CathySiu4370的个人专页

下雨天的星期一晚，朋友有事出銅鑼灣，又知我係港島人就叫咗我去食嘢，此串燒店位於銅鑼灣謝斐道世貿中心附近，店內各種霓虹光管裝飾，好logo好街頭feel，而剛好本人也喜好食串燒，我哋仲要係佢晚市第一臺客，入去之前都忍唔住問聲店員開門未😂串燒：燒冬菇、燒雞腎、燒雞翼、燒茄子、燒生蠔、和牛叉燒、燒粟米、燒菠蘿、燒五花腩、蒜蓉金菇拼蘆筍、炸春卷（送）、和牛炒飯原來佢哋只開業幾天，喺Google根本search唔到店名（同一位置前店名叫「船皇」 ） ，整體食物質素可以，當然不能同國內嘅串燒店的水準及價錢相比，如果人人都放棄喺香港消費，放咗工後仲可以去邊呢？係咪只能夠叫外賣？…查看更多

中秋前夕，跟一位灣仔地膽睇花燈，順便請佢安排附近食飯，一行12人，食中菜似乎係最好嘅選擇，就推介了金兜記。朋友食到熟晒了，除咗叫幾度大熱小菜，也有店員推介的菜式 招牌乳豬 ：皮脆肉嫩，感覺上比酒樓嘅不相伯仲明爐燒鵝：個人比較少食燒鵝，但一上枱已經俾佢由拎拎嘅賣相完全攝住眼球！食後感：皮脆肉嫩，油花填滿口腔嘅感覺太奇妙，忍唔住食咗3大件😝椒鹽魷魚鬚：呢個大贊👍朋友專登叫廚房加大份量，首先個勞漿唔會太厚，魷魚本身軟熟易咬，而且有返咁上下粗身，烹調亦不會太鹹，忍唔住想食完一條又一條，我覺得自己可以食10條（只係唔好意思食太多🤣）香煎蓮藕餅：非常厚身，豬肉新鮮，送飯一流西蘭花炒帶子：又係冇得輸，你睇吓啲帶子幾大粒！ 切咗片都贏啦芝麻雞（1隻）：雞嫩滑，芝麻香，我食咗四件豉油王炒麵：朋友推介話非常好食，但係我可以受得更濃味，所以呢個三粒星啦瀨尿蝦炒飯：呢個係店員推介，粒粒分明，唔會太油，有海鮮嘅味道，個人更喜愛此炒飯多於炒麵 總括嚟講，一大班人港島區食飯，又多一個選擇✌🏻臨走時發現，原來可以揀開一個區做私人包場，當晚就有四圍枱係獨立間開，如果有小型慶祝聚會，又有得諗吓👍…查看更多

近排真係食好多泰國菜，而令我想寫食評嘅呢個係其中一間。餐廳係養狗人士推介，環境靚地方大，狗可以落地自由活動；由於我哋有九位成人，點餐都絕不手軟： 泰式冬陰功湯、炒菜2碟、菠蘿海鮮炒飯、蒙古包、泰式炸蠔餅、泰式蝦餅2份、串燒2碟、青/黃咖喱配薄餅 、泰式炒河等等狂點，基本上都食得晒。飲品方面冇酒精飲品，竟然比House wine貴🙄, 叫杯凍檸茶要$38，反而叫紅/白酒買一送一仲低！食物味道正常啦，因為醉翁之意不在食，開餐期間仲要照顧自己嘅寵物，已經非常狼狽。但侍應嘅服務態度反而係亮點！1）客人已經入座，枱面嘅水杯遲遲未有人斟水☹️2）點咗個湯，只有4隻碗跟湯上，問侍應攞碗，遲遲冇人回應，要客人親自追☹️3）侍應工作期間吸煙☹️可能同樣也在露台位置，亦在遠處水吧位吸食，但客人見到嘅觀感亦不太妥😩4）服務員態度散漫，笑容欠奉，當晚周末餐廳未有爆場，室內位置只有4成客人，以服務員對客人嘅人數比例應該不至於忙到黑口黑面，個人認為「今時今日咁嘅服務態度係唔夠嘅」。題外話，當日餐廳3點零通知通往露台嘅玻璃趟門要緊急維修，未知能否晚上順利開放露台位，一道十分擔心要臨急轉場地（因為寵物只能坐戶外位置），好在最後餐廳致電可以照坐戶外，但出入需搵職員協助開門😄埋單計數，總數$2402/9人，人多除開就平，如果兩至四人食，可能個人消費會貴少少，睇你食乜啦。…查看更多

呢個食評有些少遲了，用餐當日係4月29號😂其實呢間算係酒吧餐廳，個水吧位都幾寛闊。我哋一共七位，點解大熱嘅泰式食物： 泰式生蝦、三文魚他他柚子沙律、炭燒豬頸肉、泰式生菜包、火山骨、清炒椰菜苗、紅咖喱雞配法式蒜蒜包， 另叫咗Asahi beer tower , 當時佢哋有個promotion，叫tower送薯片，$2xx 7人share 好合理，我哋食晒正餐先記起叫侍應妹妹比薯片我哋，原來係整筒品客薯片😚😍食物方面我精簡啲講：生蝦大隻，蝦肉結實👍👍👍生菜包既炒豬肉碎味道正常，生菜份量多👍👍炭燒豬頸肉外脆內軟，個汁調得好味👍👍👍火山骨一份共12支細骨，我見過有餐廳係好大盆嘅，佢呢份算係迷你版，骨都夠腍，個汁帶酸辣，好開胃，味道適合我👍👍👍三文魚他他柚子沙律要讚吓，三文魚蓉好嫩，冇腥味，配埋柚子食好清新，但係份量唔多，2-4人分享剛剛好（因為好食到想食多啲）👍👍👍紅咖喱雞配法包個人覺得中規中矩，反而籃蒜蓉包令大家眼前一亮，有咗哩籃包唔需要另外再叫炒粉麵飯😂炒椰菜苗係第一次試，好少泰式餐廳冇炒通菜，不過椰菜苗都有另一番口味，炒得香亦唔會太油👍👍一間餐廳要所有食評都係😋真係實力嘅證明：價錢合理，唔會催交枱，飯後可以繼續叫啤酒飲吓野，環境氣氛夠chill；如果坐近門口位置，有欄杆位仲似戶外feel；七人除開七道菜加啤Tower，每人只需$12x ， 真係好難冇下次！要留港消費，都要精選價性比高嘅餐廳，例如呢間👍…查看更多

兩個女仔睇戲之前想食餐飯先，因為大家都有啲要求，所以我上網搵咗呢間bar & restaurant 。呢度飲嘢沒有happy hour價，但如果點set dinner可以優惠價升級指定酒精類飲品。由於我哋午餐都比較遲食，所以選擇主菜係意粉嘅三道菜set 。頭盤：水牛城雞翼及炸牛油果條-雞翼辣度剛剛好，合格；炸牛油果真係第一次食，牛油果嘅狀態好似剛剛熟成一樣，肉質結實，外邊炸漿薄薄一層，唔會好油膩，讚👍主菜： 炸軟殼蟹忌廉意粉，青醬露筍嫩雞肉意粉因為唔係share所以只能評自己嘅，青醬唔會好鹹，雞肉處理得算幾嫩滑，我可以成碟食晒證明幾岩我口味😋甜品：巴斯克芝士蛋糕，朱古力心太軟cheese cake係切件上，尖端位置特別軟，第一次食咁軟嘅cheese cake，味道農而不膩，唔錯；而我嘅心太軟淨係賣相都贏晒，一切開就見到爆漿朱古力，只係本人略嫌甜咗少少，因為我都鍾意食黑朱古力，甜度如果能減少20%會更好，雲呢拿雪糕無可挑剔，就是朱古力嘅最佳配搭。最後講講個環境，一入到餐廳個感覺就好似進入高級酒店嘅西餐廳內，不論裝潢，燈飾，枱櫈，空間感都俾人幾grand嘅感覺；另有一個小舞台，台上有一套鼓，可惜我哋用餐時間撞唔正有live Band表演，如果有節日慶祝想來食飯，可以先致電查詢睇吓有冇表演，相信如果能夠聽住歌食飯會更加相得益彰。…查看更多

家人提議，唔想又係酒樓/盤菜，想食特色既中菜，地點又近屋企既，就選左中環三小漁點左一碗十年陳皮魚茸羹俾呀媽食（位上），呀媽嫌腥，加左胡椒都係飲唔到半碗😅主菜：黑磚豆腐， 脆米煎焗日本元貝，蓮藕蜜椒骨，椒鹽鮮魷，蝦仔油渣粉絲雜菜煲，黑松露蛋白炒飯甜品有：桃膠燉雪梨（位上）需預訂、桃膠燉手功菊花豆腐花（位上）、法式蕉糖燉蛋、手磨棗茸糕黑磚豆腐同日本元貝都好食，豆腐皮炸脆了，豆腐保持嫩滑，好味👍同埋元貝一齊位上，元貝好大粒，如果煎得再香口啲仲好；蓮藕蜜椒骨，我覺得甜得滯，反而我見好多台有點冰鎮菠蘿咕嚕肉，賣相及份量也比較好，少少後悔；椒鹽鮮魷跟蝦仔油渣雜菜粉絲煲非常普通，可能喺一般小菜館點仲好食；最後點咗個黑松露蛋白炒飯，黑松露幾香濃，份量夠大碟，老人家堅持要食飯，所以就點啦，價性比高。甜品價錢唔平，比較值得一提係桃膠燉菊花豆花，經理特別講一碗豆腐花要切360刀，配上桂花糖水，清甜嫩滑，賣相一流，推介👍，相比起燉雪梨，燉蛋，更值得試，棗茸糕也是較出色嘅甜品，為整餐飯畫上完美句號。是日整單消費$1806，平均每人$300（6位）…查看更多