柳記波神的個人專頁

去Nort Point叫Fuken雞！sorry, 原來係Hainnan海南雞！又要平又要靚，梗係找大媽！Oh，又sorry，原來係瓊媽媽。無骨海南鷄+雞油飯+例湯例湯係南瓜雞腳煲豬骨湯，簡直係住家老火湯，冇味精，好過老母煲 (因為我老母從來唔煲湯嘅)無骨海南鷄+雞油飯，油飯好有油香味，但就唔係花生油/粟米油/界花籽油果種油味，就係油味，好好味。無骨海南鷄，好滑好嫩，好有大陸鷄味，果然衹可以係北角先食得到呢種咁有大陸鷄味嘅雞。…查看更多

摩囉雞扒飯，喺老牌大餐廳飯，喺懷舊飯，平時係唔多見到，今次見到所以就叫嚟食，點知可能因為廚師水準唔夠，有可能對呢一個飯嘅知識同掌握不足，就中伏。雞排炸出嚟，而唔喺煎出嚟已經好唔掂，個汁甜甜酸酸，但係又唔夠香口，個味道似係甜酸汁多過摩囉汁，完全唔似以前食過摩囉雞嘅味道，雞肉攪到又嚡又硬，完全唔係個回事! 摩囉雞肉飯唔喺咁樣!!唔單止個飯唔好食，就連最基本嘅羅宋湯，佢都煮得唔掂，一味得個酸，完全唔好飲。幻想破滅! 大崩壞!…查看更多

我叫咗碟「乾炒牛河」，幾多錢我忘記咗，但係碟牛河嘅份量少到呢，真係少到一個點，正常男人根本唔會夠飽，望一望，即時嚇一跳，然後就覺得幾搞笑。呢個 dry fried beef river noodles「乾炒牛河」，憑肉眼睇起上嚟都見到「令立立」真係多油到呢，完全係拋曬光，食落真係滿口都是油，而且未到仲好，真係咸到呢，會直衝上腦咁 (可能係師傅落多咗一次鹽都唔奇！) 仲有就係嗰啲牛肉片係好硬好靱，而且都係好咸，堅係唔好食。…查看更多

開完工好肚餓，有乜食乜，最緊要係自己負擔得到而係熱食嘅話，就衝入去食。入到茶記，我通常都係食咸魚雞粒，又或者係炒粉麵，今日我就揀食炒飯。咸魚雞粒炒飯 salty fish and chicken fried rice，一啲鑊氣都冇，啲飯炒得唔夠乾身，應該係好濕身，好似未炒好咁仲係好濕，咸魚夠咸但唔係咁香，雞肉有冇乜味，炒飯食落去味道唔均勻。我個人感覺係個師傅好似未學滿師就出嚟撈咁樣，但係又有人夠彊請佢做廚師，咁先至出奇喎。 完全冇料到。…查看更多

聽聞呢一間「麻辣川米線」係香港十大米線舖之一，又聽聞佢嘅清湯底好有鮮味。我嗰日就本住去fact check嘅精神就試下，叫「食物。熊貓」 送外賣返屋企食，睇睇佢有冇料到。我買嘅係麵筋腩肉清湯米線。好處之一就係湯同米線係分開載住嘅， 而且嗰啲配料嘅份量都幾多，配料有菜脯、芽菜、韭菜、腐皮。但係米線就唔係好多，對於我呢啲大食嘅人嚟講，只可以話係完全唔會飽肚，只係攝牙罅，食嚟唔會飽肚，咁又有乜嘢意義呢。麵筋同腩肉都唔係好好味，麵筋唔夠入味唔夠林，腩肉都係唔夠入味，而且切得好薄，數量好少又好硬身。畀人講到識飛嘅清湯，飲落去平平無奇不特止！竟然仲係好咸！仲有種中伏嘅感覺睇呢坊間傳言，道聽塗說嘅嘢，真係不信為妙，乜嘢十大米線舖，只係都市傳說。…查看更多

還記得90年代嘅時候， 大快活有個電視廣告，個slogan係，「大快活精神，挑戰無限分」。 當時我比較年輕，唔知道無限分，究竟係乜嘢。 呢個迷，至今我都未曾可以解開。不過我知道，大快活幾許風雨之下，成績有目共睹，嘢食水準係有增加嘅。 呢個咖哩牛腩飯就認證咗。咖哩牛腩飯，咖哩煮得好傑好入味，我唔知道呢個係印度，巴基斯坦，印尼，定係南洋種類嘅咖哩，但我就覺得咖哩味道好香好惹味，薯仔又夠入味，牛腩煮得又夠淋又夠入味，味道唔係好辣，一般人都應該可以接受到。呢個咖哩飯好掂，真係平靚正。…查看更多

廣東話有句老語: 「好就女人，唔好就累人」 呢句話真係堅，真係金石良言，今晚我就完全體會咗喇。事關節日送一份厚禮畀girlfriend，都冇隔幾日，約佢出嚟嘅時候佢就帶咗去呢間勁貴嘅餐廳。其實喺門口我已經感覺到佢嘅貴，入到去睇到個環境更加就知道係不得了，我想走又走唔到。 硬著頭皮就坐低。打開個drink list，我真係飲唔起，其實 當佢見到啲價錢之後佢都知道大劑，冇咁大個頭就唔好戴咁大頂帽，都體會到。但係坐低咗，就求其嗌一啲嘢食咗就算。麻辣牛展，原來呢度食嘅大部分都係中菜，呢個麻辣牛展，唔係好麻但係就好辣，食落去唔覺得有乜嘢特別，除咗個擺盤比較好睇之外，味道上比起好多四川菜館嚟講都可能係中下添，真係唔知道佢憑乜嘢收咁貴，可能就係因為幫佢畀租金同裝修啦。跟住叫嗰個係，素蟹粉炒蛋白，呢個係我都好想叫嚟食嘅，因為嗰個名好特別，但原來走是賽螃蟹咁樣，係一個唔知乜嘢版本嘅賽螃蟹，啲仿蟹炒得都唔係好滑，味道幾特別，仲有啲奇奇怪怪，肯定係我食唔慣，感覺就冇傳統賽螃蟹咁好味，只不過個價錢好高貴。可能係因為地方太高級，我唔慣！坐得好唔自在！ 唔係地方問題，係我自己唔習慣。有一樣嘢真，啲嘢好貴好唔抵食。…查看更多

我唔係一個咖啡friend，我對飲咖啡一啲研究都冇，對於西餅甜食又係一啲興趣都冇，我食甜品嘅次數，一年裏面十隻手指寥寥可數。不過我個girlfriend就好鍾意食甜品，所以係冇辦法底下，我鍶要頂硬上同傴一齊食甜品，但我想講我食，唔代表我鍾意！今次我又頂硬上，同佢一齊去咗starbucks食呢個，佢話新出嘅聖誕甜品。聖誕馴鹿楓糖碧根果仁芝士蛋糕我承認，呢個馴鹿嘅造型蛋糕係好吸引， 但係切落去嘅時候就好硬，話係芝士蛋糕但係芝士味唔係好濃，乜嘢叫碧根果仁我根本唔知道，就係食得出好似係堅果味咁樣，話係焦糖味但，係其實只係面頭輕輕咁樣有啲味嘅焦糖味，完全唔突出。我個girlfriend話好好食，我唔覺囉。…查看更多

好多住喺North Point嘅朋友都話畀我聽呢間「四眼妹美食屋」啲嘢食好掂好好味，於是我就把心一橫老遠嚟到呢個區去試下睇下係咪真係傳聞咁好食。順便真心嗰句，我係想睇下「四眼妹」靚唔靚女，不過嗰日去到就唔見有個「四眼妹」 所以我未食就先失望。我就外買咗一盒腸粉，帶去girlfriend個屋企食。呢間啲腸粉真係夠經典！ 佢嘅質感又粗、好嚡、又夠硬，絕對係「機製」廠房腸粉嘅典範！味道就係冇乜米味，當然加咗各色嘅醬料，例如麻醬、甜醬、豉油、辣醬之後，係食得入口嘅。但係單純以白腸粉嘅味道嚟講，就no good啦。絕對係期望越大，失望越大。…查看更多

今日off duty之後，去美孚探一個受咗傷嘅伙記，之後再去大家樂食餐飯。 結果，還真係換來一肚氣。當時真係下晝五點半，我叫咗一個「滑蛋牛肉飯 配 凍檸檬茶」，以正常概念嚟講 應該係一絲絲又滑又薄嘅滑蛋，覆蓋著牛肉咁樣。但係大家樂嘅呢個「滑蛋牛肉飯」 竟然就係好似湯飯咁樣，有稀溜溜又水汪汪嘅芡汁，湯汁裏面有一啲滑蛋絲，同幾片牛肉咁樣。 好在就係有圖有真相，唔係真係講都冇人信呢個係滑蛋牛肉飯。賣相唔掂，味道就係更加強差人意， 水汪汪嘅芡汁，真係見到都唔想食，食到都唔覺好味，牛肉好硬，滑蛋根本就好似雞蛋碎，冇蛋味，芡汁就好鹹。完全唔似樣又完全唔好味。Oh My God…查看更多

今日無端端有啲朋友話上嚟我屋企打麻雀，咁ok啦。然後佢哋嚟咗，見佢哋拎住一盒美心蛋糕我就面色一沉，呢個蛋糕盒上面寫著let's celebrate，咁嘅環境，美心集團佢哋想celebrate啲乜嘢呢？ 又有乜嘢值得去celebrate呢？不過slogan還slogan，食物還食物，我而家就先講講啲西餅嘅狀況。講真嗰句，真係冇乜西餅，好似美心西餅嘅西餅咁頹，蛋糕嘅質地又乾 又硬，味道上面係完全冇誠意，朱古力蛋糕冇朱古力味，奶油忌廉又唔好味，芋香味嘅忌廉蛋糕完全冇芋頭味。 一個字 : 頹。…查看更多

呢一間祥香茶餐廳，我由細細個已經開始幫襯，仲記得以前阿爸成日帶我嚟呢度 「食蛋撻」。嚟到今日，我爸爸都「走咗」十幾年，今時今日嘅西環亦都唔係以前嘅西環。今日就因為有啲事 入嚟西環探長輩，當然入嚟呢間祥香茶餐廳懷舊一番，順便買盒蛋撻請長輩食。其實由我見到蛋撻嗰刻開始，已經覺得好似唔夠以前吸引咁樣，咬落口第一啖就會覺得，點解唔同咗味呀！？ 幾十年前唔係咁嘅味喎！ 就算唔好講話懷舊味道，而且呢個蛋撻直頭就係唔好味。個牛油皮，點解唔重牛油味嘅？ 蛋撻嘅蛋漿唔夠蛋味又唔夠甜味，而且拎上手仲好似輕飄飄咁樣，點解小店會嘅蛋撻會有連鎖店嘅味道呢，我覺得呢個係個疑團。What happened to the egg tart that I used to love.…查看更多

去得敏華冰室，有幾樣嘢通常啲人都會食，一係就係黯然銷魂飯，一係就係菠蘿包，我揀嘅就係黯然銷魂飯。暗然銷魂飯，如果譯做英文就係sorrowful rice 或者 tragedy rice。就咁樣講返我呢次食到嘅暗然銷魂飯。叉燒好鬼瘦，雖然用梅頭肉係燒得好香，但係好黯然，在於叉燒嘅肉質好硬，而且咬落乾爭爭 。 飯都好黯然，煮出來的白飯是一粒粒又硬又有骨，我比較偏向鍾意食軟飯，硬嘅飯唔啱我口味。好黯然。我提醒侍應，話明唔要落豉油，點知呢碗飯有好多豉油，我覺得好咸 我同侍應講，可唔可以換過一碗，佢話有難度。咁即係我要被迫去食，我果日唔食嘅豉油。真係黯然神傷。大失所望。…查看更多

人年紀越大越覺得食餐安樂茶飯好重要， 更何況香港正值多事之秋，就更加需要一啲好嘢食去振奮自己嘅心情 ; 但無奈，最係事與願違。 就連去茶記食個好普通嘅涼瓜牛肉飯都會中伏，真係no eyes see.涼瓜牛肉飯，亦即係苦瓜牛肉飯 ; 話明係苦瓜，就算點冇味，都應該有一啲苦瓜味嘅，好無奈呢碟的苦瓜係冇苦瓜味嘅 ; 飯好黏口，口感唔好 ; 個芡汁好杰，好漿口而且好咸 ; 牛肉好大陣雪藏味，完全食唔出有肉味，完全like唔落。完全諗唔明，點解簡簡單單嘅涼瓜牛肉飯都可以煮得唔好食。…查看更多

呢一間北角嘅富臨皇宮，出咗名多福建人幫襯，8月11號，中午12點，我路過上址， 於是就上去外買一個"福建炒飯"畀我呢一個朋友食，而我呢個朋友，就係啱啱8月11號由福建蒲田受聘嚟香港工作5小畤嘅朋友。我就買咗兩個福建炒飯一齊食，佢一盒我一盒。福建炒飯，個飯明顯用豉油炒過，都有少少雞蛋但係唔多，餸料唔係好豐富，但係都有啲蝦粒、火腿、菇、紅蘿蔔、瘦肉、菜粒，基本上所有餸料都食得出好大陣雪藏味，而且個芡汁好咸，個飯都係好咸。如果係一般茶餐廳嘅話，我勉強會收貨，但係要知道呢一間係酒家，唔係茶餐廳 ;我同朋友超失望。…查看更多