Kaman_hkm的个人专页

今日同朋友去銅鑼灣行街，心血來潮好想食韓燒，醒起之前食過呢間柞木炭家啲燒肉好好食，一於即興去食吓，餐廳環境幾有格調，坐得舒服，仲聞到陣陣炭香味，即刻肚餓🤣。牛骨髓石頭鍋飯好吸睛，啱晒打卡，店員會幫手撈勻牛骨髓、蛋漿、肉碎、芽菜、菇等等，飯焦香口，成個組合濃郁又暖胃。醬油蝦大大隻，醃得入味，肉質爽口鮮甜，送埋飯一齊食絕配！蔥燒厚切牛舌必嗌，肉質好厚身咬落去一啲都唔韌好爽口彈牙，炭香同蔥絲夾埋一齊食，完全唔覺得膩。職員會主動幫我哋燒野食，唔洗我哋落手，個鵝肝多士外脆內軟，入口即化，配埋香脆多士同啲醬汁好邪惡。泡菜煎餅煎得金黃色，外脆內軟，泡菜份量足，酸辣開胃。飲品叫咗荔枝梳打同青瓜青檸梳打，兩杯都清新解膩，尤其青瓜味好突出，而荔枝梳打比軟甜啲我好鍾意飲呢杯，兩杯都好啱夏天飲。最後重頭戲日本產和牛肩肉盛，牛肉油脂分佈靚，輕輕燒一燒，蘸少少鹽已經好正，唔洗點太多醬汁已經好好食🥹，入口即化嘅感覺真係好滿足！前菜有呢5款，如果想無限添加前菜可以加$40，前菜好食好豐富。…查看更多

係油麻地做完運動好餓，就同朋友去對面街，唔洗1分鐘就到食潮州菜，好彩我哋早少少嚟6:30開始就多人，呢間紅伶飯店好耐以前食過，估唔到依舊好多人嚟食。冰震芥辣墨魚冰鎮住上，點少少Wasabi豉油，入口爽脆到嗦嗦聲，芥辣嗆勁拿捏得幾好，唔會攻鼻到流眼水，反而帶出墨魚鮮甜。跟住係XO醬小炒王，一上枱比佢個份量嚇親好大碟，聞到濃郁蝦醬香好有鑊氣，魷魚、蝦乾、腰果、韭菜花炒得乾身，送飯或者就咁食都唔會過濃。避風塘茄子係我全晚最鍾意食！外皮炸得酥脆，咬落去茄肉依然軟嫩多汁。炸蒜、豆豉、辣椒炒得金黃焦香，辣度溫和，蒜粒炸到脆口好似零食咁，食落好惹味。黃金大蝦球賣相吸引，大蝦佈滿鹹蛋黃醬，蝦肉爽口彈牙，鹹蛋黃炒到起沙，食落鹹香，口感好更豐富。最後道滷水什錦有齊大腸、腎片、豬耳、紅腸等等。滷汁味道醇厚，帶淡淡藥材香，唔係得死鹹，大腸處理得乾淨無異味，炆得夠淋，豬耳肉質好淋，索滿滷汁好入味。不過紅腸就普通啲，如果可以換成鵝片或者墨魚就更正。…查看更多

坐低無耐睇中咗個「日本牛乳玫瑰鍋」呢個湯底，一上枱勁打卡📸，成個湯底係乳白色，面頭用咗牛乳玫瑰花冰，浸喺牛乳汁入面，睇見都覺得治癒。滾起之後飲咗啖湯，奶香溫柔，帶微微甜。跟住主角登場：「海陸雙饌」海鮮拼盤有蝦、鮑魚、蜆、魚，樣樣睇得出好新鮮，特別係啲蝦，淥熟之後爽口彈牙，魚肉好厚身，肉質嫩滑。另一邊嘅「特選黃牛呼拉圈」就玩內臟，牛脷薄切快熟軟淋、牛柏葉爽脆、牛小腿同牛心椗彈牙有嚼頭、牛白肉油脂甘香，每款淥十零秒就食得，牛味濃得嚟唔羶。我鍾意將牛脷點少少豉油，再加蔥花同炸蒜，入口牛味濃郁好香口。…查看更多

Surf & Turf封門柳揀咗5成熟燒得啱啱好，見到粉紅色嘅肉質但又唔會血淋淋，點埋個紅酒燒汁食，突出牛肉嘅鮮味。牛油燒龍蝦尾，用咗牛油燒過之後好香，肉質彈牙，仲要唔洗自己拆殼食落好方便。旁邊嘅雜菜都好新鮮，唔會太油膩。Pulled Pork Lasagna Roll跟住試咗個慢煮手撕豬肉芝士千層面，個千層面焗到表面金黃色，切開見到好多醬汁好濃郁，芝士同香草番茄汁嘅味道好夾，手撕豬肉煮得好入味，肉質鬆化，加埋酸椰菜一齊食，味道更加豐富，完全唔會覺得膩。Italian Tiramisu Pancake最後個甜品拼盤好打卡，厚班戟鬆軟綿密，提拉米蘇醬同朱古力薄脆嘅配搭好有層次感，酥皮卷脆卜卜，燕麥松子仁配咖啡糖漿出奇地夾，甜度適中。Pistachio Milkshake開心果奶昔堅果味香濃，口感順滑。…查看更多

中環置地廣場開咗間新嘅天米pop up store，諗起平時食開華御結，宜家又有多一個選擇試新嘢，飯團即叫即整熱辣辣好吸引，比平時食開嘅飯團大個好多。明太子沙律飯團，表面佈滿晒明太子醬，食落鹹香配埋沙律醬味道好夾，飯粒溫度啱啱好，唔會太實又唔會散開，咬開飯團都仲好多明太子餡料。松葉蟹肉蟹膏飯團，一啖咬落去滿滿蟹肉絲，仲有濃郁蟹膏嘅回甘，鮮味層次好豐富，飯粒軟熟保持到飯團嘅濕潤。京蔥醬燒A4和牛牛肉飯團，和牛油脂滲透每粒飯，京蔥同燒醬帶出肉香，牛肉嫩滑，食落好口感豐富。鹽麴三文魚腩漬魚籽飯團好邪惡，表面有滿滿嘅三文魚籽，鹽麴醃過嘅三文魚腩肉質軟滑。最後就係明太子玉子燒，玉子厚身帶甜，表面佈滿明太子醬，食落微微辛辣。…查看更多

呢間泰國菜匿埋喺天星大廈4樓，唔係地舖但晚市都幾旺場，朋友同我都好餓，一坐低就馬上scan qr code落單。火焰燒雞一上枱就有戲睇店員淋酒點火，雞皮燒到嗞嗞聲，雞皮好脆身，肉質竟然keep到嫩滑，點埋個酸辣醬更醒胃。生蝦刺身夠冰凍，蝦肉彈牙，蒜片、辣椒同秘製魚露一齊食，辣得嚟又鮮甜。泰式青咖哩燒羊架有驚喜，羊架燒得外表好香，肉質好淋唔會乾，再點埋個青咖哩，椰香味濃郁。明爐烏頭湯底清甜，酸菜同香茅吊出魚嘅鮮味，有埋鮮檸檬、菇同肉碎就更加開胃，檸檬葉同肉碎令成個湯變到好惹味，魚肉大件好滑。泰式牛肉濕炒河好有鑊氣，牛肉大片肉質好淋，汁芡撈得勻勻循循。飲品方面，椰汁冰同龍眼冰都夠濃味，唔會淡茂茂，飲完成個口都涼浸浸，好舒服。…查看更多

呢間嘅雞蛋仔之前已經想嚟食，book mark咗好耐今日終於可以嚟食吓，去到舖頭聞到好香雞蛋仔味，叫野食係自助機形式點餐。Q版菠蘿包雞蛋仔賣相好吸引，粒粒都佈滿咗菠蘿包皮好邪惡，食落好香牛油味，外層整到好鬆脆，雞蛋仔好香蛋香味，同菠蘿包皮呢個配搭味道好夾。鹹牛肉蛋治雞蛋仔真係特別，鹹牛肉炒蛋餡塞滿雞蛋仔，鹹香惹味，似足茶餐廳嘅鹹牛肉蛋治，但個口感就好過癮，一啖鹹一啖甜咁，外皮整到好香脆，裏面嘅餡料濕潤，食落唔會好乾。凍蜂蜜百香果酸酸甜甜好開胃，食完個雞蛋仔飲返一杯好解膩。凍港式奶茶就正常發揮，茶味夠濃唔會得個甜字。…查看更多

平時無咩事都唔會嚟粉嶺，今日咁啱有嘢做要嚟粉嶺，難得入嚟就搵定我想食嘅餐廳，其中一間就係金華牛雜粉麵，呢間想食好耐終於試到。點咗五香崩沙腩+鮮蝦雲吞河粉 $57崩沙腩一定係必點！師傅原來每日都炆煮8個鐘，唔怪之得好入味之如，肉質仲好淋好易咬，而且份量好多，崩沙腩切得好厚身，一啲都唔孤寒，鍾意食辣可以加少少辣椒油，令到個崩沙味道再昇華左！鮮蝦雲吞係人手包，皮好薄，餡料有大大粒蝦同豬肉，一咬開好多肉汁好好食，河粉係比較幼身，吸晒湯底啲精華好入味。下次再嚟粉嶺會再食呢個崩沙腩！…查看更多

一段時間都無食過大排檔，最近心血來潮想食，就約咗朋友嚟我屋企附近，嘅上環熟食中心到，搵咗呢間棟記飯店。炸蠔餅即叫即炸，上枱碟蠔餅好大份，炸到外脆內軟，入面蠔肉好大粒唔會有腥味，點埋個酸辣汁食好惹味。沙嗲肥牛粉絲煲滾住上，沙嗲好香濃，肥牛唔會好薄身，反而有咬口，粉絲吸盡沙嗲醬嘅精華好入味，撈埋白飯一齊食好正。豉油皇鵝腸口感爽脆，豉油鹹甜度啱啱好，撈埋啲芽菜一齊口感豐富，鵝腸唔會過韌。埋單人均100幾蚊，食到好飽，呢啲街坊大排檔，同一大班朋友嚟聚舊都幾開心。…查看更多

同friend一齊嚟咗旺角食呢間雞煲火鍋店，點咗個五指毛桃脆皮雞煲，湯底滾緊時已經聞到好濃嘅藥材味，飲一啖湯，清甜得嚟唔會油膩，仲有淡淡藥材味，雞皮爽口，肉質嫩滑有咬口。精品牛舌薄切得嚟夠大片，輕輕淥10秒就食得，入口爽脆冇雪藏味，點少少自己調配嘅醬汁，離不開豉油、辣椒、蔥、芫荽、蒜已經好惹味。蒜香焗生蠔，蠔肉飽滿又多汁，面層嘅金黃蒜蓉好香口，咬落去仲爆緊蒜香汁，呢兩個配搭冇得輸，突顯蠔嘅鮮味。海鮮拼盤有齊蝦、蠔、鮑魚，海鮮新鮮，由其係啲蝦同鮑魚，肉質彈牙好好食，落雞湯底淥熟之後，海鮮吸咗五指毛桃嘅精華好濃郁。…查看更多

熗拌濰坊鮮蘿蔔皮口感爽脆，酸酸甜甜好開胃。水晶垛子黃牛肉凍食得嚟肉質實淨，蘸少少辣椒粉食更加惹味。湯係酸辣花膠烏魚蛋湯，飲落去個酸辣度啱啱好，花膠煮得夠淋，飲完個人好暖笠笠。魚籽醬烤鴨配山東煎餅有驚喜，鴨皮脆口夾住魚籽醬嘅鹹香，用煎餅捲住食層次好豐富。膠東蔥燒渤海灣帶魚煮得香，蔥味入晒去帶魚度，肉質嫩滑。傳統魯味爆三樣好有鑊氣，豬腰、豬肝同豬肚炒得爽口無異味。個蟹對蝦醬非遺饅頭，蝦醬鮮味突出，啖啖蟹膏同蝦醬好邪惡，點嚟食真係停唔到口。膠東鍋燒大燴菜同膠東海鮮熗鍋面，好有家常風味，燴菜材料足，個麵湯底濃郁。甜品阿膠絲滑酸奶，加咗啲黑糖醬中和咗個酸度，同酸奶味度好夾。整體嚟講食物有水準，服務幾周到，人均大概$500頭喺中環區算係合理。…查看更多

鐵板海鮮二品我揀咗日本元貝同虎蝦，日本元貝好鮮甜，肉質嫩滑好juice，虎蝦煎得好香口，蝦肉爽口彈牙。另外兩款海鮮揀咗白鰻同慢煮鮑魚，海鮮好新鮮鮑魚好淋，肉質好彈牙，仲有啲蒜粒食落好惹味，白鰻好有驚喜食落爽口彈牙，煎到外脆內嫩好好食，旁邊仲有秘製龍蝦汁夾埋海鮮一齊食，突出海鮮嘅鮮味。招牌沙律煙三文魚再配上魚子醬夾埋意大利黑醋醬一齊食好開胃，旁邊粒龍珠果酸酸甜甜好好食。魚子醬蘭王溫泉蛋蛋漿混合埋魚子醬食，口感好絲滑帶點鹹香。刺身一品鯛魚刺身新鮮，肉質爽口。時令魚子醬生蠔法國生蠔新鮮，配上海鹽泡泡突出生蠔嘅鮮甜，用咗食用花同魚子做點綴。鐵板料理宮崎雞腿煎到外皮香脆，雞肉好嫩滑，一咬開好多肉汁爆出嚟好好食😋。另外一款揀咗美國安格斯牛肉薄燒卷，牛肉包住香蒜、蔥食落好香口。菊花豆腐白麵豉湯麵豉湯裏面有一絲絲豆腐好滑，湯底仲有塊花膠，吸晒湯嘅精華好入味。黑松露海鮮炒飯炒飯炒得粒粒分明好香黑松露味，三文魚子味道鹹香，仲有大量蟹子每食一啖飯都有卜卜脆嘅口感。時日甜品柚子雪芭清甜好解膩，好啱宜家夏天啲天氣食。…查看更多

今日收工同朋友喺中環搵食，之前聽同事講有間串燒店好好食，價錢唔算貴叫我得閒去試吓，今日終於有時間嚟食吓，餐廳幾有格調嘅串燒店，門面有日本居酒屋feel。墨魚滑紫菜大蝦將墨魚滑釀入大蝦，上面鋪紫菜，創意同味道兼備。海鮮方面，蒜蓉欖角燒蟶子（微辣）鮮甜彈牙，連埋粉絲、蔥、蒜一齊食，吊出蟶子嘅鮮味，味道濃郁。主食明太子忌廉烏冬creamy得嚟唔漏，明太子鹹香恰到好處。跟住嚟嘅燒雞心同鹽燒雞腿肉都係水準之上，雞心爽脆冇異味，雞腿肉嫩滑得嚟帶啲焦香。韓風燒牛肋肉肉味濃郁，燒得剛好唔會韌，好香牛味。首先上枱嘅係鹽燒西班牙五花腩，肥瘦均勻，咬落去油脂香爆出嚟，肉質唔會過韌。最驚喜係鹽燒雞皮，燒到脆到好似薯片咁，食落脆卜卜送酒一流！紫菜鵪鶉蛋卷好得意，紫菜包住流心鵪鶉蛋，一啖一粒味道出奇哋夾。焦糖菠蘿鵝肝多士係邪惡之選，鵝肝配上焦糖菠蘿同脆多士，口感豐富，鵝肝入口即融，有菠蘿中和咗油膩感。山椒鰻魚汁燒白鱔皮脆肉嫩，山椒香味好突出。最後以焦糖蛋糕三文治作結，甜而不膩，冰火交融嘅感覺好正，焦糖多士好香脆，好好食😋。…查看更多

活龍蝦份量十足，肉質爽口彈牙好新鮮，配埋龍蝦啲蝦膏一齊食味道濃郁，帶出龍蝦鮮味。前菜麻醬配上蕃茄仔同沙律菜，味道清新好開胃。是日精選刺身職員同我哋講解刺身嘅食用次序，由墨魚開始食起，之後再食尾長鯛、金木鯛、真鯛，由淡味再食到濃味嘅魚，刺身好新鮮有水準，每一款都好好食，印象最深刻係真鯛，魚肉好香濃就算食完，口腔都keep住真鯛嘅味道，好正😋。鵝肝多士外脆內軟，鵝肝香濃，配埋香脆多士嚟食好邪惡。活鮑魚煎得好香，唔會煮過龍啱啱好，肉質好淋帶點彈牙。牛肉薄燒包住香蒜粒、香蔥食落好香口，口感豐富。炒野菜係椰菜絲，蔬菜爽脆清甜。炒飯好有鑊氣，粒粒分明。最後飲埋昆布豆腐麵豉湯成餐飯好滿足。…查看更多

最近好想好想打邊爐，今日同屋企人嚟咗呢間蚊蚊豬老火鍋店，我聽朋友講餐廳係無限時任飲任食，如果想食到盡可以由5:30食到12:30都得😂，諗起平時放題限時90分鐘食到好趕急，呢到可以chill住慢慢食就覺得好爽。湯底我揀咗養顏雲南野菌好香菇菌味，湯底清甜仲有啲蟲草花同紅棗，感覺好養生，開始打邊爐前飲咗幾碗湯。估唔到火鍋店刺身三文魚好多油脂食落肥美，赤貝爽脆冇雪味，象拔蚌好爽口，牛肉控必點呢款牛肉拼盤，最鍾意食封門柳、極上牛肩嫩，牛味好濃郁雪花紋均勻，淥10幾秒食落仲有陣奶香，我哋encore咗幾碟😋。打邊爐點咗雞子同脆肉鯇，雞子大大粒夠飽滿，鯇魚片爽脆冇骨，炸饅頭啱啱炸起熱辣辣好正，點煉奶食好邪惡，臨尾仲有雪糕食好滿足。…查看更多