咖喱榮 (已結業)

嚟到澳门梗系行到边食到边，咁啱经过呢间咖喱荣见佢一串一串好似麻辣烫咁，好吸引，点知拣完嘢食畀钱𠮶阵先知中伏。点咗生肠、牛柏叶、山根、萝卜、尤鱼同一兜细牛杂，竟然索价$150！！！未试过食几串街边嘢食到咁贵，睇返餐牌，尤鱼竟然要$60！我哋呢啲平民食平民嘢畀开平民价钱，成间嘢真系太贵太高级！佢味道系冇问题嘅，都系将材料烫熟然后加咖喱汁，咖喱汁少少辣，萝卜都煮得算入味，牛杂中规中矩，牛肚好多，其他部位较少，但啱晒只系想过下口瘾嘅我。食到最后本来都只系觉得太贵下次都唔会再嚟，当我食到最后发觉点解我只系食咗一旧牛柏叶，以为男朋友咁衰自己食晒，一问之下，佢话佢都系食咗一旧咋！究竟消失的牛柏叶去咗边度呢？