只有約十張檯。之前屋企人訂了檯，不用等位。八個人(有大有細)，揀咗一個六人套餐(有八個餸，連伊麵及壽包)，另加兩個小菜。上菜啦! 煎花蝦好香鼓油味，熱辣辣。蝦大隻又新鮮，正!炒聖子皇，可能過咗火， 縮得細，有D韌。味道可以。冰梅骨是另加的，好有矱氣，夠香! 不過我覺得似糖醋骨多D。百花炸釀蟹鉗，呢個係我覺得全晚最正果樣! 真材實料，而且超大，留意下張相，隻蟹鉗放落個碗後嘅比例! 好香口，真係細細個跟大人去飲，食到果種!古法篜魚頭，我自己不好食魚頭，只是淺嘗，全不覺得有泥味腥味。但下面的豆腐點咗汁仲正。蒜子火腩柱脯，麻麻地。個汁好似濃得滯，遮晒瑤柱D味。清蒸大海班，魚新鮮，肉嫩，冇過火。古法紅燒雞絲翅，足料。見張相食咗半碗仲有咁多料就知。胡椒猪肚雞，呢個就差D。味ok 嘅，但D雞煑得耐老咗好韌。呢外仲有野菌津白同乾燒伊麵，大路貨色啦。食到呢到已經夠飽。甜品仲有盤桃(壽包)同布甸添。盤桃係裏頭有咸蛋王果種。今年既生日餐，一家盡慶! 有機會再來試其他小菜。…Read More

幾丁友玩即慶，朋友介紹石門彩福，又來一試。7pm 到已有七，八成滿，似乎平日都多人棒場客。見門口做$88斤龍蝦，問清楚係逐隻計，當一斤二兩一隻，伊面底另加$30。就叫了龍蝦(上湯伊面底)加一個小菜套餐。好快就上菜，先來龍蝦，幾大碟，新鮮，味道不錯，不過龍蝦開邊上，三個人分有D論盡。小菜套餐有三個餸，叉燒拼海哲，一般貨色，叉燒偏瘦，略咸。瑤柱野菌浸菜苗，其實係浸白菜。這個反而偏淡口，但份量夠多。篜老虎班，新鮮肉嫩。我地加了杏汁燉椰皇。這個返而有驚喜，杏汁香，椰肉多又甜，聽侍應講唔係時時有的。快閃一餐。石門好似多咗好多食嘢的地方，有機會再來搜索下。…Read More

因公事同個parter來個quick lunch，工作餐可以開公司數，經常路過未曾幫襯，就借機會來踩吓線。地方装修得幾靚，乾淨。揾個位坐底，周圍望揾menu之際，有位阿姐板住塊面走過來。由個袋"Fing" 張咭出嚟，淡然一句: 今日食呢D!原來係一張手寫咭，是日午餐menu，碟頭飯+餐湯+餐飲，五蚊幾蚊。咭上寫湯有紅(羅宋)，白(忌廉)同中湯揀。我見今日係忌廉湯係龍蝦湯，就話叫"白"湯，個阿姐重覆強調咗兩次"龍蝦湯嚟架!"，我初時唔太明點解要咁講。個湯嚟到先明白，原來今日個湯唔係白色嘅! 個湯其實幾好飲，仲食到丁丁蝦肉添。飲湯之際先有機會望下玻璃檯下果張menu，有相，但D字真係好細隻，唔起眼。圖多，感覺其實冇乜野揀。午餐我點照燒石斑蟹柳意粉。來到先覺得有伏，點解照燒汁可以燴意粉? 其實佢賣相可以，仲有一片笳子，一片蕃薯(定薯仔)做配菜。不過個意粉配照燒汁感覺似食緊甜版嘅油撈面隔離檯OL 嘅魚旦粉好似仲正。仲有杯餐茶，盛惠$53。至於有冇下次? 隨緣啦!…Read More

"花園"算係本地"有朵"的西餐名號。雖然未至於梗有一間係左梗，但旺區唔難見到佢嘅身影。隔離team 同事們推介，又跟一轉來睇下佢乜頭乜路。同事話會多人，lunch 要排隊，所以早D落樓，12點2已經坐定定。地方唔多大，記得以前在北角和太子的花園餐廳大一截(全層或者全個地庫)，鋪租貴，地方細，都可以理解。Set lunch menu 有成10個可揀，扒類飯類，豐儉由人，要跟歺湯同包既，平均七十蚊一個set。好，上菜，先來白湯(忌廉湯)，味道一般，算濃味。餐包夠熱，溶到牛油都ok。同事們今日做晒"牛魔王"，叫晒A餐西冷牛扒。上檯份量十足，甚有睇頭。個個食得津津有味，應該唔錯。我見隔離檯個焗飯都ok，我唔好牛，就叫個J餐，鴛鴦焗猪扒飯。味道唔錯，不過雖然個碟幾大，但我覺得飯底比較少，有D汁多飯少的感覺。仲有杯餐茶跟尾添。星期五放縱下都算係一個選擇。…Read More

同事即興約lunch 吹水，想食西餐，記得之前幫襯過，地方又好坐，就上來。可能現在附近多咗lunch 選擇，冇初初開檔咁坐爆，lunch 時間都冇坐滿。Set lunch 仍然有8個選擇，友人點了蜆肉天使麵: 感覺 fresh, 有賣相，而且蜆肉頗多。又想食薯條，叫一客share. 熱喇脆口，面頭芝士粉惹味。我點了烤猪鞍，分量ok，有沙律及薯菜塾底。但個人覺得偏咸。餐飲來個凍檬茶，睇隻杯就知係美式餐廳style。快閃短聚，坐得舒服，又可以靜靜地次吹水。但食物質素似乎弱咗，希望下次有改善。…Read More

這是一篇年度回顧。公司搬咗黎KT差不多兩年，起初以為工廠區容易揾平食。點知大部份鋪頭要四十幾五十蚊一個午餐，六十蚊亦屬等閒，與高級商業區無異。尋尋覓覓，揾到呢度仲係唔洗四十蚊包冷熱飲品($37，2018年)，漸漸亦成為我的午餐鐵竇。鋪頭在近碼頭的熟食中心，地方簡陋，一支公食個飯，冇計較啦。有冷氣，唔似駿業里熟食中心果邊，夏天真係食到大汗揼細汗。午飯有快餐牌，五款你揀，由大路的拼乜拼物，到中式飯，蒸餸，燒味等都有。寫單阿叔通常會強力推薦您揀快餐， 嗌其他炒粉面驚要等得耐。我亦通常揀快餐。依家消費講性價比，呢處我覺得都有中高分。放出的照片是我年度個人精選。大大碟，夠實惠，有賣相。出品都保持到水準，冇話時好時壞。我的至愛計有:1. 扒或骨類: 香茅猪扒，乳香排骨2. 炒蛋類: 韮王火腿叉燒/ 蝦仁炒蛋3. 燒味類: 鹵水雞肶紅腸，沙姜雞( 墊底花生好香口)4. 拼乜拼物類: 咖喱汁配猪/雞扒，雞肶/翼，或腸仔/餐肉/煎蛋等等。佢有時D拼湊組合係好意想不到，例如今日(31/1)嘅"豆豉鯪魚拼雞扒"。吓?! 乜咁都有得拼?就係咁攪鬼!食味以香口味濃為主，偏肥膩㗎。我很多時都講明要少汁。標題說到"義氣"，皆因有一次坐底先發覺自己冇帶銀包。同落單阿叔講，都諗住起身走人。阿叔只是一句: [唓，聽曰俾番咪得囉!] 呢D就係小鋪獨有嘅人情味，D大集團鋪頭真係睬你都傻。見牆上掛上幾面舞龍舞獅的錦旗，老闆似係武林中人。每次到前堂，他找錢給我時的一聲: [多謝!!] 已經感受到其凌厲的內勁! …Read More

過年前同事約team lunch，亦當做團年。揀咗呢處，同事sell 呢間西餐頗有水準。餐廳在KT地標之一，駱駝漆大廈。廠厦改建，熟知呢區的一定唔會陌生，甚麼outlet，開倉，物流集運等等都有，近年都很多食店進駐。之前試過一，兩間，感覺普通。早去到，少人不用等位。地方簡潔，水泥牆果然好工廠feel。午餐有指定set menu，同事之前已預留了慢煮猪鞍，因為聽講限量供應。我就揀燒猪肋骨。而每個set 都可配飯，意粉，薯蓉或者沙律，另有湯和餐飲跟。餐湯是忌廉湯，味濃，香，但不夠熱。蒜味多士香口。同事的猪鞍先上。嘩! 唔只係大，直情可以用個"巨"字來形容!留意照片塊肉同把刀的比例。同事話肉厚，唔韌，好味。我的燒猪肋骨亦到，勁大碟。可能我揀配意粉有茄醬係面，成碟個樣都好"茄"。另每一碟上有一碗類似沙律菜的東西，好似係切碎的椰菜花。我的燒肋骨味道ok, 但似乎過咗火，肉質較削。小小聚會，大家盡興! 下次有機會要試下其他!…Read More