Roar的个人专页

好耐冇食泰國嘢，喺openrice搵倒哩間。原本想試下火焰燒雞，居然7點未夠就話賣晒，惟有食其他吧。青咖哩軟殼蟹 - 熱住上當然香噴噴，咖哩微辣好惹味。個底仲有啲青豆呀西蘭花等幾款蔬菜。主角軟殼蟹就稍嫌厚粉咗啲。蒜蓉包 - 跟青咖哩上。蒜蓉味非常惹味，咬完面嗰層蒜蓉先淋青咖哩，又另一番風味。小食拼盤 - 有春卷，魚餅，蝦餅，香葉雞。全部都唔差上枱非常熱，香葉雞頗滑, 啲蝦片又脆又有蝦味~鹽燒鰂魚 - 全晚之最。好大條，燒得透夠熟之餘仲可以保持每個部位都咁juicy啲魚肉都咁滑, 火候控制得恰到好處；個汁亦酸辣得宜。讚！後記 - 清水都有青檸味，頗有誠意。員工都幾有禮貌，食物質素幾好，惟菜單冇甜品有啲奇怪。如果唔係只收現金就仲好啲。為咗再食鹽燒鰂魚同試下個火焰燒雞會再嚟。…查看更多

喺地產霸權同連鎖店充斥下，哩種街坊小廚執一間少一間。話說某日經過土瓜灣店想食個快飯，入到去坐低見倒有白灼腰潤撈麵就叫咗個試一試佢嘅功架，結果不負期望。上openrice搜尋下原來有幾間分店，今日就嚟灣仔店食個晚飯見一見真章。白灼腰潤 - 就係之前喺土瓜灣店試過撈麵，今次嚟個淨食。哩味嘢好少地方食到，猪潤同猪腰灼到緊緊熟，鮮嫩到不得了；猪腰完全冇"壓"味，點下辣椒豉油好惹味。碟底塾咗啲迷你白菜仔，醮嘅熟油好似仲加咗啲麻油，好香。老婆唔食内臟，我一個人食晒，正！西蘭花蝦球 - 好大隻蝦球，超彈牙，西蘭花剛熟。清炒，成碟餸好fresh~椒鹽九肚魚 - 上枱以為白"璽璽"唔掂，其實粉漿超薄，椒鹽味剛剛夠，炸得非常乾身，食完碟底菜冇乜沾倒油，炸功一流。蜆蚧鯪魚球 - 鯪魚肉彈牙，蜆蚧夠咸鮮，不錯。西洋菜陳腎湯 - 一大碗，西洋菜味濃。煲湯啲應該係西施骨，啲肉唔鞋仲入得口！後記 - 真係相逢恨晚。哩啲唔起眼嘅小店，就咁行過都未必會行入去試，好在試過分店ok, 睇相亦見倒地方非常乾淨，今晚就的起心肝嚟試食。食材絕對新鮮，廚師煮功亦高，啲嘢食一定好味，食唔出有落丁點味精。落單嗰陣老細話兩個人一大碗湯夠飲架喇，唔夠添到我哋夠！哩啲咪人情味囉~ 要結業可惜呀，食完覺得欣喜，但又唏噓。講到好誇張咁，事實係有質素又價錢相宜嘅店舖買少見少。唯有剩番哩十零廿日去密啲囉。…查看更多

數年前嚟過哩度一次，當年少食素，諗住信老字號喺度叫咗個套餐，當時食落覺得普普通通，份量又少。數年後今晚再嚟散叫睇下會否當年唔識食。香煎琵琶豆腐 - 一般琵琶豆腐都有啲蛋加埋豆腐，唔會難食得去邊。哩度唔知係咪全素唔落蛋，食落只係揸爛啲豆腐搓成球狀炸一炸。可能太寡，食食下好似苦苦哋。砂鍋獅子頭 - 得兩球加啲娃娃菜呀幾隻迷你冬菇。目測裏面包咗好似好多唔同材料，入口就冇乜層次只係一pat蓉。千手如意卷 - 個卷叫做咬落fresh少少就因為有層紫菜。以上幾味餸冇乜提味道。唔算難食，但睇睇食完啲器皿，其實全部同一隻汁，同一種味。最惹味只係碟花生，甜甜哋後記 - 可能食得新派素食多，唔慣食哩啲傳統齋菜。但碟碟餸都接近百元以至百幾蚊，味道千篇一律，豪無誠意可言。食完個胃仲要頂頂哋。劣食。…查看更多

最初認識LADY M梗係因為佢哋嘅千層蛋糕。試過第一次之後就愛上。無論邊一種味道，食落都係咁fresh, 味清甜 (除咗近期嘅竹炭味膩咗少少......)。又不時推出啲期間限定味道，攪到不得不久唔久去下。自從某日試過佢哋嘅熱食，發覺去LADY M唔再只係為食甜品。無論小食或主菜，都同蛋糕一樣味道係剛剛好唔會太濃味；賣相精緻，上枱時熱度非常足夠。而所有菜式都唔含肉類，每當想食西式素食，就必然會去哩度。以下係集合幾次嘅相，唔逐樣介紹喇，反正叫邊樣咸/甜食都no regret!…查看更多

見食評唔錯，嚟試一試新嘢，結果期望越大......孜然烤腩仔 - 皮夠脆口，肉質就鞋咗少少，尚可七味九肚魚 - 失望位1。炸粉夠薄夠脆口，但魚本身好腥！咩味道已經唔需要再斟酌黃金蝦球 - 挽回唔少分數。蝦夠乾身夠彈牙，有啲蝦味，外層好甘香，粉薄，唔錯黑松露鮑魚汁煎生蠔 - 好大隻蠔鮑汁加上黑松露十分惹味，正！黑松露杞子益菌翡翠炒"班"球 - 失望位2。又係魚出事，魚塊的肉極"削"毫無斑肉嘅結實口感, 更冇魚味，有一舊仲要泛紅未熟！張電腦order單寫"班"球係咪避開個"斑"字？後記 - 上菜極之快速，除咗魚之外其他都餸都ok。第一次嚟幫趁啲魚又腥，"班"球又唔似斑，失望。坐得舒服又夠光猛，陳設新派又好乾淨，拉上補下總體俾ok, 但冇下次了。…查看更多

食過旺角分店覺得唔錯，上openrice睇下原來尖咀好評更多，梗係要嚟試下~黑松露野菌忌廉湯 - 濃郁菇菌味道龍蝦湯 - 亦十分濃郁，有粒粒蝦肉，飲完食欲大振瑞士傳統熱溶芝士配新薯及火腿 - 一大舊芝士熱溶之後喺面前撥上去啲沙律菜呀薯仔呀火腿呀咁夠晒live，芝士唔咸入口味道啱啱好，薯仔夠鮮嫩海膽蒜容多士 - 好大粒嘅海膽，小葱粒更帶出海膽嘅鮮味。雖然蒜蓉多士嘅蒜蓉味唔算太濃，但都稍稍搶咗啲海膽味......香煎鱸魚配香茅忌廉汁 - 超厚身嘅魚扒，皮脆肉結實，難道係野生鱸魚？忌廉淡淡嘅味道唔會搶走魚味，討好炭燒西班牙黑毛豬配蜜糖芥末汁 - 猪肉唔熟透帶紅係令人有啲卻步，但上次喺旺角店抱住祟洋心態照食之後冇肚痛，今次再encore, 依然猪味濃而不羶，nice~自家制比利時73%黑朱古力心太軟配意大利雪糕 - 幾好味，朱古力味濃，但唔算特別格雷伯爵茶意大利雪糕伴天然蜂巢 - 好有茶味嘅雪糕，天然蜂巢好清甜，好食到唔停得口~後記 - 感覺尖咀店食材食味些微優於旺角店，惟環境唔夠旺角店開揚地點亦唔太就腳。…查看更多

原本西式嘢都係覺得一味醬醬汁汁太膩，但見哩間幾好評都要嚟試一試。結果食物有驚喜唔膩夠fresh, 服務好好又不斷添加暖水(有少少檸檬味); 收碟亦快。非常光猛潔淨，難怪情侶大伙兒一家大小咩客路都齊。黑松露薯蓉焗大啡菇 - juicy. 非常juicy, 粟米薯蓉上面加上芝士一啲唔膩，撈埋啲番茄汁，好fresh手作小漢堡 - 包係中式包，豆品漢堡素肉加啲沙律醬菜，中西合璧，好味大啡菇白松露薄餅 - 加咗松露油非常香，芝士亦唔膩特濃朱古力暖布甸配雪糕 - 朱古力布甸濃味偏苦正呀，其他vanilla 雪糕呀cream 呀正常味道，ok鮮果拿破崙 - 餅鬆化，cream 幼滑淡淡甜味，討好…查看更多

嚟到坐低見坐滿晒好在有訂枱。啲員工好忙碌咁但招呼幾好，仲要有人外賣，落單冇耐啲餸就上倒枱，值得一讚。日式裝修，menu都算多花款。吉列蝦卷 - 冇乜特別，可以XO醬蝦仁腰果炒蘆筍 - 炒得幾惹味配料多款式，惟蘆筍就較幼身，啲腰果又冇乜過鑊唔夠香口黑松露鮮菌帶子煎蛋 - 煎得好香，中間又有啲素帶子，但夾雜啲唐芹影響口感扣啲分芝士意大利醬焗薯蓉 - creamy整體唔錯，係碟頭細咗啲。位置唔算就腳，但有機會會再嚟食。…查看更多

未試過小店，格局以外帶為主，冇炸物冇熟食，飯丼似乎較為抵食。今次主要食壽司刺身。帶子刺身 - 哩度兩客，算大件鮮甜三文魚子軍艦 - 不知為何頗咸，惟紫菜十分脆口甜蝦壽司 - 蝦肉creamy, 討好，但比較短小蟹棒壽司 - 普普通通蟹子軍艦 - 份量十足蟹膏軍/甜蝦蟹膏軍艦 - 蟹膏冇預期嘅鮮甜味，失望一字排開4個座位向街景全部都係唔駛煮嘅食物刺身壽司算新鮮，惟選擇唔多。冷氣唔夠都頗熱，坐位有8,9 個左右。茶係由員工添飲但淡而無味。價錢唔算特別平，但老板員工親切，加番啲分~…查看更多

通常嚟哩度都係食雪糕，今日下晝試完個新口雪糕味夜晚又兜番嚟朗豪坊，見夜晚氣氛唔錯就試埋個dinner set~剛啱有個窗口位，可以享受下熱鬧商場中一角嘅寧靜，背境放住輕輕嘅音樂，喺cafe 食嘢都有餐廳feel~set方面選擇唔多，味道算唔錯~香橙朱古力雪糕 - 哩間雪糕不嬲都優質(薰衣草味個人就難以接受), 今次哩個香橙朱古力都幾好味，朱古力雪糕唔會太甜，偏向奶味，淋上橙味糖漿味道唔假亦幾夾，唔錯~沙律 - 沙律菜好fresh, 個汁微酸醒胃，仲有啲石榴籽正呀~和風煙三文魚意大利麵 - 話煙三文魚，其實都煮到熟晒，白汁夠味，仲有幾條波菜，味道討好；嗰片包包有芝士粒粒添~即磨咖啡 - 味淡偏苦反而啱口味~茄湯 - 好好味，濃濃的有蕃茄鮮甜味~特式忌廉蘑菇豬肉腸長通粉 - 豬肉腸幾濃味，個汁都稍稍偏咸，扣少少分熱朱古力 - 味都係偏淡後記 - 氣氛，價錢，味道各樣加埋可以俾個好評~…查看更多

見哩度價錢幾抵，評價亦唔錯，梗係嚟試下。二人餐包兩個餸，一個炒粉麵飯，又有盅湯同甜品~金銀菜湯 - 熱辣辣，素湯都唔會覺得寡，好正~碧綠法輪卷 - 腐皮炸至脆口，裏面包住菇粒，打個薄薄嘅茨，美味~蛋白炒素翅 - 整體炒得清爽，惟蛋白略少仲有多少油膩，但點咗跟嚟嘅醋就啱啱好~黑松露炒飯 - 唔算好香黑松露味，但飯炒得乾身，唔錯雪耳糖水 - 太甜頭盤 - 鑵頭波羅，甜爺爺 ......二人餐埋單$277算好抵食啦~ 食味中上份量足，會再嚟~…查看更多

又係睇完食評嚟哩度試菜~ 帶子蝦仁炒西蘭花 - 哩個唔錯，炒得清爽，帶子有鮮甜味。煎蘿蔔絲魚餅 - 都唔錯，有條條蘿蔔絲同蝦肉粒，惟莞茜頗多，不喜莞茜人仕留意。金葉椰香雞 - 就係帶有濃濃椰子味嘅炸子雞，皮脆口幾特別，惟雞炸得過火，過熟鞋口咗啲。炸猪手 - 炸得好香脆，不過都係有啲過火，肉幾乾下。個黑椒汁味道唔錯~番薯糖水 - 送嘅，可能太足料，薑味太重好辣後記 - 環境比普通食小菜嘅舒適，食味可以，價錢相對高一點，性價比一般。…查看更多

是日要搵間正正經經嘅酒樓食飯。坐低見有啲套餐就叫嚟試下，點知冇鮑魚變咗花膠，費事再諗照要吧~跟餐嘅紅酒 - 唔識飲紅酒，只覺一般，同枱長輩都冇飲，在場經理(?) 就好識做咁換兩杯橙汁嚟，加分~即燒BB鴿 - 每人半隻。皮脆但肉唔算嫩，味道可以。金柱貢菜 - 香，爽夠味，唔錯； 三層肉 - 皮脆； 芹香魚崧水晶餃 - 無乜特別龍蝦湯燴翅 - 龍蝦湯好濃好味，翅都細細哋都叫成排，唔錯。意式脆皮大蝦扒 - 大塊過手掌，咬落去好彈牙以龍蝦蝦肉；皮脆脆哋啖啖肉幾正~XO醬白玉蒸斑球 - 魚肉亦彈牙有咬口，但一舊仔太"精緻"喇啩花膠鵝掌 - 5 位由三大塊花分出嚟， 同鵝掌一樣夠林；鵝掌亦入味。原幅花膠胡麻醬撈粗麵 - 無養特別蛋白杏仁茶 - 香滑杏仁味濃，不錯…查看更多

是日特別日子，揀咗間好評嘅試下，好在冇揀錯~脆炸魷魚圈配他他汁及雞尾汁 - 炸得脆而不油膩，伴咗啲紅色粒粒果子(大鄉里唔知係乜), 酸酸哋又爽口，不錯香煎煙薰慢煮北海道帶子 - 大大粒帶子好嫩滑鮮甜，配住淡黃嘅醬汁同炒香嘅菇非常惹味；帶子得兩粒就太唔夠喉~香煎海鱸魚配牛油苦白菜 - 鱸魚煎至皮脆，肉質嫩滑又充滿魚油香味，太正，惟實在太細舊 ...... 牛油苦白菜好特別，苦苦甘甘~香煎安格斯肉眼扒 - 要3成熟，外面夠香口，內裏夠生~ 冇任何醬汁只以鹽嚟調味，原全可以食到肉嘅原味~檸檬意大利軟芝士泡沫伴草莓雪芭 - 捧出嚟啲煙勁噴囡囡實like. 泡沫淡淡檸檬味及芝士味好正；士多啤利雪芭酸甜味剛好。整體好好味。72%朱古力心太軟 - venilla雪糕唔算特別。心太軟就非常啱口味，唔太甜又好滑口。後記：食物十分可口，部份菜式份量稍稍偏少。環境係有啲嘈，有窗口位可算撘番夠。以食物質素嚟講，唔算貴鳥，會再嚟。…查看更多

經常都會搵下各區有冇邊啲粉麵好評嘅試下，今次嚟哩間~牛三寶麵 - 見叫三寶，又$52碗都唔算平，以為有咩特別部位食(......), 原來都只不過係牛根，金錢肚同埋牛腩。 三樣都夠林，浸住喺啲湯度本身都仲有啲味；湯底淡淡的不會死咸。整體尚算ok㰖菜肉卷&炸紫菜墨魚丸 - 兩款炸物都唔錯。炸紫菜墨魚丸外面炸得金黃，墨魚肉都有墨魚味，夾雜住紫菜粒，係幾好食；可惜仲有啲馬蹄粒，個人非常厭惡。㰖菜肉卷外面層腐皮炸得非常脆口，裏面肉質唔鞋亦唔太假，頗有趣。…查看更多