KatrinaChan9607的个人专页

重量級安格斯牛肉漢堡伴薯條($128): 同樣即叫即整，牛扒都幾juicy，略嫌麵包有少少細個，如果男仔食一個餐應該唔夠飽。但自己就鍾意餐廳喺包皮上面搽咗牛油，特別香 ！焗芝士蟹醬軟殼蟹($98): 純粹好耐冇食過軟殼蟹，所以叫咗。下面個焗飯都幾好食，飯夠乾身，而且鋪咗蟹膏，食落去幾香，自己冇食過呢一個組合，都幾創新。香辣魷魚($38): 唔算太辣，食到少少辣嘅人都應該會可以，魷魚份量都還好。芝士煙肉焗薯皮($38): 自己鍾意食啲啲韌韌脆身嘅嘢，芝士仲係拉絲嘅添焗薯皮外脆內軟，幾好食。餐飲檸水檸茶:正常港式味道。總結：都係盲舂舂入咗呢間餐廳，但係原來夜晚七點幾都幾旺場，真係會坐滿晒，自己覺得喺旺角呢個價錢都算係咁！ …查看更多

香馥小炒王($198): 本身叫呢道菜之前都有啲似意，因為見到個價錢都有啲驚，不過我哋睇咗啲相之後見到好似幾足料，所以叫。果然冇令人失望，每一啖都真係有蝦乾，nuts 同魷魚等等。而且食到好有鑊氣，絕對值得一試！ 香芒脆蝦球($298): 朋友想叫所以先掂咗，本身自己唔係好好啲炸嘅中菜。但係自己都忍唔住食咗幾舊，上菜嘅時候覺得好靚之餘亦都好吸引，即叫即炸，而且入邊嘅蝦係用上新鮮蝦挑埋腸之餘，亦都好彈牙。杞子花雕醉雞($168): 係待應姐姐推薦我哋食嘅，本身諗緊叫咩前菜，佢話呢一個係佢哋其中一道招牌菜，果然真係冇介紹錯，花雕酒味好重，但係唔會覺得苦，而且雞肉做得好嫩滑。杏汁菜膽燉白肺湯($108): 又係見到隔籬枱叫，見到上菜上得好靚，每一盅都會有一個小蠟燭熱住。上嚟嘅時候見到湯係奶白色，好耐冇飲過呢啲咁足料嘅湯，見到奶白色就知係真心用料同時間燉岀黎。味道鮮甜！總結：係一間高級嘅中菜餐廳，雖然定價比一般酒樓貴，但係食物絕對對得住價錢！…查看更多

豐盛牛乾拌麵($79): 有牛肉，牛筋，仲有丸，自己覺得呢一度嘅牛都做得幾出色，入味之餘亦都好容易咬開。紅燒牛肉麵($65): 自己通常第一次試台灣嘢都會食呢一個，睇吓佢夠唔夠正宗，自己鍾意佢紅燒牛肉好淋身，而且份量都好多，牛肉麵掛湯嘅程度幾好，湯亦都夠清甜。魚酥皮蛋豆腐($36): 呢個係近排鍾意嘅台灣美食，豆腐好滑，而且成件事感覺就係好夾，皮蛋亦都好香甜。路邊攤拼盤($46): 炸花枝丸，鹽酥雞同埋香腸。花枝丸炸得皮薄，而且真係食到每一粒花枝，唔係出邊嘅麵粉丸！正👍🏻冰檸檬紅茶(+$8): 正正常常，但係勝在茶味夠香濃。有機低糖豆漿(+$16): 本身都冇諗過叫呢個，但係勝在見到佢台灣製造，所以想試吓，真係比平時嘅豆漿更加濃郁同埋更加多豆味，如果無糖嘅話就更加好啦。總結: 近排香港都幾多台灣嘢，但係呢間性價比亦好高，食材有質素，而且位置其實都幾方便，食完可以去黃埔行一陣。…查看更多

平時都冇乜行過嚟呢一度，今日有個地產朋友介紹，話呢一間原來可以食一人壽喜燒又有魚生丼食，所以去咗試。睇完個Menu又覺得幾特別香港應該冇乜呢一啲咁樣嘅餐廳，可以自己揀餸嚟配搭。牛肉壽喜鍋一人前(加牛肉)(轉烏冬)($116) :落單嘅時候待應都有提醒過要等得耐啲，因為唔夠煲，但係等咗大概15分鐘左右就有啦，呢個自己私心加咗一份牛肉。壽喜燒嘅湯底同平時食到嘅差唔多，但係配料比得好多，有豆腐冬菇金菇等等。上菜嘅時候候俾佢個份量嚇咗一跳，真係好抵食。三文魚親子丼飯($85): 刺身切得好厚，而且賣相都幾靚，冇諗過喺一間名不虛傳嘅小店入邊會識到呢一個質素，而且見到都係新鮮整出嚟。刺身沙律($65): 純粹想要一個前菜，冇諗過會係有咁多舊刺身，刺身同沙律大概係一比一咁滯，仲要係呢個價錢真係好抵食。香蔥拖羅蓉小卷($35): 一碟有八嚿，睇得出係新鮮整出嚟嘅，調味調得幾好。總結：自己真係好少喺勝利道呢一頭食嘢，竟然俾朋友搵到呢一間，覺得其實好抵食，性價比極高絕對會再嚟，而且晚餐時間大概7:00已經差唔多滿座，應該都係街坊小店。…查看更多

睇完嘅K-Pop concert第二日即刻想食返啲韓國嘢，同咗朋友去呢間，見咁多個like實冇死la😂卜卜脆炒豬脆骨拼拳頭飯($142):呢個脆骨好似平時食雞軟骨咁樣，每一啖都索索聲。喺韓國料理舖頭都好少會見到，配上紫菜飯團就啱啱好啦，但係如果齋食豬脆骨嘅話就會稍嫌鹹咗少少。 甜辣炸雞半份($158): 甜辣炸雞都係必要嘅，去韓國舖頭，冇理由唔食佢哋嘅炸雞掛。同樣即叫即炸，醬汁好多，但又唔會蓋過咗雞味。懷舊烤五花肉($152): 呢個五花肉係配上菜，麻油，同埋韓國辣醬一齊食嘅，自己覺得其實唔需要韓國辣醬都已經好夠味，五花肉係真係肥瘦分明，食落去唔會好似食柴咁樣，一啖咁樣包住啲菜式好過癮。芝士泡菜煎蛋卷($112): 其實本身都冇乜期望，但係識落好惹味，芝士每切一舊都可以拉絲嘅，而且泡菜份量好多，但係又唔會蓋過蛋嘅香味，做得幾出色。總結：呢度真係好啱後生仔女嚟，無論氣氛或者音樂全部都係好新，而且平均年齡層都係20-30歲，而且不斷咁樣播住韓國kpop歌，同朋友傾吓偈嘅時候都可以唱下幾句。…查看更多

呢間係喺尖沙咀做嘢嘅同事介紹嘅，自己真係唔會無啦啦搵到呢啲捐窿捐罅嘅舖頭。店員話可以揀坐入邊或者出邊，自己就揀咗出邊，原來係望住尖沙咀海防道嘅大街㗎，夜晚都幾有feel嘅。而且係有冷氣嘅，所以唔怕熱。火焰新派老虎蝦($328): 呢個係見到隔籬枱叫，所以我地都嗌咗嘅，真係好適合打卡，適逢星期五，就叫好啲啦。老虎蝦好新鮮好蝦牙，而且每隻都係大過隻手板。連埋咖喱汁都幾正，我哋自己再嗌蒜蓉包($36)黎點。蒜蓉包烤得好脆，但係自己會想食一啲外脆內軟嘅包，咁樣好似會索多啲咖喱汁。燒牛肉沙律($128): 燒牛肉烤得剛好，而且有炭燒嘅味道，不過沙律就真係比較地道，意思係真係會比較辣嘅。我自己就食左幾啖就頂唔順啦。串燒沙嗲雞+豬($38@兩串): 即叫即燒，所以上菜嘅時候都好熱，配上沙嗲醬，係去泰國舖頭必叫嘅。香葉炒豆腐($108):本身諗住叫香葉炒飯，但係見到佢有呢一個炒豆腐，我見平時嘅泰菜舖頭冇，所以就叫咗啦。佢係用上我哋平時熟悉嘅玉子豆腐，不過同樣佢嘅香葉肉碎都係偏辣，所以配上豆腐就啱啱好可以解辣。芒果糯米飯($68): 糯米好香，上菜嘅時候都係熱辣辣嘅，芒果好甜，而且連埋椰汁咁樣食就真係天衣無縫啦，每次叫泰菜都會食。White temple ($108): yakult，荔枝，橙汁同白酒。望落去都知道係啱晒女仔嘅選擇，容易入口，而且酒味唔算好出。Pomelo master ($98): Gin 底，配elderflower同peach，飲落去香甜，而且杯邊有鹽，帶返gin嘅少少酒香。總結：呢度嘅嘢食同埋酒水選擇都好多，仲多過平時泰菜嘅小店，好適合一大班人一邊食嘢一邊嗌酒飲。同笑話俾我聽，原來佢哋平時都會有$98 free flow！真係啱晒同啲朋友一齊過一個星期五晚。…查看更多

有時喺中環好難搵到一啲性價比高嘅餐廳，一係就係西餐，一係就係其他fusion菜。今日竟然搵到一間車仔麵舖。秘製辣魷魚($38):本身有啲猶豫叫唔叫，不過朋友食到辣，所以就諗住黐下佢。點知其實都唔算好辣，係個種微辣會令到你想追食嘅，魷魚爽口，而且份量都算多。沙嗲金錢肚($35): 煮得好入味，而且好淋，都幾有水準。滷水五拼面($81): 牛筋，牛腩，蘿蔔，滷水蛋，滷煮豬腸。要一陣嘅係蘿蔔好甜，而且都好大嚿，好入味！牛腩同牛筋都住得夠淋，而且份量多。自選五拼:其實好少叫咁多，但係諗住豁出去啦，食得車仔麵就唔好嫌貴。牛柏葉，牛腩，糖心蛋，冬菇，雞翼。因為朋友叫咗蘿蔔，所以自己就叫冬菇，聽講人哋話食車仔麵嘅，呢兩樣嘢就最食到師傅嘅手勢，雖然食材簡單，但係要煮得都難嘅。冬菇入味，而且索哂d沙嗲汁！ 牛腩嘅話，就唔係舊舊都淋，不夠勝在份量多，多數都係一啖就咬到。糖心蛋個食到最尾先開始食，都仲係可以留心嘅。嘢飲就叫咗凍檸水同埋asahi。要留意嘅係佢哋嘅辣椒真係好勁，如果鍾意辣嘅就會覺得好惹味好香😂總結：自己好耐冇食個車仔麵，雖然都知道而家食車仔麵都已經唔係以前咁平嘅事情，所以更加着重佢嘅材料同埋煮法。呢間舖頭又坐得舒服，而且份量好足好大碗，真係會食得好飽。值得支持小店。…查看更多

旺角行人專用區附近都真係手搖飲品嘅戰場，今日見到有呢一間唔係買普通嘅珍珠奶茶就決定試吓。巴旦木牛油果乳酪奶昔($54): 本身以為呢一個同另一個牛油果乳酪奶昔差唔多，以為用一種特別啲嘅牛油果，點知睇返英文先知原來係加咗杏仁嘅。牛油果乳酪奶昔叫咗無糖，飲落去好健康，唔會有太大浸牛油果嘅味道，我覺得唔鍾意牛油果嘅人都可以試吓，而且做完奶昔之後店員會將牛油果鋪上面，杏仁係底。杏仁都有好多，起碼有二十幾粒！自己覺得唯一美中不足嘅就係杏仁有時會kick住飲管，搞到我飲飲下都放棄咗，直程唔要蓋咁樣飲。海紅山楂乳酪奶昔($38): 朋友叫咗呢一杯，同樣都係要無糖嘅，但係飲落去就啱啱好，應該係用咗我哋平時食開嘅山楂餅，甜中帶酸，幾開胃，好快就飲完一杯啦。總結：一睇個價錢其實大概同其他手搖飲品差唔多，但係真係睇住店員整嘅時候就知道其實真係所有嘢都真材實料，而且乳酪飲品叫無糖，應該唔會肥得去邊掛😂…查看更多

難得放假，同朋友去咗呢間咖啡室嗰度Hea。揀呢間，因為覺得佢哋裝修好光猛，而且樓底夠高，感覺上好舒適。味噌豬頸肉egg drop ($88): 見到豬頸肉出邊好似冇乜舖頭會做，所以就試吓。賣相好靚，有好多唔同嘅顏色，一望落就覺得好似好好食咁。麵包搽過牛油，好香。配菜方面有生菜，滑蛋同埋蕃茄，要讚一讚個滑蛋煮得好出色，好香牛油味。建議所有配菜一齊食，如果就咁食豬頸肉嘅話會稍為太overpowering。松葉蟹肉意粉($138):一上菜嘅時候都幾surprise，冇諗過一間咁細嘅咖啡室會咁抌本比咁多蟹肉落去，初頭嗰幾啖諗住慳返啲蟹肉，食到最尾竟然仲有好多剩低😂 味道方面都幾夾，食到有牛油同蒜香嘅味道，而且松葉蟹肉最欣賞嘅係真係完全冇食到一啲任何細殼，淡淡都係肉。Matcha Special ($60): menu講話有豆腐，燕麥奶同埋抹茶，但係豆腐就唔係太飲得出，飲落去嘅時候好滑，而且好香抹茶味道。Black Latte($55): 朋友叫咗呢一杯黑芝麻飲品，完全符合香港人對甜品或者飲品嘅要求，唔會過甜，好香芝麻味道。總結：自己一向都好支持呢一啲小店，而且全部木系嘅裝修感覺好舒服。仲要嘢食都真係唔錯，可以過一個悠閒嘅週末。…查看更多

見到呢間新開，所以去咗試。手工沙嗲手切牛肉沾面(火鍋)$68: 本身以為係好似日本style咁樣嘅沾麵，點知原來係火鍋上嘅，一上菜嘅時候手切牛肉睇落好新鮮。放入沙嗲湯底入邊搞一搞就食得啦，好嫩滑之餘，亦都好有牛味。再用$40加咗四粒牛筋丸，一餃落去好多汁，而且好彈牙，絕對值得一試，$10一粒好值得。跟套餐加嘅風沙雞翼($14)都做得幾出色，腌料偏甜，偏向台灣味道。再加咗$20(4粒)花枝丸，比香港買嘅花枝丸，佢足料好多，每一啖都有花枝嘅肉。百葉豆腐($9)有三嚿，味道正常，但亦都有台灣嘅味道。涼拌大豆芽($9)，味道小辣。蔥油厚切香茅豬扒($45):本身係見到啲相好靚，所以跟咗人哋叫，但係點知真係好厚身，而且有兩塊，亦都係即叫即炸嘅。鮮蕃茄湯手切牛肉麵($65): 本身諗住試吓呢間餐廳嘅唔同味道，所以叫咗呢個。手切牛肉同樣係好新鮮，而且蕃茄湯底都好鮮甜，有唔少蕃茄喺入邊，值回票價。白桃烏龍(+3): 自己幾鍾意呢個台灣味道，因為白桃味好subtle，但飲得出唔係人工嘅味道。總結：自己覺得係尖沙咀呢個地段有呢個價錢嘅食物好抵食，而且好還原得到台灣原味道。絕對值得支持。…查看更多

朋友介紹呢間尖沙咀居酒屋。見佢價錢都相宜所以就試吓。雞皮餃子五隻($68): 我自己就冇見過呢一種雞皮餃子，但朋友話原來喺日本都幾受歡迎嘅。外皮煎得香脆，入邊嘅餡就同平時食開嘅日本餃子差唔多。食雞皮嘅朋友唔好錯過啦。白鱔配金山寺味噌($68):不時不食，但係而家都係算係當造，所以叫咗。白鱔食落新鮮而且彈牙，泥味清得幾好，唔算好重。雞翼($28): 同樣即叫即煎，煎得外皮香脆，但係入邊雞肉都係仲係好Juicy，調味亦都好夠，完全唔使點任何額外嘅鹽或者豉油，好抵食。明太子長芋($38):自己鍾意呢一啲澱粉質類嘅食物，長芋一定會嗌，但係稍為明太子醬就有啲失色。因為食得出係批發嘅明太子醬，間間日本舖頭都係嗰種味。自己唔介意俾貴少少，如果有一細舊真嘅明太子喺上面燒嘅話應該會更加鮮味。牛肉鵝肝卷($128): 上菜嘅時候好搶眼，擺盤擺得好靚，而且個樣好吸引。慢慢吹左幾啖先食到鵝肝嘅味道，但係配上牛肉又幾特別，而且都幾夾。配上醋飯可以中和到兩種肉嘅油膩感。刺身拼盤:呢個係朋友大推嘅，佢對魚都幾講究。佢推介呢一間餐廳都係因為話可以食到一啲平時唔算太常見嘅魚，而且都好新鮮。新鮮就不在話下啦，而且每樣都好鮮甜。自己本身係點豉油嘅，但係食到一半先發覺原來有一小碟酸汁跟上，味道又完全不一樣。總結：今次坐喺師傅枱隔離，真係完全睇到佢點樣準備食物，手法都好純熟。食物真係有返咁上下質素，而且價錢完全唔貴，下次一定會再叫酒同朋友飲返兩杯。想提一提，呢度除咗食物之外，其實都應該叫做係一間鬼太郎嘅日本餐廳，由佢用碟，做裝飾全部都係鬼太郎，連師傅嘅制服都有鬼太郎印咗上去，好搞笑。…查看更多

終於比我排到呢一間人氣米之連推介泰菜，以為6點鐘去到可以早啲入去，但係都排咗大概15分鐘。黑豚肉船麵(金邊粉)($108): 湯底好好食，好飲亦都好重肉味，鮮甜。豚肉略嫌有少少過咗火，但係肉丸完全補救到，好Juicy。金邊粉好滑，而且碗入邊都有唔同嘅配菜有芽菜，洋蔥等等。我朋友連湯都飲埋。和牛炒飯($118):叫呢個純粹想睇吓佢做炒飯好唔OK，結果都幾驚喜。本身以為會係幾片黃牛擺上上面，結果係和牛碎炒埋一碟嘅，入邊有蕃茄，洋蔥，蛋同埋其他調味料。調味都啱啱好，唔會喊之餘亦會想再食多幾啖。份量亦都幾大碟。飛天通菜($88):可以揀辣定唔辣，朋友食唔到辣，所以叫咗唔辣嘅。好好食！冇乜見到好多馬拉盞，但係佢嘅調味完全係極鮮，而且唔會過鹹，同埋菜都好嫩，冇乜筋。之前睇報道，可能因為佢嘅選材都係泰國直送嘅原因，真係好似喺泰國食緊咁。芒果糯米飯($88): 點可以唔食芒果糯米飯，上菜嘅時候都幾靚，跟嘅汁偏向多少少煉奶味。今次嘅芒果唔算太甜，但係自己俾佢嘅糯米飯完全吸引住，第一次覺得芒果唔跟糯米飯食冇咁好食😂 好淋而且好煙韌完全係我杯茶。 總結：入到去嘅時候完全就係覺得去咗泰國咁樣飾品質素當然有返咁上下，而且自己覺得佢哋食材都好認真，應該全部都係喺泰國入口嘅，如果唔係唔會做到真係原汁原味嘅泰國菜。而且喺中環呢個地段而呢個價錢食泰菜根本一啲都唔貴，絕對可以再一次。…查看更多

今日經過灣仔，竟然俾我近期食餃子嘅愛店，又去幫襯啦。佢都真係開到成行成市。龍凰松茸雙湯餃($92): 八隻。同行朋友第一次食，所以叫咗呢個俾佢試，自己覺得黑松露味比較突出，但係同樣都係皮薄餡靚。自己覺得呢個用湯上嘅話會好過煎，後者可能會覺得太Heavy。牛角鮮蝦豬肉煎餃($60): 六隻。好開心，終於俾我搵到佢哋出新嘅餃子！食落去鮮蝦爽滑彈牙，而且每隻都起碼有兩至三粒蝦以上，用煎方法就最好不過啦。麥餞雞翼(大)($33):5隻。同樣有水準，麥棧好入味，食到入面都係有甜甜嘅味道，朋友大讚。山楂雪梨水($20): 每次都叫，真係感覺好潤喉，而且覺得好補身同埋呢個價錢好抵飲。唔會太甜，成杯就係健康嘅感覺。蜂蜜檸檬薏米水($20): 朋友就飲呢個蜂蜜薏米水，呢個自己之前都有飲過，都幾鍾意佢淡淡的檸檬味，同樣唔會過甜，補身嘅選擇。總結：自己其實都試過佢幾間，覺得其實質素都真係有保證，每一間嘅味道都係有返咁上下。當然自己本身嘅餃子亦都做得好，無論係煎餃或者湯餃同樣出色。成件事好健康！…查看更多

食過佢中環嘅分店，今日行過尖沙咀見到一個好細嘅牌，原來係喺地庫入邊嘅，再次一戰。紅燒蕃茄牛肉麵($78): 蕃茄湯底好入味，而且又真嘅蕃茄仔係湯底入邊，佢嘅紅燒牛肉好林，完全冇蘇味，值得一試嘅一碗台灣牛肉麵。唔單止牛肉，而且仲有牛筋嘅，同樣都係炆得好腍。麻辣擔擔私房牛肉拌麵($89):唔算太辣，如果食到少少辣嘅朋友都應該OK嘅，麻重過本身嘅辣度。牛肉方面應該同蕃茄牛肉麵一樣，而且都係有牛筋。以為拌麵係純粹乾身嘅面配上醬汁，但係呢一個係有少少半湯咁嘅形式上菜嘅湯底都ok! 魚酥皮蛋豆腐($45):價錢都幾親民，而且呢隻係凍上嘅，自己覺得做前菜一流。魚鬆同皮蛋嘅份量好多，好慷慨。逢甲鹽酥雞($42):好耐冇去過台灣嘅朋友，叫呢度餸就啱啱好啦，真係有台灣夜市鹽酥雞嘅味道，而且仲要係即叫即整。南投縣百香果QQ ($38): 之前去中環好似冇見過，茶底配上百香果珍珠同埋QQ，珍珠同QQ嘅份量佔大概三份一杯，岀手闊綽，亦唔算太甜。桂花烏龍冷泡茶($28):正常嘅冷泡茶，不過桂花味都幾香。總結：覺得呢一間台灣菜都真係幾有水準，而且價錢抵食，裝修亦都令人坐得好舒服。…查看更多

香草肉碎炒飯($98):本身以為會係平時白飯配上一兜嘅香草肉碎，但係呢個係炒埋一碟嘅。本身都會驚會唔會過辣或者過鹹，但係完全將個味道教得好好，越食越上癮。而且火候十足，正！馬拉盞炒蒜心($88):本身泰菜舖頭通常都係馬拉盞通菜，見到有蒜心揀，所以就試吓啦。每一條都係精心揀過，完全食唔到有筋，食落係嫩滑鮮甜，而且好多汁，呢個價錢絕對抵食。巴東牛𦟌($118): 牛𦟌好淰而且好入味，而且醬汁雖然較濃味，但係食完唔會覺得口渴，亦都唔算好辣。如果配上麵包應該更加好食！香蘭葉包雞($98): 朋友對蝦敏感，所以淨係揀咗呢個銀包雞，上菜嘅時候真係熱辣辣即叫即煮，份量有四粒，食落去美味多汁，有水準之作。芒果雪糕配糯米飯($68): 上菜嘅時候嚇咗一跳，賣相勁靚，冇諗過係呢個價錢食到咁樣嘅質素同份量。糯米粉擺咗喺最底，配上芒果雪糕同埋新鮮嘅芒果，完全係一個美滿嘅晚餐。鹹檸七雪碧($42): 正正常常每一次食泰菜都覺得杯鹹檸七或者椰青。總結：自己對新泰嘅認識係尖沙咀嗰間，之前食過好食，所以今日睇演唱會之前見到有都即刻encore。真係不負眾望，完全還原到泰國嘅原味度。…查看更多