tat320的个人专页

打邊爐最緊要就係食材，唔洗搞咁多花臣，新鮮就係好味。自問對本地牛嘅要求都高，但呢碟手切本地牛頸脊係世界級咁好食。 首先油花分布夠靚，而且厚切大塊，簡單淥8至10秒之後好幼滑軟腍，牛味超濃，絕對會為咗佢再嚟。海鮮拼盤有蟶子皇、台山蠔、游水中蝦、鮮鮑魚同大花甲，樣樣都好出色，台山蠔同蟶子皇飽滿鮮甜，蝦同鮑魚夠新鮮彈牙，感覺到每日新鮮入貨嘅水準，物超所值。自家靈芝響鈴同鹿鼎午餐肉都用咗靈芝油去炸，味道上唔係好食得出，但觀感上好似健康咗。 尤其鐘意響鈴大大件好鬆化，新鮮即炸當小食咁食都ok。手工韭菜餃子同手工鮮丸有自家製味道，餃子足料爽甜，超越左唔少餃子店，手工丸有肉味彈牙，梅菜豬肉配搭惹味。田園蔬菜盤淨係見到新鮮嘅淮山、菜心同蕃茄已經知有誠意，有種啱啱摘落嚟嘅感覺，好養生。…查看更多

日本餐廳好難面面俱到，難得食到一間由刺身去到天婦羅同熟食都好唔錯。薯仔波波外脆內綿，內餡有吞拿魚、蜜瓜同牛油果蓉，味道口感都好豐富，估唔到吞拿魚同生果會咁夾。蜜柑鯛三文魚籽茶碗蒸蒸得好幼滑，表面鋪滿爆珠般嘅三文魚籽，一咬就啵啵聲爆汁，醃得甜甜地有鹹鮮，蜜柑鯛蒸得僅僅熟好清甜。靜岡縣白鮭魚肉質厚實有彈性，入口有輕微甜味，配酸汁好夾。針魚好新鮮有光澤，鮮嫩爽彈，有清新魚香。北海道粒貝帶微甜海水味，索索聲好爽口。燒北海道北寄貝時間控制得岩岩好，北寄貝好嫩滑，配京蔥一齊食好香，甜到連汁都想飲埋。九洲黑陸魚係高級版Fish and chips嘅做法，最驚喜係咬開肉汁滿瀉，魚肉細嫩，配日本蛋整成嘅他他醬好完美。拖羅手卷魚油勁香，除咗撈左經典嘅醃蘿蔔粒之外，仲有啲天婦羅脆脆，食落好滿足。燒銀鱈魚飯燒到魚皮好脆，米飯粒粒索哂魚油同焦香。…查看更多

跟朋友黎到一間私房菜格局嘅葡國菜小店，氣氛好溫馨岩慢慢坐下傾下計，味道都好正宗。馬介休口感順滑，外脆內軟，鹹香味恰到好處。焗鱈魚忌廉薯蓉焗到金黃酥脆，鱈魚幼嫩，忌廉薯蓉香濃幼滑，薯香味好濃。 成個組合感覺好heavy但一啲都唔膩，味道豐富得黎好溫和。鱈魚炒菠菜 & 粟米麵包粒睇落好前一道好相似，但風味完全唔同。 麵包粒焗到好似批咁脆，同柔軟嘅食材好夾，菠菜加左一絲清新感，同樣焗鱈魚呢款更有傳統葡國菜風味。橄欖油沙丁魚意粉簡單美味，沙丁魚嘅鮮味同橄欖油嘅香氣結合得好好，意粉吸收咗所有味道，好香口。…查看更多

進入生日月發現唔少扒房質素都好參差，想食穩定又水準以上嘅牛扒，我會諗起呢度。炭燒美國16安士USDA安格斯肉眼牛扒有兩個手掌咁大，厚切啖啖肉未食已經開心。 啱啱好五成熟冇血水，牛味濃郁，外面有炭燒風味，適當地帶少少肥膏，軟腍香口。 另一個重點係薯蓉做得好好，好幼滑香甜，薯味濃，同朋友爭住食。香煎帶子青口三文魚籽扁意粉每款海鮮都好新鮮，帶子煎得啱啱好五成熟，香草忌廉汁夠creamy但唔會膩，意粉捲住少少三文魚籽一齊食帶鹹香，味道好豐富。…查看更多

Omakase價錢從來都唔係質素嘅保證，開心食到一間物有所值，止到日本癮嘅高質omakase。金平蓮藕、明太子魚卷同鵝肝都係有心機嘅前菜，魚卷有手作口感，黑醋同脆脆令鵝肝味道更有層次。愛媛縣蜜柑鯛晶瑩剔透，清甜帶少少果香。 北海道墨魚好爽脆，新鮮有彈性，柚子皮嘅清香有提鮮作用。九州深海池魚係爽彈嘅腩位，魚味香濃。 北海道銀鱈魚嫩滑油份重，有輕輕燒過嘅火炙香。赤貝仲係郁郁吓非常新鮮，厚切爽甜。三重縣鰆魚油份重，用麵豉燒香，配辣蘿蔔蓉清爽解膩。 神奈川太刀魚一整片包住茗荷卷成魚卷，口感好豐富。 太刀魚魚味清新，配上微辣嘅銘荷同芽蔥，簡單美味。象拔蚌清脆彈牙，鮮嫩爽滑，甜到爆。鹿兒島油甘魚幼嫩甘甜，加左柚子胡椒唔會太油膩好清爽。北海道牡丹蝦夠新鮮，口感好彈，濃郁嘅蝦膏完全冇蓋過蝦嘅鮮甜味。靜岡縣金目鯛帶火炙香，有鯛魚獨有嘅香氣同細嫩。中拖羅油脂豐富但唔膩，入口即化，有濃郁嘅魚油香同甜味。當造嘅秋刀魚冇令我失望，非常肥美。 薑蔥嘅清香平衡咗秋刀魚嘅油脂，食落清爽又有油香。 鯖魚顛覆咗我嘅印象，原來鯖魚都可以咁甘香，軟嫩又鮮甜。…查看更多

近年壽喜燒店開到成行成市，鍾意今晚嘅體驗好有儀式感，原盒靚靚和牛加出世紙，寫明產地品種、性別等等，加即場捲出嚟做湯底嘅棉花糖，成件事放埋一齊好日本好職人，打卡一流。鹿兒島黑毛和牛貨真價實，除咗有產地證明書，每一塊都放得好靚，由店員好似日本和服阿姐咁認真烹調。 油花同厚度、大細都好完美，煮得啱啱好五成熟，點埋蛋漿非常滿足，軟腍牛味濃。野菜盛盒都有誠意，每一款都感覺到係日本食材，豆腐、油揚、蟹柳、雜菌都新鮮高質。壽喜燒汁唔會太甜，最後加埋讚岐烏冬索晒啲精華，非常滿足。…查看更多

最近真係好忙，黎到高街坐喺開揚對住大馬路嘅chill chill cafe，飲住嘢真係有種療癒嘅感覺，仲要真係好食。Egg Benedict驚喜發現包轉咗做大啡菇，菇味濃夠厚身Juicy，食落好fresh。 流心嘅蛋、恰到好處嘅荷蘭汁、牛油果同煙三文魚冇理由唔好食，開心食到滿分嘅Egg Benedict 。香煎牛腱板扒配蒜香黑椒炒意粉十分足料，好似將兩款main夾埋一齊咁。 牛腱板扒輕輕醃過，灑上辣辣地嘅香料好有風味，牛味濃郁。 蒜香黑椒炒意粉好有鑊氣，基本蕃茄口味加海量蒜同洋蔥。香蒜牛油鮮蝦吐司蒜香爆棚，蝦球炒得好香，食唔停口。 多士意想不到抹醬居然有蝦蓉，焗到脆脆，鐘意香口野岩哂。…查看更多

一人燒肉開到成行成市，方便以外最緊要都係肉嘅質素，今晚真係有正宗日本燒肉嘅感覺。美國黑安格斯牛肉油花分佈均勻，juicy有肉香，本身已經有少少燒汁提味，推薦一定要加生蛋，沾上蛋汁真係昇華晒，有壽喜燒feel。日本和牛A4赤身肉質細膩嫩滑，燒出黎清爽又不失風味，入口即化，食到牛肉嘅天然甜味，配埋粒粒分明嘅青森縣白飯一流。帶子肥美厚實，輕易就燒到表面金黃色，大大粒好有彈性，軟嫩鮮甜。 蝦新鮮爽彈，燒到蝦殼同蝦頭都焦香，好香好滿足。不得不提最後嘅開心果雪糕非常高質，媲美Venchi水準，食到lam lam脷。…查看更多

一直想朝聖懷舊酒樓，對手推點心車總係有種情意結，原來晚市都有得食。唔同時段會推出唔同款嘅點心，仲有啲坊間見唔到嘅款式。 蝦膠魚肚，魚肚夠厚身索晒湯汁，足料大份。 炸鮮奶熱辣辣，外脆內嫩，好似食緊脆皮燉奶咁。燒賣、奶皇包、叉燒包同牛肉球做到水準以上，燒賣大大粒保持到即蒸嘅口感，奶皇包係唔覺意就流晒出嚟嘅狀態。懷舊甜品焗西米布甸講真我係第一次食，好似葡撻咁窿窿地嘅表面好吸引，內裏嘅布甸同蓮蓉滑溜，唔會太甜。椰皇燉蛋表面仲灑左啲燕窩好矜貴，重點當然係燉蛋白夠滑有椰香，食點心同時可以食到高質甜品係開心嘅。…查看更多

好多時食炒肉蟹都價值不菲，發現二人餐包星洲蟹都係六百幾蚊，性價比幾高。蒜香海蜇頭蒜香調味濃郁但唔會太重，帶點麻油香氣同微酸，海蜇頭爽脆彈牙。星洲黑胡椒蟹新鮮肥美，肉質嫩滑。 黑胡椒醬汁濃郁香辣，胡椒香辣辣地帶微甜，用手食啖啖肉，有係當地食嘅風味。脆脆咕嚕肉外皮透薄酥脆，內裡軟滑，咕嚕醬酸甜惹味，加大量彩椒同菠蘿，比一般嘅咕嚕肉更清爽唔會膩。蝦味魚子蝦球炒飯炒得乾爽，帶濃濃嘅蝦味，魚子卜卜聲令口感好豐富，簡單醬油、蔥花同蛋花已經夠好味。酸柑香茅凍滑溜冰涼，有好濃嘅香茅清香。…查看更多

心心念念朋友提過山見好食，今晚一試的確肉唔錯，花款選擇多。Lv3牛肉有好多款，基本款質素都好好，嫩肩里肌肉大大塊有牛味，牛爽腩軟腍，卡樂BEEF油花香，月見封門柳滑溜柔軟。美國穀飼黑毛豬肥瘦均勻，同牛肉比都唔遜色。風味沙茶老鍋令啲肉增添咗啖啖沙茶香味又唔會太咸，今期香港主題嘅上品蟲草木耳鍋好有驚喜，有好濃菇味，用嚟淥菜個鮮甜度更上一層樓。麻辣鴨血、鹽酥雞同埋烤香腸都係水準以上，鬼馬炸油條即叫即炸，有啲似炸饅頭嘅口感外脆內軟，好似響鈴咁點一點沙嗲湯底都好夾。竹笙抱蝦滑細細條，但索晒湯底之後竹笙口感好突出，即刻encore。 黃金鮮蝦球名副其實有種食緊流沙奶皇包嘅錯覺。欣賞除咗台式飲品，仲有自家製手工雪糕，香濃幼滑。 …查看更多

蔥蒜香蟹肉意粉係我期望以上嘅高級味道，首先蟹肉爆棚，每一啖都係滿滿嘅蟹肉，充滿海鮮甜味。值得一讚上面炸得香口嘅香蔥絲，撈埋一齊味道昇華咗，香味好豐富。明太子忌廉蝦肉三文魚籽飛魚籽紫蘇意粉忌廉汁多到滿瀉，非常Creamy香甜。 鍾意每一啖都有脆卜卜嘅飛魚籽，蝦肉多又爽，如果紫蘇葉可以再多啲就更好。松露薯條係好味嘅幼薯條，咬開係明顯嘅薯仔質感，松露醬好香。開心果牛奶麻糬係今日MVP，麻糬非常軟糯，重點係開心果粉極香，幼滑之中又食到粒粒脆口嘅開心果，會為左佢再黎。…查看更多

收工喺海旁餐廳食個好味嘅晚餐，係忙碌生活中嘅小確幸。炭烤香茅西冷牛肉好似肉卷咁包住原條香茅咁燒，一咬落去香口又滴汁，香茅嘅煙燻香氣滲左入牛肉度好match。 泰式醬汁酸酸甜甜，用生菜包住牛肉同米粉一齊食，非常惹味開胃。大蝦冬陰功味道好正宗，夠晒酸辣過癮，大蝦新鮮彈牙，大隻厚肉，吸滿左湯底嘅酸辣精華，辣度啱啱好。泰式黃咖喱蟹肉醬汁香滑濃郁，蟹肉嘅鮮甜令人眼前一亮，配埋濃味嘅蒜蓉麵包，蟹甜味都係咁突出，份量又好多，係食過咁多泰式餐廳入面難得唔係靠濃味醬汁，而真係新鮮海鮮取勝。雞肉泰式乾炒河粉炒得乾爽彈牙，雞肉嫩滑多汁，有鑊氣得黎完全唔油膩。椰子雪糕帶點椰肉口感，甜度啱啱好，真材實料。 泰式黑糯米燉蛋值得一讚煮得乾爽煙靭，微甜有米香，連我少食糯米都食唔停口。…查看更多

食西班牙燉飯係一個賭注，兩個人食一兜已經叫唔到太多其他嘢，好彩今晚係一個好食嘅燉飯。西班牙蒜油紅蝦性價比一流，一般tapas都預期份量比較少，估唔到有4大隻。 紅蝦好鮮甜，蒜香辣辣地一流。A5和牛沙巴當好腍滑，牛味濃郁，油花分布啱啱好，甘香但唔會油膩。 沙嗲荷蘭醬同西班牙煙燻醬創新又出色，前者香濃又有柔和嘅奶油感，後者係香辣嘅天然紅甜椒味，同和牛好夾。黑毛豬叉燒西班牙燴飯叉燒真係眼前一亮，第一啖就覺得好香口，除咗本身夠肥夠嫩之外，自家製醬汁好惹味，亦都燒到表面少少窿邊好香，值得單獨成為一個主菜嘅程度。 西班牙燴飯有好濃嘅彩椒蕃茄香，食落好清新。…查看更多

出chiikawa展前想食好啲，揀間市區西餐，估唔到黎到係靚靚夜景燭光晚餐，非常有氣氛。法國藍龍蝦他他肉質鮮甜，鵝肝嘅濃郁、醃製蛋黃嘅咸香味同生蠔葉嘅香氣，同清甜嘅龍蝦肉形成對比又好夾，配埋脆口嘅雞皮口感豐富，味道好有層次。日本帝王蟹蛋泡沫輕盈嘅泡沫口感特別，帝王蟹同蛋鮮味爆棚，配24個月法國康帝芝士脆片同海膽加入左咸香同海味，食落有個奢華感。荔枝車厘茄凍湯好清爽，西班牙紅蝦彈牙、酸甜彩椒爽脆，成個組合好清新，飲落好舒服好岩夏天。熟成本地雞胸肉卷做得好滑又有雞肉香，其實單食已經好出色，龍蝦汁同炸鵝肝有提鮮作用，菊芋蓉亦添加左自然甜味，係近年食過最出色嘅雞肉主菜。香酥脆皮龍蝦外酥內嫩，龍蝦新鮮彈牙，熟度岩岩好，魚子醬同清酒忌廉汁令香氣提升，味道豐富但龍蝦鮮甜味依然突出。腐皮法式千層酥脆，配幼滑嘅豆腐忌廉芝士，淡淡香甜，清爽又滿足。…查看更多