2019港澳米芝莲总结 蜜斗老板:我好想承传香港嘅食物
2018-12-12

嚟到第11届嘅港澳米芝莲指南,香港有63间餐厅获星,而澳门就有19间。当中有9间餐厅新上榜,更有3间餐厅成功升级。而车胎人美食推介则有4间餐厅新上榜,当中包括只系啱啱开咗三个几月嘅台湾妈妈吃什麽,至於街头小食则共有7间餐厅首次入围,例如重新装修嘅公和荳品厂、今年先开业嘅榴槤乐园同蜜斗。

《米芝莲指南香港澳门2018》最新收录一览
             香港         澳门
三星       7  (1升级) 3(1升级)
二星       12 (新x2) 5(新x1)
一星       44 (新x6) 11
车胎人    71 (新x4) 9
街头小食 22(新x5) 10(新x2)

发布会同上年一样,都系假澳门新濠天地举行,各大传媒、餐饮业界、大厨等都有出席,场面热闹,部分餐厅获奬时更传出阵阵欢呼呐喊之声。

发布会完结後,开饭仔都同几位新入围或升级嘅大厨倾咗几句,佢哋嘅心情都系非常兴奋。

【香港米芝莲三星餐厅(由二星升级):中环高质法国菜Caprice

主厨Guillaume Galliot: 「我好兴奋。我冇谂过可以获奬,因为我只系加入咗Caprice大约年半嘅时间,我们组织咗一个好强嘅团队。通常要用比年半更多嘅时间先可以得到呢个成就。但我们喺年半内就做到喇。所以我们都真系非常高兴。」

【澳门米芝莲三星餐厅(由二星升级):精美点心 誉珑轩

行政总厨欧阳文彦:「而家感觉好兴奋好奇妙,之前都冇谂过可以升多一级。呢个奬对我哋餐饮业嚟计个个都梦寐以求嘅,得到其他所有人嘅认同,证明间餐厅嘅出品、佢嘅质素,同客人嚟到嘅满足度。我哋餐厅开咗好耐,而家系餐厅最高殊荣,亦系我人生烹饪生涯嘅最高峰。

客人每次嚟好开心好满足咁去惠顾我哋嘅餐厅,呢一点我觉得好重要。我哋而家用紧嘅食材,全部都系用最新鲜、最时令嘅。例如我哋嘅 小笼包,用日本嘅毛蟹,佢嘅鲜味同小笼包嘅汤汁出嚟嘅效果系最好、最鲜味。」

【香港米芝莲二星餐厅(首年入围):东京三星寿司名店 鮨.斋藤

香港店主理人小林郁哉:「我哋成个团队好高兴可以拎到两星。今年拎两星系一件好荣幸嘅事,因为餐厅只系开咗8个月,希望出年可以有更好嘅成绩。虽然东京嗰边嘅餐厅有三星,但斋藤考司san都系冇畀任何压力我哋香港嘅团队。而且佢哋嗰边都系开业第一年得到一星,然後逐年升级,但香港店第一年就拎到二星,系一件好兴奋嘅事。我谂对自己、对斋藤考司嚟讲,最紧要系每个客嚟到餐厅系一个开心嘅体验,呢样嘢比拎到几多粒星更加重要。」

另外,开饭仔亦即时同咗部分新入围车胎人同街头小食嘅餐厅负责人做个访问,佢哋表示事前全不知情,所以感觉惊喜。

【香港米芝莲新入围街头小食:上环冇味精车仔面  蜜斗

老板Connie:「我哋4月开舖到而家,其实每一步都喺度进步,因为我不停咁改食谱,改到自己可以日日落去食。一定要冇味精,因为好多人味精敏感,会瞓唔着觉,好多喺中环区嘅外籍人都有同样情况,但唔落味精又要好食真系好难,但总算做到。

我系香港人,要传承香港嘅嘢,车仔面系香港嘅代表,我好想承传香港嘅食物,但同时要同现代人嘅健康概念接轨。」

【香港米芝莲新入围街头小食:榴槤小食店 榴槤乐园

老板Nicole:「收到消息嘅时候觉得好开心好荣幸。最想感谢身边嘅朋友同一直支持我哋嘅食客。

开心嘅原因系我哋可以将自己锺意嘅榴槤同大家一齐分享,听到有客人话喺舖头卖嘅即开榴槤价钱同马来西亚差唔多,令大家开心就系我哋最大嘅动力,亦系舖头嘅宗旨:希望可以成为香港各位榴槤迷嘅乐园!」

【香港米芝莲新入围街头小食:翻新後的老字号 公和荳品厂

 (资料图片)

负责人苏小姐:「获得推荐都开心嘅,因为系饮食业界嘅肯定。上年冇提名,今年重新装修後再上返榜都开心。可能系多咗朋友关心香港传统小食同行业啦。

其实装修完後,都有街坊惊质素有变,而家就可以证明畀大家睇,我哋经过翻新、重新出牌後,都keep到以往水准,保持到质素。」

【香港米芝莲新入围车胎人美食:台湾妈妈  吃什麽

主理人Tracy 及Grace:「其实很开心,也很意外,从开舖到现在只是三个多月。能够再次得到这个殊荣,其实不只是我们,我们整个团队都很开心。今天(昨天)下午记者通知我们,我们才知道。大家都很意外,很SURPRISE。

这是对整个团队的肯定,因为很多人都知道我们之前发生了一些不好的事情,我们这个团队,其实从以前旧店到现在,大家都在一起共同成长,对整个团队来说,这是个很正面的鼓舞。」


2019米芝莲相关文章
2019及历届米芝莲香港澳门指南完全版
香港米芝莲2019!新上榜餐厅逐间睇


文:Kar
相、片:Tom Li


关键字
米芝莲
香港
澳门
2019
中环
深水埗
尖沙咀
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起