食足一日!澳门5大小食推介 首选阿华田脆脆芝士西多(有片)
2018-03-26

有时想离开下香港,出去玩下hea下,但又唔系成日都有咁多假,去唔得远。就咁搵个weekend过一过大海,嚟个短短地嘅全日美食团都唔错。之但系,唔通次次过到去都系食葡挞同猪扒包咩?介绍多几间特色餐厅过你哋啦。

限定士多啤梨卷蛋  尚堂

新开咗个零月嘅甜品店,有几款新店限定嘅果昔系列同福冈甜王草莓卷蛋,系水坑尾嗰间冇㗎!士多啤梨卷蛋个样好靓,仲有半粒士多啤梨喺中间,佢心心样时女生亦心心眼。甜甜地,多少少cream都唔紧要啦,过得嚟澳门都系预咗食食食㗎啦~ 至於果昔,呢杯花花世界无论卖相定味道都好吸引,系蓝莓草莓蔓越莓明治鲜奶嚟,咁多种莓,饮落蓝莓味最重,同埋有沙冰粒粒感觉,唔错。

阿华田脆脆芝士西多   马庆康南天咖啡室

嚟呢间食嘅话,唔使谂,一份阿华田脆脆芝士西多,加多支樽仔奶茶。西多本身已经够devil,呢个华田西多,就简直系devil之中嘅devil!啲华田脆脆粒舖满成个两层厚嘅西多面,有大嚿牛油慢慢溶紧,切开中间,Oh no,仲要有啲半溶芝士唧紧出嚟,芝士嘅咸香正好中和返华田嘅甜,仲有微微花生酱嘅味道。樽仔奶茶就茶味比奶味重啦,唔会话太甜。

葱花鸡蛋肠    伦记软滑肠粉

伦记个老板,以前做中菜出身嘅,5年前自己研发咗呢种加蛋制作滑肠粉嘅秘方,就一直做到今日。佢啲肠粉,真心滑,而且个样仲好靓。即叫即拉嘅葱花鸡蛋肠粉,用咗两只鸡蛋去整,最後再撒啲葱花上去,就算咩酱都唔加,就咁食都好香口。但当然,甜酱麻酱辣酱都加晒就更加开心啦。

宇治抹茶麻糬鸡蛋仔    铁饼号

去到澳门都要食鸡蛋仔?系呀,呢间出名呀,出名在佢啲鸡蛋仔可以加麻糬粒粒、oreo或者朱古力粒,另有13种口味任拣配搭。睇住佢整宇治抹茶麻糬粒粒鸡蛋仔,淋完抹茶浆之後,就逐粒逐粒麻糬加喺面,都分布得几平均。食嗰阵,仲可以拉到丝,系几治癒,虽然唔算话好烟韧,但都有啲咬口嘅,抹茶味淡淡地,但有啲美中不足系底鸡蛋仔略嫌腍身咗少少,影一两张相好快啲食。

黄金虾饼吐司  Foodie

呢间舖喺IG都吸引咗唔少foodie去打卡,舖头主要做各式嘅厚多士嘅。望匀啲餐牌,最吸引似乎系黄金虾饼吐司,系呀黄金呀,咸蛋呀,2018年年度最佳百搭食材呀。斋睇个卖相系几呃like嘅,一粒粒橙黄色嘅咸蛋黄,好似随时准备跌嘅样,仲有煎虾饼同沙律菜,好丰富。不过食落就同期望有啲落差,烘过嘅面包都唔算太脆,虾饼亦较乾身,但无可否认,咸蛋系发挥到佢嘅本分嘅,救返唔少分。


文:Kar
相、片:Kar、Cathy

关键字
澳门
小食
芝士
抹茶
甜品
澳门味道
由澳门小编提供各种饮食情报,从游客推介到在地美味都一网打尽。
餐厅资料
更多
收起
本月热门
【优秀开饭热店大赏2021】至尊大奖 排队热店阿木台湾面 台女家传牛肉面发扬光大
2021-05-28