ccy521的个人专页

《俺流塩らーめん》俺流塩湯拉麵 🍜📍觀塘觀塘道418號創紀之城五期(apm)1樓L1-1號舖呢間店本身我就冇聽過，不過因為近來星期六都經過 APM，又有空閒，姑且一試。一如以往，第一次食，都係試最招牌最基本款。所以選左《俺流塩湯拉麵 🍜》香味 (2.5/5)塩湯本身香味係比較欠缺，呢碗都唔例外。而且冇加任何香味油，所以聞落嘅味都係淡淡然。湯 (2/5)其實見呢間店有濃湯同塩湯嘅選擇，我一向唔好食濃湯，所以都係揀左塩湯，心入面一早預左佢會偏淡，唔會濃味得去邊。一如所料，真係頗淡，鹹度偏低，湯底嘅味就只有普通鰹魚味同蔬菜甜味，然後就沒有然後了。成個湯除左淡之外，味道都偏單薄。食到後段，加返少少醬油同拉麵胡椒，勉強叫救到個湯。麵條 (3/5)最常見嘅中細直麵，麵色偏白，都係正正常常。淥麵時間可一讚，麵夠爽，硬度係我喜歡嘅。配料 (4/5)萬萬料不到，豬叉燒可以挽回唔少分數。本來見到塊叉，都幾大塊同幾厚切 (目測大概都 7mm 厚) 喎，心諗今次又要練牙力啦。點知又唔係喎，幾稔喎！部位係豬肩肉，厚切叉通常都會用豬里肌，用肩肉嘅比較少見。調味都係偏輕手，調料嘅味道唔濃，主要都係豬肉本身嘅味，而肉味係幾夠。呢塊叉燒係一大記憶點，本身湯同麵都較弱，諗住冇下次，但因為佢我可能會再去。如果你本身口味偏淡，或者一試都無妨，連加一都係 74，唔貴，重味者則多數唔會啱。要注意嘅係，APM 2樓 Food Fiesta 入面都有間《俺流うどん》，專食烏冬，如果想試唔好去錯。…查看更多

《神山麺屋》白神山豚角拉麵 🍜+ 低溫叉燒🥩📍觀塘觀塘道418號創紀之城五期(apm)2樓L2-1b號舖神山麵屋係麵屋武藏集團其中一個分支店，整間店處處都見到麵屋武藏嘅品牌。麵屋武藏响旺角朗豪坊嘅武骨相傳店已經食過好幾次，而神山對上一次食都已經係8-9年前，剛開業時食過至今，印象中已經唔深刻，淨係記得係偏濃味偏鹹，今次咁啱經過又有半個鐘自由時間，一於重溫一下。一如其他麵屋武藏分支店一樣，其中一個特色係叉燒有豚角煮🍖 (豬五花) 同豚肉片🥩 (似豚肩肉)，因為冇乜幾何來呢間店，決定一次過試晒兩款啦。香味 (4/5)魚介同豬骨嘅香味撲鼻，雙頭湯底果然係一大特色，聞落非常之香。湯 (3/5)聞就誇啦啦，飲落就唔太對到我口味。豚骨魚介嘅味配塩係討好，可惜一如我對麵屋武藏嘅印象一樣，湯太濃太鹹太甜。頭一啖還好，冇耐開始負擔就越來越大，加上味精嘅存在感都頗重，食左冇耐就有口乾感。麵條 (4/5)中細直麵，偏黃，偏高加水，爽滑彈牙。麵係好食，而且幾有特色。配料 (4/5)豚角煮🍖未係我心目中嘅最佳狀態，調味正常，但未夠稔。如果同鬼金棒嘅角煮比較，直接輸一至兩條街。好彩我決定加豚肉片，呢款低溫叉燒🥩真係好食到暈。論嫩滑程度，同肉嘅甘香鮮味，佢直接就做左我全港嘅 no.1 (本身係未搬前嘅台風R)。溏心蛋又係正，蛋香，調味，生熟度係一等一。筍就有d渣，筍味正常啦。整體 - 我唯一覺得唔 ok 嘅係湯太鹹太甜，感覺似食緊茶餐廳嘅野食咁，味道偏濃。如果你食野慣重口味，其實呢碗麵係幾好食，不過建議叫普通叉燒拉麵好過豚角煮拉麵。…查看更多

《花華和食屋》煮干粟米🌽冷拉麵 🍜📍屯門良德街8號珀御地下G06號舖早响 社交平台都見到，花華和食屋近期都有出限定款冷拉麵，而佢每款限定通常只做一個星期，今次有緣遇到呢款《煮干粟米🌽冷拉麵 🍜》，當然係要試試啦！香味 (4/5)如果以冷拉麵來講，煮干嘅香味同粟米嘅香味都算幾出，始終都係凍湯唔係熱湯。湯 (5/5)呢款雖然係冷湯，不過味道十分好。粟米嘅甜味會行先，中後段煮干嘅味會漸漸出黎，相當有層次。而煮干同粟米嘅味道平衡亦洽到好處，冇話邊個搶左邊個。可能因為主題係粟米嘅關係，甜味係會比鹹味更出，正好配合到呢碗冷麵。麵條 (5/5)店家聲稱用左自家製42%全粒粉加高水麵，係咪高到42%我就食唔出，不過呢款麵凍食真係非常之煙韌，口感好好，配呢款濃稠嘅粟米湯非常之夾。配料 (5/5)慢煮豬叉燒入口軟嫩，而肉味極之甘香，相當好食。除此之外，另外仲有一個驚喜位，就係粒睇落平平無奇嘅蕃茄乾，竟然鮮味到一個點，酸味同甜味剛剛好，對碗麵有畫龍點睛之妙。整體 - 超高水準，冇乜位可以挑剔，如果唔係住得遠，我可能會 encore 多次。順帶一提，隻碟嘅顏色我就唔多喜歡，因為個人來講，我唔鍾意响餐具上見到呢隻孔雀藍，見到令人有d冇胃口。…查看更多

《麵屋進化》塩，醬油雙沾麵 🍜📍屯門青菱徑7號華興大廈地下B號舖今日偶然間獲得一個難得機會，可以一條友食 lunch 而且連頭帶尾有幾個鐘。對於又係九龍友又係拉麵愛好者嘅我，成日見麵友可以密密响屯門搵食真係羡慕又妒忌。今日一於去屯門快閃食拉麵，而既然來都來了，一於來個連食，連跑兩間，呢個 post 就係第一間。麵屋進化早排風頭一時無兩，唔少麵友都有評論過，我就望到頸都長今日終於意外地食得到。爬過之前麵友 d 文，最後都係決定食《塩，醬油雙沾麵 🍜》。去到門口見到店家清楚表明係試業中，既然係咁我就好壞都講吓啦。做得好嘅：沾汁好好味。醬油沾汁非常甘香醇厚，色澤較深近乎係黑色，韻味高雅，唔係求求其其溝得出呢個效果。塩沾汁方面滿有驚喜，濃濃嘅煮干味極之明顯，亦有貝類嘅味道。塩沾汁入面有粒塊切成立方體嘅叉燒，以為係 d 切頭切尾 hea 野，點知係滿滿嘅煙燻味，仲幾稔添，呢吓估佢唔到。麵條本身高質，麥味夠，零鹼水味，軟硬度適中。連埋昆布水食好滑溜，效果好好。未沾汁食前，將少少鹽🧂加落去 d 麵就咁食都已經幾好食。我提過好多次，一碗好嘅麵一定要記憶點。我相信呢款麵其中一個主要記憶點就係條麵刺。連埋Wasabi同少少醬油一齊食，有一種先聲奪人嘅效果。唔夠好嘅 (都頗多)：今日未夠 12 點就到，我係第一個點餐的，不過前前後後等左 15 分鐘碗麵先到。如果前面有 order 等得耐都唔出奇，以第一個 order 來講要等 15 分鐘似乎耐得d。麵量真係過少，我冇問過，不過目測大概係 150g 左右 (煮後)。因為碗麵都唔平，$158，麵量我認為可以提升至少 ⅓ 左右，會滿足 d。叉燒方面我認為係最有改善空間的。雞叉燒塊皮烤焗至脆口，不過成塊比較乾。鴨叉燒鴨騷味頗重。豬叉燒用左兩個唔同部位，雖然都係有慢煮嘅軟嫩，不過肉味偏淡，唔夠肉嘅甘香味。最後嘅湯割，比左一杯仔嘅煮干湯。湯本身係香嘅，不過份量太少，而且要自己酌量加 d 食剩嘅沾汁入去。因為沾汁一如所料都相當鹹，就咁憑感覺倒落去都幾易倒過龍。昆布水量太少，雖然店家有話可以將食剩嘅塩沾汁倒埋落食剩嘅昆布水入面溝稀，但當食晒所有麵嘅時候，剩餘嘅昆布水只有好少，根本唔足夠溝稀剩餘嘅塩沾汁。因為沾汁本身質量夠高，而款麵配呢款沾汁，同昆布水產生出黎嘅效果非常好，所以我認為已經足夠好。其他以上指出嘅問題，如果店家係有心做，相信一定好快會有改善。…查看更多

❰阿夫利拉麵❱ 豚骨鹽味拉麵 🍜📍尖沙咀彌敦道100號The ONE 2樓 i.t orange forest內呢間阿夫利係我第三次光顧，頭兩次都係揀最招牌嘅柚子🍊塩/醬油，印象唔錯，屬淡麗風格，柚子香味帶黎不少記憶點，配雞骨湯，今次就試試佢嘅豚骨湯啦！香味 (4.5/5)可能我一早冇睇Menu張圖睇得夠清楚，原來呢款麵係配黑蒜🧄油。有黑蒜油，當然香味撲鼻，而叉燒嘅焦香味亦應記一功，好香。湯 (4/5)豚骨嘅味道其實並唔係好似一蘭d豚骨湯咁煲到咁濃郁，不過正好同鹽味結合到，取得味道上嘅平衡點，呢吓係好嘅。另外鹹度算剛好，如果主打淡麗風的話，我認為鹹味仲有稍稍下調嘅空間。黑蒜油嘅量都唔少，食得過癮不過油膩感稍稍偏重。麵條 (4/5)全粒小麥粉造成嘅麵條，直身，口感好，爽口又有韌性。最難得係，佢個湯夠熱之餘，個麵係由頭爽到尾，唔會話浸到腍左。配料 (4/5)豬叉燒都係最傳統嘅五花肉卷式叉燒，味道，香味同口感都非常好，焦香味正好同黑蒜互相配合。溏心蛋偏淡，冇點刻意調味，接近係水煮蛋咁，不過吸左d鹽湯食上來都還好 。木耳，青蔥同紅薑絲嘅量洽到好處，由頭食到尾都有清爽口感。雖然阿夫利唔係我嘅首選，但係往往每過一排都會想食返碗，因為佢風味清新討好，份量稍偏少不過如胃口不大嘅時候食就剛好。…查看更多

《癸酉》塩味拉麵🍜📍荃灣大壩街1號地舖《塩味拉麵🍜》香味 (5/5)香味方面真係冇得輸，極之香。因為我就坐响師傅位隔離，近距離睇住佢整，每碗麵都放頗多嘅雞油 (目測，未必準)，而碗湯又滾熱辣，所以雞香味爆滿。湯 (3/5)雞味係非常濃郁，又夠鮮。除左雞味之外，大概就只有蔬菜嘅甜味，冇乜其他雜味，可以話雞味非常純粹。可惜，最大致命傷係塩醬加得太多，成個湯太鹹，雖然個湯嘅味道係討好，但鹹度太高，一路食一路有負擔，未能盡情享受到。另外，雞油嘅量就真係多左d，食到冇耐就覺得油膩，令負擔更大。不過凡事兩面睇，正因為油量多，碗湯由頭熱到尾。麵條 (4/5)呢款麵唔係少見，中細直麵，偏白色，麵味偏淡不過配塩湯係夾。我特別鍾意個軟硬度，以我口味而言係剛好煮到甜蜜點，有咬口之餘又不失軟糯，呢種口感係比較少有。配料 (4.5/5)雞叉燒中上，即叫即煎，應該係先煮左8-9成熟，有order就煎香埋個面就剛好。不過肉汁稍嫌少左d。豬叉燒係即叫即切，以我觀察，正常每碗麵都係跟兩塊，剛處理我嗰碗時，咁啱切到差不多尾，所以嗰兩塊肉較細。不過師傅確實夠均真，自動自覺响另一舊大叉燒道切多塊比我，呢吓抵讚！味道方面，因為塊肉近乎冇點額外調味，完全冇食到調料嘅味道，只有純粹嘅豬肉味。如果店家想特顯肉本身嘅肉香，我就覺得未做得夠好，因為肉味都幾淡，唔夠甘香，屬中規中矩水平。溏心蛋就近乎完美，無論調味同生熟度都係一等一。我心目中一碗好嘅拉麵一定要符合某d條件，而其中一樣就係，碗麵必須要比到人感覺係用心機整。呢碗麵嘅心機位在於：擺盤靚，麵線夠整齊雞叉燒即叫即煎豬叉燒即叫即切師傅夠細心，除左以上講佢會因應叉燒嘅大小酌量調節，同埋見到佢如果隻蛋明顯烈開左會唔要，呢d細節我都看在眼內。心機係足，可惜湯嘅鹹度太高，對我口味來講係一大缺點，建議店家可以提供正常同淡嘅濃度，以供選擇，照顧淡口味者。p.s 水壼入面放嘅唔係檸檬，而係橙，飲橙水我都係第一次。…查看更多

《麵屋丸京》清湯丸京拉麵 🍜📍牛頭角宜安街9號地舖丸京對我來講係有種情意結，因為牛頭角店就响我轉左觀塘返工冇耐之後開，應該都差不多係9年前，可以話睇住佢開，而咁多年，特別我响觀塘嗰幾年一路都有食開，味道各方面都唔錯，lunch食返碗絕對係好嘅選擇。我冇做觀塘份工都有3,4年，今日特登抽空去探一探佢。《清湯丸京拉麵 🍜》香味 (3.5/5)因為點左嘅係清湯，冇刻意加香味強烈嘅香油，所以香味並唔算好強，都ok。湯 (3.5/5)湯底應該係主要係用雞骨煲，或許都有加豬骨，不過雞骨味為主，食到中後段香菇🍄‍🟫嘅味會出左黎。醬油有加但比例唔算重，鹹甜度算剛好，稍偏甜，順喉，完全冇任何負擔。湯嘅溫度就唔多夠，不過咁啱今日係大熱天，反而好，唔駛食到身水身汗。麵條 (3.5/5)中細麵，煙韌，麵味中等，正好同個清湯幾夾，幾好食。配料 (4/5)豬叉燒份量非常足！有4塊較細塊嘅叉燒，同3塊較大嘅叉燒，睇肉嘅紋理同味道應該都係豬肩肉。第一款叉燒有頗重蒜味，我就幾鍾意。第二款佢地稱之為”真叉燒”，大塊好多，不過冇特別調味。兩款叉燒肉味甘香，不過唔算好軟嫩。因為份量真心多，食得非常痛快，唔駛就住食。筍方面真係抵讚👍，非常咁好！夠粗，夠腍又不失爽口，口感係完美，調味又剛剛好，超水準！溏心蛋就一般，雖然生熟度係好，但調味出左事，有少許苦味，可能料理酒加多左。整體 - 值得小推薦👍。因為呢間店咁多年都有保持一定水準，而且限定湯底常常有推出，永遠唔會悶。…查看更多

《一笑食堂》雞湯拉麵 🍜📍深水埗順寧道98號美寧中心A座地下13號舖先講一件無聊事，話說有次去池袋食五感，我出發時响 Google Map 就 search “池袋 五感”，就不加思索撳左頭一個 result，跟住出發。去到之後發覺並唔係我預約嗰間五感，但店名一模一樣，我就唔知邊個抄邊個，亦唔知當中來龍去脈，我只係飛快地衝去”真正”的五感，好彩兩店距離都算近，步行15分鐘，跑就5分鐘，唔跑真係唔得，因為預約左 😫，結果趕到身水身汗。點解會講呢件事呢？睇到底自有分曉 😂《一笑食堂》一直都有聽其他麵友提過，而食評幾乎都係正面，店長富哥似乎好健談會主動同客人傾計，想試好耐，今日終於安排到時間探店。今日我點左雞湯拉麵 🍜，論驚喜度，可能係今年內最高嘅一次。首先因為我中午去，所以有做午巿價，碗麵只係 55 蚊。碗麵一上，富哥主動提點食到咁上下可以加拉麵胡椒轉味。我習慣每一碗麵一上就先聞一聞先，香味就並不強烈嘅，點知一飲個湯，雞味濃烈，真心可以用响口腔爆發來形容！雞味唔單單係濃，仲有鮮雞先有嘅鮮味，呢吓冇可能用雞粉可以扮得到。雖然menu冇寫明，不過呢款明顯係雞白湯，亦見到富哥有用blender打過。講真我唔太鍾意雞白湯太過白色(個人喜好)，而呢款湯就係自然偏黃色，十分濃郁而鹹甜度剛好，我覺得近乎係完美黃金比例。麵條方面，細直麵，同一般博多風拉麵會用嘅細直麵大同小異啦，軟硬度適中，好食嘅。豬叉燒又係另一驚喜位，豬五花，肉同脂肪之間有一層筋膜，因為係第一次幫襯唔知係咁啱係咁定長期係咁，我就非常鍾意，就類似食牛腩嘅人都多數會鍾意食崩沙腩，就係貪佢有塊筋膜，口感好好，而且肉味甘香可口，又係近乎完美。溏心蛋就正常發揮啦，調味偏淡口不過勝在夾個湯，有流心不過我就鍾意再生少少會啱口味d。讚左咁多係咪冇野唔好呢？有一樣嘅，我就覺得放高菜有少許唔夾個湯，因為高菜味道有d霸道，撈埋落個湯度有d蓋過左湯嘅鮮味，如果用返木耳可能會好d。因為係午巿，加35蚊可加個小食同飲品，我就加左雞沙律。我未做足功課，以為沙律係沙律菜，原來個沙律係薯仔撈蛋，不過都係好食嘅。整體，55蚊可以享受呢款麵，論性價比呢款麵係真超高，下次一定要帶埋屋企人朋友去探探佢。話說回來，回應返開頭，因為我第一次去，唔知間店真實位置，都要搵一搵。响附近，有一間叫”千笑居食屋”嘅店，似係新開張，傻傻的我仲以為自己記錯左店名，响門口望左一陣先知此間不同彼間，好彩冇中鬼左入去。…查看更多

《泓一拉麵（紅磡店）》背脂醬油拉麵 🍜📍紅磡民泰街29號德民大廈地下F4號舖以下係一篇長文，如果覺得眼花又有興趣睇結論就飛到最尾啦。最後一次幫襯已經係3-4年前嘅事，自從上年啟動左認真模式食拉麵之後，我一直都冇返轉頭，原因好簡單，因為以前試過雞白同背脂醬油，都覺得唔啱口味，所以就算呢一年幾食左150碗以上嘅拉麵都好，都冇諗過再去。不過咁，唔少麵友都對呢間店推崇備至，過左咁多年都仲咁受人愛戴，我就開始諗，當時我覺得唔啱食，係我未夠識食，定間店當時一時失手，定佢一路以來口味有進化所以迎合到大部分人口味呢？自從開左太子店之後，我就一直都係幫襯佢，始終都係近一步，我又鍾情佢嘅出品。今日咁啱有兩個鐘自由時間，又諗起紅磡店，就試返佢啦。泡系雞白湯我就真心麻麻地，最怕d泡嘅口感，虛虛的，又冇味，所以既然冇食咁多年了，就先試返背脂醬油拉麵 🍜啦。未講食評前，先講吓我今日响店內觀察到嘅無聊事 (係，所以篇文真心長)。我對呢間店嘅營運有少少意見，有好有壞。好嘅，唔知由幾時開始 (裝修後？)，食客要响門口揀好食乜並比埋錢先入座。咁樣可以幫店家慳返時間處理落單收錢，食客食完就拍拍羅友走人，我覺得咁非常好。未夠好嘅係，我一直認為邊個先 order 就應該要先食，咁諗係咪好理所當然呢？今日我11:50am到排第4， 可以頭輪入閘。因為每個人要先 order 比好錢先入得，所以肯定係先排嘅先 order。我咁啱8卦到夾左响個架嘅飛仔 (見下圖)，由左至右排，左邊係最早 order 的。由於頭輪一共有 5 個人點左雞白湯，分別係第 1, 3, 5, 6 同 7 個客，但基於店家一次過只能煮 4 個麵，所以只能同時間上4碗。重點來了，有趣嘅係，店家竟然先上比第 3, 5, 6 同 7 個客，而第 1 個客就未有得食。雖然真心唔太關我事，而第一個客都冇特別表示不悅 (表面上)，不過都想講講，營運流程係有呢個問題存在。講返關我事嘅問題，咁，因為我排第4， 但我唔係點雞白湯。店家應該為左節省時間，一炮過煮4個雞白，我嘅麵就第二輪先有。我理解咁做都無可厚非，始終咁多人排隊，煮得快上得快比起順序係緊要d，所以只係小問題。入正題，講返碗麵 😂香味 (3.5/5)香味唔算撲鼻而來，主要都係聞到醬油嘅香味為主，其次係面頭嘅白蔥。湯 (3.5/5)可能因為有豬背脂嘅關係，湯底相當的油潤，亦好順喉。背脂，醬油同雞骨湯產生嘅效果都算好。醬油味道都醇厚，不過鹹度同甜度都偏高，對我來講係鹹左d。整體係幾討好，可惜湯嘅溫度唔夠熱，背脂嘅香味未完全發揮得夠好，呢下扣左唔少分。麵條 (4/5)中細直、全粒粉造嘅麵，中至低加水率，質感較為扎實，麵味都夠香，幾啱口味。配料 (3.5/5)好嘅係豬叉燒同溏心蛋，高質。未夠好嘅係雞叉燒，雖然質地夠軟，但雞味可以話接近冇。白蔥同紫洋蔥碎正常發揮。整體來講，口味偏濃偏鹹，所以食到中後段會膩，見到有沙甸魚乾醋，加左少少，解膩效果都唔錯。其實成碗麵係幾好食，最大致命傷係唔夠熱，令豬背脂香味未能夠充分發揮，另外就係雞叉燒真係差，其他範疇全數中上水平啦。比起3年前食，確實整體質素係比我記憶中好左，我決定下一次食會試鰹魚🐟拉麵。順帶一提，唔肯定係咪裝修後嘅產物，店入面多左條捲曲嘅膠光管，唔知响各麵友眼中佢嘅藝術成分有幾高呢？🤣(見下圖)…查看更多

《小田拉麵》蟹 🦀之雞🐓白湯拉麵 🍜📍觀塘開源道60號駱駝漆大廈第三座1樓J室上次試左最招牌嘅濃厚鮮雞白湯，感覺相當唔錯，今次試試都係主打嘅蟹 🦀之雞🐓白湯拉麵 🍜。香味 (3.5/5)以蟹湯來講，我預期會香d，呢一款湯就咁聞香味就一般，唔會話好醒神嗰種。湯 (4/5)店員有叮嚀，湯先試原味，食到一半再將蟹膏撈勻去轉味。我就冇跟足指引，因為本身個原味”雞白湯”一早已經近乎比蟹味蓋過晒鮮雞味，我飲左兩啖就決定令個湯早d成為完全體。因為蟹膏嘅量都唔少，撈勻後蟹🦀味係足，雞味則此消彼長，冇晒咁滯。鹹甜度適中，呢個蟹湯算討好，幾好味嘅。麵條 (3/5)直麵，比中細麵感覺上再稍稍粗些少。麵味一般，而口感少少偏立。我就認為如果配細麵會夾 d。配料 (3.5/5)以呢個價位來講，都預左蟹肉係現成蟹肉碎，量都係非常有限。因為同阿女一齊食，佢飲左我一啖蟹湯，連埋大部分蟹肉都比佢一啖KO左 🥲。豬叉燒睇落似慢煮，不過口感未夠嫩，肉味一般，中規中矩。溏心蛋本身散開左，不過食落係正常。整體 - 普通偏好，絕對唔會驚艷，經過食碗係 OK。…查看更多

《拉麵來》廣島牡蠣 🦪牛尾湯拉麵 🍜 + 小食 (紫菜 5 塊) + 飲品 (Coke Zero)📍尖沙咀加拿分道25-31號國際商業信貸銀行大廈地下8號舖呢間店嘅地理位置非常好，正正就喺尖沙咀嘅最旺嘅心臟地帶，人流不乏。店入面目測大概廿幾個位，就算我平日12:30pm到，已經要排隊先入得，重要排第6。從店內大部份客人操嘅語言，我估計呢間店有部分麵友未必會有好感。我以前有食過牛舌牛骨湯麵，我就覺得幾好食嘅。今次見有款期間限定，一於試試啦。香味 (3.5/5)我一直認為牛尾嘅味道係好獨特，牛尾湯嘅香味應該一聞就識認到。如果從呢個角度睇，佢嘅香味就唔夠風味，因為牛尾嘅味並不強。反之，蠔嘅香味即非常明顯，加埋佢有唔少蔬菜增強風味，特別係片青檸，所以香味都係幾好。湯 (4/5)雖然唔太夠香，但湯嘅味道係唔錯。牛尾嘅味係食到，而且算濃郁，撞埋蠔嘅鮮味上互相輝映。鹹度剛好，甜度就偏高。麵條 (3/5)麵就普通d，中細直麵偏白，口感正常，配個湯效果都係普通。好彩我揀左 5 塊紫菜做小食，連埋麵一齊食，增加風味同口感。配料 (4/5)因為個價格都算進取，我對主角廣島牡蠣 🦪有住幾高嘅期望。蠔有三隻，當中兩隻算大隻，一隻奀d，味道都夠鮮，我收貨。豬叉燒係五花肉，有燒過不過唔夠香，肉質稍柴，算中規中矩啦。溏心蛋都係普通，唔夠蛋香。反而想講下d蔬菜，有海苔，蘆筍粒，洋蔥粒，少量薑絲，我覺得佢地發揮得幾好，連個湯同麵一齊食好夾。本身個湯食到中段係會有少少膩，不過有呢堆蔬菜嘅襯托下，增加唔少清新爽脆口感，解膩效果唔錯。整體，我認為雖然價格唔平，不過有小食有飲品，而款麵本身都足夠好食，蠔算大隻夠鮮味，連同配菜食充滿住海洋氣息同旨味。…查看更多

《山椒油 • 麵 🍜》係啟德店限定，之前一直冇試，而家正藉天氣炎熱，正好係食撈麵嘅好時機，所以一於試試佢。山椒可能對香港人較為陌生，不過如果你有關注開日本料理，不難知道山椒係日本普遍會採用嘅辛辣調料，例如食鰻魚飯多數會習慣加山椒粉提升風味。而山椒同香港人較熟悉嘅花椒味道雖接近，不過山椒會比較溫和清香，帶柑橘味, 而麻痹感亦冇咁重。《山椒油 • 麵 🍜》香味 (3/5)山椒味為主，冇乜其他香味可言，香味較單調調料 (4/5)周月最令人津津樂道嘅首推佢嘅秘製醬油。有左佢加持，加上生蛋中和左山椒同青蔥嘅辛辣感我認為相當好味，不過較為淡左少少。好彩，店家一早有所準備，只要點呢款麵，店員會另外比一樽醬油，正好可以為呢款撈麵加味。醬油嘅豆味非常香濃，而且好夠鹹，加埋醋，令個調料嘅味道提升左一個層次。麵條 (5/5)同沾麵同一款麵，煙韌有彈性，麵味強，好食！配料 (3/5)配嘅叉燒粒都係切頭切尾d位，偏硬。蔥同芽菜配埋個醬同個麵一齊食，增加口感，效果不錯。完食冇難度！整體 - 值得推薦 👍👍👍👍…查看更多

《風雲丸》石燒濃厚雞🐓叉燒魚介味玉沾麵🍜📍尖沙咀麼地道30號Mody House地舖風雲丸係一間過江龍店，以前响灣仔有分店，不過唔知關唔關一位頗大名嘅Youtuber狠批左佢一鑊事，灣仔店好似都執左好多年了。至於呢間尖沙咀店係灣仔店執之前開定其實只係搬店，我就冇刻意去了解了。我今次試嘅係雞🐓叉燒魚介味玉沾麵🍜，同以往試嘅招牌沾麵，分別都只係塊叉燒唔同左姐。香味 (4/5)魚介沾汁用石窩上，上桌時仲係滾熱辣，出晒煙，魚介香味係好足夠。沾汁 (4/5)佢個汁真係做到相當濃厚，就算以沾汁來講都稍為鹹左d，但還可接受。如果將d麵全數沾透會過鹹，不過呢下可以自己調節，我就認為沾6成效果好d。同其他做豚骨魚介口味嘅店都有同一個問題，魚介味蓋過晒d豚骨味，所以豚骨味食唔出咁滯，只能食到少少動物系嘅甜同鮮。食到尾湯割，溝稀左d後豚骨味出返來，食到魚介唔只鰹節咁簡單，仲有唔少煮干嘅味道。麵條 (3/5)麵比較普通，唔算係好煙韌纏綿嘅質地，比較硬同實。麵味則正常。配料 (3/5)雞叉燒中規中矩，雞肉似超巿買到嘅急凍貨色，而調味亦當相普通，唔夠香，麻麻地。整體都係普通水平，唔好唔壞，未至於好似以上提及位仁兄講到咁伏。另外，因為我响尖沙咀返工，留意到唔少食肆，包括呢間風雲丸，都請左d操唔純正廣東話嘅阿姐做樓面，雖然同食物質素係冇直接關係，只係我個人覺得為呢碗麵添左d譚仔風情姐 😂。…查看更多

《味吉長龍》吉龍，北海道豚足鹽味濃清湯拉麵 🍜📍尖沙咀漆咸道南17-19號帝后廣場地下7-8號舖第二次食呢間店，上次試左白龍，白松露慢煮叉燒濃清湯拉麵，今次試另一款：吉龍，北海道豚足鹽味濃清湯拉麵 🍜首先講個湯底。店家叫個湯底做 ”濃清湯”，我覺得好特別，唔係因為個名，係因為呢款濃清湯其實就係豬骨清湯。豬骨湯底十間有九間九都係做成博多風豬骨白湯形態，而豬骨「清」湯，而又做到又濃又稠又清澈，我就絕少响香港搵到。比起上次食，今次湯底嘅鮮味更加來得驚艷，因為上次款白龍加左松露。我一直都比較少揀加左松露或櫻花蝦嘅麵款，因為只要有佢地，其他味道多數會被蓋過。而今次款麵，我就揀左淡醬油口味，而醬油味不但唔會蓋過豬骨鮮味，仲起左相當嘅提鮮作用，我第一啖飲個湯心入面真係嘩左一聲！另外，比起上次食，今次湯嘅甜味明顯地降低左，對於我呢類唔喜歡甜湯頭嘅人來講，實在更討喜。麵條方面，中細，微曲，偏黃，口味扎實，麵味夠強，配醬油味幾夾。再講具材，重點當然係豬腳啦！我本身偏愛炆得又稔又爛嘅豬腳，好似食豬骨煲入面d咁。而呢度嘅豬腳正正符合我口味，調味剛好，又夠膠。豬叉燒方面，比上次今次明顯改善左。上次略乾柴，但今次夠粉嫩，肉味又夠鮮夠甘香，好好食。雖然可能係巧合唔定，今次碗麵嘅質素明顯比上次有改善，我就相當滿意，亦乜都清晒完食，除左d豬骨 😂。…查看更多

《銀座 篝》拌麵 (連湯) 🍜📍尖沙咀河内道18號K11購物藝術館B2樓B232號舖原味，松露，抹茶，都試過晒，今次試拌麵。碗麵未送到前，職員比定支醬汁我，話唔夠味可以加，我心諗，會唔會又係 d 淡茂茂嘅麵，將加味嘅責任交比食客自己話事？非也，碗麵一上，一夾，發現所有麵都上晒色，食落其實都幾夠味，完全冇需要額外加味。同拉麵唔同，拌麵用嘅麵係較粗身嘅麵，中太麵至太麵之間，口感扎實煙韌，幾有咬口。食到咁上下，撈埋生雞蛋。呢隻蛋蛋香好夠，撈埋食口感變得更滑溜，有蛋香加持下層次感又上一層。呢款麵佢會連一杯仔雞白湯，上嘅時候我問職員個湯嘅建議食法係點，職員呆一呆，尷尬笑左野，之後叫我等等，去班救兵。另一個職員叫我可以就咁飲，或倒埋落去食都得，真係唔該晒嘅。見個答案咁行，我就冇理佢，當平時食沾麵咁食。不過事實係唔太work，因為個湯太稀，個麵唔多掛得起佢，所以其實一啖麵，一啖湯咁食會好d。整體我都覺得還好，因為呢碗麵可以就咁食，撈生蛋食，同配湯食，體驗還算完整。而麵本身嘅調味都幾香，醬油鹹度剛剛好，趁天氣咁熱，呢款拌麵都係唔錯嘅選擇。…查看更多