Da媽的个人专页

第一次去幸福商場意樂食早餐，香草雞火煺即食麵，配料南瓜同火腿都係凍嘅😵麵係硬未熟嘅😵應該係放嗰麵喺個器皿內然後加熱水😵只有香草雞是熱的，蒜香牛油多士都係凍嘅😵我諗為求快捷多士係預早焗定，新鮮冷榨熱檸好難飲😵同用新鮮檸檬片嘅檸水味道差別很大，服務唔錯嘅，但食物質素差所以唔會再嚟幫襯😵‍💫…查看更多

今日訂咗兩點同朋友品嚐下午茶， 坐低即時落單，坐咗十分鐘，服務員向我們說還需要十五分鐘，足足坐咗半小時下午茶餐先上枱，我們當然慢慢品嘗啦，食食吓有位男服務員叫我們埋單，當時係下午三時半還有食物未食完，搞到我要將食物包走，想問下午茶供應時明明寫下午二時至四時，點解三時半就趕我地走呢？今次嘅經歷真係非常不愉快！芝士麻卷味道一般，太極馬拉糕略甜，煙燻素鴨腐皮嘅煙熏味太濃，蝦餃燒賣普普通通啦，荔茸天鵝酥最好味，春卷都唔差，紅菜頭水晶餃好味道。可惜趕客😩…查看更多

因為舊年喺蛇王協食蛇宴覺得好味，而且菜式特別所以今年推介朋友一齊再食，點知竟然中伏，話明7時半開席但八點先有得食，太史五蛇羹雖然料多但味道一般。龍飛鳳舞炒蛇片鴕鳥肉，唔夠熱而且汁好稠。金龍獻瑞，比舊年細粒咗而且又係唔夠熱。椒鹽蛇碌，又咸又韌 。蛇汁時蔬，明顯係白灼生菜仲過咗火有部份菜灼到變咗啡色。秘製蚊蛇腩，又係唔夠熱而且汁太稠 。古法白切雞，無雞味而且雞肉仲韌到咬唔開。生扣野生大山瑞，汁稠賣相及味道都差。巨型老蛇蟲草花燉烏雞，夠熱不過味道一般。滋味生炒糯米飯，同舊年比簡直係差天共地，濕，我地大家都覺得好明顯係蒸熟之後落鑊兜兩兜。因為今次所有菜式都比舊年差所以無影相！…查看更多

8月4日在網上見到香港萬麗海景酒店提供Movenpick 雪糕afternoon tea set，某些信用卡有半價優惠，被Movenpick 雪糕吸引，馬上打電話訂位，但最快要9月12日先有位，無法啦照訂，等到頸都長埋，今日足之可以品嚐Movenpick 雪糕afternoon tea set喇，買相幾吸引，食到半飽就問waiter 未有Movenpick 雪糕喎，佢話雪糕送到8月31日，當時覺得有被呃嘅感覺，寫明係Movenpick 雪糕afternoon tea set但成個tea set竟然係無雪糕嘅，訂位時又無話個Movenpick 雪糕afternoon tea set8月31日後不會送Movenpick甜品綠寶石，真係有誤導成份！係時候講返個下午茶喇，咸點有鴨肝芭菲，鴨肝脆卜卜好香口，炙烤三文魚滑滑好味道，芝士素菜三文治，用法包但法包唔脆而且仲好韌添，失敗，椒鹽魷魚好味但唔夠脆，法包及魷魚應該係預先整定所以都唔脆！焦糖貝殼蛋糕一般啦！高麗芝士餅唔錯！露絲瑪莉草莓圈頂層薄薄的草莓好味，但下層浸左糖水又淋又濕又超甜怪怪地唔好味！雲呢拿石榴好味但餅底太甜！柑桔朱古力OK喎！棉花糖脆朱古力魚，夠脆甜左dd！英式鬆餅太硬！無送Movenpick甜品綠寶石！…查看更多

九龍香格里拉洒店大堂下午茶自助餐食品款色多又坐得舒服，信用卡仲有8折優惠添，坐足食足4個鐘，認真超值，甜品款色多得很，未能一次過試晒，飲品亦多款選擇，有幾款川寧茶包，咖啡，檸水及檸茶，還有兩款水果雜飲清新又好飲，熱食有桃肉拌鴨胸，翠肉瓜黃椒燴䐁肉及雜菇煮牛肉等等...........另外還有燒牛肉多汁好味，葡撻，叉燒酥，仲有軟雪糕及Haagen-Dazs 雪糕添，每位300元，從未試過食下午茶自助餐可以食四個小時，呢個下午茶真係值得推介！…查看更多

網上見到北角新酒店自助午餐168已包加一服務費，即時約埋三五知己去品嚐，亦即時打電話訂位，但非常失望食物選擇甚少，熱食只有煮雞肉淡而無味，白汁三文魚味道一般，豬頸肉炒豆角好鹹豆角煮得太淋，炒飯材料甚少可以叫做無料炒飯，燒牛肉太熟，壽司有五款蟹柳壽司，迷你熟蝦壽司等等....刺身有𩶘魚，三文魚及八爪魚全部淡而無味冇鮮味，沙律都好少選擇，冬瓜湯好鬼鹹，昆布湯無飲所以唔知味道如何，蛋糕及生果有幾款選擇，曲奇餅及麵包我冇食過唔知味道如何，牛奶公司杯裝雪糕及紅豆雪條，總括黎講食物質素差，我覺得新酒店做優惠唔應該食物質素咁差囉，唔會再去！無諗住寫食評所以冇影相，但係咁嘅質素真係要同大家分享！…查看更多

係常樂素食同朋友慶祝生日，叫咗台式炒米粉，紫菜三色卷，栗子魚腐菜心煲，三杯猴頭菇堡，拼盤，以上菜式全部勁甜，係落咗糖果種甜，蒸餃子都唔好味，芋頭魚係所有菜式維一唔錯不過味道都係一般而且係超級細條，服務都係麻麻地，以為素食健康d啦點知呢個素食加咁多糖，唔會有下次囉！…查看更多

今日打完波去咗東港城itamama食晚餐，叫咗個法式紅酒香茅燴牛肉配珍珠飯，買相唔錯而且配有少許沙律，沙律菜新鮮醬汁又好味，牛肉其實係牛筋條，牛筋條夠淋醬汁又好味，珍珠飯都OK！…查看更多

今天在旺角上課，放學後好肚餓所以在付近食午餐，入咗雲吞皇麵食，叫咗兩碗牛筋麵，湯底超級無敵非常鹹，所以我倒咗d湯，用咗兩杯熱水洗過d麵，麵仍然好鹹而且d牛筋仲鹹，鹹到頂唔順又唔好意思再攞熱水維有攞咗自己帶出街飲嘅熱水再將牛筋及麵清洗一次，先可以將牛筋麵食晒，因為唔想嘥嘢，希望店舖日後可以改善啦！…查看更多

約咗朋友喺上環食午飯，近近地搵到呢間，叫咗個日式吉列咖喱脆炸豚肉飯鍋，日式咖喱汁通常都係甜甜地微辣，但呢間的日式咖喱汁就辣咗啲囉，吉列豬扒仲差，離晒譜炸粉厚過塊豬扒勁差，熱芝麻鮮奶抹茶，暖暖地唔夠熱芝麻唔夠香抹茶亦唔夠滑！…查看更多

朋友介紹話天然齋下午茶半價，咁抵食一定要去食啦，今日就同親人一齊去食，齋滷味唔鹹唔油可惜冇半價，羅漢齋炒麵，滿滿的羅漢齋多到遮住曬啲麵，足枓羅漢齋加埋脆脆嘅麵認真好味，牛油果沙律賣相靚不過味道一般，招牌叉燒包好味道正到暈，叉燒唔大咸好味道掛包超級軟熟，腰果露唔太甜好味道，吉列黃金素豬扒熱辣辣好有口感，酥炸芋絲餅脆漿厚咗啲一般啦，整體食物唔太油又唔太鹹，哥哥讚口不絕馬上推介給朋友，仲話下次再來！**因食物太好味而忘記影相，最後只影了叉燒包**…查看更多

今天天氣實在太熱喇，路經窩打老道見到有間甜品店新開張，就馬上入店內買杯檸檬特飲降降溫先，清香的檸檬味，有汽、冰凍、清涼超正！菠蘿多多都唔錯喎，多多冰凍味濃！西瓜波波，原個西瓜滿滿都是打碎的西瓜肉，清甜好味，如果有幾粒西瓜波波肉在內就更完美！黑豆漿清甜無豆青味，入口時覺得有種特別嘅味道（好似有少許桂花香味好清新）。豆漿味濃唔太甜味道適中，值得推介！…查看更多

銀杏時光的自助早餐，有人話好亦有人話唔好，聽人講不如自己親身去試吓啦，其實都冇抱住希望，點知換黎嘅竟然係失望，＄35價錢一般選擇唔多係正常嘅，但所有食物都唔夠熱除左自己煎嘅雞蛋，而且盆腸粉好似食剩咁，成盤腸粉都唔夠十舊又無味，烚菜淋到無牙都食到，炒麵又油又咸仲唔夠熱添，湯通粉我無食過所以比唔到竟見，滾水都唔夠滾又唔熱，烚蛋唔係純白色但有超級非常輕微嘅茶色，唔講都唔知係茶葉蛋以為係烚蛋因為無香味唔好食，最有創意係自己煎蛋，希望餐廳會改善啦！…查看更多

曾經睇電視見介紹過呢間車仔麵，今日入香港仔就順路去食吓啦，叫左豬腸、豬皮、蘿蔔粗麵竟然要39元，加杯熱檸水就6元，成為45元，豬腸唔夠淋，蘿蔔都係唔夠淋亦唔甜無蘿蔔味，豬皮及粗麵還可以，好少餸而且價錢仲超級無敵好鬼貴，價錢收得貴食物唔好味，服務態度又差，超貴服務又差，我係唔會再幫襯既！…查看更多

餐廳外貌幾高貴，坐位濶落, 坐得好舒服, 服務都唔錯，唔同平時d日式放題餐廳坐位好迫好窄，最快黎既係刺身，我地品嘗完刺身，等左20分鐘還未有食物到，原來漏左單，我地再落單，幾分鐘後食物到喇，Waiter話師傅做得好快，落單後最遲十分鐘食物就會到，如果未到應該漏單，食物質表一般，D炸物粉太厚唔好味，刺身雖然新鮮但鮮味唔多夠，三文魚子唔腥好味，甜蝦都幾大隻玉子好味，雖然係團購不過價錢都有點貴，送既羊架唔羶好味，我地叫左豆腐綠茶麵都無黎，漏單都幾嚴重喎！…查看更多