Kimmm_的个人专页

之前見到有人post茶墨既手調飲品已經覺得好靚，芝麻味又好似幾特別，經過The One就同朋友買杯試下！黑- 芝麻烏龍麻糬鮮奶$36-芝麻味香濃幼滑，加埋鮮奶口感豐富，有奶香，估唔到鮮奶配芝麻味道都唔錯。而且成杯整到好似水墨畫咁，又靚又呃得下Like！但可惜麻糬沒有想像中煙韌，可能配凍飲關係感覺硬左一舊舊，唔好食，寧願走麻糬。紫- 紫薯鐵觀音堅果奶蓋$42-呢杯朋友叫，佢係紫薯愛好者，但連佢都覺得呢杯唔好飲。奶蓋分量少同唔覺有堅果味，紫薯蓉太一pat pat，紫薯同鮮奶比例唔夠，飲落都麻麻地好杰身。可能本身我地期望好高，反而試過有啲失望。…查看更多

之前睇ig見呢間有優惠，逢星期一、二$38有迷你海膽飯，見望落都唔錯幾新鮮咁同都幾多海膽，就約埋朋友星期二去試下。一早book定枱，晚市6點開始，早去唔洗點等位，一到7、8點出面就好多人等位，好彩我地有book到枱。$38迷你海膽飯-一人可以叫一個，另外要叫一款野食。海膽飯比預期中吸引，用加拿大海膽，味道鮮唔苦澀同腥，自己一個食一碗好滿足好邪惡！冇睇佢細細碗，都已經足夠，唔係會食唔落其他，$38物有所值！帶子壽司$38 三文魚腩壽司$30 甜蝦壽司$48 火灸三文魚軟殼蟹卷$108魚生都好新鮮，壽司飯適中唔會太熱同硬。三文魚卷份量夠，好食！整體嚟講都唔錯。…查看更多

呢排Pokka Cafe轉左有鐵板餐，日日晚市都見人排哂隊，9點幾都仲有人排緊，搞到我都心思思想試下。難得今日放早同朋友嚟撞下彩，希望唔洗排隊。好彩我地都算早到，一入就有位。我地2個都叫左鐵板牛扒，另外仲有飯、粉可以揀紐西蘭西冷牛扒200g $82 燒汁+$29 意粉 凍咖啡 升級龍蝦湯呢度既牛扒嚟到先切開睇下自己要咩程度，覺得ok再倒汁。我覺得可以切開再煎多10秒先倒汁會好啲。牛扒味道ok，唔會好鞋都夠肉味，但栗米嚟到已焦黑，食唔到。意粉幾彈唔係發脹哂，但分量唔多。龍蝦湯偏咸，覺得唔需要升級。咖啡細細樽似自家製，味道普通。紐西蘭西冷牛扒300g $118 黑椒汁+$29 薯條 柚子汁 龍蝦湯300g都係多少少分別不大，同樣栗米都係焦黑。薯條嚟到已經淋哂，有啲失望。柚子汁係罐裝，朋友覺得hea左啲😂整體嚟講中規中矩，好少少既花x。…查看更多

今晚即興約，朋友想食呢間，又搵好哂地址，就跟佢嚟食。位置係深水埗，地鐵站一出都要行一段路，本身而為要排隊但個日我地都算早，一入就有位。店面不大但幾乾淨舒適。成間店只係賣一種丼飯，有分size同豪華版。我地叫左2個丼飯，一嚟先上前菜。前菜有2片魚生配胡麻汁，先食一塊，留返另一塊一陣食茶漬飯。紫菜一陣可以自製手卷。梅 $108-有10種海鮮，吞拿魚、吞拿魚蓉我最愛、北寄貝、帶子、甜蝦、三文魚子、烏賊、油甘魚鱲魚、希靈魚。呢種丼飯係全部海鮮切粒mix埋，但朋友唔鐘意食希靈魚要自己夾出嚟。魚生都新鮮，飯有芝麻幾香。我自己都幾鐘意自製手卷個食法。竹 $145-朋友既丼飯，飯量冇變，魚生都係10種但魚生份量就多啲，都明顯係高啲。食淨3份1飯可以轉落另一個碗，叫店員幫你加湯。湯有d柚子味幾清，反而覺得呢個茶漬飯係全晚最好飯😂朋友試左留返塊魚生加湯食，但覺得味道好怪，都係當魚生就咁食好食啲。整體嚟講不過不失。…查看更多

今日5點令鐘就放左，時間尚早但又有啲餓，一於食個甜品當晚餐。附近見到呢間，環境幾好都唔錯，又有想食既芋圓，就試下呢間。珍寶芋圓仙草 (古早黑糖) 熱 $32-芋圓有分普通同珍寶，珍寶大粒啲因爲入面仲有餡食到有芋頭蓉同蕃薯蓉，好食。黑糖唔會好甜，熱熱地好養生既感覺，啱哂呢排涼涼地食。仲有紅豆同仙草係入面，好豐富好滿足。芒果窩夫$46-窩夫即叫即整，熱熱地，有蛋香，配埋芒果雪糕同鮮芒果粒食，一流！雪糕仲有2球，一球係窩夫後面遮住左芒果都好甜唔酸。榴槤星球$32-星球系列都算係呢間甜品店招牌，出面未見過。椰汁底，有芒果、西瓜、西米，最重要係榴槤星球。一粒粒啫喱球包住榴槤肉，一咬就爆開，幾特別。草莓戀人$36-成個甜品都係草莓，女仔一定好難抗拒！草莓雪糕有果肉好好食，有小丸子同椰果口感好豐富。略嫌草莓汁有啲甜，食到尾覺得有啲膩。整體嚟講都唔錯，坐位都舒適。…查看更多

今日約左朋友去尖沙咀行街睇野，諗緊食咩好，突然想起有介紹過烏蠅館，一於同朋友嚟試下冒菜。平日夜晚少啲人，去到唔洗等，但夜啲都開始多人，早啲去好啲。有一人餐，二人餐咁，但二人餐有千層肚、黃喉，唔係咁啱食所以都係叫返一人一個餐。$48可以揀6餸豬大腸、豬耳絲、肥牛、蓮藕片、土豆片同火鍋寬粉。麻辣湯底要小辣。小辣真係唔會好辣，完全食到，但麻味略欠，感覺清左啲。蒜蓉勁多，好香蒜味，我幾鐘意。豬腸洗得好乾淨，唔臭，豬耳爽口唔會太肥。寬粉似內地火鍋個種，煙煙韌韌。配料都幾多。餐配$10桂花烏龍茶好有茶香，唔係用出面支裝買既茶而係自己沖，幾有誠意。茉莉蜂蜜，少少甜但有返茉莉既香味，幾好。本身想叫烏龍奶茶，可惜當晚冇，唯有睇下下次有冇機會再飲到。…查看更多

今日約左朋友係旺角附近食lunch，呢間係佢介紹，望落環境幾靚野食ok就去試下。餐廳環境幾好，唔會好嘈，都幾啱傾計，仲有wifi同board game玩，下次同一班朋友嚟食下野玩下game都幾好。lunch set都幾抵食，仲包一杯$30野飲。波菜忌廉雞肉意粉$68朋友叫既，味道唔錯。雞肉份量都多，仲有啲蘑菇，忌廉食落唔會好膩。蕃茄忌廉煙三文魚意粉$68煙三文魚係有少少煮熟個種，唔係就咁放上去，味道幾好，酸酸地好開胃。有啲洋蔥、黃椒同紅椒。另外叫左2杯凍檸茶，加$2。整體嚟講都ok，幾抵食，環境又舒服。…查看更多

近期係東港城新開呢間，lunch同夜晚都好多人排隊，好彩可以用app拎飛，呢樣幾好。今晚屋企冇煮飯，一於試下新野。波士頓龍蝦喇沙$84-新開期間既優惠，原價要$168，見差唔多每枱都有叫，我地都叫嚟試下。湯底幾濃郁，上枱前見匙羹有啲醬諗都冇諗就撈哂落去，後尾先知係辣醬所以都幾辣。龍蝦肉質都結實，唔會好霉，仲有豆卜、魚片做配料，呢個價錢都唔錯。軟殼蟹紙米卷6件$66-紙米卷入面仲有芒果同黃椒紅椒，軟殼蟹份量都啱啱好，唔會少到食唔出，味道中規中矩都ok。香茅牛肉撈檬粉$64-香茅味夠出，略嫌牛肉有啲老。檬粉份量夠多又唔會碎，幾好食。秘製肉骨茶$76-好大碗，豆卜好索味，排骨有幾夠舊未至於老到咬唔開，湯都好飲。泰色奶茶(凍)$24-都幾大杯，味道偏甜，我覺得都可以。整體嚟講都唔錯，仲有其他菜式想試，唯有留返下一次…查看更多

今日4點先有堂，可以同friend食個好d既lunch先返去上堂。朋友提議食呢間放題，可以慢慢食，一於去試下。平日嚟到少啲人，加上lunch time人未多環境幾靜幾啱傾計，平時食夜晚人多又嘈，講野都要大聲啲。全部都係卡位設計，坐得幾舒服。野飲自己出去拎，款式都係平時放題飲開既。食放題第一round緊係刺身，人多咩都寫啲，嚟到嚇一跳。海膽係送既，好鮮甜。帶子大粒鮮甜。甜蝦同三文魚都好新鮮。當然唔少得我既至愛北寄貝之後叫左啲熟食。鰻魚切到細細粒，方便入口，嚟到仲熱，可以再叫。蕃薯仔都係必叫。金菇好香牛油味，個個爭食。再嚟就係壽司，好特別呢到有煙三文魚壽司，一樣好食。花之戀用料足。手卷細細隻唔會話好飽食唔到其他野。炸物全部熱辣辣，芝士年糕好煙韌，芝士又夠多，好回味。芋圓都唔錯。芝麻雞翼夠脆夠香口，另外仲有平時少見既紫薯薯餅，同樣好食，唔係求其貨色。食到咁飽都食唔落甜品。甜品都係普通雪糕，都ok。整體嚟講唔錯，lunch嚟食會更抵，人少少又可以食幾個鐘，唔去cafe溫書可以轉埋場嚟呢到。…查看更多

今日係朋友既生日，一早揀定呢間同佢慶祝，夜晚開始會多人所以最好book定位。我地叫左個開心晚市二人套餐$398再加多個意粉，價錢都ok仲有野飲。先嚟個餐包同2個蘑菇忌廉餐湯，蘑菇湯都唔錯，湯幾香幾濃。牛油果三文魚籽蟹肉脆餅-呢個前菜幾特別，食落又幾夾，餅夠脆，魚籽新鮮。係口中爆開又幾好味。燒美國肉眼扒(10oz)配炸薯條 +$30-加左$30升級呢個肉眼扒，完全係值得。叫左5成熟，燒到啱啱好，肉未夠濃又唔老，好好食。薯條新鮮炸起熱辣辣。烤蕃茄什菌扁麵-味道唔會太酸，有少少芝士粉係面增加香味，麵煮得都Q彈。大蝦扁麵配乾白酒汁$128-另外叫左呢個意粉，好香酒味同蒜味，大蝦都彈牙，唔錯。套餐仲包2杯餐飲。整體嚟講都好食，下次會再嚟。…查看更多

近排天氣熱又曬，都費事阿媽煮飯咁辛苦，都係出去食餐算。好耐冇食婆婆，今日一於去食。一共叫左4個餸。雞絲水晶粉皮$65-用左上海麻醬，好香，有d似花生醬味。雞絲同青瓜絲分量都夠，粉皮唔硬，味道唔錯。醉乳鴿$90-平時食開醉雞今次試下醉乳鴿，酒味夠重，幾香。乳鴿皮比起雞皮冇咁肥，食落冇咁罪惡感肉質都夠嫩。婆婆生煎包$36-生煎包就麻麻地，入面冇湯汁似係放耐左，底唔夠脆，下次可以唔洗叫。野生山椒牛仔肉撈麵$62-試下呢個新款撈麵，餐牌寫明一隻辣椒，諗住少少辣應該都ok，點知真係超級超級辣。麻味重，牛肉都多同香，但唔食得辣既我下次都係叫返其他，因為真係太辣。整體嚟講都ok。…查看更多

今日約左朋友係尖沙咀行街，幫下眼買咩生日禮物送比人好，行街前緊係要醫左肚先。吉烈牛講左咁耐都未試過，今日一於去試下，睇下係咪真係咁好食。午餐有set lunch都幾吸引，而且價錢平啲，但今次嚟係為左吉烈牛，雖然lunch meun冇，但都可以叫，只係冇得平啲姐。和式牛吉列御膳有3款級別，分別係極上、霜降同普通，我地小試牛刀都係叫個普通先，用既係美國安格斯牛。點左菜之後會一人有一個鐵板爐同3款醬汁。牛吉列御膳$188-配花有菇漬物同龍蝦沙律。我朋友唔食沙律都覺得龍蝦沙律唔錯。溫泉蛋好滑，我用左嚟撈飯食，一流。湯正常。牛每邊煎幾秒就得，肉味夠而且有肉汁幾好食，但始終係吉列牛，外面炸得唔夠脆身，同普通燒牛冇分別，呢點有啲失望。整體嚟講都唔錯，但下次會試下其他定食。…查看更多

今晚約左朋友係apm睇deadpool 2，順便係呢到食埋夜晚。朋友想食日本野，丼丼屋又未食過，之前已經想試，今次有機會終於可以試下。星期五晚都幾多人，差不多都等左成個鐘先有位，咁多人食應該都唔差。meun上好多刺身丼飯都好吸引，但今晚大家都想食熱啲既野，所以叫左個滑蛋丼飯，我地都係滑蛋系列既fans。特上刺身定食$48-叫任何丼飯都可以加錢要沙律、炸雞、薯餅、刺身等。我同朋友都叫左呢個刺身定食，有2片三文魚、2片帶子同1住甜蝦。刺身幾新鮮，三文魚正常，帶子同蝦好鮮甜。仲包埋昆布湯、沙律、漬物。湯好清，唔錯。其他都正常，$48有齊咁多野，都ok。滑蛋饅魚丼$118-到主食la一上饅魚丼見到都好滿足，蛋好香而且好滑，撈飯一流，仲有啲洋蔥絲甜甜地。饅魚份糧都唔少，一大塊上，夠熱而且肥美，成個丼飯真係好好食。滑蛋豬扒丼$98-朋友叫的豬扒丼，同樣係滑蛋同樣好食。豬扒炸得啱啱好，又熱又脆，而且豬扒唔會好鞋，食落好鬆軟，有肉汁，好食。買單300幾加一，仲送張$20優惠卷下次用。整體嚟講唔錯，下次會再食。…查看更多

係附近行到熱想買杯野飲，朋友話之前見到呢間茶理史想試下，一於就買杯試下。嚟到都幾多人排緊隊，見到小芋圓幾特別，就買杯小芋圓系列。芋香鮮乳小芋圓$26-草莓鮮乳小芋圓$28-嚟到顏色幾靚，分左3層。芋頭味好香，夠味，同有芋頭蓉係入面，食到有粒粒芋頭。用鮮奶唔會太甜，啱啱好，而且奶味重，好滑。小芋圓煙煙韌韌好有咬口，好食，但冇珍珠咁韌，幾鐘意。朋友的草莓味，成杯粉紅色啱唒女仔打卡。係用新鮮草莓打出嚟，食到有粒粒果肉，唔錯。下次會再試下其他。…查看更多

又到一年一度母親大人既生日，指名要食buffet加上成家都鐘意食榴槤，一直想試The market但冇機會，今次就趁呢個藉口去試下。一早係網上訂好位，要先俾訂金每人$200。6點半可以入去，6點半未到已經見人排唒隊係出面等入。餐廳環境幾好，座位夠闊，一坐底即刻出去拎野食。第一round緊係刺身同海鮮，龍蝦雖細隻但都有好多膏，夠彈牙，阿媽反而鐘意細細隻可以食多啲其他野。帶子鮮甜，食多幾隻都得。甘海老反而有d失望，肉質唔幾實，似放左好耐，食過一隻就冇再食。魚子醬蟹肉多士超級好食，多士脆卜卜配上魚子醬，魚子醬香味係口腔散發，呢個真係高質，食左4 5塊。椰子海底椰燉雞湯，呢個湯好足料，食到好香椰子味，鐘意飲湯幾我都飲左2碗。喇沙，好香椰奶味，可以跟麵或米線，但我已經飽飽到所以淨係要湯。都好重料，有魚片、蝦、豆卜、青瓜絲。味道唔錯，可惜已有6 7成飽要留肚食甜品。到全晚既重點甜品好多，有好多款都係榴槤系列。炸榴槤要熱食先好食，脆卜卜好香有既榴槤蓉。榴槤芝士蛋糕正常。榴槤班蘭卷好好食，一向鐘意蛋糕卷，中間用榴槤蓉代替cream，更對我心。不得不提緊係最出名既榴槤雪糕，成球好似榴槤拎去雪咁，好香好濃榴槤味，仲有少許果肉。茉莉花朱古力蛋糕，呢個蛋糕唔會好甜，仲有啲茉莉花茶香，都值得一食。整體嚟講呢個buffet都好高質，甜品更加係食過之中款式多同好食，下次都會再嚟。…查看更多