KATHY WONG的个人专页

好味嘅地方係值得一去再去，尤其係好嘅Pet Friendly餐廳更加會去多幾次都唔嫌多。帶狗狗一齊去北角玩，唔洗諗就一定係要去CACTUS依個墨西哥菜午餐兼勁打卡。今次我地係星期六嚟，未到中午十二點就已經座無虛席 ，室內同半室外都坐滿客人同狗狗，令到成個環境都好熱鬧。(因為太多人，所以唔太方便影環境相)我地就叫左兩個Lunch Set，然後Upgrade左配有餐湯、沙律同Mocktail。當然唔少得加配埋墨西哥著名小食Taco啦！先嚟是日餐湯係番茄湯，好濃香嘅番茄味，入口酸酸甜甜，好開胃。沙律都好則清新爽口，唔錯。Mocktail方面我地就叫左兩杯飲品都好有特式， Obsess就係由石榴汁再加上蘋果汁，當然佢嘅重點係下層係手工制嘅青檸啫喱，有得食又有得飲，令到整個感覺好好清新。而Aloof就係以番石榴同烏龍茶為主，入口都好特別，重點就落係杯邊梅粉，所以飲嘅好得意更加解膩。餐前小食就嚟手撕豬同燉牛肉嘅Tacos，用脆卜卜熱辣辣嘅粟米片包住滿滿嘅手撕豬同燉牛肉，再加埋啲配菜，入口好味得嚟仲好滿足添。主菜方面先嚟蟹肉帶子龍蝦汁寬蛋麵配牛油燒琵琶蝦，睇賣相已經好豐富，入口仲覺得好味。寬蛋麵嘅口感厚實得嚟又好彈牙，龍蝦醬汁非常鮮甜，仲有帶子同埋三文魚子，不得不提佢嘅蟹肉份量都真係好多，再加埋非常新鮮琵琶蝦，整個配搭加埋一齊真係非常好食。另一個主菜係燒黑毛豬鞍架，黑毛豬鞍架肉質非常軟熟，juicy得嚟又好有豬味，加埋豬鞍架上滿滿嘅香草香料，成個感覺真係好出。再加埋清清甜甜嘅燒菠蘿，令人非常回味呀！堅Pet Friendly當然唔少得主子份，Pet Menu嘅提供咁主子唔止係陪食打卡咁簡單，齊齊開心食飽飽。…查看更多

三口子入左大美督行大霸同郊遊，之後我地就去左附近三小時任食任飲嘅巴希雅海灣重慶燒BBQ。俾左人頭費入場之後，就會有手帶同一張咭仔，咁就可以去拎嘢食同飲品。而菠蘿、香蕉、大蝦、沙白、金菇菜同雪糕就係按人頭贈送嘅。揀好位置就有職員為我地準備個爐，個爐真係好勁，個火好猛得嚟我地燒左幾個鐘都唔洗加炭，而且又唔會有好多炭灰周圍飛，亦唔會攪到周身炭煙味，真心覺得唔錯。當然最好就係可以好方便地放啲食物係烤網上燒，所以我地就密密燒又密密食啦！飲品種類真係超多選擇，有汽水、涼茶、烏龍茶、檸檬茶….就連唔同牌子嘅啤酒都係任飲，絕對係十個正。食物方面同樣都係超多選擇，肉類牛仔骨、羊扒、豬扒、豬頸肉、雞全翼。另外仲好多款丸類、菇類、蒜容包、魷魚…，大部分都已經串好嘅食物，所以食起嚟方便又易處理。基本上樣樣都好醃得好夠味，強烈推介安格斯牛肉串、羊扒、豬梅肉扒，真係超級好味。當然唔少得大蝦同沙白都好高質，大大粒新鮮得嚟又夠彈牙，如果可以食多幾粒咁就真係冇得頂。燒菠蘿同燒香蕉同樣都係我杯茶，一個字….正。密密燒到冇停手肚餓嘅仲可以去拎燒賣同蕃薯即食添食埋杯雪杯就完美了整體上食物、環境、衛生都令我地非常滿意，有機會一定會再嚟食過呀！…查看更多

朋友介紹話牛頭角有間好正而且食物質素嘅日系小店，竟然講到咁好，就緊係要嚟會一會佢先啦！餐廳以木系為主嘅裝修，加甘光線好充滿，令到整個環境都好舒服。午餐嘅選擇都多元化，既布主打嘅一汁三菜午餐定食，仲有菜湯漬飯、洋食漢堡扒系列同埋素食餐。先嚟升級左嘅兩杯特飲，青柑桔賓治梳打同埋新鮮水果茉莉綠茶，單睇賣相都係十個正，入口非常有驚喜，甜度又剛剛好，酸酸地清新又解渴。我就嚟左個嘅 日本花魚一夜干定食 ，另外再加配兩份小食。第一次食一夜干，估唔到佢個嘅肉質緊致得嚟仲可以咁鮮甜，魚油亦非常豐盛，燒封得魚皮香脆，入口真係有濃濃嘅魚香。雖然附上有醬汁同埋檸檬，不過我覺得原味食更好味。小食方面先嚟香橙牛油果沙律，香橙嘅酸甜加上牛油果嘅奶油般滑順，再配上果醋，三者個味道好夾，依得好清爽。三文魚南蠻漬，清爽酸甜嘅南蠻漬配上細滑又Juicy嘅三文魚， 口感滑嫩不澀，酸酸甜甜咁好味又開胃。再嚟磯煮甜魷魚，魷魚口感非常彈牙又滑溜，魷魚味都非常濃厚，加埋有淡淡磯煮嘅甜味，真係好味唔停口。 另外仲叫左漢堡扒•吉列蝦•忌廉蟹肉薯餅•日式燒汁配薯條，幾款炸物都炸得好鬆脆香口，厚厚嘅漢堡扒煎得香口，肉質夠濃郁，而吉列蝦外脆內嫩，再配個滿滿蟹肉忌廉嘅忌廉蟹肉薯餅，鮮甜美味非常好味。不得不提附送嘅南瓜湯，口感豐富落足料，湯滑身得嚟又夠creamy，仲有超濃香南瓜味，飲落又唔會好膩，完全係驚喜之作呀。…查看更多

好味係會再嚟幫襯，約朋友食飯短聚就當然要搵個舒服又relax嘅餐廳，所以我地就再戰Casamigos，一起來享用豐富午餐。餐廳環境舒適得嚟有格調，坐係沙發上感覺夠晒chill，如果唔係天氣太熱，我地坐戶外感覺應該更加正。先嚟Set Lunch加配嘅雜菜龍蝦湯，入口非常Creamy既有龍蝦嗁鮮味又有蔬菜嘅清新，口感唔錯。我地另外加左兩份餐前小食，先嚟西班牙八爪魚粒寶石生菜沙律，爽口清甜嘅寶石生菜淋上甜椒蛋黃醬，加埋煙韌彈牙八爪魚粒、卜卜爆汁嘅三文魚籽同埋蕃茄乾一齊食，既得意又夠Flash。另一份係 香煎鵝肝多士配甜酸青瓜柚子莎莎，估唔到塊鵝肝仲厚過件多士，而鵝肝外脆內嫩入口即化，加上脆卜卜嘅多士同埋酸甜柚子莎莎，食落一啲都唔油膩。朋友仔嘅主食係 薑味橙香橡果西班牙黑毛豬鞍架，豬鞍架肉質超嫩滑，油脂分佈均勻，入口仲非常juicy。而且食落仲有陣陣嘅薑橙香味，令到成件事都好清新，再加埋滑身嘅薯蓉，令到整個主食非常豐富。我嘅就係 香煎紐西蘭比目魚柳佐香濃蝦湯，魚皮煎得好香脆而肉質好嫩滑，配上香濃蝦湯蝦汁更加突出比目魚嘅鮮味，兩者真係互相輝映，食嘅時候加入埋嫩滑嘅薯蓉，整個風味非常豐富。最後飲埋杯餐飲就完美晒…查看更多

同朋友慶祝生日就當然要搵個環境舒服又坐得耐嘅地方慢慢邊食邊傾。上openrice碌左好耐，最後就決定去樓上鋪嘅意大利餐廳。餐廳雖然唔算大，但寬闊嘅環境都令人好舒服，而整體上都感覺好chill，啱晒同朋友慢慢傾計。我地叫左兩個lunch set，再加配餐湯、沙律同甜品每個set都包一杯飲品，咁我就來一杯凍檸茶，生日壽星就升級飲返杯清甜解渴嘅荔枝蘋果特飲。加配嘅凱撒沙律有新鮮沙律菜配上芝士碎、煙肉同脆卜卜嘅的麵包粒，口感好爽脆。南瓜湯同樣出色，入口超濃香南瓜味又夠creamy，口感豐富。我嘅主菜係 香煎盲曹伴香草醬普羅旺斯燉菜，煎至外層香脆，魚肉嫩滑，入口即化而且一啲腥味都冇。而佢嘅燉菜軟腍香濃，加埋個蕃茄醬汁嚟搭配真係恰到好處。壽星嘅主菜係燒豬梅頭扒拼薯條，梅頭扒咬落非常軟腍又juicy，味道唔會太濃但就已經好夠味。外層燒得剛剛好，微微嘅燶邊食落加多一份香口。薯條應該係即炸，因為夠熱同埋口感外脆內軟，唔錯。最後就嚟一份是日甜點tiramisu，估唔到份量都幾足，而佢嘅味道又香又滑，餅底做得濕潤，咖啡味道都適中。…查看更多

平日行街見到ChaTraMue 都會圚返杯泰式奶茶嚟飲，估唔到入嚟沙田行街見到佢地嘅Café，有齊小食、主菜、甜品同埋飲品，完全係一站式服務，咁就當然要入去食返個午餐啦！店面環境都好闊落，坐得都好舒服。食物類型都幾多，而且樣樣都好吸引，真係攪到我嘅選擇困難症又再發作。|先嚟兩杯飲品，我嘅 泰國蜂蜜檸檬烏龍茶 ，融合左烏龍茶嘅茶香同埋蜂蜜自然甜味，再與檸檬清爽酸味加埋一齊，入口感到層次豐富且清爽解膩。大少就嚟一杯 泰國荔枝綠茶，荔枝嘅甜味唔會蓋過綠茶嘅香氣，加埋一齊有一種特別嘅味道，口感非常清新，解渴一流。再嚟就係我地嘅主食，我嘅泰式海南雞飯味道唔錯，雞肉好滑嫩而肉質鮮嫩多汁，米飯吸收左雞油同香料嘅精華，加埋雞肉一齊食，味道層次即刻提升，埋個秘製酸辣醬汁，直頭係醒胃之選。大少就嚟一客 泰式香茅青檸魷魚意粉，啲魷魚好彈牙，而意粉嘅口感好滑順，加清香香茅同酸酸地嘅青檸醬汁，唔會過於油膩之餘，仲好有泰國風味添。最後就當然要嚟一個甜品時間，我地分別叫左泰國奶茶飄雪同埋泰茶梳乎厘班戟。依個泰國奶茶飄絕對係打卡之選，因為一送到就睇到我地嘩嘩聲，但原來入口都一樣好正。刨冰質感非常幼細，而每一口都充滿濃濃嘅泰奶茶香。加埋山頂上綿密嘅奶蓋，同埋Q彈涼粉一齊食，口感味覺都係超豐富，絕對係是日MVP。泰茶梳乎厘班戟同樣一絕， 班戟超級蓬鬆，空氣感極強，睇佢個彈彈樣都真伙係太療癒了。而入口就散發著濃郁嘅蛋香，加埋淋滿濃稠嘅泰式奶茶醬，同埋脆卜卜嘅焦糖脆脆，整齊一齊食真係甜而不膩，好味再ENCORE之選。…查看更多

話說同大少去完又一城打卡之後，見差唔到到左老公嘅放工時間，就係咁….我地就嚟左個小驚喜，玩一轉接放學…哈哈。老公見到我地就緊係好歡喜，所以就帶左我地去附近一間好有特式嘅西餐食個豐富晚餐。餐廳整個環境都好寬闊舒服，空間感十足。由於老公都只係嚟食過lunch，所以都諗左好耐食咩好，店員姐姐唔知係咪見到我地嘅迷茫，主動過嚟為我地介紹及講解有咩好嘢食，多一份親切感覺，最後叫左餐廳主打嘅菜式。先嚟 法式馬賽魚湯配藏紅花蛋黃蒜蓉包，姐姐真係冇介紹錯，個魚湯底夠鮮味得嚟又濃郁，再配上嫩滑嘅西班牙紅杉魚仔、鮮味嘅青口、彈牙大蝦同魷魚，令到整個味道層次更加提升。藏紅花蛋黃蒜蓉包 我就覺得係另一亮點，滿滿嘅蛋黃配上外脆內鬆軟嘅蒜蓉包味道好香濃，再加入了藏紅花就可以提升香味嘅層次，單食都已經好好味。再配埋個香濃魚湯一齊食，可以話吸晒湯嘅精汁後令到鹹香中又帶點甜，大愛。鴨白湯手打意粉配慢煮鴨胸同樣出色，湯底用上鴨骨熬製，所以鴨味濃郁但又唔膩，而鴨胸經過低溫慢煮，肉質非嫩滑多汁，而手打意粉都非常柔軟又夠彈牙。我最鐘意就係佢嘅湯汁都好夠，每啖意粉都可以掛滿湯汁一齊食，口感好豐富。香煎紐西蘭西冷牛扒外層煎至酥脆，而內裡又保持七成熟的熟度，讓肉質味道濃郁得嚟又夠嫩滑，有入口即溶嘅感覺。浸大教職員仲有折扣優惠，所以今個晚餐真係抵食又好味呀！…查看更多

同大少去開太子，就當然要係食埋個午餐先得，上次自私食嚟左東京街都覺得唔錯，所以今次就帶埋大少嚟個好味係要再encore啦！餐廳唔算大，不過都坐得舒服。午餐定食選擇都多，有壽司、魚生丼、拉麵或者咖哩飯類，總有一款啱你嘅。最後我地一份什錦寶盒套餐、牛板腱壽喜燒同埋珍寶帶子刺身。先嚟我嘅一人前什錦寶盒，估唔到真係超級豐富，既有生蠔、三文魚、油甘魚、甜蝦、吞拿魚、帶子魚籽、加州卷、日式煎餃、玉子燒、日本大福。額外追加$28可以有埋麵豉湯、茶碗蒸、蟹籽沙律及飲品，而且仲配上冷烏冬，真係何其豐盛，當然味道同樣唔錯。各款刺身、都好鮮甜，絕對係水準之作。另外肥啫啫嘅生蠔同樣鮮味不絕，煎餃入口都脆卜卜，以依個價嚟講絕對係勝價比高。另外珍寶帶子刺身同樣出色，無論其軟滑度、鮮甜味道、厚度都係超水準之作，令人一食難忘。大少就嚟左一客美國牛板肩壽喜燒，壽喜燒材料都好豐富，除左有肥美嘅牛板肩之外，仲有前茶、野菜拼盤、蛋、及烏冬。店員姐姐教我地可以牛板肩兩食，先嚟可以鍋上將牛板肩燒熟，就可以令肉味更加香濃鮮甜，其後就可以將野菜拼盤、烏冬、壽喜燒汁加入鍋上，野菜及烏冬吸入湯汁變得更香口，而牛板肩肉質就細嫩又帶點彈性，滿滿牛肉嘅鮮甜。兩個人食到飽飽好滿足呀！…查看更多

返工忙左好多個星期，終於做完哂嘢，係時候要俾自己Chill下。所以就入左將軍澳海邊行下，然後就去Pet-Friendly嘅DHYC Dimsum Restaurant食點心。其實之前都見好多狗友對大讚，今次嚟到又真係覺得冇介紹錯，我地有狗狗就會安排半室內位置坐，望住個靚海景歎茶，成件事都真係好relax。點心種類都好多，而且個每碟嘅味道都唔錯，所以都食左好多，窩貼蝦多士配雜果沙律、蝦餃、菜苗餃、懷舊臘腸卷、酥皮菠蘿叉燒酥，同埋韭菜金錢蟹盒。每樣點心都好有水準，感覺真係唔錯。尤其個韭菜金錢蟹盒足料脹卜卜得嚟炸得又好脆口，另外懷舊臘腸卷都好有驚喜，估佢唔到條臘腸係好Juicy，包包又好鬆軟，正！有靚VIEW，食物又好，最重要係可以帶埋狗一齊，仲唔係啱晒我地，所以我地應該會再嚟呀！…查看更多

行經銅鑼灣見到開左一間店，見個環境同嘢食都好吸引，而佢嘅價錢都係合理性，所以就入去食返個冰凍嘅甜品抖一下啦！餐廳環境感覺帶點文青feel，加埋啲特色佈置同寬廣嘅空間感，令到整個感覺都好舒服。除了室內之外，外面仲有幾張枱座位好啱打卡添。種類都比較多，傳統同新式嘅都有，而且樣樣都好精緻，睇個mean都已經好吸引。炎炎熱日就當然要食透心涼嘅消暑，所以就分別叫左青提雪花冰同特式嘅芒果河粉。先嚟青提雪花冰，青提味嘅雪花比較少見，當然就要貪新鮮食返碗。雖然我地叫嘅係單人版，但佢嘅份量大大份好足料。雪花冰淡淡嘅綠色再加上堆滿新鮮青提造成嘅小山已經覺得好靚，味道仲更有驚喜，雪花冰嘅質地細緻綿密，而雪花冰就由牛奶再配上青提嘅清香，整體上甜味剛剛好，口感細膩得嚟仲好清新，完全係冰涼透心之選。再嚟一份芒果河粉，聽到個名已經覺得好得意，一問之下原來「河粉」就係用椰汁加上蒟蒻製成，所以入口滑溜溜得嚟又帶啲彈牙，而且佢個椰香味非常濃郁，好啱我食個椰子控。而芒果肉都幾多而且好香甜，芒果汁、椰漿同埋河粉撈埋一齊食，口感味道都好享受，大愛！…查看更多

朋友約食生日飯，梗係要揀啲特別嘅，所以就嚟東九龍潮流文化音樂餐廳及酒吧嘅臥虎藏龍食個豐富lunch 。餐廳佈置都好有格調，而且感覺好寬敞，坐得好舒服。而最好嘅就係佢個戶外半開放式Roof Top，以 270°啟德壯觀景望到啟德體育園同青年運動場，係依個咁正環境下食嘢，人都chill啲。餐廳食物種類都比較多，仲要由星級團隊主理新派多國美食，有日式料理、串燒、薄餅、甜品…. 真係令人嘅選擇困難症又發作了。我地先嚟兩杯打卡-able嘅mocktail ，唔止得個靚字，兩杯嘅味道都好突出，而且仲要唔太甜，好𠸉飲哦。小食炸魷魚配青檸沙律醬，新鮮炸起嘅魷魚圈，外脆內爽滑，點埋嗰個青檸沙律醬，更加好味味，仲感覺好清新，完全係食唔停口嘅感覺。再嚟串燒拼盤，有牛柳、雞髀肉及五花肉各兩串，同樣係即叫即燒，所以送上枱嘅時候熱辣辣，感覺份外新鮮。而三款肉都有配特別嘅醬汁，所以各有特色，同樣都係咁惹味。主食就叫左明太子雪場蟹肉忌廉烏冬，依個絕對係驚喜之選，烏冬軟滑彈牙，忌廉又夠濃郁，再加上微辣嘅明太子微辣同埋滿滿的鮮甜蟹肉，味道同口感層次都非常豐富，大愛。最後就嚟個意大利風乾火腿溫泉蛋薄餅，薄餅嘅餅底整得好脆身，再配上帶有鹹香味嘅風乾火腿同火箭菜，估唔到味道得意得嚟又幾夾，再加埋個溫泉蛋一齊食，整體口感提升左得嚟仲好特別添。…查看更多

老公今晚要OT，咁就當然懶懶地唔煮，約埋係九龍灣補完習嘅大少食個晚餐，咁就近近地去德福商場嘅茜廊餐廳啦！未夠六點半都已經座滿晒人，都好彩我地嚟到仲有一張枱，如果唔係就有排等。餐廳環境幾靚，座位都好寬敞，食物種類款式都有好多，總之就一定搵到心水嘅選擇。我地叫左兩個SET DINNER先嚟餐湯及蒜蓉包。估唔到佢嘅羅宋湯係咁多配料，啖啖都係蔬菜。而大少嘅忌廉湯都唔錯，夠味又CREAMY。蒜蓉包大塊得嚟焗得又好香脆，都好好食哦。大少就叫左份 特級西冷牛扒配薯菜，7成熟嘅西冷牛扒煎得啱啱好，肉質鮮嫩得又肥瘦均勻，口感厚實牛味又濃，搭配薯仔同雜茶一齊食，整體上食得好滿足。我就來一份 香煎羊架配薯菜，羊架煎得恰到好處，外脆內嫩充滿肉汁嘅鮮味，羊味好濃郁而又冇羊膻味，羊架下面仲鋪滿蔬菜，食得好味又健康。最後飲埋杯凍檸檬茶就完成時日嘅豐富晚餐。…查看更多

中環街市都有好多餐廳選擇，不過老公就鐘情於拉麵，行經見到竹麓拉麵都好吸引，所以我地就嘅一個豐富午餐啦！雖然set lunch只有五個選擇，但每一碗拉麵都好吸引，睇見到真係非常15/16，諗到頭都痛先揀到食乜好。老公就嚟一碗和牛肉鹽醬油拉麵，以鹽醬油湯底一啲都唔會覺得鹹，反而有點點清爽而不油膩味道。軟嫩嘅和牛夠肉味得嚟仲帶有淡淡嘅和牛油香，配合埋彈牙嘅拉麵，令到整碗拉麵口感味覺非常豐富。我嘅就係魚乾極濃厚醬油拉麵，湯底以大量魚乾及厚醬油熬製，一入口就散發出啖啖魚香，而佢個味道濃得嚟又唔會太鹹。而叉燒都好香口，肥瘦均勻肉味夠。另外都叫左兩份小食，黑豚肉餃子外皮焦脆，內餡肉汁豐富柔軟，值得一試。炸吉列蝦就炸得酥脆又唔會油膩， 蝦肉又夠彈牙，整體上口感唔錯呀！…查看更多

今次落觀塘又搵到新嘢食，去左一間性價比不錯又有質素嘅西餐廳食左一個豐富午餐。餐廳環境寬敞舒適，簡約得嚟又帶點時尚，最重要係座位寬敞舒適，整體感覺真係非常RELAX。SET LUNCH選擇都算多。每位仲包自助沙律吧任食添，而啲沙律菜同配料種類都算多，而且仲好爽脆新鮮添。是日餐湯係香濃嘅粟米湯，仲配上軟棉棉嘅黑芝麻餐包同埋兩杯餐飲凍檸茶。BURGER控嘅大少就當然揀左雙層芝士牛肉漢堡，估唔到個漢堡係咁豐富，個漢堡肉煎得根焦香，肉質嫩滑得嚟仲非常JUICY，而個厚度亦剛剛。半融狀芝士味道非常濃郁，同漢堡嘅味道非常夾，完全係啖啖入口都好滿足呢！我就嚟左一客 炭燒法式北海道黑豚扒，黑豚扒豬味好濃香而且肉質結實又嫩滑，炭燒令到外皮有烤到焦焦地，咬落去就有少少焦香，非常香口，雖然表面有少少乾身但入面都依然保持到非常JUICY。伴碟薯蓉都係一個亮點有驚喜，薯蓉綿滑之餘仲加入左松露，每一啖都係濃郁松露香，清新得嚟仲唔會覺得好膩添。…查看更多

行過加連威老道見到間糖水店，俾佢一系列芒果甜品吸引住，係依個淡淡夏日尤其係你又熱又攰嘅時間，就當然要食好東西嚟消消暑，所以我地就二話不說入去依返個冰凍甜品降降溫。餐廳簡約潔淨而且食物選擇款式都幾多，除左推介芒果系列之外，仲有椰皇系列、綿綿冰系列、清涼推介、傳統滋潤、仲有小食同下午茶，真係想點食就點食。當然我地就緊係貫徹始終，叫返我地至愛嘅芒果系列。先嚟黃金萬兩即係芒果綿綿冰，以新鮮芒果肉、芒果汁加埋綿密嘅芒果刨冰為主打，再埋有Q彈西米、椰果同芒果雪糕，單睇賣相已經吸引又豐富。而芒果綿綿冰口感非常細膩，入口即化，加埋芒果香氣同甜味都夠濃郁，且不會過於甜膩。完全係好味又消暑，最重要係啱晒打卡-able。 再嚟芒果丸子椰皇燉鮮奶，燉鮮奶嘅質地超滑嫩，而且勁有奶香味，加上芒果的香甜同埋丸子嘅Q彈，令到整個層次更加豐富。當然再配埋椰皇肉一齊食，加埋濃厚椰子味，真係好味到無得形容。特別一提，每份甜品都會附送細味熱茶，當食完冰凍甜品再飲點點熱茶，除左令身體少了一份寒氣之外，仲有助消膩，貼心度滿分。…查看更多