sharonho1111的个人专页

這間店鋪的同一位置原本是潮福蒸氣火鍋，最近改頭換面為新華苑酒家，見食評都幾好又有脆皮燒乳鴿及貝殼併盤送，就上咗去試下。一上去就係酒家內行咗個圈，拎野飲之餘發現佢地嘅海鮮及魚缸都有放出來俾人可以見到，不但光淨而且大大件好新鮮，令人可以食得好放心。於是我地就叫咗蒸氣鍋配雞粥，仲有海鮮包括帶子蝦飽魚及聖子蝗，樣樣味道都非常鮮甜，基本上都無須要配醬料，單靠食物本生的鮮味已經好足夠。而且酒家送上嘅脆皮燒乳鴿及大蜆都好好食，大蜆每人有3-4件又鮮甜又多汁，令人好滿足。我地另外仲叫咗和牛肉粒，多款手打丸及蔬菜例如粟米芋片冬茹和菜，由於每樣食材本生質素好好，蒸熟後多出來的水份令食物好juice，而且更流到粥底令其充滿鮮甜味。我亦非常盛讚佢地嘅牛肉粒，口感好軟(脂肪比例高)好重牛味，我地再三order幾碟都不斷送上非常好服務。成晚食到肚都突埋都只係三百蚊內嘅事，非常扺食。…查看更多

之前葵芳廣場搞咗個雞翼節，網上雜誌報導出咗黃金雞翼，見男友又好鐘意食咸蛋黃類的食品就即刻去試下。揀咗網上雜誌介紹的烤焗工房，非常好彩一去到無人排隊，order後已經出現一條長龍，等咗5-10分鐘左右就有雞肉食。果然名不虛傳，用料十足，一食落口咸蛋黃味已經湧出來，加上即炸熱辣辣非常惹味。不過$40共8隻單邊雞翼都有少少偏貴。總括而言都係非常值得推薦。…查看更多

假日得閒就去咗葵芳廣場行下，無來一段時間發現呢度又多咗好多美食，睇網上介紹二樓開咗一間麻辣手撒雞手卷，就立即衝上二樓揾下，一去到發現超多人，排咗5-10分鐘先order到美食，再等5-10分鐘先拎到手卷，但係絕對等得值得，因為佢做o既手卷實在係好好味。首先雞肉又滑又勁多，其次個手卷超巨型，上面麻辣汁流入飯到，食到落底仍然好惹味，而且只係十幾廿蚊，性價比真係超高呀，好值得推介。…查看更多

今日經過紅磡，忽然想飲珍珠奶茶，見歇腳亭有杯飲品個名幾得意叫Double全家珍珠奶茶，就叫一杯試下，發現原來杯飲品幾有驚喜。飲品內原來混有 好多材料，包括涼粉，珍珠，布丁，椰果等等，混埋一齊味道唔會亂之餘仲配合得很好，好快就飲完一杯啦，好值得下次再叫!!…查看更多

發現屋企附近有間天仁茗茶，原本一心念住想飲913茶王珍珠奶茶，但發現佢又有鐵音茶雪糕賣，未試過好想試下就叫了一支。嘩，原來都幾大支，雪糕仲唧得好靚添。食落口茶味好濃又好冰涼，雖然無其他雪糕咁Cream，並帶少少冰粒感覺，但絕無影響雪糕的味道和口感，係少數以茶做主題又好好味的雪糕。…查看更多

坐落於海港城最佳觀賞維港風景的位置，一入到去就俾佢個270度維港景觀所震撼。幸運地被安排坐係窗前位置，一面食野一面望住呢個景真係好正。剛好到了幻彩詠香江的時間，可以行出露天位置觀賞。一坐低，每人都會一杯小小的荔枝酒。極香荔枝味，但酒精含量高。不過一小杯分開成餐飯慢慢細味品嚐，剛剛足夠。未欣賞夠風景，食物好快就黎啦~第一味紅油棒棒雞。上菜時有一個糖膠包住紅油放係正中。影好相打完卡之後待應會打爛個糖衣，紅油就會流落下面D雞度。食起黎有陣香濃的麻辣味﹐入面除左有雞絲，仲有荀同蓮藕，好好味!!!第二味蔥油餅~ 炸得剛剛好，香脆得黎無燶到，用黎送頭先個棒棒雞一流!芥末大蝦~ 呢個蝦炸完之後沾上沙律及芥末汁。一次過可以食到炸味, 甜味, 辣味, 非常有趣。墨魚餃~ 食唔出係墨魚，同普通餃差唔多，不過咬落去熱辣辣又多汁，都唔錯。炒椰菜~ 看起來平平無奇，但食落有獲氣，仲有少少辣，有驚喜!!!螞蟻上樹(肉粒+粉絲) ~ 同出面食差唔多~ 不過不失啦。泡飯~ 上菜時鍋裡面的飯好似米通咁係乾同一粒粒。然後待應會將湯倒入，鐵鍋的熱力會將湯及飯煮滚。等一陣之後，飯會吸收左高湯同變返軟，好似普通飯咁。食起黎每粒飯都充滿海鮮湯味，好特別!!!擔擔面~ 面上有肉粒同花生，湯頭極濃，食落去有花生同香辣味，非常刺激。今次係第一次係翻新後的海港城食飯。呢度的食物賣相精緻，服務亦很周到，待應會主動講解每味菜的特色。最重要的是有270度無敵維港景相伴，令係呢度的用餐體驗更加悏意。…查看更多

今日係銅鑼灣試下重來都無試過ge FUSION菜~入面環境好靚，可以坐係BAR枱，一面飲野一面透過落地大玻璃望住銅鑼灣夜景。餐廳入面仲有一條長長玻璃樓梯，打卡一流!!!!!!用上金色餐具同雲石色碟，貴氣非常~頭盤係~手撕法國鵪鶉海膽汁海蜇。海蜇充滿海膽汁，每咬一啖都好爽又充滿濃郁海膽味，旁邊伴碟的脆脆都好好味。餐湯~花膠螺頭片波士頓龍蝦。從來都無諗過原來花膠螺頭同西式式龍蝦都可以咁夾。另一款餐湯~虫草花黑松露野菌湯。野菌勁多勁濃，仲有D虫草花咬下，幾特別。點心~三文魚籽鳯眼餃。綠色係波菜味，黑色係竹炭味，白色就普通味。三文魚籽粒粒都脹卜卜，一咬入面D汁爆出黎，勁鮮味。蝦餃新鮮即蒸，上枱時熱辣辣出曬煙，好正!!!!終於黎到主菜啦~ 牛油果川味辣子雞。佢無傳統辣子雞咁炸咁咁辣，雞件炸完之後入面仲好JUICY，而且少少辣，適合香港人口味。入面仲有牛油果同三色椒中和辣味，大推~另一個主菜~ 牛抽乾炒安格斯牛河。傳統菜式最能夠睇到廚師功力。呢個牛河夠穫氣，D河粉無癡埋一舊舊，仲用左安格斯牛，勁有牛味。地道菜式但係配上高級安格斯牛，感覺有趣。黎到最後的甜品~ 火焰橙酒法式焦糖燉蛋。放係彩色雲石碟上面，色彩繽紛，好似幅畫咁，未食已經覺得好味啦!!!!食之前待應會係橙酒上面點火，再倒係燉蛋上面。睇住燉蛋係藍色火中燃燒，真係好治瘉呀!!!!燒完之後，會有一陣濃濃橙香味飄出黎。配合埋濃郁的燉蛋，為今日晚餐作完美的收結。今日係Cubus 28係一個好難忘的晚餐體驗。菜式FUSION方法都令人意想不到，味道極有水準，環境優美，服務令人舒服無壓力，係請客的好選擇。希望有機會再黎!!!!! …查看更多

一鍋堂不嬲都多人, 試過幾次walk in都因為人太多放棄左。今次一早book好枱，去到完全唔洗等就有位啦!!!!!我地揀左喇沙湯底，香濃好味每張枱都附送餐前小食，等上菜期間可以開開胃呢度全程用電話掃QR code落單，方便又環保。食物選擇亦都算多，上菜速度亦都好快，落完單約5分鐘左右，餸菜陸續送上。依度每張枱後面有張茶機仔，侍應會自動將食物放係茶機上，減少對客人打擾，另外亦都會主動替客人收盤，所以坐二人枱雖然枱面比較細，但係其實坐得幾舒服。依度有得叫出面好少見ge迷你聖子~幾特別。海蝦好新鮮彈牙，帶子就不過不失啦~打邊爐又點少得肥牛呢~ 呢度d牛幾好，油脂分怖平均，仲要好有心機排得好靚，淨係賣相已經令人食指大動!!!!另外呢度仲有特長蟹棒，出面都好少見。放曬D餸入鍋，一煲滾有陣濃濃ge喇沙湯味飄出黎，食物經喇沙湯煮過之後，唔需要落調味料已經好好味。食到差唔多，侍應主動提醒如果入座起個半鐘之內埋單有9折，兩個鐘之內埋單有95折。由於呢度上菜速度快，我地個半鐘都已經食飽嚕，可以拎埋個9折優惠。離開前再食埋個蜜瓜味雪糕+爆爆珠+朱古力碎，為今晚劃上完美ge句號。…查看更多