Foodie_84的个人专页

老公生日梗係要揀返間靚餐廳同佢食吓好嘢，黃埔呢間餐廳喺正海邊，有戶外座位，望住個靚海景食飯夠晒情調，撞啱佢仲會有live Band表演添。我哋去嗰晚有啲涼，吹住海風有啲凍，我哋着唔夠衫，唯有揀咗坐室內位，環境都非常唔錯，我哋坐私人空間十足嘅卡位，坐得好舒服。講返嘢食先，原來呢度可以同時泰國嘢同埋意大利西班牙西餐，食物選擇好多元化。我哋試咗佢個tasting Menu，再加咗個熟成和牛同埋泰式蟹肉炒飯，一於狂食慶祝。幾款前菜我哋都試晒，前菜已經好精緻，特別係個油甘魚，勁靚。薄切油甘魚：油甘魚一片一片薄薄的，配上特別調製嘅醬汁，有啲麻油香氣，再加上一啲青紅黃椒粒，味道好清爽。牛肉他他：牛肉他他好新鮮，唔會有雪味，配上一啲黑椒粒，鹹鹹香香，用香脆多士片配搭一齊食。鮮蝦芒果米紙卷：芒果配鮮蝦，味道清爽香甜，用上煙靭嘅越南米紙包住一齊食，好清新。法國生蠔：生蠔新鮮，蠔肉飽滿，鮮味，唧上檸檬汁就咁食已經好味，但係佢都配有兩款醬汁搭配，一款係熱情果，另一款係醋。跟住就小食，我哋都試咗3款，全部都好味。香脆魚柳夾餅：細細件，但係餡料非常豐富，炸魚柳非常香脆，炸粉好薄酥脆，裏面魚肉嫩滑Juicy，配上牛油果醬同埋特別調製嘅醬汁，加上一啲洋蔥，味道好惹味。蟹肉餅配蟹籽及是拉差醬：呢個蟹餅好正好正，切開嚟原來全部都係蟹肉，一絲一絲的，煎得非常之香口，配上一啲蟹籽同埋個微辣嘅沙律醬，食到舔舔脷。三文魚芝士吐司：呢個多士裏面夾住煙三文魚同埋勁厚嘅熱熔芝士，好邪惡，但係好味，如果再加埋黑松露醬仲正。鮮蝦蛋忌廉咖喱配長棍法包呢個跟餐嘅main course泰式黃咖喱有三隻大蝦，爽口彈牙，加上配料好香嘅芹菜同埋滑蛋，配上牛油法包一齊食好好味。招牌西班牙乳豬配馬鈴薯，蜜糖芥末西班牙乳豬賣相好靚，切得四四方方好整齊，皮焦脆焦脆，肉鬆軟鬆軟，而且有肉汁，配菜嘅焗薯都好好味。熟成和牛 150g呢個熟成和牛肉質柔軟，我哋揀咗五成熟，粉嫩粉嫩，配上燒牛肉汁，加上芥末一齊食，好正。泰式蟹肉炒飯呢個炒飯炒得好香，炒飯裏面伴入咗好多一絲絲嘅蟹肉，而且上碟嘅時候面頭仲鋪滿咗蟹肉炒蛋，蟹肉份量都幾多，淡淡鮮味。食嘅時候加入青醬汁一齊食，更加提鮮。芝士蛋糕&Tiramisu最後食埋跟餐嘅甜品，兩款都好食，芝士蛋糕口感綿密，香濃芝士味， Tiramisu幼滑，咖啡香氣同埋酒味恰到好處。我哋食得好滿意。…查看更多

呢間滿滿食堂簡直係中環打工仔嘅必食餐廳，款式選擇多，最重要係價錢實惠，由幾十蚊嘅一碗嘅丼飯至到百零蚊嘅燒肉都有，係中環絕無僅有嘅平民食堂。平時中午放飯每日都排長龍，我放工去食就可以慳返時間唔使等位。薩摩牛和牛料理 150g日本和牛燒肉$126真係冇得輸，油脂豐富肉味香，肉質鬆軟，嚿熱石夠晒熱，一放落去即刻焦香，沾上燒汁，更加滋味。套餐嘅飯可以免費升級做蟹黃飯，賣相好吸引，蟹黃份量都幾慷慨，蟹黃應該撈咗一啲魚肉或者蟹肉，拌飯都幾好味。壽喜燒牛肉鍋呢個鍋配有日本豆腐同埋一碗白飯，鍋嘅材料豐富，除咗有肥牛之外，仲有兩隻日本餃、竹輪、雞蛋、一盒日本豆腐、芋絲、金菇、海帶同埋一啲蔬菜，份量絕對夠飽。肥牛薄片輕輕一淥已經熟，帶有壽喜燒汁甜甜味道好食。其他配料都可以同樣煮得入味，天氣涼涼地食呢個鍋好合適。手撕雞肉青瓜蛋芝麻醬沙律估佢唔到呢個手撕雞肉又幾嫩滑，而且份量大，配上爽脆青瓜同埋爽口生菜，口感豐富。沙律用上芝麻醬，好濃好香，啱晒我口味。…查看更多

好耐冇食過韓國嘢，放工走咗去韓國街食，呢一間見到佢晚市都有做套餐，好似幾抵咁，就入去食咗。我哋點完嘢食之後店員就送上前菜，有5款咁多，好豐富。燒肉套餐有牛同埋豬嘅選擇，我哋就梗係揀咗牛啦。套餐包咗一個燒肉，兩個主食，其實兩個人都夠飽，不過我哋就好大食，叫多咗個飯卷。我哋揀咗個板腱肉，都幾大碟，牛肉顏色都幾靚，雖然食落去唔係太多油脂，但係口感都唔會話好靭。我哋燒得朝朝香香，然後沾上燒肉醬汁，配上泡菜，再用生菜包住食，味道一流。辣海鮮豆腐湯呢個湯估唔到佢又幾鮮味，唔會太辣，有啲蜆、各款蔬菜、雞蛋，仲有唔少得大大嚿嫩滑豆腐。所有嘢都入晒未，夜魅得來又鮮甜，我哋成鍋湯飲晒。石鍋拌飯呢個石鍋拌飯簡直係我哋食韓國嘢必食，熱辣辣嘅石鍋令到啲飯有少少微微焦香，個底仲有少少飯焦，而且材料好豐富，除咗有牛肉、仲有唔同顏色嘅蔬菜、紫菜同埋蛋，加入韓式辣醬拌飯，冇得輸。紫菜包飯個紫菜包飯又係簡單得來超好食，飯粒煙靭煙靭，用紫菜包住。飯卷裏面有腸仔、蔬菜同埋蛋，色彩繽紛。…查看更多

星期五放工去佐敦食飯，想食個餃子，見到呢間小店都幾多人食，入咗去試吓。原來佢出名有個墨魚餃子，但係我哋想食其他嘢就冇試到我哋食嘅小食同埋餃子酸菜魚都唔錯。醉雞卷雞肉嫩滑，充滿酒香，好入味。嗰半隻蛋都好香酒味，而且仲要係糖心嘅效果。千層醬豬耳呢個千層豬耳爽脆爽脆，夾雜住切幼細嘅爽脆青瓜絲、紅蘿蔔絲、蔬菜絲，食嘅時候好清爽，味道有黑醋嘅香味，酸酸地好開胃。餃子雙拼10隻餃子可以雙拼，我哋就揀咗牛肉洋蔥餃子同埋粟米香菇鮮肉餃子，配有一碗湯，我哋就揀咗蟲草南瓜金湯。餃子大大隻，真材實料，牛肉餃香濃肉汁豐富，而且洋蔥爽脆，沾上黑醋食風味更加好。粟米香菇鮮肉餃口感都好好，肉質鮮嫩，配上香菇嘅香氣，味道好夾。南瓜湯唔係西式嗰種打到溶晒，佢真係好似中式老火湯咁，見到一嚿嚿嘅南瓜肉同埋蟲草花，好有住家湯嘅感覺。砂鍋酸菜魚白飯呢個酸菜魚可以揀辣度，我哋揀咗小辣，佢個湯底原來都係用南瓜湯，仲見到好多南瓜肉，本來覺得有啲奇怪，但係食食吓又OK喎。魚肉切得薄薄一片片，肉質鮮嫩，唔腥，亦都冇骨。配上爽口雲耳、鹹酸菜，仲有給晒湯汁入味嘅紅薯粉，要嚟送飯一流。飲品方面，我哋就揀咗山楂汁同埋冬瓜茶，兩款都好啱夏天飲，消暑解渴。…查看更多

放工去咗上環食生煎包，平時食晏時候都好多人，今日早放工去終於都食到。原來呢度食$60以上套餐就可以任飲豆漿。呢度啲豆漿幾香濃㗎，仲要係凍嘅，我哋一人都飲咗幾杯。招牌生煎包招牌真係招牌，生煎包好正，煎到一面金黃香脆，一口咬落去完全係爆汁，食嘅時候真係要小心啲。裏面勁多湯汁，先吸晒啲肉汁，香濃鮮味，然之後落少少醋更加滋味。生煎包都幾大隻，真材實料，餡料豐富。舖頭寫到生煎包明唔夠熱包換，唔爆汁包換，證明舖頭對佢哋生煎包嘅出品好有信心亦好有要求。招牌炸豬扒菜飯配生煎包套餐套餐配有一隻生煎包，然之後一個煮食同埋一杯豆漿。炸豬扒火候啱啱好金黃香脆，外層嘅炸粉厚薄適中，酥脆酥脆，裏面嘅豬扒肉嫩滑嫩滑，一啲都唔會乾柴，保持到肉汁。菜飯好好味，啲飯粒粒分明，而且煙煙韌韌，調味鹹鹹地，配上爽口菜粒，就咁食唔使其他餸都好味。香煎雞扒拌麵配生煎包套餐餐煎雞扒需時耐一啲，因為要慢慢煎，雞扒煎得雞皮微微焦香，雞肉好爽口，煎雞扒係香口得來可以過口癮又可以冇咁熱氣。拌麵好香好惹味，佢隻醬油味好香濃，加上一啲乾蔥，配上少少粗身有咬口嘅上海麵，醬汁好簡單就已經好好味。…查看更多

Airside行咗一輪唔知食咩好，最後都係揀返呢一間食pizza，雖然之前都食過幾次，但係佢都真係幾好食，始終都係揀返佢。French Fries首先食個小食先，呢個薯條雖然簡單，但係好好味，薯條粗幼適中係我鍾意嗰一款，炸得好香，外脆內軟，咸牛油香氣足，沾上黑松露蛋黃醬，好滋味。Wagyu Sirloin Pizza呢個Pizza有和牛西冷，一次過滿足我兩個願望，又食牛扒又食pizza。pizza係薄薄脆口嗰一款，餡料非常之豐富，加上特別調製嘅醬汁同埋芝士，好惹味。Squid Ink Risotto呢個墨魚汁意大利飯好香濃，每一粒飯都掛滿醬汁，八爪魚片都幾多，薄薄一片一片，完全唔會韌，搬入意大利飯度食口感好好。配料仲有一啲車厘茄Juicy Juicy，同個墨魚汁飯味道好夾。Ricky road gelato最後我哋梗係要食返個甜品啦，見佢個雪糕櫃好吸引，我哋要咗一球石板街配waffle cone，朱古力味好香濃，加上一啲果仁碎粒，配上香脆嘅雪糕筒，我哋兩個人share一個食得好滿足。…查看更多

去啟德睇波，早啲去附近行食野，見到呢間點心店新開張，免茶介加一，見咁抵就試吓，估唔到啲手工點心幾高質，賣相靚之餘，真材實料。環境都幾好，坐得好舒服，坐窗邊仲可以睇到體育園廣場嘅景色。大池鮮蝦餃賣相勁吸引，顏色靚而且有金箔，望落去好高級，食落去蝦餃皮薄，裏面真材實料，鮮蝦爽口彈牙。原隻鮮蝦燒賣皇呢個都好靚仔，每粒燒賣上面都有原隻鮮蝦，燒賣肉質爽蛋，有啲冬菇調味，味道好好。蟹肉西施餃呢個好精緻，一個花形嘅餃，仲要有金箔，咬落去有蝦肉之外仲可能有少少蟹肉，雖然唔係好食得出蟹肉，但係味道好。啤梨鹹水角鹹水角造型好得意，啤梨形狀，咬落去餡料鹹香鹹香，惹味惹味。水晶潮州粉果潮州粉果都合格，個皮做得幾爽，唔係一pat嘢，裏面有好多沙葛，好爽口。鬼馬牛肉腸呢個腸粉好滑，薄而且爽身，裏面有啲油炸鬼，一粒一粒咁，佢唔係好似啲炸兩咁卷住成舊位裏面，佢好脆好脆，再加上牛肉餡料，好食。薑蔥蒸牛肉球呢個牛肉球竟然有啲子薑喺度墊底，酸辣酸辣咁，同牛肉球味道好夾，食得出牛肉新鮮，伴入一啲蔥，好香。鳳爪排骨煲仔飯煲仔飯熱辣辣，材料豐富，排骨肉嫩，鳳爪入味，煲仔飯仲有少少飯焦焦香添，伴入甜醬油一齊食一流。…查看更多

好耐冇食過打邊爐，搵到呢間食海鮮邊爐，嘢食好似幾高質，我哋order咗個二人餐，每位$380 ，包咗刺身拼盤，三款新鮮海鮮，火鍋配料湯底，每人一杯嘢飲，仲要茶介+1全包，價錢非常合理。先嚟個刺身拼盤，刺身有吞拿魚、三文魚、同埋八爪魚，三文魚好厚切肥美，吞拿魚同埋八爪魚都新鮮，質素好OK。跟住呢就開始食火鍋，我揀咗招牌鴛鴦鍋底，有芫荽皮蛋湯同埋沙嗲湯底。海鮮呢就一開始食芫荽皮蛋湯，食海鮮嘅鮮味。蟶子王好大隻，肉身好厚，超級爽嫩鮮甜，裙邊嘅部份好爽脆，拖一拖就食得。桶蠔好大隻，咬落去卜一聲鮑汁，鮮味creamy。南非鮑魚都好大隻口肉，最重要係一啲都唔韌，爽嫰爽嫩，好正。食完海鮮我哋就食頂級雪花肥牛，牛肉好靚，雪花均勻適中，唔會太肥冇得食，肉質軟嫩，牛味濃郁，沾上我自己調製嘅火鍋醬油好好味。手打丸有牛丸、鯪魚丸、蝦丸同埋墨魚丸，細細粒迷你版，一口一粒，每款都真材實料，爽彈爽彈。水餃同埋雲吞好有驚喜，特別係嗰隻鮮蝦雲吞，皮薄餡靚，個皮滑溜溜，裏面包住好多隻蝦，超級爽口，而且蝦味濃郁，似係海蝦。最後食埋啲菜同埋個超級爽口嘅生麵已經好飽好滿足。點知原來仲有個甜品送，係桂花杞子糕同埋椰汁馬豆糕，兩款都好清甜，食到飽晒食都唔會覺得腻。…查看更多

夜晚想去飲茶，去呢啲點心店就啱晒，唔使出去酒樓都食點心，本色質素都一樣好㗎，呢間仲有前米芝蓮主廚主理，保證點心香港現場製造，有質素保證。蝦餃2隻呢度有得嗌兩隻，啱晒我哋兩個人食又想試多啲點心款式。蝦餃真材實料，蝦肉爽口，大大隻。燒賣2隻燒賣好食，蝦肉同埋豬肉比例啱啱好，爽口結實，仲有冬菇嘅香氣。脆皮鮮蝦腸呢個腸粉好好食，滑溜溜嘅爽滑腸粉包住酥脆酥脆嘅米春卷，餡料係豐富嘅爽口蝦肉，好有層次口感，沾上甜豉油食，一流。米網春卷仲要放咗一輪俾腸粉包住都仲可以保持脆度，勁。蝦多士蝦多士唔係好多點心舖有得食，呢度竟然有。炸得金黃酥脆，蝦多士上面仲配上少少豆瓣醬，好惹味。燒汁釀茄子茄子好厚身，軟滑軟滑感，中間嘅魚肉都好真材實料，唔會係薄薄一片，配上燒汁好好味，如果再加上一啲木魚絲更加好。奶黃流沙包奶黃好香濃，包好軟熟，流沙效果超級好，就算放涼咗一陣，都可以保持流沙嘅效果，食嘅時候要小心噴出嚟。煎蛋牛肉飯牛肉餅好味，加咗爽口馬蹄同埋惹味嘅芫荽，唔會話溝咗好多肥豬肉好膩，配上煎蛋同埋蒸飯必備嘅甜豉油，又係食到舔舔脷。…查看更多

屋企人鍾意食粵菜，搵到呢間酒樓好抵食，晚飯時間2-5位竟然送一碟例牌燒鵝。燒鵝平時都唔平，見到咁抵食，決定嚟呢間酒樓試吓。燒鵝（例牌）估唔到送嘅都好正，出品好有誠意。燒鵝唔係凍冰冰，有溫度的，而且皮脆肉嫩，咬落去啲皮度充滿油香，鵝肉有肉汁，絕對唔會又乾又柴，屋企人食得好滿意好滋味。粟米深海魚塊呢個係非一般嘅粟米斑塊，魚塊係超級厚一大件，用上靚魚，肉係一索索。粟米汁係分開上，保證食嘅時候炸魚塊表面係脆身，口感先係濕潤嘅粟米汁，然之後脆脆嘅薄薄炸粉，然之後係厚厚爽滑嘅魚肉。生煎蓮藕餅呢個又係好好食，蓮藕餅煎得好靚，色澤金黃金黃，咬落去肉餅充滿肉汁，而且有一粒粒嘅爽脆蓮藕，口感好好，加上適量嘅芫荽蔥調味，味道絕配。乾燒伊麵呢個雖然係好普通嘅菜式，但係好香好好味。伊麵質感好好有彈性的，唔係好腍斷晒嗰啲，而且每條都入晒味，掛滿蠔油香氣，加上芽菜同埋韭黃增加爽口嘅口感，香氣十足，我好鍾意。最後仲有糖水送添，我哋嗰晚有綠豆沙同埋芝麻糊。我試咗綠豆沙，有臭草同埋果皮香氣，絕對唔會馬虎，一樣係送嘅都好好味。…查看更多

放假同老公喺觀塘買嘢，晚飯揀咗嚟呢一間Cafe食，想試吓佢啲疏乎厘班戟，見到啲相好吸引。虎蝦帶子意粉虎蝦有兩大隻，肉質爽，蝦頭先係精華，啲蝦膏超正。帶子都有兩大粒，鮮嫩鮮嫩。意粉質地啱啱好，有咬口，而且醬汁非常足夠，蕃茄味道濃郁，配上一啲香草調味同埋粒粒蔬菜，好開胃。墨西哥牛肉餡餅呢個墨西哥餡餅熱辣辣，裏面嘅牛肉原來係一大塊嘅，本來我仲以為係碎肉，一大塊嘅牛肉好慷慨，肉質鬆軟，我覺得有啲似牛舌。餡餅裏面仲有好多芝士，熱熔芝士creamy，每一啖都食到焦香薄餅，牛肉同埋芝士，味道香濃豐富。開心果忌廉麻糬疏乎厘終於嚟到我最期待嘅疏乎厘pancake，呢一個開心果忌廉醬超級濃郁，開心果控嘅我好鍾意，開心果忌廉濃厚Creamy，凍凍地，好似食緊雪糕咁，配上一片薄薄煙靭麻糬，同埋充滿空氣感嘅疏乎厘pancake鬆軟鬆軟，再加埋一粒粒嘅開心果碎同埋杏仁片，口感好豐富。輕啡奶蓋椰青呢一個咖啡好易入口，加上清甜嘅椰青，就算飲唔慣咖啡嘅人都唔會覺得苦澀。山政小山園（Rich)一番焙茶鮮奶呢個熱嘅焙茶奶有可愛拉花，兔仔超級可愛，充滿焙茶濃郁香氣，甜度亦都有得揀，啱晒鍾意少甜嘅我。…查看更多

去開佐敦做嘢，食晚飯揀咗呢間老字號嘅米芝蓮推介越南餐廳，嘢食好味價錢親民，唔怪之得屹立喺呢區咁耐。迷你庶蝦 $44雖然寫係迷你，但係我覺得係正常size，哈哈。蝦肉爽滑，食得出係用新鮮蝦整，炸得外層金黃，裏面啖啖蝦肉，最後再啜埋啲蔗汁。蟹肉粉絲肉碎金磚 $62蟹肉粉絲肉碎配搭恰到好處，食落好似仲有加一啲蛋？成個金磚唔會鬆散，食落口感軟得來有咬口，調味幾好食。咖喱牛腩煲跟法包 $158咖喱香濃。牛腩煮得鬆軟腍身，一啲都唔乾柴。牛筋入晒味，軟滑軟滑又有少少Q彈，配法包真係一流，唔會嘥咗啲咖喱汁精華。老趙牛肉粉 $88呢個招牌越南粉好好味，湯底清得來又香濃，材料豐富，除咗有生牛肉片，仲有牛腩、牛筋、兩款牛丸同埋一大舊蘿蔔，全部都煮到入晒味。河粉又薄又滑，非常之掛湯，重點係好多肥仔芽菜，爽口爽口感配埋軟滑嘅河粉一齊食口感好好。香茅豬扒飯$68豬扒煎得啱啱好，唔會乾爭爭，肉質係紮實得來有肉汁。香茅惹味，配上一啲乾蔥同埋蔥花，送飯好好味。佢仲可以加配煎蛋，如果撈埋流心蛋汁一齊拌飯應該仲好食。椰汁拉椰卷 $34 椰汁味幾清香，唔會太甜，作為飯後甜品唔會好滯。…查看更多

呢間冰室裝修好懷舊，裏面仲播住一啲80年代金曲，完全有老香港嘅感覺，嘢食都幾多選擇，最特別係有提供而家少有嘅豬油渣拌飯系列，好味又啱晒打卡。生炸雞脾煎雙蛋飯炸脾真係冇得輸，雞皮係脆卜卜，雞肉嫰嫰，我哋揀咗咖喱汁，港式咖喱汁唔會太辣，又香又惹味，再拌入流心蛋黃撈飯，好好味。XO醬牛柳粒豬油撈飯聽到豬油撈飯真係又愛又恨，太邪惡，好彩呢度豬油係分開上嘅，可以根據自己喜好加入，即時減低咗自己罪惡感。XO醬炒牛柳好有鑊氣，牛柳軟嫩，配上XO醬好惹味。啲飯先係精華，撈埋脆脆豬油渣、蔥花同埋豬油醬油真係食到唔停口。紐西蘭西冷牛扒西冷牛扒我哋揀咗七成熟，鐵板熱辣辣，倒入蒜蓉汁，豬豬聲真係未食得流口水，牛肉肉質軟嫩，一啲筋都冇，啖啖肉。呢個我仲揀咗配意粉，意粉係分開上嘅，唔好睇佢一啲執都冇，佢用蒜蓉炒過好香，拌入鐵板牛扒嘅蒜蓉汁又係食到舔舔脷。炸魚薯條魚柳吉列炸粉薄，魚肉厚厚，外脆內軟，沾上千島醬食絕配。薯條係我鍾意嘅粗身款，熱辣辣炸起冇得輸。…查看更多

媽咪鍾意食蟹，約咗佢食飯特登搵呢一間有蟹食嘅酒樓，而且做特價，幾抵食。去到酒樓見到環境都唔錯喎，一入門口就見到有條靚靚花樓梯同埋水晶燈，好適合婚宴擺酒。招牌白胡椒蟹炆飯 $368呢個做特價好抵食，白胡椒蟹幾大隻，蟹鉗真係啖啖肉。蟹肉鮮甜嫩滑，配上白胡椒汁惹味得來又唔會搶咗蟹嘅鮮味，媽咪食得好滿意。店員仲會另外俾一碟白胡椒汁，客人可以根據自己喜好添加。飯底都好好食，吸收晒醬汁嘅精華，用瓦煲上好傳熱，飯喺鍋上面炒得粒粒分明，鍋底仲有少少飯焦脆脆，撈勻一齊食口感好好。遠年陳皮脆皮燒鵝伴陳村粉 $168我哋叫咗個例牌，份量都好足。燒鵝微熱，燒鵝皮保持少少脆，油香豐富，肉質都唔會乾柴，最特別係墊底嘅陳村粉，吸收晒燒鵝汁精華，好好味。滋味芥末蝦球 $148大大隻蝦球新鮮爽脆，啖啖肉，配上嘅芥末沙律雜果感覺清新，成個餸爽口清新，好啱夏天食。蠔皇燴安格斯牛肉球 $168呢個餸有啲似獅子球，不過係牛肉版。獅子頭就成日食，呢個牛肉球就真係第一次食。安格斯牛肉牛味香濃，帶有少少油脂香，口感少少扎實爽彈，加上裏邊有一啲爽口牛筋粒同埋馬蹄，口感豐富。…查看更多

行完Airdide想食晚飯，見到呢一間Cafe好似唔錯，新開未食過，價錢好似都唔貴，就入去試吓。石燒紐西蘭肉眼扒呢個牛扒都幾好味，牛味夠，肉質有咬口得來唔會韌，熱石夠晒熱，燒得牛肉焦香，食飯嘅時候灑上少少鹽同埋沾上青醬食，味道好好。半碟仲有燒粟米同埋燒菠蘿添，兩款都幾香甜，食完肉用嚟清喉嚨唔錯。傳統海鮮西班牙鐵鍋飯擺盤好吸引，色彩繽紛，材料豐富，大蝦啖啖肉彈牙，青口同埋蜆肉都冇沙，中間仲有一件煎魚柳添，我估係盲曹之類，魚皮煎得金黃香脆，魚肉鮮嫩，食嘅時候唧少少檸檬汁，幾鮮味。西班牙飯拌入左一啲Salami同埋蔬菜粒，個飯好香好濃味。 焦糖布朗尼配雪糕最後甜品都幾好食，布朗尼夠熱，朱古力味香濃，又唔會太甜，中間仲有一啲合桃粒增加口感添。雪糕方面有三隻味道選擇，雲呢拿、朱古力同埋芒果，我就揀咗最鍾意嘅朱古力味，配上香濃綿密濕潤嘅布朗尼一齊食，好正。…查看更多