美食焚化爐的个人专页

香港人鍾意去日本食買玩，熱愛程度同每周北上深圳不遑多讓。 暑假期間同囝囝都走了一轉，真係未落機已經想返轉頭，一日食兩至三碗拉麵、燒肉、甜品、壽司同居酒屋，半夜三更又有宵夜店，真開心。 不過香港家陣都有好抵食日本菜，就係海洋公園內的Ginger Grill餐廳。 繼上次萬聖節套餐後，又推出了「日本秋祭慶典」。 今次所有主要食材都是來自日本，供應期由2025年11月1日至30日。 炭燒雞腿肉伴柚子胡椒（$58）烤得啱啱好，雞腿肉保持嫩滑的質感，外層帶焦香，加以上柚子胡椒消弭了油膩感，作價$58，已經有兩大串，很相宜的價格。 炭燒獅子唐椒、南瓜與雞肉串伴柚子醬油（$68）加入了唐椒一齊食，多了一份辛香，而南瓜片亦給烤過，甜美可口，兩款烤雞同樣精彩。 炭燒味噌清豚五花肉蘆筍卷（$68）五花腩烤至油香四溢，內裡的蘆筍脆嫩，塗上了味噌更加美味。 炭燒味噌醃北海道豚肉豬扒（$268）肥大肉厚，烤至外層微焦，而中心位啱啱熟，肉味好香，處理得相當好。 炭燒A五和牛柳配山椒味噌醬（$328）（120克）牛柳切開時，中間位是呈現嫣紅色，帶少許血絲，配上了山椒味噌醬，不單有嚼口，而且更惹味。 炭燒A5和牛西冷配岩鹽($328）（120克）今次簡單得多，西冷配岩鹽，找不到挑剔的地方，日本A5和牛，仲要在主題樂園的餐廳內享用，都只是$328，性價比不錯。 餐後可以來份園方特意為兩隻本港出生熊貓而調製的熊貓朱古力冬甩配凍朱古力（$62）。 老實講，一份串燒加一塊扒，都只是$400左右，六點後入場係免費之餘，仲有免費車位，去邊度搵呀？…查看更多

首先問下大家係咪「牛魔王」，每餐無牛不歡？如果答案是「係」的話，這一刻可以恭喜你，因為將會話比你聽一個好消息。人氣平鐵牛扒餐廳Flat Iron Steak 聯乘香港海景嘉福洲際酒店意大利餐廳 The Mistral限時推出T骨牛扒及斧頭牛扒半價推廣。由2025年9月16日起，香港海景嘉福洲際酒店 The Mistral 意大利餐廳，作出為期兩個月的優惠。逢星期二堂食只需以港幣$599（原價港幣$1198）即可享用重達一公斤的黑毛安格斯T骨牛扒；而星期四則可享堂食半價港幣$599（原價$1198）品嚐1.2公斤的黑毛安格斯斧頭牛扒。而且牛扒是即叫即燒，除了麵包籃外，每份套餐的Side Dish均伴以即炸薯條、沙律及牛油，實在非常豐富。由原條即切的牛肉，賣相果然澎湃，燒完之後外層帶焦香，配以紅酒更是味蕾的頂級享受。其實係兩三個月前，自己都參過 Flat Iron Steak係上環店所舉辦的肉腸製作班，當時由主理人 Johnny Glover親自指導下，炮製出一條條自家風味的肉腸，非常好玩。當然，The Mistral 都有好多其他菜色，先來一份 Argaosta，把波士頓龍蝦起肉，混和意大利Datterini 蕃茄及Saffron薯仔，放上了啖啖肉的龍蝦鉗，每口都是濃郁的龍蝦鮮味。再來是 Vitello，薄切的小牛肉，放上了松露及吞拿蛋黃醬及黑松露，口感豐腴，又有松露的幽香，我鍾意。至於 Tagliolini 既有亞拉斯加蟹肉、意大利辣肉腸及 Datterini 蕃茄，尤其是麵條蘸滿了惹味的醬汁，煮得又 al dente，水準好高。餐後再來酒店名物 Tiramisu，濕潤可口，灑面的可可粉入口甘甜，秒殺是容易不過的事。很滿足的一餐，尤其是半價下享用高質的牛肉，更是機會難得。優惠日期：由2025年9月16日至11月21日。   …查看更多

一直以來，都覺得十里洋場好抵食，出品穩定，而且經常有驚喜。 早前十里洋場搬去了利園三期，同樣的就腳方便。餐廳位於地庫，不過有電梯供客人使用，無須怕要撐樓梯。 蒜香海參Sea Cucumber with Garlic Sauce海參每口都沾上了蒜香，很美味。 蓑衣黃瓜伴紅蜇頭Sliced Cucumber with Marinated Rosy Jellyfish Head in Aged Vinegar口感清新爽脆，置底的黃瓜刀功細膩，睇得又食得。 香干馬蘭頭伴西班牙火腿Iberico Ham with Indian Aster把傳統的香干馬蘭頭提升，加入了西班牙火腿，多添了一份咸香。 桂花蜜汁黑毛豬叉燒Honey Glazed Iberico Pork Char Siu with Osmanthus很平穩，桂花蜜很甜美，但個人始終喜歡多點焦香。 砂鍋煎焗星班Pan-fried Live Leopard Coral Trout in Casserole原個砂鍋上，保持了熱度，一揭蓋芳香四溢，陣陣蔥香撲鼻而來，星班肉質嫩滑，仲要係用上最佳的斤來重的“條頭班”，我鍾意。 香酥舟山帶魚Deep-fried Hairtail簡單而不浮誇，炸得酥香入味，啖啖肉，個人覺得佐酒最好。 滬式焗釀蟹蓋Baked Stuffed Crab Shell with Cheese避開了蟹蓋常見的通病，就是外層麵包糠太厚的問題，輕輕一戳便能享用，蟹肉更加入了金華火腿、蘑菇及洋蔥，口感豐富。 陳腎扁尖筍燉老鴨湯Dry Braised Grouper & Glutinous Rice Cake with Fermented Soy Sauce夠火喉，筍的鮮、鴨的臊、腎的香，完全溶入湯裡，每口都是精華，就連湯渣都消滅了不少。 珍酒十里富貴雞Prosperity Chicken with ZHEN又是一道充滿了儀式感的菜色，澆上烈酒後點火，即時瀰漫著酒香，用小鎚敲開，內裡是用荷葉包裹的三黃雞，精彩處在於雞殼內是釀入以醬香型白酒「珍十五」炒香的鮑魚、冬菇及洋蔥，雞汁把鮑魚都變得惹味，雞肉都焗至軟熟，輕輕一撕便開。 京蔥扒鴨Braised Duck with Leeks份量太勁，一定要人多先好點，鴨肉燉至糜爛，京蔥的香氣完全混和了鴨肉，油香滿滿的。 揚州紅燒花膠蘿蔔Braised Turnip with Fish Maw花膠的骨膠原自然受歡迎，而蘿蔔更是有驚喜，非常入味又無渣。 冰花鮮肉鍋貼Pan-fried Pork Dumplings with Crispy Net店方名物，底部煎至猶如花朶，咬落肉汁熱燙，肉味又鮮，必食。 …查看更多

 說起與“阿鴻小吃”的鴻哥結緣，至少都有15年以上吧？ 當年鴻哥在北角一條充滿了車房的橫街上開店，還未奪得米芝蓮光環時便已經光顧，直至一口氣連奪五年米芝蓮一星殊榮，店子亦搬了好幾次，我是依舊緊隨美味。 退休前曾在機場工作，亦經常幫趁“阿鴻小吃”在機場T2的分店，但隨著T2的拆卸，又消失了好一段日子。 早前聽到“阿鴻小吃”在機場入境大堂再現身，仲要係24小時營業，啱晒凌晨機既旅客，最難得佢既定價同市區一樣。 今次試返鴻哥好幾款拿手菜式，水準都好穩定，而且又可以買上飛機享用，真係可以衝出香港。 芥末雞腳筋（$108）爽彈依然，好香芥末味又不嗆喉，送啤酒一流。 素鵝（秘製腐皮$98）以腐皮製成素鵝，質地軟熟，又有淡淡的豆香，我太太好鍾意。 叉燒王（例牌$188）如果無記錯，其實鴻哥係燒味師傅出身，叉燒當然難不倒他，有嚼口而蜜味不太重，單點再來配碗白飯最好。 鹵水鵝（半隻$468 ）鹵得入味，尤其是骨膜位有油香，佐酒一流，店方更有外賣服務，帶比外地親友好方便。 鹵水鵝片三拼（$368）鵝片盡見刀功，薄薄的一片，紋理清晰，鹵得入味，另外兩併的墨魚片及鵝腎都是同樣可口。 蒜香雞（半隻$188）好香蒜味，有點把雞味蓋過，但香港食雞一向味淡，很奇怪，但看得出已盡量處理好，單看刀功已是心機作。 花膠姬松茸螺頭燉雞湯（$98位）一百蚊碗湯其實不算貴，尤其是燉湯，單睇材料是佔了大個燉盅，加上以時間換來的美味，每口都是食材的精華。 南乳粗齋（$138）又是鴻哥的另一名物，以紅米水煮齋，配料勁豐富，甘筍切成心形，金針打結，娃娃菜煮得夠稔，就連冬菇都大大粒，當年歲晚同家人食飯，都外賣一盒返去做餸。 香芒鍋巴大雞球（6隻$268）鍋巴炸得啱啱好，色澤淡黃之餘好脆口，雞球澆上芒果汁，多添了甜美感。 上湯蝦球沾米粉（$168）份量十足，米粉炸至焦香而不過份，很喜歡玻璃芡夠薄。 籠仔欖菜肉鬆蒸陳村粉（$128）原籠上冒著熱氣，澆上醬油後，陳村粉蘸滿了肉汁，滑溜的質感，拌以肉鬆，惹味到極，令人吃不停口。 黯然銷魂飯（$128）之前的叉燒再伴以燶邊流心蛋，戳穿蛋黃，讓蛋漿滲入飯粒，真是人間美味。 清心綠豆爽（$38）甜度輕盈，木薯爽口而綠豆爽軟稔，吃得很舒服。…查看更多

說起來，灣仔六國酒店中菜廳粵軒的「黯然銷魂飯」已近十年歷史，經過多次改良，成為終極版本，就在十周年的日子，推出了限定套餐，每款菜式均以「十載」命名。 《十載･功夫湯》：​以精美小巧的茶壺奉客，內裡是響螺上肉燉湯，斟出來湯色清澈，入口陣陣醇香鮮美，是用時間換來的精華。 《十載･粵點心》：​​分別是源自老闆舊日家廚六姐手藝的經典懷舊點心「六姐粉果」，摒棄了蝦仁之類的貴價食材，而是還原昔日的味道。 而「鮑魚燒賣」就相對顯得貴氣，豬肉是吃得出的新鮮，但個人覺得如果想要懷舊，可以選擇豬膶燒賣又或是老式灌湯餃。 《十載･銷魂飯》：​​套餐靈魂菜式「黯然銷魂飯」，十年間持續優化工藝，由叉燒至飯粒，由豬油至豉油都一絲不苟，自家製脢頭叉燒厚切，足足成吋厚，有嚼而鬆軟，蜜味毫不過火，邊位帶焦香，飯粒是泰國青靈芝米，粒顆分明，尤其是加入了澳洲紫洋蔥粒，多了清爽的口感，配上自家煉製的豬油及本地品牌的豉油，別看祂小小的一支，可是要$200啊，澆上了豉油的燶邊溜心蘭王蛋，拌勻一齊食，滋味無窮。 《十載･慶甜圓》：​​甜品是熱辣辣的「黃金煎堆仔」與甜美芳香的「桂花紅豆糕」，其實粵軒每逢過年都有桂花糕出售，今次加上了紅豆置頂，甜美度又加了分。 套餐回饋價每位$388(兩位起 /另加一服務費)已包括茶芥及小食，即可暢享四道佳餚。…查看更多

都有好一段日子沒來石門帝逸酒店的日本餐廳了，不過原有的餐廳已改名為「火蓮花」。 身處28樓的景觀極開揚，尤其是晚上俯瞰城門河景色更美。 而餐廳選用了日本奈禾牛，質素有保證，「霜降」油花分佈均勻，更是吸引。 近日推出了「嘗味套餐」，零售價兩位$1,888（兩位起・另加一服務費），又覺得幾抵食。 前菜：有蒜子漬、 柚子蘿蔔以及醬油漬牛蒡，其實自己好鍾意呢類型漬物，尤其是牛蒡，有嚼口而氣味獨特，最重要係健康，邊食邊聊天最好。 空運生蠔今次係法國及愛爾蘭生蠔，時令又新鮮，質素有保證，食生蠔最緊要係衛生。 前者蠔味較重，而後者就海水味豐盈，總之就各有捧場客。五點刺身：當中包含了醬油漬赤身、中拖羅、牡丹蝦、帆立貝、間八一共五款，吃得出的新鮮，解凍處理得相當好，沒討厭的雪味，軟熟可口，吃得心滿意足。 當中最喜歡間八，除了平日少接觸外，本身肉味清淡，蘸點些少醬油來提鮮，美味。 燒物：甲羅燒-蟹味噌釀蟹蓋是日亮點之一，原隻新鮮生拆皇帝蟹，把蟹膏混和味噌後再燒，慢慢香氣四溢，最後加入蟹肉及蘭王蛋黃，塗上多士上享用，簡直是人間滋味。 蒲燒鰻魚選用了日本鰻魚，肥美肉厚，蒲燒時塗上自家特製的醬油，惹味之餘，入口即化。 原隻加拿大龍蝦開邊明火烤，為了令龍蝦肉烤得更平均，雪白的龍蝦肉咬落彈牙可口，龍蝦頭位置更有肥美的蝦膏，吃得出的新鮮。 窩物：日本國產牛肉 或 西班牙黑豚腩片今次選用了日本的奈禾牛肉，油花分佈細緻，以昆布高湯慢煮烹調，與京蔥、洋蔥及金菇一口吃下，更添滋味。 長崎香草雞野菌釜飯飯粒帶黏性，有嚼口，主力是來自於長崎的香草雞，因為是農民使用無抗生素和抗菌劑的香草，混合乳酸菌作飼料，夠晒健康，兩者配合下，秒殺是必然吧！ 甜點壓軸來一份新鮮甜美的水果，真好。  …查看更多

好記得自己細路時最鍾意放學後同同學去打波，一身臭汗時最佳娛樂就係成班人去士多一人一枝汽水。有時錢不夠，就會飲細吃汽水，開開心心吹水到日落西山，回憶真是無價。家陣香港越來越少可堪回憶的舊事物，未免有點唏噓。近日尖沙咀YMCA再臨閣就推出「經典懷舊廣東自助晚餐」，將餐廳打造成昔日的環境，當然要打返張卡緬懷一番。最開心係可以無限暢飲可樂玻璃樽裝飲品，包括可口可樂、無糖可樂、雪碧、分達及玉泉忌廉味汽水。 自助晚餐推廣日期為2025年9月1日至11月30日，供應時間為晚上6時15分至9時30分。 星期一至四：成人每位港幣$738，小童每位港幣$448。 星期五至星期日及公眾假期成人每位港幣$848，小童每位港幣$578。 小童價目適用於三至11歲。 經網上平台預訂，人均可去到不用$500。一入門口，已經有兒時熟悉的街頭擺設，即時打卡留念。 尤其是有樽裝可樂汽水任飲，雖然不是什麼好值租飲品，但開心回憶湧現。 凍海鮮係大堂中央的長檯，最吸睛一定係凍海鮮，開邊波士頓龍蝦任食，好多都有蝦膏，必食。 另外，琵琶蝦又係好少地方見到，肉質同樣爽彈，好味。 仲有龍蝦鉗、小龍蝦、藍青口、翡翠螺、蟹腳、青口、熟蝦及熟蜆，種類出奇地多，最開心係refill夠快，不怕海鮮位空盪盪。 而且逢星期5、6日、公眾假期及其前夕供應麵包蟹，又多一種海鮮，足足超過10款，係咪好豐富呢？ 刺身有磯煮鮑魚、赤貝、油甘魚及三文魚，老實講，食過好多次，今次質素係最好，而鮑魚又係一個必食位。 仲有即叫即整的花之戀壽司。 Carving Station有即煎虎蝦及牛扒，虎蝦即煎即食，好香口；而牛扒就等切到中間位先出手，帶血絲下肉味份外濃。 熱葷係熱葷中有幾款都好受歡迎，龍蝦鉗伊麵是其中之一，伊麵好入味，龍蝦鉗又啖啖肉，最啱懶人。 而清蒸比目魚勁厚肉又無骨，老人家食都不怕食到碎骨。 避風塘炒蝦就好香口，辣辣地好惹味。黑松露焗蠔焗至表面好香口，食落亦好creamy，不錯。 加埋釀蟹蓋、燒有骨西冷、鮮菌扒魚肚、蘿蔔炆牛腩、愛爾蘭羊肉、煎鯪魚餅、脆香豬手、臘味荷葉飯及滷水拼盤，都好啱老人家口味。 麵檔好多時都係普普通通一款就算，第一次係自助餐食到酸菜湯麪，配料有魚片、豬肉片、雞肉、魚腐、銀芽、豆腐卜、韭菜、魚角、豬紅、生菜、米線、油麵及米粉，我當然會整返碗。 其實佢仲有碗仔翅及魚肉等兒時街頭小食，記得試埋。湯品西湯是滑溜香甜的南瓜湯，而中湯是好家常feel既青紅蘿蔔豬肉湯。 頭盤有煙三文魚、水晶肴肉、南京凍鴨、廚師沙律、雞絲粉皮及醉雞翼。 個人幾鍾意碎雞翼，有淡淡酒香，雞皮又爽又滑。 Cold Cut 及芝士拼盤有黑松露軟芝士、黑胡椒吞拿魚及莎樂美腸。 甜品最吸睛一定係哈根大師雪糕，因為有比利時朱古力、Summer Berries & Cream、Pistachio & Cream、Caramel Biscuit & Cream以及 Mango & Cream五款不常見口味，大家記得試多幾款呀！ 再臨閣的甜品一向都係被人遺忘的一族，但老實講，又真係幾好，無論味道的配搭及質感，都相當到位，值得同大家介紹一下。 即焗即食既經典焗梳乎厘，質地鬆軟而芳香，自然是不能錯過。 押上自家名號的YMCA自家製曲奇餅，果然鬆化可口，如果配埋咖啡就最好。 同行朋友最愛黑森林蛋糕，原來懂的人更多，因為最快被消滅的就是黑森林蛋糕。 另外有特別日子提供的甜品。 懷舊黃梅果占蛋糕（逢星期五、六、日，公眾假期及其前夕供應） 核桃忌廉拿破崙（逢星期一至四供應，公眾假期及其前夕除外） 而懷舊系列有懷舊乾果蛋糕、焗蛋撻及葡撻、缽仔糕、芝麻卷、紅豆茶果、杞子桂花糕及楊枝甘露。 真係勾返童年回憶，如果有埋即整蛋卷同有「買餸籃即切滷水紅腸生腸」，飲品若然增添埋「美祿」、「和尚戴帽」同「黑牛」，就更加形神俱備了。 …查看更多

每次去會展參觀展覽，都會找多年曼聯迷老友聚下，好多時見抽到空，都會順便食埋午飯。 是日又有相關美食的展覽，受邀下出席，見仲有時間，先醫肚再喪逛吧！ 中午時段是全場滿座，相信是與展覽館活動有關。 近日中菜廳中庭裝修完，原先半開放式廚房位已封，未免有點可惜，因為個人好喜歡望住師傅把食材變成美饌的過程，而且衛生條件佳，令客人更加有信心不是更好嗎？ 望望餐牌，改動都幾大，其實由點心開始，都有了不少改進，竹笙鮑魚雞紮（兩件）（$88）連焗盅上，賣相改善了，竹笙既清爽又能吸汁，變得好惹味。鮑魚咬落好稔又有嚼口，絲毫不覺韌。 而焗酥皮焗山楂叉燒包（$68/三件）似乎是雪山包的變奏。即叫即焗下夠熱度，外層的確有點酥化，而餡料比預期中乾身，食落毫無負擔，不錯。 作為素菜，南瓜彩椒雞頭米配紫菜脆杯及生菜片（$168/各四件）相信好啱素食者。以新鮮茨實，搭配南瓜粒、彩椒及甘筍粒去炒，除了自然的甜度，更有少許辛香，大家可以放落羅馬生菜包起食，更添清爽的口感，而放落紫菜脆杯，更有種東南亞菜的氛圍。 兩個人只簡單的點了半隻客家蔥油脆皮炸子雞（$258/半隻）（$488/隻）。置底的蔥油煸得好香及稔身，與雞肉是絕配，炸子雞雖然有點油，但雞皮又薄又脆，好香口，雞肉亦不覺嚡，有水準，加埋蔥花用來伴飯一流。 單尾個名好得意，叫「禾加馬得梨」（$198），鍾意睇波既朋友一定會發出會心微笑。其實分拆開又好易明，「禾」當然係措米粒，而加上「馬」碲、「Duck」及「梨」去炒。 有圖有真相，飯粒炒得好乾身，加入菜頭令口感更佳，馬碲的爽甜與鴨肉的惹味，很有趣的配搭，卻又沒有違和感，幾片梨片的甜香，吃起來有平衡的作用。 吃得飽飽的，自然要入場行下幫助消化。   …查看更多

 香港真係好，就算幾天時暑熱，只要想食，都可以去打邊爐，火鍋湯底變化多端，配料又豐富，今次就同朋友去了旺角的亞南雞煲。 而且餐係太子站附近，出入都好方便。 因為餐廳係同西貢六福姊妹店，所以有椒鹽鮮鮑魚提供（$48隻），水準似乎總店較好，但比起坊間好多酒樓做得認真，肉質軟稔又大隻。 同樣價錢有酥炸桶蠔（$48隻），又係勁大隻，內裡好juicy，而且熱辣辣，咬落一定要小心。 其實店方都好多炸物，蝦多士（ $65 ）做得非常工整，咬落酥代可以，一點都不油膩。 而麻辣墨魚鬚（$65）及麻辣豬耳 （$65）既辣度啱啱好，刺激了味蕾。 皇牌脆炸牛坑腩 （$88例牌），驚大家唔夠食，加孖份上檯，外層一層薄脆漿，坑腩事前炆煮夠稔，蘸點一下喼汁就更惹味。 今次人多食，一於點了兩個鍋底。 一個是冬瓜花膠瑤柱花甲雞煲(大) 加野生竹笙皇(一份)$468 ，另追加新鮮雞（$200） 及竹笙皇（$128） ，單是鍋底近$800，但大家可以先飯返碗花膠雞湯，然後再開始打邊爐，今次個冬瓜花膠瑤柱花甲雞煲係用上新鮮雞，所以湯底份外鮮甜，雞肉又正。 另一個係牛雜雞煲(半隻冰鮮雞) 加日本帶子(一份)，就抵食好多，都係$426，當然就無湯飲，但食完牛雜就可以加湯做火鍋，重點係牛雜真係炆得好稔。講真，佢仲有好多不同雞與海鮮或肉類的配搭，總有一款啱大家。 食火鍋牛肉少不2了，一大碟安格斯牛小排(大)（ $328）送雜菜籃1個），最啱大家 share。 而極品黑豚肉（小）（ $188）話就話小碟，但都大大塊，幾軟熟。 仲有好爽脆彈牙既桂花蚌 （$148），淥幾淥就食得。 當然要有我鍾意既牛柏葉 （$48）同頂級鵝腸 （$72），好邪惡，但份量好足，大滿足。 而頂級炸魚皮 （$58）、咸蛋流心丸 （$58）、極級芝士牛丸 （$58）、鳳城水餃（ $58）同埋台灣刀削麵（$25），都係火鍋中不可或缺的成員，有時候你未必想食，但無既時候又覺得不可或缺。 食火鍋飲品少不了，除了大路的啤酒汽水外，仲有幾款 homemade涼茶。當中包括了五花銀菊茶、羅漢果菊花靈芝茶、一品木瓜雪耳、海底椰雪梨茶及粟米薏米水，每樽都係$30。 見近日都有兩聲咳，海底椰就最好。 一行六人，連加一$3500左右，人均不到$600，不錯。…查看更多

好耐都食宵夜了，小時候最愛跟老爸在街頭吃宵夜，那種情懷是一生最美好的回憶之一。只可惜近年經大力整頓，香港昔日街頭巷尾的車仔檔是蕩然無存，加上政府只一味推諉，想重現往日光景，幾乎是沒可能的事。其實政府常說要緊靠大灣區，遠的不說，單是深圳已經有水圍夜市，中山的露天車仔檔，每晚九時便會有人清場，逾百部熟食車井井有條的在街上擺賣，熱鬧到似去了年宵市場，個人覺得只要好好監管，重視往日上環大笪地的風光不是問題，更可以吸引外國遊客，對嗎？不過要找，總是有地方的，位於金鐘地鐵站上邊的香港港麗酒店的樂聚廊，近日又有名為「饗•樂之夜」的宵夜自助餐提供。今次就係同囝囝去，延續同父親一起共聚的時光。現場有live band，演唱的都是耳熟能詳的經典中西流行曲，講真，回憶返晒。食物種類與正常的自助餐只有少許出入，但價錢就平了一截。P.S : 供應日期及時間: 2025 年６月６日起，逢星期五及六 (公眾假期除外) 晚上８時至 11 時價錢: 成人港幣$388; 小童 (6-12 歲) 港幣$258  (所有價目另設加一服務費)中東傳統烤雞沙威瑪雞肉烤得好看，碎切更是有層次感，好少係自助餐見到，不過最好同朋友分享，因為一件都好易飽肚。 湯麵類麵類當然就好啱我，湯底有清雞湯、馬來西亞喇沙湯及魚湯，配料有齊水餃、雲吞、龍蝦丸、魚片、魚蛋及豆卜等等，都好豐富。 點心酒店本身有金葉庭中菜廳，點心不假外求，最欣賞餐廳每款點心都是位上，每籠一粒，好多時如果係一大籠放係度，好易比人摷到散晒。四款口味分別是蝦餃、燒賣、南瓜素餃及牛肉球，都在水準以內。 熱葷質素好好，所以都有好多款比人圍攻。印度雞肉咖喱雞肉一點都不覺老，咖喱香而不太辣，我鍾意。 肉鬆四季豆當然不是乾煸，但都炒得好入味。 乾燒伊麵都幾乾身，但有些少咸，早排近生日，一於當生日長壽麵食。 揚州炒飯油份不多，炒得好乾身，蝦仁同叉燒粒大隻又多，但蔥花只簡單的灑上面，我自己炒會加埋一齊兜，逼出香氣。 南乳炆豬手炆得啱啱好，皮位有嚼口，最啱撈麵。 中式蒸魚用上了海鱸球，啖啖肉又蒸得恰到好處，吃了不少。泰式煎魚是另一種風味，魚肉好乾身，煎至微焦，所以有嚼口。 其他仲有燒豬脾骨、豉椒炒蜆、避風塘炒蝦、素菜春卷、蔬菜咖喱角及泰式魚餅。 什錦壽司，都係十款八款，作為宵夜，夠啦！ 另外仲有泡菜豆腐、泰式青木瓜豬頸肉沙律及香檳蝦雞尾酒。 甜品提一提大家，Movenpick雪糕係要同侍應講先有，因為現場係無雪櫃，問過侍應，有雲呢拿、朱古力、士多啤梨及咖啡四款口味。 金葉庭木瓜雪耳糖水講真，又真係幾好喎，不太甜之餘，仲要好足料，雪耳亦都好稔身。 金葉庭楊枝甘露押得上中菜廳的，自然有信心，西米夠稔，芒果肉勁多，正過坊間好多甜品店。 豆腐花雖然未夠大埔名物出色，但已經不錯。 中式甜品仲有合桃酥及笑口棗，都是中菜廳出品。 西式甜品我覺得芒果慕絲好甜滑，而荔枝紅桑子玫瑰蛋糕有種芳香馥郁的感覺。 其他的水果果凍、芝士蛋糕、麵包布丁及水果盤，都有不少捧場客。 最可惜係飲品只得一杯，就算有開水供應，有時都想飲多兩杯其他飲品，有點美中不足。…查看更多

自從海景軒經重新打造後，以實力吸引了不少食客，余照軍師傅的努力有目共睹，今次更聯乘深圳國際會展中心洲際酒店梁桂鴻師傅，來個近年大熱的四手聯乘套餐，將粵川兩菜系盡情發揮。 紫蘇玉女瓜、桂花蜜脆鱔Morinated Jade Melon, Purple Perilla, Deep-fried Eel, Osmanthus Honey Sauce漬過的玉女瓜盡見刀功，除了獨特的紫蘇香氣，更有蘋果醋的甜酸，咬落清新爽脆，在炎夏很適宜；選用了達兩斤以上的大白鱔，酥炸後，澆上homemade的桂花蜜，可口甜美。 Riesling Trocken, Dr. Bürklin-Wolf, Magnum Bottle, 2021, Pfalz, Germany帶少許青蘋果的氣味，酸度適中，洋溢著花香，正好要來開開胃口。 客家風味手撕雞Shredded Chicken, Scallion, Coriander, Peanuts, Sesame手撕雞撕得細碎，加入了海蜇、花生、薄脆、椒粒、芫荽及洋蔥絲，撈起後口感複雜有層次，好味。 酸蘿蔔湯過橋蚌仔Poached Sea Clams, Pickled Radish, Supreme Broth酸蘿蔔原來係由師傅醃製，切成細粒配合魚湯，起了提鮮的作用，蟶子王洗得勁乾淨，用滾湯澆上，灼至緊熟，鮮甜爽彈，加碗白飯來作泡飯也是一絕。 黃金蟹盒、麻辣小龍包Deep-fried Crab Meat Dumpling, Minced PorkSteamed Shanghai Style Dumplings, Minced Pork, Chili Sauce蟹盒這類手功菜，莫講話做得好食，就連坊間都係買少見少，有得食就好食。兩片冰肉經玫瑰露醃製及冰鎮後切成薄片，夾層中間是蟹肉、冬菇、豬肉及蝦肉，做得工整，炸得色澤金黃，明顯是以新油去炸，不帶半點異味，很對辦。 而小籠包呈艷紅色，是加入了紅菜頭汁去搓，自然多了點果甜，包工細膩，咬落熱燙的鮮肉汁隨之而來，小心。 Chardonnay, Tiansai Vineyards, Skyline of Gobi, Selection, 2023, Xinjiang, China以Chardonnay來配以海鮮是最好不過，有少許酸度，令海鮮的味道提升了。 海南黄椒醬蒸星斑球Steamed Spotted Grouper Fillet, Hainanese Yellow Pepper Sauce黃椒醬是師傅自家醃製，誠意十足之餘，對味道的掌控可以更精細。星班是我最愛的魚類前列，起球是啖啖肉，以椒醬蒸帶來少許辛香，很有趣，效果亦很好。 烈焰竹炭和牛肋肉Flambé Wagyu Beef Short Ribs, Bamboo Charcoal一道充滿了儀式感的菜式，起初 見送來一舊黑黝黝的竹炭，完全摸不著頭腦，仲要澆上烈酒點火，再用精巧的小鐵鎚敲打，竹炭裂開後，更露出以荷葉包裹的和牛肋肉。牛肋肉烤焗至極軟稔，說真的，就算“無牙”都食到，真係好啱老人家。 Malbec, Xige Estate, N28, 2022, Ningxia, China產自中國寧廈，單寧好適中，似乎可以配襯好多肉類，近年中國的紅酒已經常出現於高級餐廳內是好事。  天府擔擔麵Tianfu Dandan Noodles所謂天府，即是四川，一般擔搶麵都是以湯麵為主，但四川搶擔麵卻是撈麵，而且加入了宜賓芽菜，是更見風味，坊間亦少見，麵條沾上醬汁，比湯麵味道更濃郁，少許辛辣，亦令人食指大動。 茉莉花生酪、酥皮雪燕杏仁蛋撻Peanut Cream, Jasmine Jelly, Baked Almond Tarts, Snow Swallow呷一口，濃稠香滑的感覺油然而生。 至於蛋撻的酥皮很鬆化，杏仁味輕盈，放入雪燕更是健康。 整個菜單每位$988(兩位起)，若是海景嘉福餐飲美食會會員每位$888(兩位起)，如果想喝上一杯，配上三杯佳釀，都只不過另加$368。…查看更多

幾年前好友移民，臨行前跟她來了一次午餐小聚，當年的用餐體驗，至今念念不忘，今天重臨，昔日光景，彷如歷歷在目。 門前佇立的武士，簡撲的裝潢，沉穩的色調，予人想靜靜用餐的感覺。 午間以套餐餐供應為主，希戈餐廳午餐每位$588。 先是自選頭盤又或即煮龍蝦湯。 餐廳的頭盤手推車一向有名，由凍蝦到紅菜頭沙律共有十多款，客人大可隨意挑選當中的三四款，悉隨專便。 客人又可以選擇濃稠的龍蝦湯，正所謂有圖有真相，龍蝦湯只放了不到一分鐘，表面便呈視一層薄膜，便可想而知，而且真係有龍蝦肉，配麵包一流。 主菜方面，有（意瓜茴香脆餅、甘筍蓉、番茜松露沙律）香煎鱸魚柳、（茄子、時令蔬菜、香茅牛油汁）烤羊柳配油封羊髀、（迷迭香燒汁、千層薯仔、青豆蓉、烤青蔥）原隻大西洋波士頓龍蝦拼盤酥皮盒及扒龍蝦（另加$40）、燒美國頂級牛肋骨肉（另加$40）（席前銀車切片）以及本月特選，廚師精選澳洲MB6和牛牛扒（另加$40）（炸薯條、黑椒汁）。 幾位朋友各有所好，我是食肉獸，當然二話不說選了Prime Rib。 由銀車推至餐桌前切，充滿了儀式感，肉質鬆軟有嚼口，滲著血絲，肉味濃郁，澆上了肉汁更是美味滿分，配上的Yorkshire Pudding，沾上了肉汁，又是一個加分位，side dish的薯角吃得令人心花怒放，簡單的兩個字～滿足。 意猶未盡的話，大可另加$100來份自選甜品。 又是餐車出現的時間，客人可在甜品車中挑選三款甜品，我就選了鮮果杯、朱古力慕絲及無花果撻，其他更有即炙Crème brûlée、開心果撻及Tiramisu，總有一款啱妳的。  …查看更多

終於“登陸”了，正日當然想對自己好一點，太太特意請假陪我，囝囝又放暑假，最好就由起身一直食同玩足一日。 午間係另一間酒店品嚐了下午茶，晚飯就選擇了九龍酒店的倚窗閣，今次的主題是‘’夏日美食狂想曲‘’（地中海香草美饌配搭特色滋味火鍋）。 可能網上平台有折扣，就算是平日，居然有8，9成客，是少見的熱鬧。 磯煮鮑魚以前會有兩至三款生蠔供應，但可能之前太多餐廳出事，倒不如轉做熟食仲好。 磯煮鮑魚真係好正，肉質軟熟入味，食幾多都有。 海鮮有俄羅斯雪花蟹腳、藍貝、青口、咖啡蟹、海蝦及翡翠螺。 解凍處理得不錯，質素有保證，點都要食返一round。 刺身係香港酒店自助餐中，倚窗閣的種類及質素都好好，有劍魚腩、三文魚、油甘魚、八爪魚、紅蝦、赤貝、帶子及北寄貝。 火鍋近年酒店自助餐都多了點新意，火鍋是其中一樣，而且食落又幾豐富喎！ 主打有美國牛肉片、伊比利亞豬肉片、海螺、蠔肉、沙白、鮮蝦、魷魚、鮮花甲及龍躉片， 其他配料蔬菜類有高麗菜、唐生菜、金針菇、冬菇、白蘿蔔片、皇帝菜、冬瓜片、芫茜及腐竹。 而湯底有椰子雞、法式海龍王以及四川麻辣湯，講真，海龍王湯硬係覺得怪怪的，還是傳統椰子雞啱我。 越式牛肉湯麵有豬骨及牛肉兩款湯底，另外配料有牛丸、炸魚片、扎肉、豆卜、肥牛肉、芽菜同西生菜。 作為澱粉質怪，當然要食返碗，老實講，湯底又真係幾好，湯色清而味濃，我鍾意。 Carving Station香草海鹽慢烤有骨肉眼扒一如以往，都係等到中間較生的位置先出手。 北京片皮鴨即包即食，可以自行加配醬料，鴨皮有油香，不錯。 另外有香煎rosemary羊扒、鹽燒牛舌、免治雞肉棒、意大利莎樂美場薄餅、日式天婦羅及鷹嘴豆配中東包。 真心推薦鹽燒牛舌，厚切下啖啖肉，好食。 熱葷酒店本身有中菜廳，中菜出品穩定，所以都好受食客歡迎。 養生系列野生姬松茸炆雞炒得幾乾身，雞肉亦嫩。 紅棗欖角蒸排骨甜甜地又醃得好入味，尤其是個汁，用來拌白飯一流。 蔥油頭抽蒸比目魚勁厚肉又無碎骨，蔥油好香，有提味的作用。 西式熱葷仲有美式燒排骨、摩洛哥紅酒牛肉、鹽燒三文魚鰭、黑松露卡邦尼意大利粉、三文魚炒飯、忌廉薯片及西班牙海鮮炒飯 再來一碗街頭小食碗仔翅及咖哩三寶。 湯倚窗閣既湯品一向都好夠火喉，尤其是係中湯。霸王花粟米甘筍煲唐排一揭開蓋，已經瀰漫香氣，忍不住飲了兩三碗。 西湯是南瓜甘筍湯，質感滑溜，甜度來自南瓜及甘筍。 沙律有八爪魚蘑菇沙律、素菜藜麥沙律、煙火腿菠蘿沙律以及吞拿魚沙律。 芝士有橙車打芝士、蒜蓉芝士以及大孔芝士。 Cold Cut有紅椒凍肉腸、意大利前菜、煙三文魚、精選意大利凍肉雜錦、芝麻吞拿香芒莎莎及西班牙凍湯配鮮蝦。 甜品Movenpick雪糕有雲呢拿夢幻、瑞士朱古力、士多啤梨、 薄荷朱古力、特濃咖啡、熱情果芒果雪葩、法式焦糖燉蛋、Rum酒提子及香蕉味，可以杯上，又可以配甜筒，所以好受歡迎。 每晚都會有即製火焰雪山，當年同太太拍拖時的回憶一下重現。 當然要食即焗梳乎厘，輕盈鬆軟的質感，好對板。 太太比較鍾情中式糖水，這個紅棗雪耳燉桃膠就最啱佢。 加埋即制窩夫、DIY豆腐花及涼粉，種類可算多。 Whole Cake有芒果熱情果慕絲蛋糕、十勝紅豆宇治綠茶蛋糕及72%黑朱古力慕絲蛋糕。 為免比人拆散，最佳方法係盡早食，對嗎？比較迷你的有西班牙果酒凍、木糠布甸 、芒果布甸、藍莓芝士餅、北海道3.6牛乳芝士蛋糕、開心果葡撻、葡撻、加泰隆尼亞焦糖奶凍、什莓特飲、紅桑子檸檬忌廉、黑芝麻布丁配雲呢拿汁、Cupcake、啫喱糖（青檸、黑加侖子、士多啤梨及芒果）、杞子桂花糕 及洛神花椰汁糕。 整個甜品區超過20款甜品，好啱心多的朋友。 水果有蜜瓜、哈密瓜、士多啤梨、西瓜及菠蘿。 飲品凍櫃有汽水，另外有橙汁、蘋果汁、薄荷香橙水以及冰凍紅茶，仲要係free flow。…查看更多

 “登陸”的一天，好好憩睡至中午，醒來已經肚餓，對肚皮當然要好一點。 就先由一頓下午茶開始。 位於尖沙咀的皇家太平洋酒店已有好一段日子沒來了，餐廳的自助餐早已取消，換上了半自助餐，也對，有時要順應時勢。 Pierside的位置挺好，靠窗位置可以望到海景，是日陽光普照，與近日狂風暴雨是兩碼子的事。 氣泡茶白桃氣泡伯爵茶（$88）餐前點了一枝手功氣泡茶，係5款口味中挑選了白桃味，因為有氣泡的帶動，令白桃味好突出。 而酒店方面，首次同本地手工有機香氛品牌 Ignite Candle合作，推出了Aromatic Fruit Afternoon Tea（芳香果韻下午茶）。 現凡每兩位賓客惠顧下午茶，即可免費獲贈    Ignite Candle「有機精油擴香瓶」乙份（價值港幣$280），送完即止。 推廣期由即日至9月30日，快閃優惠7折，每位港幣$187.6（須於酒店官網預訂及繳付全費）（原價每位港幣$268） SAVOURIES 鹹點Pan-fried Ocean Scallop with Hot and Crispy Chip香煎帶子配辣味脆片帶子略為煎香兩邊，以辣味脆片夾好，兩種截然不同口感又沒有違和感，加入生菜有點清爽的感覺。 Deep-fried Chicken Lollipop with Wild Berry Jam脆炸雞肉棒棒配野莓醬雞肉炸得外脆內軟，就算不蘸點野莓醬都超好味，尤其是用錫紙包裹骨位，方便拎上手食，更見細心。 Baked Mini Croissant with Cheese Tuna Salad焗芝士吞拿魚沙律牛角酥牛角酥很酥化，中間夾有原片芝士及吞拿魚，令牛角酥變得更可口。 Parma Ham Melon巴馬火腿配哈密瓜經典的傳統配搭，咸香的火腿與甜美的哈蜜瓜的組合，從來都是絕配。 SWEETS 甜點Passion Fruit Profiteroles百香果泡芙置頂的泡芙，蓋上了百香果忌廉，少許酸度，正好起了平衡的作用。 Guava Mascarpone Cheesecake番石榴瑪斯卡邦芝士蛋糕迷你小巧的圓球，每口都是番石榴及芝士的香氣，很少甜品會用上番石榴，但效果出奇地好。 Lychee Yoghurt Delights荔枝乳酪杯荔枝的甜美芳香，自古已經受歡迎，融入甜品之內，味道更加提昇，奶滑芳香，太好了。 Mango Napoleon芒果拿破崙三層酥皮層次分明，中間的吉士醬好香滑，置頂的芒果肉夠熟又甜香，有水準喎！ Honey Scone Served with Clotted Cream, Orange Jam and Strawberry Jam蜜糖鬆餅配忌廉、香橙果及士多啤梨果醬很喜歡鬆餅份量啱啱好，又可以分別塗上Clotted Cream同兩款果醬，味道有變化。 Freshly Brewed Coffee or Tea即磨咖啡或茗茶及A Glass of House Red or White Wine精選紅酒或白酒乙杯 一個下午茶，足足有四杯飲品，都係百幾蚊一位，去茶餐廳飲杯凍檸茶都要廿幾蚊啦。 話晒未食午飯，一行三人當然要加菜。 係 a la carte點了澳洲菠菜苗、蟹肉、芝士意大利燉飯（$158），份量好足，飯粒有 al dente的質感，芝士完全溶入飯粒，很濃稠的味道，囝囝就最鍾意。 另一道是港式焗豬扒飯（$148），聽侍應說是餐廳最受歡迎的菜色之一。 雖然豬扒未至於勁厚，但焗至表面焦香，內裡的蕃茄帶來的酸度，令油膩感減輕了不少，醬汁拌和飯粒一齊食，更是惹味。 開開心心的過了一個下午，能在生日當天跟家人一起是最幸福不過的事。…查看更多

說起來，灣仔合和酒店已開業了一段日子，早前試過人氣半自助餐中餐近日推出‘’夏季時令套餐‘’（$638），連加一及茶芥，大約$700左右，以酒店級別已不算貴。 夏季開胃精選合和黑豚肉叉燒、蜂蜜桂花脆鱔、話梅白涼瓜Summer Appetizer PlatterHoney Glazed Iberico Pork | Deep-fried Eel, Honey, OsmanthusMarinated Bitter Melon, Plum Sauce黑豚肉叉燒今次有點結實，蜜味亦較輕。 脆鱔就因為忙於拍照，錯過了最佳的食用時間，非戰之罪。 白涼瓜以話梅水泡浸過，咬落有爽、甜、酸及甘幾種味道，冰鎮了更是夏天最想食的前菜之一。 養顏八寶枕瓜湯Double-boiled Winter Melon Soup, Assorted Seafood, Lily Bulb, Lotus Seed原個迷你冬瓜上，食完可以平飽，新鮮蟹肉、蝦仁、帶子、蓮子樣樣齊，最重要係有夜香花，夠晒消暑清熱，冬瓜肉又夠稔，用湯匙挖呀挖，吃得只淨得瓜皮。 豉汁輕煎立鱗馬頭Pan-fried Threadfin, Black Bean Sauce近排似乎中西日菜都遇上了“立鱗”，猶幸幾次的水準都好高，馬頭魚鱗淋油火喉啱啱好，沒有過火或不足的地方，豉汁經調較，味道不會太嗆，芡汁亦夠薄，我鍾意。 雞樅菌醬唐芹炒牛柳粒Sautéed Cubed Beef Tenderloin, Chanterelle, Chinese Celery,Termite Mushroom Sauce賣相比較平實，牛柳粒好鬆軟，亦有少許鑊氣，但油份好輕，處理得不錯。 薑米貢菜蝦鬆炒糙米飯Fried Brown Rice, Minced Shrimp, Yamaurage Vegetable, Ginger口感豐富，薑米的辛香、糙米的嚼口以及蝦鬆、菜頭的結合，正好多添了層次感，而且飯粒炒得好乾身，有水準。 荷塘碧玉Green Tea Panna Cotta, Jasmine Tea Syrup以粉青色作主調，其實是綠茶奶凍，旁邊是茉莉茶糖漿，如果奶凍的造型可以似一朶荷花會更加分。 意猶未盡，追加了一道陳皮香辣牛尾（$368），老實請，辣辣地又真係好惹味，牛尾炆得夠稔，部分牛尾肉溶入汁內，隱約的陳皮香氣，令人食指大動，用來拌飯一流。 餐廳有好多廂房，想有私人空間最啱。   …查看更多