万众期待嘅美国过江龙The Cheesecake Factory终於於澳门试业，澳门嘅朋友唔使过大海就食到啦！餐厅位於澳门金沙城中心，占地8500多尺，除咗有4款新菜式外，仲供应澳门独家嘅葡式烧鸡啊。
葡式烧鸡(澳门限定)($218)
去澳门又点可以唔食葡国鸡，呢味葡式烧鸡融合咗澳门及美国特色，酱汁混合咗香甜嘅椰香咖喱同微辣嘅花生酱。烧鸡鲜嫩多汁，配菜脆薯仔同热熔芝士都好有惊喜。菜式系澳门限定，想食就一定要过嚟食啦。
而澳门分店试业期间亦推出四款新菜式，分别系香脆椰菜仔、墨西哥活力早餐夹饼、泰式椰香青柠鸡肉及香脆鸡肉虾配菠萝，迟啲亦会於香港店供应！
香脆椰菜仔($98)
椰菜仔炸得香脆，微微带苦涩味，加上烟肉粒同枫糖牛油酱汁，咸甜苦嘅味道会越食越开胃同上瘾。
墨西哥活力早餐夹饼($148)
菜式灵感来自经典的西班牙香肠薯仔墨西哥夹饼，以墨西哥软玉米饼夹住芝士炒鸡蛋同鸡肉肠，加上芫茜、墨西哥烟燻辣椒同莎莎酱，味道好丰富～配埋黑豆、牛油果酱或酸忌廉食仲无咁腻添。
泰式椰香青柠鸡肉($158)、香脆鸡肉虾配菠萝($158)
今次仲特意推出两款有东南亚特色嘅饭类，泰式椰香青柠鸡肉酱汁以芒果、姜、蒜及乾葱制成，充满香料味道，好有异国feel啊～而香脆鸡肉虾配菠萝嘅甜酸汁微微带辣，又几开胃。
除咗新菜式，餐厅当然有得食一系列嘅招牌菜，份份都好有份量，最後当然要拣返个Cake食啦！
Luau夏威夷盛宴沙律($228)
餐厅招牌沙律之一，包括沙律菜、菠萝、青瓜、红黄甜椒、四季豆、萝卜及洋葱，加埋烤鸡胸肉同香脆馄饨皮，最後洒上夏威夷果仁、花生同芝麻增添口感，捞埋油醋汁，好味又健康！
牛油果脆卷($158)
牛油果脆卷酿咗满满嘅牛油果蓉 、加埋番茄乾、红洋葱和芫茜，以春卷皮包裹後炸至香脆，牛油果迷必试！
马德拉酒鸡肉($268)
呢味系餐厅另一人气鸡肉菜式，香煎鸡胸肉配上鲜芦笋同微微溶化嘅芝士，淋上鲜蘑菇马德拉甜酒汁，配菜薯蓉都好香滑啊！
地址: 路氹城金光大道第五至六地段金沙城中心2楼2203D&E号舖
文、相: Yanica