snorlaxolaf的个人专页

呢間熱門餃子店夜晚門口大排長龍，舊舖隔離有間新分店，入座時間可以快少少喇！不過可惜實在太受歡迎，所以夜晚八點入到去只係剩返幾款選擇，所以下次一定要再早啲去食其他款式。首先揀咗香菇鮮肉煎餃，用冬菇做餡料口感豐富咗，同豬肉都好夾，煎得夠香口。知道呢度嘅湯餃係用冇味精嘅椰子海帶鮮雞豬骨濃湯，所以揀咗雙拼嘅素餃同紫菜鮮肉餃。素餃入面有冬菇、雲耳同雪耳，所以食落好爽口而且夠晒健康，另外估唔到紫菜鮮肉餃係咁好食，原本冇期待嘅反而覺得呢款係今日嘅MVP。最後一款揀咗芝士粟米鮮肉餃配邪惡金沙餃，滿滿嘅鹹蛋黃碎鋪喺餃子上面，香口得來又夠濃郁，真係好值得試！小食方面，今次食咗秘汁雞腎、酸薑流心皮蛋同埋香煎豆腐，個人推介雞腎，份量夠多，而且唔會好硬，另外糖心皮蛋配酸薑同砂糖食都好正。…查看更多

呢間韓國燒肉店好多朋友食過都推介，知道而家做緊優惠，所以特登去試吓，有幾款肉都做緊六折，其中豬五花仲可以任食，食肉獸嘅話真係超抵！今次我就嗌咗其中兩款六折嘅肉，就係牛肋條同埋豬肋骨，估唔到份量咁多，而且醃得好好味，店員會幫手，當燒到差唔多時間就會提醒可以食得，因為燒肉嘅時候有張錫紙鋪喺底，所以唔會有燒到燶晒嘅情況出現。兩款肉都唔會嚡，而且肉味好香，呢個價錢嚟講簡直物超所值。我哋仲嗌咗一盤生菜用嚟包肉食，估唔到生菜多到食晒兩碟肉都用唔晒，而且價錢只係$38 ，又係佛心嘅價錢。小食方面嗌咗蝦煎餅，餐廳係用蛋漿包住啲蝦去煎，食落好有家庭嘅味道，再點埋個汁，好惹味，旁邊仲有翠玉瓜做配菜，可以解下膩。餐廳老闆係韓國人，但係佢好主動照顧客人，而且又好Nice，下次一定會嚟再食。…查看更多

早兩日喺太子做完嘢，突然想食點心，所以入咗嚟呢間三哥點心，入邊裝修簡單，但係座位都唔算少，見除咗點心之外仲有小菜可以選擇，所以就決定嚟試吓。豉汁荷葉蒸膳唔係咁多食點心嘅地方有蒸鱔食，而且套餐好抵食，有白飯仲有例湯，鱔都幾新鮮，蒸到熱辣辣，份量都唔算少。例湯係青紅蘿蔔煲豬骨，真材實料，而且夠晒大碗。點心拼盤呢個拼盤完全滿足到我呢啲樣樣點心都想試嘅人，包括有兩粒蝦餃、兩件菜苗餃、兩件潮州粉果、仲有奶皇包同叉燒包各一個，價錢只係40幾蚊超抵食，拼盤入邊我最鍾意嘅係蝦餃同菜苗餃，餡料多到不得了，而且蝦好鮮味。蠔皇鮮竹卷每次去飲茶都會嗌鮮竹卷，呢度嘅絕對係保持水準，而且餡料較多，醬汁亦夠多。燒汁釀茄子茄子每一件都好大嚿，而且鯪魚肉好新鮮，食得好滿足！如果其中一名店員服務態度會好啲，相信成個體驗會更加好，點心係唔錯嘅，有下次！…查看更多

朋友介紹我嚟呢間主題餐廳，特別有藝術氣息，就係凡高廚房，一入到餐廳就見到好多梵高嘅畫作，裝修得好有特色，環境令人好舒服，喺度食晚餐特別有情調。今次同朋友嗌咗兩four-course set dinner。前菜可以選擇意式煙三文魚沙律或者巴馬火腿沙律，所以我哋兩樣都試晒，煙三文魚唔會好鹹，魚香味好重，亦都好大塊；而Parma Ham有兩款，鹹香味好出，兩款沙律菜嘅配料都係一樣，除咗沙律菜仲有發達芝士、蕃茄仔等等，配料好新鮮。餐湯方面，是日餐湯係南瓜湯，味道非常清甜濃郁，一飲難忘，另外仲可以加$38轉做野菌忌廉湯，呢個湯係餐廳嘅招牌菜式，係用咗98%嘅蘑菇製成，啖啖蘑菇嘅香味同埋口感，難怪做到招牌菜式。主菜方面，第一樣就揀咗燒美國豬肋骨，店員話係攞過金獎，所以對佢都好大期望，點知一食真係好出色，尤其係個BBQ醬汁調得好好，好夾個豬肋骨，值得下次返嚟再encore！第二款主菜就揀咗火焰護心肉牛柳串，牛柳串用鐵枝送上，睇得出係即叫即燒，肉質真係非常嫩滑，一啲都唔嚡，粒粒都好大嚿，兩款主菜嘅配料都有西蘭花、粟米、炸得好好味嘅薯角等等，成份主菜都好出色！甜品方面，就有抹茶芝士餅同埋意式奶凍，欣賞餐廳製作甜品唔會太甜，但味道依然保持濃郁，由前菜到主菜到甜品嘅味道都非常令人滿意，真係唔可以錯過呢間又有特色又好味嘅餐廳！…查看更多

呢間專門食天婦羅嘅居酒屋長期都有人排隊，今晚咁啱經過就決定嚟試吓，我同朋友都揀咗自選天婦羅定食。第一份自選天婦羅定食就揀咗冷烏冬，鮮帶子，廣島蠔，鰻魚，黑虎蝦，金菇。每一款材料都偏向大嚿，海鮮好新鮮，每一款天婦羅都炸得好乾身，個人推介鮮帶子同鰻魚！第二份自選天婦羅定食就揀咗冷酢橘鳥冬，鮮帶子，鱚魚，希靈魚，黑虎蝦，茄子。呢款凍烏冬加咗青檸同特製醬汁，味道好特別，個人推介希靈魚同茄子！每款定食都會有湯、沙律，份量嚟講絕對夠晒，唔夠喉嘅話仲有好多小食可以選擇，今次就試咗清酒煮沙白，清酒嘅味道好濃，沙白冇沙，而且粒粒都好大隻，夠晒飽滿。望住師傅炸天婦羅感覺就好似喺日本食緊居酒屋咁，唔怪得知日日都大排長龍啦！…查看更多

平時最鍾意去食日式火鍋，鍾意一人一鍋可以揀自己鍾意嘅湯底慢慢食，仲夠晒衛生。呢間分店座位都唔少，自助區空間都夠大，店員服務都好親切。湯底有七款常設款式，同埋四款期間限定，難得嚟到梗係試吓兩款期間限定嘅湯底啦，所以最後就揀咗蕃茄壽喜燒湯底，同埋海老豚骨湯底。前者仲會附送一隻日本生雞蛋，可以點牛肉食，令牛肉好滑溜，後者嘅蝦味好重，帶出食材嘅鮮味。今次嗌咗嚴選牛任食套餐，除咗其他套餐都有嘅豬肉同雞肉之外，呢款套餐仲可以任食嚴選牛肉同埋牛舌，係更加高級嘅牛肉，只要用QR code落單，肉類都好快送到。至於其他火鍋配料，都可以喺出邊自選區到拎，有好多唔同嘅蔬菜、類、面類等等。仲有唔同嘅飲品同醬料選擇。最後仲可以自己唧埋雪糕食，仲有好多唔同Topping可以揀添！…查看更多

每次經過大有街都會買啲小食，最近見到新開一間茶飲店，仲有好多港式小食，就決定喺呢度解決我嘅下午茶。草莓4.3特濃鮮奶呢款係舖頭嘅top 3，用咗4.3特濃牛奶，士多啤梨味好出，仲食到粒粒果肉，另外仲有份量好多嘅椰果肉，所以好有咬口。椰汁紫米西米鮮奶呢款就好似可以飲嘅糖水咁，配料份量好多，夠晒足料，口感好豐富，又唔會太甜，下次一定要試吓佢其他飲品。阿華田格仔餅格仔餅入面有好多阿華田脆脆，令到個口感同平時食開嘅原味好唔同，呢款唔係恆常款式，所以想試嘅就記住早啲嚟試吓！秘製魚肉燒賣/椒鹽燒賣試咗兩款燒賣，如果揀蒸燒賣嘅，記得叫佢一定要落辣椒油，夠晒香口；如果想食外脆內軟嘅就一定要試炸椒鹽燒賣，個皮唔會好硬，所以口感都幾唔錯，灑上椒鹽粉，夠晒惹味！…查看更多

今次再去燒肉屋，原因係佢哋新出咗個榴槤燒肉放題，性價比十足，任食啲24榴槤，每一粒都好香甜，而且粒粒都好大粒！各款燒肉質素都非常唔錯，首推美國安格斯封門柳、牛舌芯、澳洲和牛M7牛板鍵，出菜速度好快，而且嗌幾多就嚟幾多，絕對唔會唔夠喉！海鮮方面又係好抵讚，蒜蓉牛油烤帆立貝同泰式生蝦都好正，食多幾份就好快回本。甜品方面有任食Häagen-Dazs雪糕，特別嘅係可以自製貓山王榴槤醬燒薄餅，瞬間好似去咗泰國咁！除咗五款前菜，生菜都可以任添，各款飲品都可以任飲，所以都真係幾抵食。女店員wing同另一個男店員服務態度好好，周不時都關心我哋睇吓有冇需要協助，店內油煙味唔會好犀利，所以下次都會再嚟幫襯！…查看更多

屋企人成日同我去陳儀興度嗌小菜同埋打邊爐，最近發現原來仲有副線係滷水鵝專門店，定價偏低，客飯好抵食，有時想加餸斬料返屋企都好唔錯！招牌鵝三寶飯鵝三寶包括有鵝肝、鵝腸同鵝肉，包括晒我最鍾意食嘅三款部位，鵝肝好滑溜，滷得好入味，鵝腸好爽口，鵝肉一啲都唔鞋！滷水鵝肉飯我嘅份量超多，肥瘦均勻，而且唔會好似出邊嘅滷水鵝咁過鹹，而且仲有芽菜同酸菜，啖啖肉之餘仲可以食吓菜，夠晒健康。每款都送一碗老火湯，每碗都超多紅蘿蔔，仲有豬骨，夠晒足料，仲可以加$10有一客時蔬，真係夠晒抵食！…查看更多

將軍澳中心新開咗一鼎火鍋，係一人一鍋任食火鍋，湯底有八款選擇，今次試咗蕃客為主，即係鳳梨蕃茄濃湯，同埋冬蔭功湯。兩款都好濃味，酸酸哋，好開胃。有四款套餐可以揀，今次就揀咗top 1澳洲200日穀飼牛套餐，牛肉非常高質，仲有好多款食物都係嗌呢個套餐先食到，包括千層牛柏葉、特級牛舌、海鮮方面嘅大蜆、超鮮生蠔、一鼎鮮蝦，海鮮超級新鮮，而且一啲雪藏味都冇。另外有一串串可以放入火鍋入面方便快捷，例如有芫荽和牛串、露筍和牛串、金菇和牛串、豚肉小露筍、油揚餐肉串。除咗嘢食，仲點少得嘢飲呢，值得提嘅係一鼎火鍋係同一鼎茶飲店連住，套餐價錢已經包埋任飲手沖飲品，真係超抵好快回本，呢個套餐嘅選擇有純綠妍茶、芝士琥珀、香水爆檸、黑糖珍珠牛乳、百香果三重奏、冬瓜牛乳茶，亦都有神泡生啤任斟添！甜品方面，自家製嘅桃膠牛乳同埋手打麻薯紅豆沙都好出色，唔會太甜而且夠晒濃味，推介！小食方面，選擇都有好多例如有：冰釀梅汁蕃茄肉鬆皮蛋豆腐青麻椒辣魚皮藤椒虎皮雞爪台灣風味嘅小食亦都有：金錢肚金錢腱滷水牛筋一鼎鹽酥雞三星蔥燒串花枝手作地瓜球梅香地瓜條古早鹽酥豆腐酥炸菇菌古早蒜味小香腸黑糖炸麻薯龍師傅招牌韭菜餃紅噹噹蝦球古早滷肉飯台灣鮮製手工麵火鍋配料亦都有更多更多，鍾意打邊爐嘅朋友千祈唔可以錯過！…查看更多

間唔中我都會去海濱南岸到食點心，香嗰度環境舒服，可以望住將軍澳海濱同跨灣大橋，有別於一般嘈吵嘅茶樓，而且點心亦都好出色，有幾款點心係我每一次去都會嗌嘅。蝦餃：蝦餃皮唔會特別厚，入面包住嘅蝦大隻又爽口。燒賣：出邊有啲燒賣粉多過肉，但係呢度唔會，食得出肉嘅比例都好多再加埋蝦同冬菇，粒粒飽滿食得好滿足。菜苗餃：呢樣係必食嘅點心，菜苗嘅份量超級多，一咬開已經湧晒出嚟，仲有少少肉，啱晒健康人士，而且個調味好令人上癮，想一啖又一啖咁食落去！韭菜金錢蟹盒：外賣好似炸雲吞咁，炸得好乾身，唔會油淋淋，韭菜好香，同薄脆嘅外皮好夾。今次仲試咗幾款之前未食過嘅點心，估唔到都幾唔錯喎。牛肉球：牛肉球大大粒，一上枱熱辣辣，食完一粒已經好飽肚。蒜蓉粉絲蒸鮮魷：粉絲吸晒湯汁好惹味，魷魚好新鮮，爽口又彈牙。馬拉糕：蒸得好鬆軟，淡淡黑糖味嘅味撲鼻而來，而且唔會太甜，當甜品咁食簡直冇得輸。…查看更多

朋友生日所以揀咗一間都幾多好評嘅自助餐同佢慶祝一下，見到最近好多人去食再臨閣，而家到8月底主題係「味遊泰國」自助晚餐，主打「從農場到餐桌」美食概念，有唔少正宗泰國地道菜式，啱晒我同朋友嘅口味！座位好寬敞，環境好舒服，拎食物嘅位置好清晰，一目了然，好清楚咁知道每一個區有咩嘢食，特別要講吓而家期間限定嘅泰國美食區，款式真係超級多，例如有：泰式青辣椒汁蒸烏頭、特色咖哩魚及鮮花七味蝦等、泰式無骨鳳爪沙律、泰式魚乾西瓜沙律、泰式魚乾西瓜沙律、海南雞等等，就好似置身泰國一樣，而且味道一啲都唔輸當地口味！除此之外，推介嘅熱葷仲有燒原條有骨西冷、即煎虎蝦、即煮鮑魚，每一度都係水準之作！除咗熟悉又點少得刺身同埋海鮮類呢，刺身每件都切得好厚，新鮮得來冇雪味，海鮮方面好多選擇，唔單止有波士頓龍蝦、琵琶蝦，仲有蝦蜆蟹腳同蟹鉗等等，唔會太重海水鹹味，而且refill好快！泰國主題又點少得泰式甜品，款式亦都非常多，包括有：芒果糯米飯、蒸泰式千層糕、泰式奶茶慕司蛋糕、D24榴槤薄餅、泰式蒸香蕉糕、香辣戚風蛋糕、玉桂木薯布甸、班蘭戚風蛋糕等等，榴槤薄餅同埋心太軟係即叫即整，熱辣辣，令人食得好滿足，另外大推斑斕戚風蛋糕，好味到食完又食！買單嗰陣店員仲送咗一張每位-300嘅優惠券，可以喺一個月內用，計落又真係幾抵喎，嚟緊又可以再食啦！…查看更多

尖沙咀有主打食天婦羅嘅日本餐廳，除咗多款式之餘，餐牌上仲有好多唔同種類嘅嘢食，啱晒收工嚟happy hour！唔同種類入面都有啲嘢食值得推介，自選天婦羅，炸得好乾身脆口，果然係招牌：南瓜 / 蕃薯✔️ / 粟米✔️ / 金菇✔️ / 黑虎蝦✔️ / 松葉蟹鉗 / 穴子 / 帶子串揚：雞肉啡菇✔️（超級推介大啡菇好Juicy有埋雞肉估唔到係咁夾！）佐酒小食：雞肝醬多士 / 櫻花蝦炸豆腐✔️ （炸衣好薄身，面頭有滿滿嘅櫻花蝦碎，好香口）/ 炸日本白蝦✔️（份量多之餘炸到卜卜脆，送酒一流）串燒款式超多，包括有牛、豬、雞、蔬菜、海鮮，全部都燒得好出色，超級值得試多幾款：雞心喉✔️（少有機會食到，口感特別） / 雞腎 / 雞皮 / 雞頸✔️（有啲咬口入邊仲有少少軟骨） / 雞胸軟骨✔️ / 牛舌芯✔️ / 雞髀菇✔️燒物：白鱔✔️（燒得乾身，好新鮮）另外仲嗌咗冷手打鳥冬，係扁闊身嘅一款，有別於平時食開嘅烏冬。今次冇試到沙律同埋刺身，下次一定要約朋友再嚟食過！…查看更多

好耐冇見呢個老朋友，佢話要帶我嚟呢間懷舊嘅意大利餐廳試吓，入到去裝修有種經典嘅感覺，暗暗嘅環境特別有氣氛。我哋入到去冇耐已經座無虛席，見到食客有啲係慶祝生日，有啲係情侶撐枱腳，亦都有一家人嚟食飯。我哋叫咗個二人套餐，好豐富！芒果煙鴨胸沙律估唔到前菜嘅沙律份量係大得咁誇張，有一整個芒果，超級甜，煙鴨胸唔會太鹹，非常高質，中間有整得好好食嘅雜果雞蛋薯仔沙律，同埋唔少嘅沙律菜，賣相靚之餘，配料仲非常多，好出色！龍蝦湯超鍾意呢度嘅龍蝦湯，原因係足料超濃味，每一啖都食到粒粒嘅龍蝦肉，非常抌本，亦都唔會有任何苦澀味。芥末牛柳牛柳揀咗三成熟，唔韌之餘，肉質仲好嫩滑，每人都有一嚿手掌大小嘅份量，牛肉味香濃，點埋芥末汁非常之夾！海鮮焗茄子配尖通粉海鮮嘅款式非常多，有魷魚、蝦、蟹肉、蟹柳、魚肉，簡直係海鮮盛宴，茄子亦都可以解油膩感，夠晒滿足！FRUIT PARADISE我哋嗌咗兩杯有滿滿生果味道嘅飲品，主要由橙汁、菠蘿汁、西柚調配而成，酸酸地夠晒開胃。甜品方面我哋試咗CHOCOLATE ZABAIONE同埋TIRAMISU，兩款都係意大利傳統嘅甜品，前者比較少見，蛋糕有淡淡嘅酒味，非常特別，而後者雖然好多地方都有得食，但係呢度嘅比較偏向雪糕嘅形態，一啖接一啖好快就俾我哋清晒😊…查看更多

呢間法式餐廳非常平民化，二人套餐都非常抵食，首先會有餐包同是日餐湯忌廉甘筍椰子湯。火腿芝士拼盤🥓🧀拼盤有法式火腿、西班牙火腿、康堤芝士、reblochon 芝士，兩款火腿同芝士可以混合配搭嚟食，可以食到唔同嘅鹹香味道，又或者配埋麵包一齊食。Canapés Platter法式點心拼盤🥧法式點心好少機會食到，所以今次一上枱就已經有特別嘅感覺，款式方面有炸黑松露球、法式芝士蛋批、蟹肉酥、仲有三文魚肉碎醬配合麵包一齊食，每一款都有獨特嘅口感同味道，非常值得一試！煎鴨肝油封鴨腿意粉🍝鴨肝好大嚿，煎得好香口，油封鴨腿份量都好多，配以意粉一齊食，口感上非常滿足！阿根廷安格斯牛脊肉🥩牛脊肉揀咗三成熟，所以肉質非常嫩滑，配菜方面有法邊豆、燒薯粒，份量一啲都唔吝嗇，重點推介係旁邊嘅鴨肝白蘭地醬汁，估唔到同牛肉咁夾，超出色！Japanese Mule🍹呢杯Cocktail係由gin酒同提子甜酒，混合紅茶，再加水蜜桃糖漿調配而成，入口紅茶香味撲鼻而來，之後酒嘅味道慢慢滲出來。Blueberry Mojito🍸Mojito平時就飲得多，藍莓口味嘅都係第一次試，入面有粒粒藍莓，薄荷葉同青檸嘅味好出。…查看更多