呢個刺身併盤，係我今次最驚喜既環節！師傅把刺身放係乾冰盤上，陣陣白煙飄出，視覺上非常美觀！正所謂食物最緊要色香味俱全，呢個刺身併盤，每款刺身都好新鮮,食落好爽滑，要知道刺身如果唔新鮮會好大獲架！ 
呢度既任食時間係兩個半鐘，時間非常充足，所以食完第一輪既刺身之後，回一回氣先，抖一陣之後就主攻下燒物，我地叫左串燒牛肉，燒羊架同汁燒牛柳粒 
侍應推介我地飲香茜三文魚湯，整返碗先，濃濃既香茜味，我既最愛，係自助吧自己拎的，大家真係要飲呀！呢間店除左日本野之外，仲有泰式野食架，呢個就係我既小驚喜啦，因為我最中意食日本野同泰國野的，一次過可以食晒兩樣野，真係好開心 我地叫左冬蔭公湯同海南雞！個海南雞超得，雞肉好滑！另一個小驚喜就煲有生蠔 平時我可以食十隻八隻的，不過一時睇漏眼，最後先知有，所以點都要叫黎試下！不過我中意咩都唔落就咁食！咁樣蠔既鮮味先唔會被蓋過！自助吧仲有我最愛既阿拉斯加長腳凍蟹腳！不過最慘因為飽了，最後只食左兩條！…查看更多
環境好舒服，雖然係商場入面，但絕對唔會嘈，而且空間好闊落，唔會逼住逼住！最岩三五知己聚下舊吹下水又得！一雙一對既談下心又得，得左！呢度唔駛收加一架，雖然唔收加一，但店員既服務態度一樣好殷勤有禮！ 
老闆提議我地可以先飲咖啡先！因為唔會俾食物既味道影響左品嘗咖啡既味道！我同我朋友既口味唔同，佢喜歡飲偏苦既咖啡，我就喜歡甜既，所以老闆就提議我飲Flat White 啦，陣陣咖啡既香味，配上嫩滑既口感，簡直係人生既一大享受！先黎個前菜先，一人整一件煙三文魚配蛋沙律多士！黑松露磨菇意粉！最近對黑松露好似著左迷咁，只要一見到呢三個字，對眼好似識發光咁！味道好正！濃濃既黑松露滲入晒意粉入面！呢款係我今次極力推介既一樣食物！就係自家制薯條！雖然薯條都好味，但對唔住，今次既主角係佢個醬！咩醬咁巴閉？哈哈，就係佢個自家製黑松露mix沙律醬！呢個醬係老闆自己調出黎架！食完第一條我已經返唔到轉頭了，往後既日子我只會更愛黑松露！香煎虎蝦意粉，虎蝦好大舊，份量充足！但朋友對海鮮興趣一般，所以成碟我清晒 食飽飽，到第二個胃出動，朱古力蛋糕，入面暖暖地，又係一種奇妙既感覺！呢款檸檬批都幾得意，除左檸檬批充滿檸檬味，再配埋淋上面既檸檬醬，雙重效果，檸檬控一定要試！…查看更多
環境方面，一入去令人有一種很舒服既感覺，空間感充足，就算之後坐滿人，都不會有侷促擠迫的感覺！人多黎gathering下又得，一個人黎睇下書飲杯咖啡又得！其中有張檯似塌塌米feel既設計，更加有優遊自在同家既感覺，如果想成班fd聚下enjoy一個下午，呢度真係唔錯既選擇！呢隻咪星人好可愛！原來佢原本俾人遺棄，但老闆好心領養左佢，好嗲人的呢隻貓仔，對陌生人唔會怕，仲會走埋黎同你玩的！貓奴或者愛貓之人可以留意下！菠菜雜菌培根意大利粉。。味道唔錯呀，清清地三重芝士炸蝦pizza...如果係芝士迷，一定要叫呢個pizza.....濃濃既芝士加大大隻既大蝦，大家點可以錯過！啤酒炸魚配美國薯條。。。呢款係我最推薦既菜色！講真，係香港我成日都食炸魚，但呢次我覺得係我食過之中算係no.1的！平時既炸魚炸完之後可能會偏乾，但今次當我一咬落口，不但唔會乾，而且魚既鮮味完全保存落黎之餘仲唔會腥，因為加了啤酒，口感唔會因為炸完變鞋，入口依然好滑！相信係其他地方都幾難食得返呢個口感既炸魚！美國薯條夠晒大條，差唔多長過雙碟咁滯！ 呢間小店既另一個賣點就係咖啡既選擇非常多，除了 Latte 同 Mocha 呢啲比較大路之外，仲有其他特色既咖啡選擇！老闆好細心，走過黎詳細解釋同介紹下唔同咖啡既特色！如果喜歡飲帶酸味的咖啡，大家可以選擇埃塞俄比亞同薩爾瓦多！我自己就揀左巴拿馬唐佩佩咖啡，因為我較喜歡甜甜地既咖啡！呢間小店一定有下次！I will be back！…查看更多
我自己其實都算係一個幾矛盾既人，一方面覺得香港傳統既懷舊冰室應該保留同多多支持，但又因為大多環境唔太乾淨所以我會卻步。。。。咁岩呢間樓下冰室正正可以解決到我既矛盾了！既保留左舊式冰室既風格，同時環境都算乾淨！我本身食野唔中意同人迫，所以今日冒住嚴寒既天氣，十一點岩岩開門就去食了，但係我未食完，短短幾個字就已經差唔多坐滿人了！證明都幾受歡迎！今次黎食之前已經鎖定兩大必食目標 瑞士雞脾同蕃茄湯通粉！如果叫蕃茄湯通粉餐有兩樣選擇，上面$38果款就係蕃茄湯通粉加一味餸！不過因為我我想食埋個瑞士雞脾，所以我揀左下面$46既餐！如果大家唔食雞脾，想配其他小食，都仲有好多選擇既！其實我以前只會飲媽媽煲既蕃茄薯仔湯，係出面我好少食蕃茄湯製既東西的！不過呢幾年提倡健康既飲食，所以我都食多左蕃茄湯既野了！如果大家唔食蕃茄，唔駛擔心，都仲有好多午餐選擇！鎮店之寶之一。。。我揀左螺絲粉，因為細細個已經有螺絲粉情意結！佢個濃湯真係飲得出係即叫即製用心熬製的，無味精，濃濃既蕃茄味又唔會太酸！滑蛋都好過水準，唔會因為浸左落湯變淋！夠晒滑，連埋蕃茄湯飲。。。正！鎮店之寶之二。。瑞士雞脾。。。個瑞士汁味道岩岩好，有啲餐廳個瑞士汁會偏咸，呢度就唔會！成隻雞脾都滲入晒瑞士汁，好入味！唯一美中不足既地方係人手唔多夠，我叫左杯水飲，但因為人手唔夠，最後都無俾我！不過我明白的，因為客人真的太多了！而且侍應服務態度好好，好有禮貌！咁忙仲可以保持到好好既服務態度，抵讚既！…查看更多
山蝦刺身。。其他店通常都會俾碟酸辣醬你（甜）下啲蝦，但呢度居然無，減分！ 
串燒不過不失，同其他泰國野食店無咩特別！可能我自己飲親椰青都係凍既，呢個居然俾個唔凍既我，好飲程度大打折扣 不過最令我失望既係服務，以下幾點，真係嬲到振， 1：明明客人唔多，侍應無咩做，頗為得閒咁行行企企，我叫左埋單，重覆叫左三次，仲要同一侍應，佢三次都唔記得，結果埋個單要十五分鐘！ 2：侍應拎張單埋黎，嘩 做咩成千蚊架？我地應該二百幾咋啵，原來佢拎錯，拎錯唔道歉仲要黑面，覺得我唔應該話佢錯！ 3：之後又等左成十分鐘，有個四眼男侍應拎左我張單去隔離枱，隔離枱先岩岩開始食，邊有咁快埋單呀，用啲常理諗都諗到啦，訓醒未呢哥仔！之後佢用極度黑面咁俾我簽卡，我真係好想問佢今晚係咪要去送殯，點解咁黑面！ 我唔係要求咩優質服務，但係你收我加一 係咪應該都俾返啲啲服務我呢！講真我食好多唔加一既餐廳，服務都比你地好！ 呢間野價錢已經唔算平，食物又唔係十分特出，仲要垃圾般既服務！我保證唔會再黎呢間野食！無下次，請我都唔會去，垃圾餐廳！ …查看更多
休息是要走更長的路，平時做野同生活節奏已經非常急促，放假既時候可以停下來靜靜休息下，嘆嘆咖啡充充電吧！ 店內坐位唔算太多，不過空間感很大，枱與枱之間有足夠的空間，加上會播啲柔和既音樂，好relax,最岩三五知己或者情侶過黎飲下野傾計談心！ 因為今朝好早起身去篤波，打左成朝都未食午餐，我就叫左個班尼迪蛋，朋友就叫左一份allday！我自己好中意食蛋黃既，一野吉穿個蛋黃之後，濃濃既蛋汁流在火腿上，果種感覺真係無得彈架！另外最令我有意外驚喜既係佢個homemade bread, 自家用心制作，麵包質地好軟熟，甜甜地，超正！ 
我地好似岩岩飢饉三十出黎，極速食完野之後，梗係嘆返杯咖啡啦，靜靜地咁傾下旅行野，估唔到一坐就係三粒鐘！傾傾下旅行野，老闆好隨和健談，都同我地一齊傾，哈哈，感覺唔錯唔錯！ 價錢黎講真係相當抗通漲同平民化既，正所謂蔗渣既價錢，燒鵝既味道！每人一百蚊都唔駛，又有好味既午餐同香滑咖啡飲，係百物滕貴既香港真係唔多了，所以下次要繼續黎！一定有encore …查看更多
甜品既種類都幾合我心意，幾多選擇，中西式都齊晒，所以都要用十分鐘時間揀，樣樣都想食，都幾頭痛！ 我自己叫左碗龍珠！我都幾中意啲甜品改一啲完全無關係既名，都幾有創意，不過就要用多少少時間了解下係咩黎 ！如果中意椰汁既，一定要食呢個，因為龍珠其實係龍眼椰汁沙冰，配上珍珠，新鮮龍眼肉同椰果，我自己最欣賞既係濃濃既椰汁味！哈哈，但係天氣太凍啦，凍到牙都震，比平時要用更多時間先食完！不過冬天食凍野先正！我朋友就叫左呢個黃金拿破侖，呢款真係鎮店之寶，我痴我朋友食左少少，已經好後悔無叫一份，食一啖已經返唔到轉頭！本身厚厚既酥皮已經好甜好鬆脆，再係面頭鋪上滑滑忌廉同香甜芒果，簡直係邪惡恩物，我決定下次一定叫呢款 …查看更多
頭盤先黎一味生蝦刺身！小弟最中意食既一款泰國菜式！講真，可能好多店鋪都有生蝦食，但我食過幾間唔係間間新鮮，呢間既生蝦都算新鮮架，配埋個酸辣醬一齊食，簡直一流！再黎一味泰式招牌豬手！提起豬手，之前我都只食開德國豬手，泰式豬手都係第一次食！肉質都算軟熟，個汁好入味，食下一舊食下一舊真係停唔到手架！ 今餐既壓軸菜色-->黑毛豬串燒！九龍城咁多泰國野，我揀試呢間就係因為呢味餸！間間泰國野都有串燒架啦，雞，牛，豬就基本野，但係呢間除左普通既豬肉串燒之外，仲有黑毛豬，唔試唔得！黑毛豬真係好食好多架，一咬入口既感覺好唔同，比普通既豬肉更加林同柔軟，配合埋燒烤恰到好處既火喉，更加突顯到肉質既鮮味！ 馬拉盞炒通菜，如果同黑毛豬同豬手比較，呢款有少少失色！味道尚算ok既，但因為我中意食濃味既野，所以我覺得稍稍淡左少少，再濃味返啲啲會比較好！ 飯後原來仲免費送兩件甜品，大菜糕！不過我自己就少食，所以俾我朋友食埋！ 其實我都幾滿意店員既服務態度既，都幾有禮貌，唔錯唔錯！哈哈，不過有樣野我覺得可以做得更好既！食串燒食豬手最好梗係飲啤酒啦，我本來想叫藍妹既，但係老闆話唔夠凍 
，所以我只好叫另一款泰國啤！所以希望老闆可以係下午先將啤酒雪定，咁晚市果陣就唔會有嚨個情況出現！…查看更多
