cherie_fiesta的个人专页

今日想食啲唔同啲嘅嘢，意外發現公司附近有間東南亞菜，就去試吓。我叫咗一個咖喱雞（$40），加個飯（$10）。如果就咁嗌三餸都係$100 ，其實份量都唔錯，所以如果兩個人食都幾抵食。不過因為我得自己一個，所以就淨係嗌咗一個餸🤣🤣店員好熱情叫我試吓啲串燒，四串（$50）其實都OK，不過我一個人食唔晒，所以就試咗一串牛肉沙嗲串，都真係冇介紹錯幾好食。店員好用心咁樣燒，加埋沙嗲醬真係唔錯😁另外我都嗌多咗個泰式奶茶（$28），店員話咁啱冇晒冰，就沖咗勁大杯俾我🤣🤣好耐冇飲泰奶了，好掛住泰國！🫶🏻…查看更多

終於有機會試吓馬灣小巷，佢正式開張前都已經講過個鳳爪排骨飯會好足料，睇相都唔係好信，不過今日朋友話想試吓，所以就一齊嚟。結果個鳳爪排骨飯真係好大個🤣🤣所以$50真係值！另外馬灣雞髀王大家真係要試吓，雖然都要成$60但係真係好值得試，個外皮唔會太過厚，唔會成口炸粉，入面啲雞肉仲要勁滑同好多肉汁。老闆好搞笑，得閒就出嚟問吓我哋覺得嘢食點，好唔好食🤣🤣我朋友食到都停唔到口，答都答唔切😆😆希望大家得閒嚟try try！不過希望之後堂食嘅位會好啲，而家都只係暫時得一張枱喺出邊坐。…查看更多

今日難得放假，就同朋友去咗食個early lunch，11點左右就到所以唔算太多人。餐廳嘅工業風式設計好特別，bar枱嘅設計都令人諗起一啲外國嘅酒吧，所以幾好feel😆今次我哋嗌咗軟殼蟹漢堡（$115）、馬蘇里拉芝士條（$60）、菠蘿燒烤醬牛肉漢堡（$98）同埋旋風薯條（$30）。先講咗個菠蘿燒烤醬牛肉漢堡，本身唔係特別鍾意食燒烤醬，但係佢夾埋啲菠蘿嘅甜味平衡得好好，另外仲有洋蔥嘅辣，令個層次非常豐富，仲要好大個！所以好滿足😍另外我最期待就係個軟殼蟹漢堡，佢真係勁大隻成隻夾喺中間。個殼脆、肉香，真係好正。同埋我欣賞佢用咗啲沙律醬，應該係自己調或者特登出面買，因為同平日食嘅唔同，有多少少鹹味，唔會太甜，但同個軟殼蟹好夾，我同朋友都爭住食😆😆大家一定要嗌嚟試吓！小食方面我地嗌咗旋風薯條同埋芝士條，薯條就冇乜特別，佢比較乾身同脆，所以可以食好多唔會太油嘅感覺🤣🤣個芝士條真係幾正，可以拉絲拉到好長，同埋芝士味好濃，啱啱整好嘅時候食真係好好食，又脆而且啲芝士又夠溶，推薦一試！…查看更多

最近好想食台灣嘢，所以就試吓呢間古早牛肉麵☺️佢哋嘅裝修都令我諗返起台灣嘅早餐店，未有得去旅行都可以回味下台灣感覺～喺門口店員已經好主動上前招呼我，所以感覺真係好親切😆見店員有時都會同其他客人閑聊下，感覺好warm～我今次嗌咗一個鹽酥大雞扒肉燥飯（$60）同埋輕芝士岩鹽奶蓋朱古力（原價$29，跟餐減$10）。其實除咗滷肉飯，佢都仲有其他選擇，例如拌麵、牛骨湯米等等，不過我今日比較想食飯😆個雞扒肉汁多，唔會只係勁多炸皮同好少肉，真係值得一讚😄個肉燥就比較普通啲，不過都好食，唔會話太乾。杯輕芝士岩鹽奶蓋朱古力都幾特別，個奶蓋鹹鹹地，中和返個甜味☺️佢係特別有一個輕芝士岩鹽奶蓋系列，所以大家都可以嗌吓其他combination試吓！…查看更多

今日喺the One行咗陣，想買個下午茶，就去咗茶墨try try🥰聽講佢個水墨風嘢飲好出名，所以就試吓，果然好正！我叫咗個麻糬芋泥鮮奶綠（$39），嗌凍嘅話會好似水墨畫咁勁靚！不過因為最近唔飲得凍嘢，所以叫咗熱，但係都好好飲！佢差唔多啖啖都有麻薯同芋泥，所以飲飲吓都覺得有啲飽🤣🤣足料良心店！💛仲可以揀喺嘢飲上面加Gelato雪糕！超級邪惡😆😆另外我叫多咗件日式奶茶cake食，嗌咗嘢飲之後可加28蚊優惠價買件蛋糕仔。佢奶茶嘅茶香好出，唔會好甜。雖然佢都有cream，不過都唔會話好膩，同件蛋糕少少乾身所以balance返，個口感好平衡好中香。唯一係個環境唔算太chill，但係食物好好，好適合大家嚟當下午茶食😆如果鍾意佢地啲茶，仲可以即場買佢哋啲茶葉！…查看更多

原來sogo附近就有間貓貓cafe，一直都唔知，都係無意中喺ig見到，就同朋友嚟一齊過節慶祝下🥰Catio環境好好、好靜，可以靜靜地陪啲貓貓玩同埋傾吓計都好開心，整體個環境都好舒服，適合同朋友逗留長時間～今次帶咗個炸魚薯條（$168）、鮮茄免治豬肉意粉（$138）、桂花烏龍同埋玫瑰朱古力，不過因為嗰日咁啱薯條賣晒，所以轉咗薯格。佢啲薯格辣辣地都幾正，佢仲有泰式辣醬同埋茄汁俾你揀嚟點😋至於個意粉係返茄汁，所以好開胃，如果個份量再多返少少就好！嘢飲方面，個玫瑰朱古力最有驚喜。我本身就好鍾意飲朱古力，冇諗過佢同玫瑰嘅味咁夾，令到本身個口感再多咗層次，而且嗅覺方面都得到滿足🥰一邊聞住啲玫瑰香飲真係好正！仲有佢個杯真係超可愛！…查看更多

今日去厚福街打邊爐，諗住試吓佢哋個花膠雞湯。個雞湯$308 ，非常足料，有好多雞同埋沙滘，仲有隻大雞髀！侍應提我哋要先飲雞湯，之後先至落打邊爐嘅生料，因為落咗了之後個湯就冇咁好味。個湯非常之濃味，花膠同雞都好入味😋啲雞又好滑好大嚿，朋友都話好足料。我哋另外嗌咗烏冬、金菇、餃子同丸，兩個人都唔係好食得晒，因為冇諗過湯底已經咁多料。個貢丸都幾好食，夠彈牙。本身見佢40幾蚊都覺得有啲貴，不過係好食嘅！烏冬都好大個，又好滑，夾埋啲湯真係一流！同埋呢間舖好得意，一開始侍應就會捧一大盤醬料去你面前，俾你任揀同撈自己嘅打邊爐汁，都幾正😋有花生、蒜、蔥、辣椒等，朋友話辣椒都好夠味幾好食，所以食得辣嘅朋友都不妨試下～…查看更多

今日想食啲唔同啲嘅嘢，所以機緣巧合下搵到呢間印尼餐廳。其實我都唔係好熟印尼菜，因為都冇乜機會食，所以就叫店員推介俾我。店員都係印尼人，識講廣東話。佢哋推介左幾款俾我，最後我想食飯，所以就嗌咗呢個啦斯啦媽斑蘭飯。嚟到嘅時候非常之有驚喜，首先佢個擺盤已經好靚，同埋佢餐牌上面冇寫其實係啲咩嚟嘅，嚟到嘅時候見到又有炸雞、豆腐、蛋、花生鹹魚仔、辣椒鹹魚仔等等，同埋嗰個非常之靚嘅斑蘭尖飯，首先視覺上已經滿足咗😍首先我試咗佢個炸雞，入邊仲有肉汁，出邊又炸到好脆，所以個質素好好。另外個班蘭飯都好有驚喜，真係每一啖都有班蘭味😆夾埋花生同鹹魚仔食真係好正。不過如果唔係太食得辣嘅話，建議就唔好夾埋個辣椒鹹魚仔食，因為真係辣到飛起😂😂😂（利申我唔係好食得辣）嘢飲我嗌咗個黑糯米特飲，佢黑糯米嘅量非常足料，再加埋本身佢落咗啲奶，杯嘢飲非常之香。有奶香又有米香，推薦大家試吓☺️…查看更多

KCC有好多吾同嘅餐廳，今日同朋友去試下地下果間Little Mario's薄餅專門店，2:30去到仲可以叫午餐。午餐有沙津/頭盤，主菜及飲品。主菜有pizza, pasta, fusion及burger。本來想食burger, 點知已賣晒了，所以揀左 pizza同埋fusion。前菜的 Caesar沙律菜夠爽脆，個汁酸酸地好開胃。頭盤的雜菜㗎喱角有兩件，新鮮熱辣，仲脆卜卜，好好味。主菜的T-Rex 食肉獸pizza好足料，真係啖啖肉，餅底焗得好香脆。印度㗎喱雞豆配印度烤餅，好夠辣，多豆又多汁，如果有白飯撈埋食更正，不過配烤餅都吾錯。飲品我們都叫了凍的Honey Lime 青檸蜜，少少酸但又吾會太甜,幾好。本來想加$30試埋個甜品Tiramisu, 點知又賣晒，下次要早啲嚟食先得。…查看更多

本身喺尖沙咀食飯其實都幾貴吓，難得搵到呢間樂園魚蛋粉，唔算話好貴咪就試吓佢。我嗌咗個梅菜扣肉飯同炸魚皮。個梅菜扣肉飯送埋紫菜湯都只係$45，仲要佢扣肉同梅菜嘅份量都非常多，又濃味😍用嚟撈飯真係好正！另外我都幾鍾意個紫菜湯，因為除咗紫菜之外仲加咗啲葱同芫茜（我最愛芫茜），所以好啱我味～個炸魚皮係佢地自己搵本地製造，有魚味得嚟又脆口，好正又好邪惡😆佢另外仲有個酥炸門鱔皮都好似幾正，依家做緊推廣價$35，可惜我見到嘅時候已經落咗單🙈下次再試！另外想讚吓個場都幾企理，本身去呢啲小店expect都唔會好似啲好少少嘅餐廳咁乾淨。不過整體都乾淨衞生，而且員工都幾有禮貌同親切，下次會再幫襯！😙…查看更多

啱啱呢排想食台灣嘢，見土瓜灣新開咗間德懿屋就去試下😋入到去都見有啲客人嚟買台式飲品，因為選擇都算多，而且都幾大杯但又唔會話好貴☺️我今次叫咗桂花烏龍，因為唔係好想飲太甜，但係桂花同烏龍個味道好夾😋一方面甜甜地又有茶香，而且好大杯！我都爭啲飲唔晒🤣另外我再加咗一個滷水排骨肉燥飯，啲肉燥比我想像中多，因為坊間好多都俾好少，都唔夠撈飲。不過呢間真係比得算多，加埋啲醃蘿蔔真係口感好好，個肉燥濃得嚟又有少少酸味中和返。唯一係可以再做好少少嘅係個size，我本身個人細食，所以食晒都好夠飽，不過男仔嘅話可能就要嗌多個蛋餅。我見都好多人叫，好似都幾好食咁😆我見依家仲有學生優惠做緊，買嘢可以送嘢飲，同埋都有lunch set，所以大家都可以試下～雖然而家得外賣，不過佢個飯都好夠熱，我隔咗差唔多半個鐘先食都仲熱嘅，所以喺附近公司放lunch嘅人更加唔需要擔心😉…查看更多

今日lunch同friend一齊去附近韓國餐廳Dodam Chicken食，估唔到入面環境咁靚，但lunch set價錢都唔算太貴，只係around $70-80包嘢飲（雪櫃自己拎，配菜都係自己出面拎）😙環境舒服又唔算好多人，最啱同朋友chit chat我地嗌咗一個鹹蛋黃雞同泡菜炒飯，呢間啲炸雞有部分可以免費轉無骨雞。咁啱今日有啲懶唔想食骨，所以就轉咗無骨雞😝一嚟到嘅時候個鹹蛋黃香已經好出，真係超香😍個口感都幾好，不過如果個鹹蛋黃味可以再濃少少，就愈更加好😁另外都嗌咗個好出名嘅泡菜炒飯，佢menu寫係level 1辣，本身都怕會唔會好辣，因為我唔食得太辣🙈不過試咗少少之後，發現原來都唔係真係好辣，啱晒我呢啲又想食少少辣，但又唔食得太辣嘅人😆😆😆如果嗌泡菜炒飯會送多一個湯，個湯好香蒜味，應該係牛嘅湯底，比較濃。如果可以配清少少嘅湯，應該會更加可以中和返泡菜炒飯嘅濃味。…查看更多

今日心血來潮好想食焗豬扒飯，所以就去咗附近龍城冰室買外賣。餐牌明明寫下午茶係去到六點，應該係55蚊包嘢飲，不過最後埋單57蚊，唔知係咪因為外賣加錢呢。今日店內客人唔多，不過收銀都比較忙，因為佢哋好多外賣，所以有啲客人等得唔耐煩🙈但收銀姐姐都真係已經好努力了！個焗豬扒飯不過不失，啲豬扒幾冧下，所以好容易切。不過最深刻印象係真係好夠熱，因為我都係做住嘢食飯，做咗好一陣野之後再食都仲係熱，所以都幾滿意☺️…查看更多

無諗過$208午餐可以咁豐富。龍寶酒家午市供應這個餐有即日生劏大龍躉二味，仲有燒鴨窩米。龍躉的二食是翡翠炒斑球及雲耳杞子蒸斑頭腩，兩款不同製法都很有水準。至於燒鴨窩米是分開上枱的，燒鴨份量十足，味道香濃、肉質鮮嫩，加上彈牙爽口的窩米，真係好抵食。…查看更多

其實之前我喺灣仔都食過一次，今次嚟到觀塘又好想食下❤️佢除咗選擇多，啲腸粉仲好滑，食過返尋味🥰🥰今次揀咗佢招牌嘅雞蛋豬肉腸粉，淨係落咗炸蒜、麻油、豉油（因朋友唔食芫荽），但係都好好味！個蛋同啲腸粉好夾，本身啲蛋都煮得好滑，加埋豬肉鹹鹹地嘅口感，真係好好食，好有層次！佢其實個套餐都好抵買，30幾蚊有腸粉又有燒賣仲有支嘢飲，我本身個人唔係好大食，對我來講個份量就啱啱好😋男仔可能會唔夠食，但係唔緊要因為觀塘廣場好多口立濕，可以慢慢掃街😆…查看更多