Cy li的个人专页

大埔官中活化之後一直都想入去參觀上個月左右見到門口有廣告牌有新餐廳開幕，上網睇環境同廣告相都唔錯，又近，咁一於book聖誕節試吓啦。一切都好興奮，大家對於呢啲活化既地方其實都好有興趣！入到去環境感覺都幾好～餐廳地方都大，坐得闊落，裝修靚。直到坐低，見到啲燈光就唔係好對路！俾啲射燈射到好辛苦！燈罩反而係裝飾嚟嘅！真新頴！侍應放低麵包同油醋～紙袋包裝好可愛～但一打開⋯⋯入邊濕晒，麵包又濕晒！！咁好明顯就係個麵包熱嘅時候放入個袋然後就成為又濕又軟既發水麵包啦，難食到一個點！(共2片，一片老公挑戰了，這片我只敢撕下一角試試）想食既布包芝士同炸芝都售罄咁就唯有叫青口，炭燒牛，2個pasta新鮮青口配椰香秘魯辣椒汁上面本來有2件包．已經比我地立即食咗，終於有2件脆包食吓。青口嫩滑不過．．青口太鹹．．食唔到醬汁味道Carbonara .. 之前青口太鹹，依個意粉就冇味、bacon 係唯一有味但．．口感似中式臘肉，實到一個點！伯爵茶牛面頰寛意粉雖然茶味不足，但牛肉軟香，牛油溶入意粉，加上花椒橄欖，味道尚可。炭燒安格斯封門牛柳薯條有雙倍的，只是食咗半先拍照。牛柳味道像袋鼠肉哈哈，比較乾瘦。飲品叫咗free flow 白酒和lemon teaFree flow只可紅/白酒二選一，不可中途轉！白酒更和茶一樣用玻璃jar refill…M…其實我飲緊乜嘢？！酒瓶都冇得睇？各菜式己有心理準備，如其他文章分享，份量偏細。餐廳後半場冇客就燈都冇開．．氣氛死寂！What a Christmas!2個人埋單$900…一齊講咗句：究竟我哋食咗啲乜？冇下次！…查看更多

太耐冇去日本好想食浜燒！知道呢條街都有幾間就同男友去睇吓。其中呢一間除咗裝修同同日本嗰啲好似之外，menu 選擇又夠多！咁一於食呢間啦！收工食飯第一時間梗係飲杯生啤先，呢度價錢都幾底飲$58 杯suntory! 爽，結果叫咗三杯！叫個蕃茄豆腐沙律開吓胃，豆腐嫩滑，蕃茄鮮甜，蔬菜都幾新鮮，加埋日本芝麻醬好夾。刺身壽司方面就叫咗本鮪盛盒，吞拿魚刺身都有三款，仲有三款壽司，一次過滿足晒所有願望。吞拿魚他他加埋蛋黃醬油味道即時變得又滑又多層次，感覺好似牛肉加咗雞蛋咁樣！鮮味出晒嚟！吞拿魚面肉真係未試過，味道濃郁肥美。海膽吞拿魚壽司，海膽新鮮唔鯹，全件壽司入口即溶好滿足。之後當然到戲肉甲羅燒同埋燒魷魚啦。甲羅燒我哋叫咗原味同黑松露味。原味食到蟹膏嘅鮮味，黑松露味味道濃郁，各有所長兩者都鍾意。蟹膏味道濃重自己覺得如果配埋飯團一齊食就Perfect！燒魷魚方面又估唔到咁大隻！侍應加上醬油一齊燒，燒嘅時候已經聞到味道非常香。剪開一望真係不得了，入邊仲要好厚肉！食落口外邊香，入邊依然魷魚嘅彈牙口感，海鮮味喺口入邊爆發！必叫！重點係我覺得呢間餐廳服務非常好，全程都有侍應幫你燒晒所有嘢食，飲住啤酒傾吓計就食得。想食浜燒嘅時候一定會再嚟！…查看更多

酒吧喺疫情之下無法營業，想搵間可以happy hour靜靜地傾吓計嘅地方都唔容易。朋友話之前去過呢一間都唔錯，就帶咗我去試吓。餐廳位於大廈一樓，全座大廈都經營食肆，但樓下宣傳不多，平日經過也沒有留意到呢。餐廳環境舒適，酒吧位置設計經典亮眼。餐桌同時具有高桌及矮桌可以選擇，矮桌方便今日着咗裙嘅我，值得一讚。happy hour 直到晚上9點，基本上晚餐時間都係Happy Hour價錢，抵！即刻同朋友叫返兩杯draft 1664爽一爽。食物方面有小食同主菜選擇，飲啤酒當然以小食為主啦，所以我哋就叫咗三款。鹽燒牛舌，有四件厚切，鹹香燶邊牛尾重，唔錯。酥炸生蠔，外脆內Juicy，生蠔依然保留creamy質感，配啤酒一流。炸魚薯條，炸魚比想像中厚身，而且肉質細嫩，薯條份量亦多，抵食。主菜叫咗香草茴香酒煮青口，呢個真係強烈推介！好耐都未食過青口可以咁creamy，嫩滑！廚師控制時間方面非常出色，並沒有將青口煮至橡膠狀態！而且蒜頭及其他香料用料多，味道豐富有層次！淨係青口同抵飲嘅啤酒已經絕對值得再一次光顧呀！…查看更多

工作關係成日都會去新加坡，天天、文華、文東記、全部都食過。幾個月因為疫情留喺香港，今日喺沙田見到天天雞飯，就坐低諗住食返新加坡嘅味道。侍應帶咗我哋去蛇王芬嗰邊坐，原來都係同一間嚟。叫咗一個雞飯同一個喇沙套餐，但留意套餐嘢飲都係要加錢嘅哈哈🤨然後坐咗20分鐘左右水都冇一杯，冇人理我哋。咁枱面呢個黐住啲毛嘅水壺係做乜嘅呢？原來應該係要食蛇王芬先至有茶嘅？！25分鐘左右，喇沙到！飲啖湯，味道係正常嘅，不過就唔夠熱！可能因為嘢食要喺另一邊廚房用餐車推出嚟，侍應好似仲拎錯咗過去天天嗰邊！因為之後黑T經理就鬧佢啦，大大聲話佢瞓醒未！食一隻花甲，又硬又臭完全唔新鮮。蝦呢就係霉既，肉質鬆散，冇蝦殼嗰啲雪藏蝦都好食過佢！炸豆卜又有油益味！然後到啲粉絲啦，完全黐實一大舊？！$108一個你俾啲咁樣嘅嘢我？之後雞飯終於到啦，明明唔係叫佢嘅輕量版，成$78但個正常版都成個兒童餐咁樣。雞好老都算啦，因為海南雞飯最重點係個飯，要加$5嘅油飯，仲硬過隔夜飯！仲要係完全唔夠熱！海南雞本身就係室溫，所以個飯一定要夠熱先至好食㗎嘛！乜事呀而家！我用電飯煲煮鹹雞飯都好食過呢個飯多多聲囉！問黑色衫經理想要2杯暖水，澎一聲放杯水俾我，仲要得一杯。仲有一杯咖啡豆花都仲未到，再問一問個經理啦，睇都冇睇就即刻答：整緊等陣！結果我哋失望地食完所有嘢後，杯嘢飲都冇到！大大聲鬧啲細嘅，但自己服務又差，對住其他客態度都唔好係想點先！由於伏味非常高，都係cut咗杯嘢飲走人算數！俾咗燒鵝嘅價錢，但食物同服務都係蔗渣！絕對絕對唔會再嚟！　…查看更多

之前試過呢一間嘅豬手非常出色，今日同男朋友又再一次嚟到呢度，今次一於試吓其他菜式。坐低叫杯啤酒，選擇返我最鍾意嘅IPA，因為味道比較濃郁。叫一個小食鬆脆香口配吓啤酒。呢度嘅避風塘魷魚鬚好惹味，仲要加埋薯片碎，極度邪惡但食唔停口。之後就到我哋要嘅兩樣主菜啦，低溫慢煮燒原隻美國野雞，雞嘅size唔算好大，啱一個人食。雖然話低溫慢煮，但食落其實同普通烤雞冇乜分別，比較驚喜嘅係雞殼入邊塞滿左雜菜同白胡椒。充滿雞味嘅雜菜味道豐富，同雞肉一齊食別有一番風味。12小時低溫慢煮烤乳豬件，同豬手完全唔同，可以用皮薄餡靚形容。外層烤得好脆，而且非常之薄，脂肪唔多食完唔會好油膩。乳豬嘅肉非常香酥嫩滑，慢煮的確係正。值得一讚嘅係配上嘅芥末籽蘋果燒汁，香甜醒胃，同乳豬好夾。食第二次嘅水準都係同之前一樣咁高，價錢又唔貴，絕對會再嚟。…查看更多

星期日一行四人，求其喺附近搵嘢食。呢間新嘅茶餐廳，見到佢都花咗幾多心思去裝修，就排隊拎枱試吓。叫咗佢午餐餐牌嘅四樣嘢，竟然四樣都非常地獄，難得一見！！！我嘅紅酒牛腩飯先上，真係不得了，監躉飯咁樣嘅賣相，一舊圓形嘅飯放一隻碟上面，然後求其放啲牛腩係側邊…味道方面簡直童年回憶返晒黎，係中學時代喺學校食飯嗰啲飯盒，10幾蚊一個嘅味道！唯一嘅差別就係啲汁唔係橙色咁樣！男朋友嘅越式豬肉飯更加係挑戰人體極限，好似沙嗲牛肉飯加隻蛋咁嘅樣！重點係嗰個沙嗲汁，咸到不得了！連飯食都頂唔順！真係地獄廚房當之無愧！好少浪費食物嘅佢都忍唔住要廚房換咗佢。星洲炒米叫正常少少，不過份量係人哋下午茶嘅大細。細佬食蜆肉天使麵，又跌入另一地獄，天使面超級淋，而且完全冇味！見到佢係咁落鹽同落胡椒粉…大廚嘅味覺係咪有事呢？到老竇嘅菜遠牛肉河，老竇話啲牛肉醃到完全冇晒味，鬆肉粉落得太多，佢話完全唔使𡁻…賣$58.個嘅午餐，四個人食咗二百幾蚊，得到嘅味道竟然係地獄嘅出品！完全連影張相嘅心情都冇！老闆竟然可以花咁多錢裝修，然後面對海寶一條街都係茶餐廳咁大嘅競爭底下，依然有勇氣比咁嘅食物出嚟，勁！但呢間野我哋一定唔會再有勇氣食，各位勇者如果想試一試地獄廚房的話，請挑戰！…查看更多

睇完套三個鐘既戲刺激又緊張，好肚餓之餘，又想搵個舒服啲嘅地方慢慢食可以傾吓剛才劇情。見到呢間嘅評價唔錯一於試吓。我哋選擇咗靜靜地既卡位，每個位仲有電視仔添喎！不過我哋都係傾計飲杯啤酒聽下頭先啲劇情先。鍋底我哋叫咗招牌和牛薈。材料比較似牛雜鍋，中間放左一大舊牛骨，令到湯底牛味越煮越濃郁。男朋友好滿呢個湯底，見佢偷偷地飲咗半碗。本地牛頸脊賣晒，佢哋話今日嘅邊爪都好好，不過我哋未食過邊爪，所以都係食返極品特級手切肥牛。啲雪花密集又夠均勻，煮3秒食得，入口即溶，脂香味濃郁，正！師傅仲送咗兩片本地邊爪我哋，肉味濃重，下次真係可以一試。三菇拼盤新鮮，絕對唔係放耐變軟身嗰種。鮮肥鵝腸肥美甘香！響鈴係廚房自己炸，可以點炸雲吞嘅甜酸汁食，夠晒脆口又大件。手打黑白墨魚丸，賣相好睇之餘，墨魚丸夠實淨爽彈，味道鮮，質素好高！總括嚟講呢間火鍋店食材高質，卡位都幾舒服，約朋友傾計食飯可以再嚟。…查看更多

今日等狗狗剪毛沖涼嘅時候，發現轉角位嘅餐廳又轉左手，睇睇個餐牌發現都幾吸引選擇都幾多，就等男朋友收工一齊去試吓。坐低發現雖然格局同之前差唔多，但燈光同座位就舒適咗。牆上亦有大投影電視，相信會有足球直播。生啤嘅選擇都幾多，價錢亦都適中。自己就鍾意ipa味道比較濃郁。男朋友嘅德國白啤亦相當爽口。先叫個小食送下酒，避風塘椒鹽魷魚鬚，夠晒香口邪惡，小小辣夠惹味。酒吧餐廳當然亦都要試吓佢哋嘅漢堡同薯條啦。安格斯牛肉煎蛋芝士煙肉漢堡，分量夠晒大，女仔食一份嘅話應該唔使食其他嘢。牛肉夠多汁，煎蛋依然流心，出色。主菜我哋就叫咗德國鹹豬手，一切落去就知冇叫錯，卡卡聲超脆！而且裏面嘅肉冇一般咁咸，而且比較軟熟。男朋友超級鍾意，話呢一隻係佢食過最好食嘅豬手，比好幾間傳統德國餐廳更好食！佢話以後唔使出尖沙咀d德國餐廳食啦🤣唯一失色嘅係旁邊嘅椰菜比較酸，估計係使用來貨而唔係自己整。總括嚟講呢間餐廳食物質素高，價錢又唔貴，想飲啤酒食豬手嘅話，我哋都會首選呢度！…查看更多

成班朋友聚餐，大家都諗唔到食乜嘢，咁就一於食放題啦～之前食過呢間都唔錯就一於book定呢一間。刺身當然就係放題必叫㗎啦，一上枱大家都非常驚喜，分量十足，賣相靚仔而且相當新鮮。另外仲有生蠔同埋海膽，未影相已經俾人食咗幾隻。海膽真係必食，creamy鮮甜又唔腥!配爽脆嘅青瓜真係好夾。我記得我只係點左一份嘅炒蜆，上枱大家都再嘩～一聲，因為超級大碟！朋友話：「仲正過出邊大排檔嗰啲喎，呢度超過一斤蜆啊！」其實由侍應拎住由廚房出嚟嘅時候，大家已經話好吸引，因為出晒煙好夠鑊氣。味道果然不負眾望，蜆肉新鮮又入晒味，醬汁香濃惹味！飲埋罐韓國啤酒真係夾到爆！日式芝麻雞翼，外脆內juicy，食得出即叫即炸！馬拉盞通菜，上邊除咗有炸蒜頭之外竟然仲有蝦皮，落足料！夠晒香口，我自己一個食晒一碟自私食🤣另外天婦羅都唔錯，都係即叫即炸，皮又剛剛好唔會太厚。甜品方面任食嘅有維記雪米糍同埋雪條～另外原來仲有更加高質素嘅韓國雪條喺門口，走嘅時候一人有一條！結果大家都捧住個肚走🤣呢間放題食物質素高份量足，選擇又夠多！朋友聚餐適合不過。…查看更多

踩單車踩到大埔區搵食，去到呢頭遇到呢間山城，見到餐牌就勁想食個擔擔面，我哋都好肚餓，就叫咗個紅燒肥腸面、擔擔面、紅油抄手、手拍青瓜、蒜泥白肉、手絲雞、口水雞翼、尖椒皮蛋。先嚟個蒜泥白肉，肥瘦均勻，肉爽又夾埋啲麻辣辣椒粒，味道不錯。擔擔面好大碗，搞勻個湯連埋肉碎一齊飲啖，係呢種感覺喇！微微嘅辣加埋麻醬嘅香味同黏度，味道值得一讚。另外試咗朋友碗肥腸面，大腸砌成一口小粒，都幾入味。紅油抄手，極度推薦，抄手嘅皮入口有好滑溜舒服嘅感覺，内餡嘅肉碎好香又嫩口。手絲雞同雞翼都係肉爽，配支啤酒真一流。手拍青瓜好大碟，清爽夠凍。尖椒同皮蛋分開上，但因為尖椒砌成片狀，將佢夾埋啲皮蛋食，口中充滿又有蛋黃黏黏感覺又有尖椒嘅爽脆感覺，正。其實我想講呢度抵食指數極高，都係二百零蚊，味道又滿足到我，就係因為咁，將一日燃燒咗嘅脂肪重新補充，哈哈。…查看更多

放工約朋友去尖沙咀飲嘢食宵夜吹下水。突然之間好想食日本燒蟹蓋，搵到呢間係附近又未食過就一齊上去試下。唔好講咁多即刻叫杯啤酒先，雖然佢得一款生啤，但價錢又幾平。一杯細嘅都係$39，大杯到好似個頭咁嘅都係$88！咁當然叫杯大嘅爽下啦。然後我哋就叫咗幾個小食一邊飲嘢傾計一邊送吓酒。浜燒蟹蓋&浜燒三色蟹蓋雖然就唔係好似日本咁有個火爐自己燒，但都會見到火爐喺餐廳嘅一邊燒緊自己嘅蟹蓋，依然令人滿心期待。蟹蓋入面除咗蟹膏之外仲有滿滿嘅蟹肉同蛋黃。攪勻一齊食，蟹味大爆發！而且味道冇一般蟹蓋嘅通病：太鹹！呢度嘅蟹蓋味道剛剛好。朋友嘅三色蟹蓋都好靚仔，佢話加咗海膽之後味道更加鮮。牡丹蝦刺身，肉質新鮮，味道甜美。飲酒又點會少得燒物呢，明太子牛油燒烏賊鬚，魷魚鬚夠爽脆不靱，加咗明太子牛油去燒更加鹹香。燒雞軟骨，燒夠乾身，做到好似炸出嚟咁香口，結果另外要叫多兩串。呢間餐廳雖然地方唔大但坐得幾舒服。每一種食物都有水準，嘢飲價錢合理，不失為同朋友飲嘢傾計食嘢嘅好地方。…查看更多

一段時間冇去尖沙咀，發現美麗華入邊嘅鋪頭轉晒，都幾多嘢行。新開嘅食肆都好多選擇，行過呢間喺新加坡拎過米之蓮一星嘅餐廳，食福建菜幾特別就排隊試吓。等左十幾分鐘就有位，有一碟酸菜做前菜，鹹鹹酸酸幾開胃。餐廳做緊海蠣節推廣，188可以揀兩款用生蠔整嘅餸。我哋叫咗江口家鄉海蠣湯同九層塔香燜海蠣。湯即係番茄蛋芫荽生蠔湯，出奇地一啲都唔腥，生蠔好鮮甜，唔錯。薑蔥燜蠔改咗用金不換，又幾出色，香氣十足，雖然生蠔細細隻，但味道又惹味蠔肉飽滿，出色。百秒黃花魚，名副其實師傅功夫菜，黃花魚滑到不得了，煮嘅時間非常準確。鍾意食魚嘅男朋友食唔停口。興化米粉，係好幼細嘅米粉好似台灣早餐店炒米粉。但呢一個係豪華版，入邊有好多海鮮好似蝦，蜆，元貝等等，值得一試。酥炒芋芯，芋頭夠粉，外面糖漿落得剛剛好，唔會一大層死甜，反而多咗一種香脆。另外值得一提嘅係茶都同外邊唔一樣，問侍應先知今日我哋飲嘅徐杞子菊花茶，養目安神！總括嚟講呢間店舖菜式有特色，下次會再嚟試吓其他嘢先。…查看更多

朋友移民之前就已經帶我品嚐過呢一間米之蓮推介四川菜，水準非常高。今日同男朋友路過中環，一於食過返尋味。去到就嚇親點解會圍哂板？唔通？？立即上網搵一搵，發現好在只係搬咗舖，而且係行上一條斜路咁近啫。新店環境比較開掦，陽光照射到店內嘅藝術品，令藝術館餐廳感覺更有生氣。我哋叫咗set lunch B, 前菜有口水雞同滋味冬瓜球。冬瓜球上枱嘅時候我同男朋友都好驚奇，白雪雪珍珠咁究竟會係乜嘢味道嘅呢！原來係平時嘅酸甜青瓜蘿蔔製法，但就換上冬瓜！冬瓜比青瓜同蘿蔔更加甜美入味，醒神開胃。食一件口水雞，男朋友立即叫好！佢話未食過咁入味嘅口水雞。雞件完全去骨，雞皮都做到爽脆啫喱狀，出色。例湯好足料，有白菜菌類雞蛋等等。雖然清淡，但味道就好有住家菜嘅感覺，完全冇味精。飲完湯就有三個餸食，芙蓉三寶，入面有三種海鮮包括蝦鮑魚片同帶子，係海鮮版嘅賽螃蟹。蛋白炒得夠滑，味道鮮美，分量十足，正好中和下另外兩道菜既辣度。招牌大千雞球，一睇就知道非常惹味，尖椒麻椒落得重手，夠晒刺激。雞球大大件，內裏保持juicy。干扁四季豆炒得夠香又夠辣，重點係兩味餸都唔會太過油，食到最尾碟上面都唔會有一大碟油嘅出現！師傅控制得非常好呢。食飽飽嘅時候，侍應話Like佢哋嘅Facebook仲有甜品～今日係雪耳木瓜糖水，清甜滋潤又解辣。雖然以午餐來講價錢唔平，但可以食到咁有水準嘅四川菜絕對值得！…查看更多

好耐之係呢間火鍋店舊鋪常客，由細舖得幾張摺檯，食到佢變大舖。不過之後雞煲越開越多，而人都係貪新忘舊，結果好耐都冇再食。最近知道佢喺銅鑼灣開咗分店，隔咗咁多年，一於試吓而家咩質素先。首先同男朋友叫咗啲餐前小食送啤酒傾吓計，涼拌萵筍，燒牛舌心，雞皮，同埋內蒙羊肉串。最值得推介嘅竟然係羊肉串，香羶惹味，必叫。同以前舊舖唔同，呢度有生啤，而且有三款選擇，正！之我哋叫咗隨便麻辣湯雞煲（中辣），同一般炒上嘅雞煲唔同，一上枱佢已經充滿麻辣湯汁，好香麻辣味，唔係一般帶甜嗰一種雞煲。配料落得重手，估計有成個洋蔥。雞煲用嘅瓦煲好保溫，所以建議大家盡快食咗雞先再打邊爐。因為我哋之後轉細火佢都係好滾，我同男朋友慢慢食結果最後啲雞係老左少少。而且中辣男朋友都頂唔順，食到咁上下要將所有辣椒拎起。x仔米線男朋友食三小辣，我食特辣，所以我覺得辣得好爽超級正！比好多重慶麻辣火鍋更刺激！火鍋配料方面，頂級手切牛頸脊（大）雪花均勻，入口即溶，而且師傅刀工好好，每一件都係雙飛切法，值得一讚。有膏鵝腸肥美甘香即炸響鈴，上枱都仲係熱嘅，味道非一般來貨可比。可惜我哋叫咗有湯嘅雞煲，如果係可以點乾炒嘅汁就更加正。雲吞王都唔錯，每一啖都食到爽口蝦肉。咁多年之後食返呢一間雞煲，結果都冇令我失望！埋單嘅時候發現宵夜有85折，下次約埋食得辣嘅朋友一齊再嚟爽一爽先。…查看更多

火鍋揀咗麻辣同杏汁豬肺鴛鴦湯底，麻辣味啱啱好唔會太麻，而且湯中仲有豬皮豬紅支竹，絕配；那邊廂飲咗幾啖豬肺湯感覺幾潤又夠味，豬肺白雪雪都洗得幾乾淨。安格斯剩係睇圖都唔洗解釋咁多，油脂分佈靚仔，8秒就入口即溶。肥鵝腸明顯新鮮肥美，如果鍾意食肥真係啱晒，而且真係每一條都爽脆彈牙，最正係夾埋啲豉油芫荽䓤一齊食，極之重口味。響鈴雖然我食嘅唔係即炸，但用料豐富，唔會散收收，鎖水力十足。韭菜餃外觀飽滿靚仔，肉汁鮮美，整體味道不過不失，如果內餡中有蝦就更加豐富啦。手打丸我哋揀咗雙拼墨丸同芥末墨丸，兩者都同一彈牙爽口，而且內裏有墨魚粒，增加口感，至於芥末味嘅就係多一添新意，感覺都唔錯，又唔會太辣。呢餐的確係用咗良心食材，靚料之餘又乾淨，所以先話係真材實料。…查看更多