EGPlus的个人专页

跟住Openrice搵食係無錯嘅。今日在油麻地搵食，在Openrice入面見到呢間中東印度野，好似都唔錯，於是就去試下。入到去基本上都係睇Openrice叫野食，又竟然款款都唔錯。首先係咖哩羊腿，真心正，咖哩唔係好辣，羊腿嘅肉都幾嫩，一D都唔會un。第二樣係Butter Chicken，其實即係咖哩雞，不過個咖哩汁嘅味同羊腿唔同，呢個汁比羊腿的更唔辣，食得出用咗好多香料去整，所以好好食。呢個真係要跟Openrice先識叫，呢個係印度薯仔脆餅，係冷盤黎嘅，酸酸味味，加埋面嘅脆麵粒，好好食，係一度非常好嘅開胃菜。呢個印度燒雞都唔錯，唔會好乾身，少少燶邊令D雞肉更香。仲飲埋呢隻德國味，正。…查看更多

去咗一間Cafe無飲到咖啡反而食咗個Burger同埋炸魚薯條係乜野玩法？呢間西灣河太安樓第三街嘅Cafe Whale就係咁嘅玩法。佢D Burger都真係有好多choice，花多眼亂，而我最後就揀咗墨魚漢堡，比想像之中更好食。入面舊墨魚真係好高質素，首先夠厚身，咬落去非常有彈性，而且入面D墨魚有粗有幼，食到入面有D大粒墨魚，整體感覺非常好。跟餐要咗特色薯條，揀咗火炙明太子薯條，性價比高，估唔到明太子同薯條咁夾。店長話今日有白鱔，仲話可遇不可求，Last一份，於是為食嘅我當然唔會拒絕啦。個白鱔炸魚薯條真係好有特色，中西Fusion，白鱔一咬落去爆油，好好Feel，佢個豆豉醬都好食，同白鱔好夾。…查看更多

今日經過Airside 7樓嘅呢間西餐廳，門口有人派Coupon，於是入去試吓。佢個豬手好似好正，因為我見入面幾枱都有叫到，不過我個Friend話唔想食咁多肉，於是就揀咗個焗魚，Menu話係岩鹽焗，即係鹽焗雞D Friend啦，叫黎試咗，又估佢唔到真係幾好食，雖然係焗，不過D魚肉都幾滑，而且又會唔焗到好乾。我地另外仲叫咗個小食，個名好長，簡單D講就係蒜片大蝦配法包，可以點D橄欖油黎食，D蝦都幾新鮮幾好食。反而要讚呢度D啤酒，真係好掂，德國啤，試咗一支麥啤同埋一杯清啤，真係好有味道，唔淡又唔苦。…查看更多

雖然呢間餐廳嘅蛋糕款式又多又靚，不過今日無點cake，反而試咗佢個藍青口，做得很出色。呢度嘅藍青口好鮮味，佢個汁亦做得好好味，好彩佢個青口係配埋toast，可以點d汁黎食，如果唔係就浪費晒佢咁好味嘅青口汁。作為一間coffee shop，咁就梗係要試下佢嘅咖啡啦，另外啲friend就叫咗一杯檸檬梳打同埋一杯蜜桃梳打。佢嘅咖啡都幾香，朋友話個拉花都幾靚，不過我覺得最緊要係杯咖啡好味，另外兩杯梳打味道都ok，d水果未唔會好假。…查看更多

滷水鵝1/4隻要下莊，滷水汁香而不鹹，鵝肉都算嫩滑，墊底嘅芽菜同豆腐都好食。滷水併盤同樣美味，鵝腸、豬耳、滷肉、紅腸、豆腐都正。蠔仔粥點了一窩，d蠔仔都幾新鮮，難得窩粥無乜味精。方魚炒芥蘭夠鑊氣，d方魚碎吊返出芥蘭嘅鮮味，同埋d芥蘭好綠。呢個炒韭菜花都係好食又名夠鑊氣。反而個蠔餅有d強差人意，特別係佢個邊位嘅炸粉又硬又韌，好彩中間部份都ok。…查看更多

晚飯時間叫咗個週年孖寶套餐，包括有上湯龍蝦伊麵底，文昌雞半隻，加68蚊要埋個鮮蝦荷葉飯，另外再叫多個菠蘿咕嚕肉。菠蘿咕嚕肉畀想像之中大碟，而且有一楷新鮮菠蘿，不過個汁就比較酸。個週年孖寶套餐嘅上湯龍蝦伊麵先上，有一隻龍蝦，當然隻龍蝦唔係好大隻啦，唔計個頭同埋啲腳位，啖啖肉嘅部分都有四五舊，個伊麵底都幾多。跟住就到文昌雞上枱，已半隻嘅份量嚟講都算唔錯，隻雞偏瘦，上面啲薑蔥幾好食。個荷葉飯都幾大個，整得幾好食。…查看更多

今次揀咗呢一間意大利餐廳Happy Hour，侍應姐姐先送上車厘茄小麵包，可以點黑醋同橄欖油，好有意大利風情。呢度嘅happy hour係free flow House Wine，隻酒味道都唔錯，所以飲得好開心，結果飲咗5、6杯。我哋另外仲叫咗d小食餸紅酒，首先係焗煙燻芝士配意大利豬肉腸。呢隻豬肉腸都幾香，同個煙燻芝士嘅濃味道好夾，雖然佢話係落咗黑松露汁，不過又唔係好覺有太濃嘅黑松露味。另一款就係意大利風乾火腿黑醋火箭菜沙律卷，食落非常清新。…查看更多

金牌脆皮燒雞餐真係差唔多枱枱都叫，不過我覺得呢個餐最正係個茄汁意粉，因為佢就係細細個食到嗰種中式西餐已經撈好晒茄汁嗰隻意粉嘅味道。當然佢個雞其實都唔錯嘅，熱辣辣，又大隻。另外仲叫咗酥炸脆皮牛腩，咖哩汁另上，唔會整淋d脆皮牛腩，不過d牛腩就肥咗少少。呢間餐廳另一名物就係維他奶紅豆冰，味道唔錯，印象中好似無喺其他地方見過。…查看更多

排骨陳村粉就係豉汁排骨再搵陳村粉墊底，d排骨ok，有肉類應有嘅質感同肉味，陳村粉都吸到d排骨嘅肉味。蝦腸都唔錯，當然唔可以同出面高級酒樓嘅出品比啦，始終價錢差好遠，呢度蝦都算新鮮，腸粉本身唔算滑，不過都唔鞋。叉燒包係好食嘅，有一種懷舊嘅味道，同埋入面真係有叉燒，唔係只有叉燒醬。鴨腳扎真係好耐冇食過，出面酒樓好少有得食，雖然未係最正宗，不過都收晒貨啦。焗西米布甸好濃郁，仲要焗到燶燶地，令到個布甸會香d，呢度都算焗得夠乾身。…查看更多

呢隻炸子雞真係不得了，隻雞本身夠肥美，炸咗之後皮脆肉嫩，一啖咬落去juicy到肉汁橫飛，係必點嘅菜式。蝦多士又係必點嘅，因為都幾大件，所以建議可以兩個人share一件。多士炸得透，又無乜油嗰吓勁。第三個必點嘅就係呢個蔥花臘味煲仔飯，夠香夠乾夠入味，仲要有食得到嘅飯焦，無得彈。呢個就輸人唔輸陣，如果以味道黎講只屬一般。呢度嘅咕嚕肉都唔錯，夠鑊氣，不過如果要同其他餸菜比較就會差少少，真係好想食或者個胃仲有位先考慮叫啦。差d 唔記得呢個魚扣煲，一流，必點。首先如果無熟人攞又邊度會有咁靚嘅魚扣呢？入味惹味。…查看更多

今日幫襯咗呢間太安樓名物，試咗魚湯烏冬同埋漢堡包，兩樣都真係做得好食兼好有heart。獅頭魚魚湯烏冬係原用細細條嘅獅頭魚，起骨後先煎一煎，然後再加入魚湯。因為獅頭魚始終係好細條，所以如果唔先煎一煎，條魚會散晒，而且衣家煎一煎又會令條魚香d。獅頭魚嘅真身，無散開，起咗骨之後啖啖肉。和牛可可漢堡嘅橫切面係咁樣，件和牛漢堡扒都幾厚身，落order時可以叫佢切開一半上，會容易d食，和油油份足而且都幾多汁。加$15轉餐竟然可以揀番薯條，超值。…查看更多

朋友澳洲返嚟約食飯梗係要同佢食一啲夠晒地道而且有鑊氣嘅粵菜啦，所以就揀咗太子呢一間小菜館。招牌咕嚕肉叫唔得啦，老闆娘話除咗菠蘿係新鮮菠蘿之外，連咕嚕肉用嘅豬肉都係新鮮豬肉，唔怪之得食出嚟又鮮味又亂畫，咕嚕肉外層嘅皮加咗個甜酸汁之後仍然保留微微嘅脆口，味道真係非常出眾。唔好淨係食肉要食啲菜，老闆娘推介我哋試呢一個甜梅菜龍仔蒸菜心，甜梅菜嘅清甜帶出左菜心嘅鮮味，呢個配合搭真係幾好食。第三個餸就叫咗一個邪惡小小嘅薑蔥鐵板魚春魚卜，呢個餸夠晒嘢未夠晒香口，因為鐵板上所以可以保持個新嘅溫度，我自己覺得乳酪好食過魚春。呢度隻德國麥啤幾好飲，出面好似好少飲得到。…查看更多

呢個余均益辣椒醬雞扒漢堡真係幾好食，首先係件雞扒新鮮Juicy多汁，炸得好香但係又唔會油淋淋，塊雞扒好巨型，仲大過個漢堡包。余均益辣椒醬聽就聽得多，不過食就真係第一次，都食到佢個辣椒香味，不過又唔係好辣，對於唔食得太辣嘅我黎講真係唔錯。封門柳竹炭吐司又好睇又好食，啲封門柳好濃牛肉味，中間仲紅紅地證明個生熟度控制得唔錯，啱啱好無出血水係正嘅。睇落去好少野其實食落都幾飽，加$8就有埋野飲都幾抵，性價比高。…查看更多

呢間專食雞煲嘅餐廳性價比高值得一試。 佢啲雞好新鮮好靚，而且啲雞嘅脂肪含量比較低，所以一邊食一邊都唔使狂撇油。佢有個漏斗仔俾你計時，大約5分鐘左右啦就可以食雞同埋飲雞食完雞飲完晒雞湯之後就可以開始打邊爐，佢呢度嘅炸魚皮都幾震撼，因為好大塊。侍應推介我哋食佢嘅韭菜餃，因為係自家製嘅，食落又真係幾好味，啲韭菜好香。呢度嘅墨魚滑都幾好食，夠新鮮又彈牙，一份仲要有兩條，真係唔錯。叫咗個雜菌拼盤嚟試，啲菇菌都幾新鮮，而且比想像中份量多。醬料區有蓋冚住都幾衛生。…查看更多

好果想食好食嘅傳統粵菜，呢間粵菜餐館唔會令你失望。預訂咗個杏汁白肺湯，杏汁的香味配上豬肺，一邊飲一邊就覺得好滋潤，豬肺夠晒淋，而且又非常入味。另外仲預訂咗鹽焗雞，又係一絕，隻雞夠晒嫩滑，非常入味，感覺上連D骨都有鹽焗嘅味道，火喉控制得十分好，連平時唔食雞皮的我都忍唔住食咗幾塊，真係好掂。第三個預訂嘅菜式就係家鄉釀鯪魚，都算係功夫菜，鯪魚先起肉，然後攪碎佢，再釀返入個鯪魚身入面，為嘅就係可以啖啖肉咁食。話雖如此，我個人仍建議食嘅時候都要小心D，因為都有機會有D碎骨嘅。最後一個餸無預訂嘅，就係柚皮菜芯，印象中衣家唔係好多地方可以食到柚皮，呢度嘅柚皮又真係炆得幾好，扣返個汁，味道特別好。…查看更多