Lee Yee Mei的个人专页

來Cova食午餐，會開心成個下午，因為環境丶服務同食物都係高質。11:00來到餐廳，我坐一個幽靜的角落，待應還為我介紹和推介午餐。先到的頭盤，包括沙律丶醃紅椒芝士丶帕馬火腿加蜜瓜加兩款cold cut,加上堙三文魚，簡單多樣食材又高質，現在更不用自己去夾，可以無限order還可以自選配搭不用浪費食材，食得舒適又衞生。隨頭盤會捧上四款包點，但為避浪費，通常我只要求要留下最鬆化也是最肥的兩款-扭扭條和方塊酥。今次主菜要了個蘆筍蕃紅花意大利飯配帕馬芝士，清清地唔算膩，份量對女士嚟講頗多咗少少。最後一定要推介這杯「covacinno」，是這裡的特色飲品，朱古力+咖啡，上面還有whipped cream和開心果碎，好治癒的配搭。環境10/10服務9.5/10食物10/10衞生9.5/10回頭率10/10…查看更多

好喜歡去南蓮園池閒遊，因為這裡十足十小型金閣寺，環境清幽又舒適，咁一場去到到又點可錯過龍門樓嘅素菜。龍門樓窗外是一道大瀑布，感覺就好似清洗城市的俗氣與負能量，比人清新的感覺。今次座位安排在窗旁，好幸運。瀑布時流時停，好有feel。三個人，選了個二人餐，數一數，共有八個不同的餸菜，部分更是雙拼，用料上乘又有特色。其中我最喜歡的是「香麻羊肚耳青瓜苗」，D青瓜仔幼幼的得半隻手指尾咁長，可愛得嚟又脆口，真係第一次見。另一個我欣賞的是胡椒繍球煮蘿蔔，清中帶甜，而翡翠百福袋就口感十足，另外還有香酥脆奶卷丶醬燒菌丶牛肝菌豆抱挫頭菇，見其中一個菜叫黃油白玉炒飯，好奇甚麼是黃油，原來黃油是一種菌。三個人吃個二人餐，飽到好緊要。去南蓮池園及龍門樓是一種慢活體驗，去試的朋友真的要預留多些時間去慢慢品嚐及閒逛，去個偽旅行。環境10/10服務9/10食物10/10衞生9.5/10回頭率9.5/10…查看更多

下午放早，約朋友到金鐘樂茶軒歎下茶食素點心。茶室裝修好高雅丶舒適，枱與枱之間有較大空間，走高格調路缐，中式設計甚有文人書室的色彩，給人優雅舒適的感覺。茶室以品茗為主，佐茶點心為次，選一盅好茶非常重要。佢哋嘅茶種類多樣，一定有一款啱你。打卡之選是仙女散花，慢慢睇住一束「茶花」開花，甚是好看。朋友則選了野生老樹白茶，沖過廿多泡仍留有餘香，真是靚茶。茶室好細心，每張枱都有電子茶煲，客人自己可以慢慢一盅兩件，怡然自得。特登避開午餐的白領，2:30先到，人群是避開了，但原來部份點心也隨著午市結束而售馨，有點煞風景。我哋最後選了龍華素卷丶煎芋絲丶黑松露素燒賣和高麗餃。點心水準相當不錯，亦十分精緻，價錢方面絕對是一分錢一分貨，坐得如此舒適，值了。環境9.5/10服務9/10食物9.5/10衞生9.5/10回頭率9.5/10…查看更多

在長沙灣工作多年，竟然要睇亞蘇嘅YouTube 先知呢間正野，今日終於有機會試吓。叫咗個雞仔招牌海南雞，配住家湯同油菜。個湯係粟米南瓜，足料夠火候，唔係水汪汪。海南雞到了，份量好多，雞翼連雞胸差不多四份一隻雞，五六十蚊個餐，使唔使咁抵食？！D雞目測相當油潤嫩滑，食落真係滑溜嫩口，啖啖油香，感覺應是浸到剛剛熟，所以口感先咁正，隨雞附近四個醬料同醃青瓜，梗有一款啱你口味。要一讚嘅係個油飯，甘香而不油膩，成碟食到照曬鏡，正！環境7/10服務7.5/10食物8.5/10衞生7.5/10回頭率9/10…查看更多

唐宮小聚又係我私房簿仔裡面其中一間至愛，係周末同家人飲茶首選。我哋一定係食11:30頭輪，因為人少，點心嚟得快，加上第一輪乳鴿一定熱。坐低第一件事係叫乳鴿，佢哋嘅乳鴿嫩口又好食，以為近排做優惠$39.9好抵，原來做埋會員重可享買一送一優惠，$20一隻乳鴿問你死未？今日有得坐窗口位心情特別好，因為好有渡假feel，窗外嘅竹樹伴著我地食點心，感覺好似去咗日本咁。今次點了三色餃丶黑金流心奶黃包同應節嘅兔仔榴連雪糍，除了三色餃個皮太黏同隻兔仔個樣太老，其實各款點心水準真係幾平均幾高。至於酥炸乳鴿，今次略嫌佢炸唔夠香口，可以淋多一分鐘油，但就分量丶味道方面都真係無得彈，性價比超高。環境8.5/10服務8.5/10食物9/10衞生8/10回頭率10/10…查看更多

自己係半個坪洲人，但卻從來無食過這個坪洲名物，直至被到過坪洲既朋友問及才知這個名物的存在，今日終於有機會一嚐這個「冰火菠蘿包夾雪糕」。烤熱的菠蘿包，本身塊皮已經乾身脆卜卜，中間夾住兩球三色雪糕，係呀，係童年回憶牛奶公司三色雪糕（士多啤梨丶雲厘拿同朱古力）。兩樣都係好普通嘅嘢，但咁都夾得埋咁都比佢諗到都服左佢。難得嘅係兩樣嘢撞得嚟好夾，雖然價錢貴少少，但我絕對支持，浄係肯創新我已經要比滿分！加油！！…查看更多

幾年前，茶木嘅蜜糖磚塊系列響香港曾經風靡一時，店外每日都大排長龍。隨著新鮮感減退，茶木門口嘅人龍已越來越短了。對於我哋呢啲不是常常幫襯的人，久不久吃一次蜜糖磚塊真係視覺和味覺上的享受。近來重要有特價，真係好值得重溫。朱古力曲奇蜜糖磚塊：三層厚多士中間掏空了，鑲上烘過的多士磚，上面再鋪上cream丶朱古力雪糕丶朱古力漿和Oreo 曲奇及士多啤梨，成個感覺真係好肥好肥好肥，但又好鬼好味同震撼。即時令大媽們變返少女，不斷狂打卡。😍我哋三個人，除咗叫咗一個磚塊，還叫了兩壼熱帶水果茶。水果好足料，計有西瓜丶橙丶檸檬丶柑桔丶火龍果丶熱情果丶士多啤梨等，加上橙汁同話梅吊起個味，真係好好飲，不過甜度稍高我哋加咗個熱水落去味近調淡一點，又可飲耐啲。環境7.5/10服務7/10食物8.5/10衞生8.5/10回頭率7/10…查看更多

在初夏之際，選了一條輕行山路缐，由中環一直行上扯旗山，沿途經過古色古香的纜車站丶政務司官邸，路上飽覽美景，直至了山頂廣場才稍稍休息。正準備繼續攻上山頂花園之際，竟然開始有少少缺水，於是去咗奈雪之茶涼一涼，飲咗杯霸氣芝士芒果，順便叫咗個芒果魔法棒。相比喜茶及其他茶店，奈雪的芝士奶蓋較為輕盈但味道亦較淡，缺乏了芝士的咸香，但芒果部分味道不俗，芒果量亦十足，芒果調味天然不會過甜，在炎炎初夏行山歎杯凍飲補給一下，天大享受。至於魔法棒比想像中長，於是只吃了一半，另一半包起到登頂時再吃，包的質感綿軟好吃，不錯。奈雪裝修時尚簡約，坐位較少但坐得舒服，但此店長期客滿，實在辛苦了員工。…查看更多

從「銀座藏人」到現在「銀座神樂屋」，這店一直在我的私房薄仔中穩佔頭十位。佢哋既食物質素相當高。如果你午餐來吃，一個定食閒閒地百多元，但仍全場座無虛席。Well，午餐時段百多元個餐你只能說是物有所值，如果你晚飯時段來，我可以說簡直係半賣半送，一點也不誇張。佢哋嘅魚生新鮮又高質，其他款式食物種類雖不算十分多，但質素卻很高，好有日本風味。我個人最喜歡佢哋嘅燒雞翼，個味道真係令我有去咗日本居酒屋嘅感覺。另外佢哋有個手打烏冬，香港很少地方有，要留肚一試。$248-$288，放題連火煱，汽水任飲。闊落既座位丶高質嘅食材、全晚不翻枱沒有限時，絕對係同朋友促膝詳談的好地方。每次嚟我都會提醒自己唔可以過飽，更不可浪費食物，要好似日本人咁，夠就好收，做個高質嘅食客。環境9.5/10服務8.5/10食物9.510衞生9/10…查看更多

成年無得出行，幫襯異國特色餐廳當去短trip已成香港人日常。今晚嚟東歐餐廳感受下烏克蘭同俄羅斯風情，幻想去東歐小鎮吃晚飯。餐廳嘅佈置別具心思，燈罩丶枱布丶碗碟、擺設等每個細節都用心裝飾，加上悠揚既俄羅斯手風琴音樂，真係幾有東歐風味，雖然座位有D迫，但無損大家享受既心情。朋友發板，話要食D特別野，但估唔到竟然點了個「俄國炆兔肉」。「吃兔兔？」反正從來沒吃過，就樂得有人點來試試。兔肉用好似石頭窩的方式端上，有啲稠稠的湯伴隨，上枱時重滾到啵啵聲。嗯，雪藏兔肉少許鞋口，似實少少嘅雞肉，未算精彩，但我覺得個亮點不是在兔肉上而係隨窩奉上的濃濃湯汁裡。湯中的意粉吸收了兔肉肉汁的精華，真心好味。當然不可錯過的還有俄羅斯羅宋湯。我早已忘記以前去俄羅斯飲過的羅宋湯味道如何，但這裡做的湯放了很多紅菜頭，口味不俗，也較為清新和獨特。這時侍應端來一瓶vodka，說要請我和小姐姐喝酒。Vodka係俄羅斯特色，而店家的Vodka更是他們老闆親自在俄羅斯選購，其他餐廳沒有的。我嚐了一小杯，果然烈而不嗆，完全沒有火燒喉之感，也令我們的晚飯錦上添花。不可不提的是為晚餐畫上完美句號的蜂蜜蛋糕，蛋糕不是平時連鎖店那種幼滑質感，相反卻像極小鎮農家媽媽的粗豪之作，帶點鄉野的口感，本人非常欣賞。環境10/10服務9/10食物8.5/10衞生9/10…查看更多

去花墟買完花，借D易搵間cafe 坐下，雖然呢間cafe無tea set，但佢個環境同燈海實在太吸引，人又唔多，作為一個地道港女，已經有足夠理由入去試試。餐廳的佈置同用色落咗好多心思，落地玻璃引自然光外，又以歐洲風的花園風顏色作為牆紙，加上彩色的燈海及傢俱配搭，感覺好清新。打開個餐牌，內裡只得文字，對今時今日喜歡看圖識字或打卡行先既人嚟講，尤其甜品無樣睇真係有少許不便。今次揀咗個腐乳巴斯克焦香芝士蛋糕，配latte。老實講，中西合璧嘅嘢好難拿捏，不過唔知點解果刻竟然好想試吓。自己平時無整蛋糕，對巴斯克焦香呢個term好陌生，原來係指將芝士蛋糕表面焦糖化，做到焦而不燶既效果。蛋糕來了，看上去平平實實，感覺有份量。以前食過腐乳西多士，都係噱頭居多，可食性不高，但呢次既腐乳芝士蛋糕竟然有啲blue cheese既味道，唔通腐乳真係中式芝士？不太清楚，但響呢件蛋糕上味道好夾，有濃郁嘅咸香既味道。而表面上焦皮視覺上唔好睇，但食落又真係有D甜甜地既焦香感。整體而言，cafe環境好靚，甜品不錯，可以一試。環境9/10服務8/10食物8.5/10衞生9/10…查看更多

如果唔係行紫羅蘭山徑，平時真係好少機會去到淺水灣。計一計，原來對上一次去淺水灣已經係10年前。The Pulse沿海有好多半開放式既餐廳，呢間裝修同食物都啱feel就坐低試下。對海的位置屬半開放，有鞦韆式座位，感覺好chill，而內部位置既裝修就走時尚風，坐得幾舒服。今日天氣頗暖，點咗iced Latte同iced Mocha，味道濃而不甜，舒服曬。嚟到意大利餐廳梗要試吓佢哋嘅pizza。Parma ham火箭菜pizza味道可以但唔算特別出色，份量一般，未有留下太深刻既印象。另外點咗個龍蝦汁蝦球意大利飯，D汁稍稍多咗D，但味道不錯，唔會太膩，蝦仁亦多，份量重幾足添。總括來說，環境靚，食物中上，打卡及傾計勝地，可以一試。環境9/10服務8.5/10食物8.5/10衞生9/10…查看更多

旁晚上6:30，估唔到門口已排晒長龍，人頭湧湧，睇嚟香港人真係好需要食餐好既。好彩姐今日一個人自私食，咁啱唔使等位即時入座。星期五喇，同自己講食好D，於是叫咗3樣嘢：牛油果軟殻蟹卷、芒果蟹柳沙律同粟米天婦羅。雖然好多地方都有芒果蟹籽沙律，不過佢哋份量真係超多，現做的沙律好refreshing。牛油果軟殻蟹手卷係我每去日本餐廳必點菜式，有比較先知邊間正，佢哋軟殻蟹現炸脆口，牛油果又熟又多，整體比例好完美呀！不過最令我驚喜既竟然係呢款不起眼既粟米天婦羅。一排排既新鮮粟米夾天婦羅原來好好食。粟米好juicy，口感相當唔錯。環境8.5/10服務8.5/10食物9/衞生8.5/…查看更多

位於纜車站旁嘅呢間特色cafe，每次上山頂都話想嚟試吓，今次一個人上山頂行山，的起心肝留肚落嚟試吓佢。呢間有啲歷史既建築物外牆用麻石切成，幾層高好有英式風格。裏面既裝修簡單得嚟又具心思，木色為主用色好warm。大約兩點，人流好少，座位頗多，可以揀到睇纜車既最佳位置。睇咗若干個食評都話佢啲食物麻麻，為免中伏，要認真揀下食乜，最後選咗個朱古力muffin同Latte。可能真係冇乜期望，反而覺得幾好食，比Starbucks 好少少。不過有個位覺得可以改善，就係全店用上紙餐具，呢方面真係較為失色。一邊食一邊睇靚景，真係好有旅行feel。每10分鐘左右一班纜車，你可以無限打卡。間餐廳重有室外陽台座位，同纜車有更近距離的接觸。我幸運地遇上員工午膳時間，又無乜客，可以自由遊走於餐廳不同角落狂打卡。趁而家無遊客真係建議大家嚟chill下，當去咗咗短旅行。相信第時遊客回歸就一定唔會咁清靜了。環境10/10服務7/10食物7/10衞生9.5/10…查看更多

比佢哋半價優惠吸引而光顧這餐廳，但離奇地最後又無用到佢哋优惠，點解？因為佢哋嘅下午茶比優惠更吸引更抵食。餐廳位處一條幽靜嘅街道，加上餐廳闊落，相當好坐。選咗個三文魚牛油果pizza，同芒果沙冰，另外加$28要咗個龍蝦湯。作為下午茶，長方形既薄pizza份量剛好，薄薄脆脆嘅餅皮正係我杯茶，加上熱辣辣，芝士拉絲加曬分，面頭重有沙律菜都有D心思。杯芒果沙冰有驚喜，D冰打得細緻軟滑，個味又唔太甜太假，算幾好飲。龍蝦湯相對較一般，中規中矩但未能留下深刻印象。小小建議希望佢哋用白色湯碗取代黑色碗，給人更乾浄看得清楚的感覺。環境8.5/10服務8/10食物8.5/10衞生8/10…查看更多